1. ¿Ima nishwantaj Jehovata adurashganchipita y imataj ruranapaj decidido caycashwan?

 CANAN wichan achca runacuna paraíso japuycho caycashganno Jehovata sirvipäcun. Paycunaga cushishga y jaucala caycar, decidido carcaycan rasunpa caj aduraciunta mana imaypis cachaycunanpaj. Jina waquincunatapis yanapayta munapäcun juc shongunola paycunawan Jehovata cushishga sirvipäcunanpaj.

2. Cay munducho imayca mana alicuna captinpis, ¿imanirtaj Jehovata cushishga sirvinchi?

² Cay munducho imayca mana alicuna y chiquinacuy captinpis, Jehovaga sirvejnincunata yanapan cushishga y tranquilo payta sirvir caycänanpaj (1 Juan 5:19; Apoc. 12:12). Payga musyanmi Satanás imanopapis nacachimänanchita munashganta. Chaymi Jehová cuyacuywanmi chapämanchi y marcanman pushamashcanchi seguro caycänapaj. Jehovata sirvirga shanaypita llantucushganchino ricacunchi y pargushga huertunomi caycanchi (Is. 4:6; 58:11). Jehovapa bendiciunninwan marcancho caycajcunaga cushishga y ali carcaycan (Is. 54:14; 2 Tim. 3:1).

3. ¿Imaytaj puntata cumplicurgan Isaías 65 caj capítulo nishganga?

³ Isaías 65 caj capitulucho Jehová wilacurgan sirvejnincuna imano ricacunapaj payta sirvir. Profeta Isaías escribishganga 537 watacho J.m.sh puntata cumplicurgan. Chay wichan  Diosta cuyaj judiucunaga Babiloniapita cutipäcurgan yurishgan marcanman. Jerusalenman chayaycur jucla alchachergan y cuyaylapaj marcaman ticrachergan. Juchucaycaj templutapis alchachergan chaycho yapay Jehovata adurapäcunanpaj (Is. 51:11; Zac. 8:3).

4. ¿Isaías wilacushganga imanotaj cumplicuycargan?

⁴ Isaías escribishganpita ishcay caj cumplimientunga galaycurgan 1919 watacho, Diospa sirvejnincuna Jatuncaray Babiloniapita yargupäcuptin. Chaypita pacha achca Diospa sirvejnincuna may chaypa ganas ganaswan yachachicur galaycurgan, y chayraycu más congregaciuncuna mirargan. Unaycho magacoj cajcuna, jucwan jucwan cacojcuna cawayninta cambiargan, y mushoj runanona Dios munashganno cawar galaycurgan (Efes. 4:24). Isaías wilacushgan bendiciuncunaga mushoj Pachachoraj chipyaypa cumplicunga. Chayno captinpis canan mayna ricaycanchina waquin bendiciuncunata. Canan ricashun imanirtaj valurashwan Diosta aduraycashganchipita y imanirtaj paypita raquicäcushwanchu.

JEHOVATA SIRVISHGANCHIPITA BENDICIUNCUNA

5. Isaías 65:13 nishganno, ¿ima bendiciuncunataj charanchi Diosta sirvir?

⁵ Ali micushganno calpayoj ricacunchi. Profeta Isaías claro wilacun Diospa sirvejnincuna imano cawashganta y Diosta mana sirvejcunata imata pasashganta (leiriy Isaías 65:13). Jehovaga sirvejnincunata lapan necesitashgancunata camaripan. Jina Palabranta, espiritunta y publicaciuncunatapis gomashcanchi paypita yachacur cushishga caycänapaj (Apocalipsis 22:17 textuwan tincuchiy). Pero Diosta mana sirviycajcunaga micanaypita, yacunaypita nacapäcun y pengaycho carcaycan. Yanapacuycunatapis manami charanchu Diospita yachacunanpaj (Amós 8:11).

