1. ¿Imanotaj waquincuna ricacärin runacunata yachachiptin? (Fotutapis ricay).

 TAYTANCHI Jehovata cuyashpanchi runacunata yachachinchi y munanchi Jehovata shumaj reguinanpaj. Waquincunaga cushicärinmi runacunata yachachicur, pero waquincuna manami. ¿Imanir? Waquincunaga quiquincunaman yäracunchu y pengacunmi estudiado runacunawan parlananpaj. Juccunataga manami gustanchu jäpa runacunawan parlayta. Y waquincunaga manchacunmi runacuna mana chasquinanta yarpar y piwanpis rimanacuyta munanchu. Paycuna Jehovata alapa cuyaptinpis öraga sasaman ticracurin jäpa runacunata Bibliapita parlapänanpaj. Chayno captinpis valurcharcärin cada cadala predicananpaj. Chayta ricaycur Jehovaga paycunapita alapachi cushicun.

2. Runacunata yachachicur mana cushicuptiquega, ¿imanirtaj guelanäcunquimanchu?

² Y gamga, ¿cushicunquichu runacunata yachachicur? Chayno mana captenga, ama guelanäcuychu. Capaz humilde cayta munarchi öraga manchacunqui waquincunawan parlanayquipaj o rimanacuymanpis mana chayanayquipaj. Runacunata yanapayta munaycaptiqui mana chasquishuptiquega laquicunquichi. Pero Taytayqui Jehovaga ricaycanmi imano sienticushgayquita, y yanapäshunayquitapis munan (Is. 41:13). Cay yachachicuycho ricärishun imacunata rurashwan mana manchacunapaj y runacunata yachachicur cushishga caycänapaj.

 DIOSPA PALABRAN CALPATA GOSHUNQUI

3. ¿Maypitataj Jeremías calpata tarergan predicananpaj?

³ Diospa Palabranga sirvejnincunata yanapashga chasquishgan carguncuna sasa captinpis cumplinanpaj. Yarpachacushun profeta Jeremías imano sienticushganman. Payta Jehová mandargan predicananpaj, pero Jeremías manchacur cayno nergan: “Noqaqa mözularaq kar rimaytapis mana kamäpakütsu” (Jer. 1:6). ¿Imataj yanapargan manana manchacunanpaj? Diospa Palabran calpata gorgan. Chaymi Jehovata cayno nergan: “Wilakuyniki shonqücho nina rupaykaqnömi rikakushqa. Tulüyaqmi tsay rupashqan chayaykushqa” (Jer. 20:8, 9). Jeremías runacunata predicananpaj alapa sasa captinpis, payga yarpachacurgan imata wilacunanpaj cajman, chayga calpata gorgan cargunta cumplinanpaj.

4. ¿Imataj pasanga Diospa Palabranta leiptinchi y leishganchiman yarpachacuptinchi? (Colosenses 1:9, 10).

⁴ Noganchitapis Diospa Palabran calpata gomanchi. Colosas cristianucunata cartacamur apóstol Pablo nergan Diosta ali reguishganchimi yanapämanchi pay munashganno cawanapaj y imaypis alilata ruranapaj (leiriy Colosenses 1:9, 10). Y runacunata Diospita yachacherga alicunata ruraycanchi. Chauraga Diospa Palabranta leiptinchi y leishganchiman yarpachacuptinchega Jehovaman masraj yäracushun, y shumaj tantiashwan imanir calpachacunanchi Diospa Gobiernunpita runacunata yachachinapaj.

5. ¿Imataj yanapämäshun Bibliapita shumaj yachacunapaj?

⁵ Diospa Palabranpita shumaj yachacunayquipäga rasla ni janan jananla leinquimanchu. ¿Imataj ruranquiman juc textuta leir shumaj mana tantiaptiquega? Alimi canman Índice de las publicaciones Watch Tower o la Guía de estudio para los testigos de Jehová nishgancho chay versiculupita maslata tantiachicushganta ashinayquipaj. Tiempuyquita raquiptiqui shumaj yachacunayquipaj Diospa Palabranman masraj yäracunqui (1 Tes. 5:21). Y Bibliaman masraj yäracurga, yachacushgayquipita waquincunatapis cushi cushila parlapanqui.

RUNACUNATA YACHACHICUNAYQUIPAJ ALI PREPARACUY

6. ¿Imanirtaj aliraj preparacunanchi predicaciunman yargunapaj?