6. ¿Ima micuycunapitataj parlaycan Joel 2:21-24? ¿Imataj micuycuna japuy canan caycan y imanotaj yanapämanchi?

⁶ Profeta Joelpis wilacun Jehová sirvejnincunata garananpaj triguta, vinuta y aceititapis (Joel 2:21-24). Chaywanga Jehová sirvejnincunata niycargan lapan necesitashgancunata camaripänanpaj cajta y yanapänanpaj paylata sirvinanpäpis. Canan wichanpis chaynolami ruran, chaymi gomanchi Bibliata, publicaciuncunata, internetcho caycaj yachachicuycuna, reuniuncuna y asambleacunapis. Chaycunaga yanapämanchi espiritual cajcho ali micush caycänapaj.

7. ¿Imanirtaj Diospa sirvejnincunaga lapan shongunwan cushicärin? (Isaías 65:14).

⁷ Cushishga y contento caycanchi. Diospa sirvejnincuna shongupita Jehovata agradecicur alapa cushicärin (leiriy Isaías 65:14). ¿Imanirtaj lapan shongunwan cushicärin? Paycunaga Diospa Palabrancho rasunpa cajta taripäcushga y Diospa promesancunapitapis musyar shacyächishga ricacun. Y Jesús wanushganraycu ali cawaytapis shuyaraycan. ¡Paycunaga amatar cushicärin chaycunapita hermanuncunawan parlapacuptin! (Sal. 34:8; 133:1-3).

8. ¿Diospa marcanchoga imataj ricacämun?

⁸ Diospa marcanchoga ricacämun juc shongula caycashganchita y jucninchi jucninchipis cuyanacushganchita. Cuyacuyninchega mana ushacajmi y cuentata gocunchi mushoj Pachacho caway imano cananpaj. Chay wichanga cananpitapis masraj cuyanacushun y juc shongunola caycäshun (Col. 3:14). Juc cristiana Testigucunata reguishganpita cayno wilacun: “Nogaga manami musyargächu imano cushishga cawacunäpaj.  Testigucunata reguir-raj cuentata gocurgä rasunpa cuyacuy ima ninantaj”. Diospa marcancho caycaptinchiraj ima rurashganchicunapis ali yargupämäshun y cushishga cawashun. Cay munducho contranchicho imaycata niptinpis, Jehovapa y sirvejnincunapa ricaynincho ali ricashga caycanchi y favornintapis chasquinchi (Is. 65:15).

9. ¿Imataj Jehová aunicun sirvejnincunata Isaías 65:16, 17 textucunacho?

⁹ Mana yarpachacuycunawan tranquilo cawacunchi. Isaías 65:14 textucho nin Diosta mana sirvejcunaga “shonqu nanaywan ataypa atar” wagangapaj. ¿Y ima nishwantaj Diospa sirvejnincunapita? ¿Imataj paycunata pasanga unaycho pasaypa nacashga captenga? Jehová nin: “Unay nakashqankunatapis qonqaykärinqami” (leiriy Isaías 65:16, 17). Jehová lapan problemacunata ushacächenga, chaura sirvejnincuna mana yarparanganachu unay nacashgancunata.

10. ¿Imanirtaj ninchi hermanucunawan caycar juc bendición cashganta? (Fotutapis ricay).

¹⁰ Canan wichanpis reuniuncunacho caycar tranquilo ricacunchi, y ima yarpachacuycuna captinpis manami cäsupanchichu. Noganchipis yäracoj masinchicunata yanapayta puedinchi Jehovata sirvir cushishga y tranquilo caycänanpaj. Chaypäga Biblia nishganno cuyacoj, cushishga, waquincunawan ali apanacushwan, ali shimilapa parlapacushwan y pacienciacoj cananchi (Gál. 5:22, 23). ¡Alapa cushicunchi Diospa marcancho caycar! Y chaypita mana yargucurga Jehová lapan aunishganta cumplicushganta ricashun, payga nin: “Mushuq ciëlutapis y mushuq patsatapis noqami kamashaq”.