⁶ Predicaciunpaj preparacuptiquega runacunawan mana manchacuypa shacya  shacyala parlapacunqui. Jesusga discipuluncunata shumajraj yachachergan imata ninanpaj predicaciunman cachaycunanpaj (Luc. 10:1-11). Y Jesús lapan nishgancunata cäsucushganpita, lapan discipuluncunaga cushishga cutimurgan runacunata yachachicur aywashganpita (Luc. 10:17).

7. ¿Imanotaj preparacushwan runacunata yachachinapaj? (Fotutapis ricay).

⁷ ¿Imanotaj preparacushwan runacunata yachachicunapaj? Yarpachacunanchi quiquinchi tantiashganchilapita imano Bibliapita runacunata parlapänapaj. Jina yarpachacushwan imata ninapaj runacuna ocupado caycaptin o chasquimänanchita mana munaptin. Chayta ruraptinchega paycunawan cushishga y shacya shacyala parlapacushwan.

8. ¿Imanirtaj ninchi Diospa sirvejnincunaga mitu manca japuyno cashganta?

⁸ Apóstol Pablo predicaciunpita parlar nergan chayga “mitu mankacho pasaypa väliq riquëza kaykaqnömi” caycan (2 Cor. 4:7). Diospa Gobiernunpita runacunata yachachicuyga tincunmi valej riquezawan, y chaywanga runacunapa cawaynintapis salvanchi (2 Cor. 4:1). Y mitu manca japuyga caycanchi Diospa sirvejnincuna. Apóstol Pablo cawashgan wichan negocianticuna mitu mancacunacho churapäcoj cargan más alinnin caj micuycuna, vino o guellaytapis. Canan wichanpis Jehovaga juc valej carguta gomashcanchi, chayga caycan: ali wilacuyta yachachicunapaj. Diosninchega calpatami gomanchi, chasquishganchi carguta imanopapis ali cumplinapaj.

DIOSTA MAÑACUY VALURTA GOYCUSHUNAYQUIPAJ

9. ¿Imataj rurashwan runacunata mana manchacunapaj? (Fotutapis ricay).

⁹ ¿Imatataj rurashwan runacuna mana chasquimänanchita yarpar o manchacuycarga? Yarpachacushun Jesuspa apostulnincuna imata rurashganta runacuna michaptin manana predicananpaj. Paycuna manchacunanpaj trucan, Jehovata mañacärergan yanapänanpaj “mana mantsakuypa” yachachicunanpaj. Y mañacuyninta usharcuptinmi Jehová jucla contestargan (Hech. 4:18, 29, 31). Chauraga runacunata manchacuycarga, Jehovata mañacushun yanapämänanchipaj. Chayta rurarga runa masinchita cuyashpan valurcharcushun mana manchacuypa yachachicunapaj.

10. ¿Ima yanapacuycunataj caycan chasquishganchi cargunchita cumplinapaj? (Isaías 43:10-12).

 ¹⁰ Noganchega Jehovapa testiguncuna canchi (leiriy Isaías 43:10-12). Y payga aunimanchi yanapämänanchipaj mana manchacunapaj. Yarparcushun imanotaj chayta ruran. Juc, runacunata yachachiptinchi Jesús noganchiwan caycan (Mat. 28:18-20). Ishcay, Jehovapa angelnincunapis listo caycan yanapämänanchipaj (Apoc. 14:6). Quimsa, Jehovaga espíritu santunwan yarpächimanchi imata yachacushganchita (Juan 14:25, 26). Y chuscu, Jehovaga gomashcanchi hermanunchicunatapis yanagämänanchipaj. Chauraga ama gongashunchu Jehová y hermanunchicunapis noganchiwan caycashganta, chayta musyar manchacuyninchipis ilacangami.

RUNACUNA MUNASHGAN HORACHO CUSHISHGA YACHACHICUY

11. ¿Imataj ruranquiman Diospita yachachicur más runacunata tarinayquipaj? (Fotutapis ricay).

¹¹ Juc ishcay runacunalata wasincho tarerga, ¿guelanäcunquichu? Chayno captenga tapucuy: “¿Maychoraj chay hora paycuna carcaycan? ¿Rantipacojchuraj aywashga o trabajunchochuraj caycan?” (Hech. 16:13). Chauraga alichi canman callicunacho o juc horacunachopis yachachicunayquipaj. Joshua cristianuga cayno nin: “Jatun negociucunapita yarguycajcunata y achca runacuna caycashgancunacho yachachicuyga alimi cashga”. Joshua y warmin Bridget, runacunata wasincho más tarergan tardipaypa y domingucuna tardipaypapis yachachicur aywaptin (Efes. 5:15, 16).