11. ¿Imanotaj ricacunchi Diospa marcancho caycar? (Isaías 65:18, 19).

¹¹ Alapa agradecido caycanchi. Profeta Isaías wilacun imacunaraycu Diospa sirvejnincuna cushishga y agradecido carcaycan. Y chayno cananchipäga quiquin Dios yanapämanchi (leiriy Isaías 65:18, 19). Jehovaga munan luta religiuncho caycajcunata yanapänapaj chaypita yargucunanpaj. Chaynopa paycunapis congregaciuncho cushishga y tranquilo ricacunanpaj. ¡Alapami cushicunchi rasunpa caj religiuncho caycar! Chaymi chay bendiciuncunapita waquincunatapis parlapayta munanchi (Jer. 31:12).

12. ¿Imanotaj ricacunqui Isaías 65:20-24 textucunacho caycaj promesacunata leir?

¹² Jehovata sirvirga alapa agradecido ricacunchi y imata shuyaraycashganchimanpis yarpachacunchi. ¡Mushoj Pachachoga lapan  munashganchicuna chipyaypa cumplicunga! Bibliaga cayta nin: “Wamrakunapis yurirkularqa manami wanunqanatsu. Awkinkunapis pasaypa awkinyashqanyaqmi kawanqa”. Jina nin: “Wayinkunata ruraykurmi runakuna tsaycho tanqa. Üvata plantarmi wayuyninta mikupäkushpan kawanqa”. Jehová bendiciptinmi lapan rurashgancunaga “manakaqlapaqqa manami” cangachu. Diosga sirvejnincunata aunicun seguro y cushishga cawacunanpaj, paycuna manarajpis mañacuptin necesitashgancunata camaripanga. Jehovaga lapan cawajcunata bendiciunninta churanga (Is. 65:20-24; Sal. 145:16).

13. Isaías 65:25 nishganno, ¿ima cambiucunata rurashwan Jehovata sirvinapaj?

¹³ Jaucala y seguro cawacunchi. Achca runacuna unaycho fiyu uywano cawaynin cashga carpis Diospa espiritunwan cawaynincho cambiucunata rurargan (leiriy Isaías 65:25). Cananga paycunaga geniuntapis shumaj controlan (Rom. 12:2; Efes. 4:22-24). Pero juchasapa runacuna cashganchiraycu öraga pantaycunchiraj. Chayno captinpis Jehovaga yanapämanchi may chaypita captinchipis juc shongunola, cuyanacur y tranquilo cawacunapaj (Tito 2:11). ¡Chaytaga lapanta puedej Dioslami ruran!

14. ¿Isaías 65:25 nishganga, imanotaj cumplicurgan juc cristianupa cawaynincho?

¹⁴ ¿Rasunpachuraj pipis cawayninta cambiayta puedinman? Ricärishun juc runa wilacushganta. Pay 20 watayoj caycaptin, pasaypa magacoj, suwacoj y mana alita ruraj runa cashganraycu carcelcho achca cuticunacho wichgarashga caycargan, jina waquincunawan peliayta munar pï maytapis achäquita ashipaj. Pero Biblia yachachicushganta wiyar y reuniuncunacho Jehovapa testiguncuna alapa cuyanacärishganta ricar, payga convencicurgan rasunpa caj religiunta tarishganpita. Chaymi valurcharcurgan cambiananpaj. Bautizacurirna quiquin cuentata gocurgan Isaías 65:25 nishgan cawaynincho cumplicushganta. Unaychoga fiyu liyunno cargan, canan ichanga manshu uyshano ticrargan.

15. ¿Imanirtaj waquincunata yanapayta munanchi Diospa marcanman shacamunanpaj, y imanotaj chayta ruranchi?

¹⁵ Isaías 65:13 textupa galaycunancho nin: “TAYTA DIOS kayno nin”. Y 25 caj versiculupa ushanancho nin: “TAYTA DIOSMI tsayno nin”. Diosga imaypis promesancunata cumplirgan (Is. 55:10, 11). Canan ricaycanchi Diospa marcancho caycajcuna cushishga cawacushganta. Canan wichan caway alapa sasa captinpis Jehovaga sirvejnincunata yanapan seguro y jaucala ricacunanpaj (Sal. 72:7). Chaycunata ricar noganchipis alapa cushicur waquincunata yanapayta munanchi Diospa marcanman shacamunanpaj. Chaymi calpachacunchi paycunata Bibliapita yachachinapaj (Mat. 28:19, 20).

IMANOTAJ RUNACUNATA YANAPASHWAN DIOSPA MARCANMAN SHACAMUNANPAJ

16. ¿Imata ricartaj waquincunaga Diospa marcanman shacamun?

¹⁶ Lapanchi Jehovata cushishga y ali sirviycashganchita ricar, waquincunapis Diospa marcanman shacamuyta munanga. Chaypäga Jehová imano cashganno cananchi. Payga pitapis manami obliganchu marcanman shacamunanpaj, sinoga cuyacuywanmi pushamun (Jer. 31:3; Juan 6:44). Jehovapita yachacuycajcuna ali shonguyoj runacuna carga, Diosta cuyashpan quiquilancuna marcanman shacamun. ¿Imano runataj cananchi waquincuna Diosta sirviyta munananpaj? ¿Imalapis caycanchuraj ruranapaj?

17. ¿Imatataj rurashwan waquincuna munananpaj Diospa marcanman shacamuyta?

 ¹⁷ Yäracoj masinchicunata cuyacuywan y respetuwan trataptinchi, waquincunapis Jehovata sirviyta munanga. Munayculanchimi Diosta mana sirvej runacuna reuniuncunaman aywaptin cuentata gocärinanpaj Tayta Dios noganchiwan caycashganta (Zac. 8:23; 1 Cor. 14:24, 25). Chaymi ali canman 1 Tesalonisenses 5:13 textucho caycaj consejuta cäsucunapaj, chaychoga nin: “Mana chikinakuypa ali kawapäkuy”.

18. ¿Imacunata ricar waquincunaga Diospa marcanman shacamun?

¹⁸ Jina calpachacunanchi Jehová ricashganno hermanunchicunata ricanapaj. Chaypäga paycuna pantashgancunalaman yarparänapaj trucan ali rurashgancunata ricänanchi. Cuyacoj cashganchi yanapämäshun waquincunawan ima asuntutapis jucla alchanapaj, chaypäga cay consejuta cäsucunanchi: “Jukniki juknikipis kuyapänakur kawapäkuy. [...] Tayta Dios perdonashushqaykinöla perdonanakäriy” (Efes. 4:32). Cuyacuywan tratananchita munaj runacunaga noganchiwan Jehovata junto adurayta munanga. a

JEHOVATA SIRVIYCARLA CAYCÄSHUN

19. 1) ¿Imataj waquincuna nipäcun Diospa marcanman cutimushganpita? (“ Aywacurpis cuticamurgan” nej recuadruta ricay). 2) ¿Imataj ruranapaj calpachacushwan? (Dibujutapis ricay).

¹⁹ ¡Alapa cushicunchimi waquincunawan Diosta sirviptinchi! Cananga unaypitapis más shumajraj caycan, y may chaycho masraj Diospa sirvejnincuna miraycan. Jehovata agradecicuyculanchi marcanman pushamashganchipita.  Chaymi tranquilo, cushishga, seguro y shacyächishga cayta munar, Jehovata imaypis sirviycarla caycanman. Pero cuidacunanchi Satanaspita, payga imanopapis engañamänanchita munan Jehovapita raquicäcunapaj (1 Ped. 5:8; Apoc. 12:9). Chaymi lapan calpanchiwan valurcharcushun Diosta sirvir ali cawacuycashganchita cuidanapaj y imawanpis mana ganratanapaj.