12. ¿Imataj rurashwan musyanapaj runacuna imaman creishganta o imapita parlayta munashgantapis?

¹² Runacuna shumaj wiyayta mana munaptenga, yarpachacushun imacunapita parlayta munashganta y imacunapaj yarpachacushgantapis. Joshua y warminga trataducunapa garancho caycaj tapucuypitami runacunawan parlar galaycun. ¿Ima ninquimanraj Bibliapita? nishgan tratadupita parlayta galaycuptin cayno nipäcun: “Waquincunaga yäracärin Biblia Diospita shamushganta y waquincunaga mana. Y gamga, ¿ima ninquitaj?”. Chayta rurarshi öraga waquincunawan shacyala parlapäcun.

13. ¿Imanirtaj predicaciuncho pipis mana wiyamaptinchipis cushicushun? (Proverbios 27:11).

 ¹³ Runacuna mana wiyamaptinchipis, chasquishganchi carguta ali cumplinanchi. Jehovawan Jesusga munan runacunata yachachicunapaj (Hech. 10:42). Chauraga predicaciuncho piwanpis mana parlaptinchi o mana wiyamaptinchipis, Jehová gomashcanchi carguta cumplicuycashganchita musyar cushicushun (leiriy Proverbios 27:11).

14. ¿Imanotaj ricacunchi predicaciuncho pilapis tariptin Bibliapita pipis yachacuyta munaycajta?

¹⁴ Pipis predicaciuncho tariptin pilapis Bibliapita yachacuyta munashganta lapanchi cushicunchi. La Atalaya revistaga predicaciunninchita tincuchergan juc wamra ogracashganwan. Juc wamra ogracaptenga achcajmi rasla caypa o wacpa ashir galaycun. Y pipis wamrata tariptenga, manami paylachu cushicun sinoga lapancuna cushicärin. Chaynolami pasan Diospita runacunata yachachicuptinchi, lapanchimi yanapacunchi predicaciuncho runacunata ashinapaj y pipis reuniunman aywayta galaycuptenga lapanchi cushicunchimi.

CUYACOJ CANAYQUI

15. ¿Imaraj yanapämäshun runacunata ganas ganaswan yachachicunapaj? (Mateo 22:37-39; garancho caycaj).

¹⁵ Jehovata y runa masinchita cuyashganchimi yanapämäshun cushi cushila runacunata yachachicunapaj (leiriy Mateo 22:37-39). ¡Jehovaga alapami cushicun runacunata yachachiptiqui y runacunapis amatar cushicärin Bibliapita yachacur galaycuptin! Ama gongaychu Diospa Palabranta chasquejcunaga salvashga cananpaj (Juan 6:40; 1 Tim. 4:16).

16. Wasipita yarguyta mana puedirpis, ¿imanotaj runacunata cushi cushila yachachicushwan? Tantiachicamuy.

¹⁶ Wasipita yarguyta mana puedirga, lapan puedishgayquimanno calpachacuy Jehovata y runa masiquita cuyashgayqui ricächicunayquipaj. Pandemia cashgan wichancho, Samuel y Dania wasilancho wichgarashga caycargan. Chaura telefunulapa predicargan, cartacunata escribirgan y Zoomlapa Bibliapita yachachicurgan. Samuel cáncer gueshyawan caycarpis clinicacho caycajcunata Diospita parlapargan. Payga nin: “Problemacunapa pasarga uticashga, pishipashga  y calpaynaj ricacunqui. Pero Jehovata sirvirga cushishga caycanchi”. Chay wichanlacho warmin Daniapis ishquishganpita cämacho quimsa quillacuna caycargan. Nircurpis sojta quillacunapa silla de ruedas nishgancho caycargan. Payga nin: “Watucamaj enfermerata y wasëman shamojcunatapis Diospita parlapaj cä. Jina medicinata ranticamoj warmiwanpis telefunupa ali parlapacärej cä”. Samuel y Dania gueshyaraycu wasinpita yarguyta mana puedirpis, lapan puedishgancunata rurargan Diospita yachachicunanpaj, chayta rurar paycuna cushishga carcaycargan.

17. ¿Imatataj rurashwan canan yachacushganchicunawan?

¹⁷ Cay yachachicuycho lapan yachacushganchicunapita manami juc ishcaylata rurashwanchu. Juc micuy ali yargunanpäga lapan imaycancunataraj winanchi. Chaynoparaj ima micuypis mishqui yargamun. Chauraga cay yachachicuycho ricashganchicunata ruranapaj calpachacuptinchega, ima manchacuyninchipis ilacangana y runacunata cushi cushila yachachicushun.