1. ¿Imanirtaj discipuluncunapaj Jesucristo ruwacurgan?

 JESUCRISTO wanunanpaj junajcho Taytan Jehovata ruwacurgan gatejnincunata chapänanpaj (Juan 17:15, 20). Sirvejnincunataga Jehová imaypis cuidaycanmi y chapaycanmi. Ichanga Jesucristo musyarganmi discipuluncunata chiquicoj Diablo masraj nacachinanpaj, chaymi ruwacurgan discipuluncunata chapänanpaj.

2. ¿Imanirtaj mana manchacushwanchu sasacunapa pasar, Salmo 33:18-20 textucuna nishganno?

² Satanaspa maquincho caycajcunaga Diospa sirvejnincunata chiquir nacachipäcunmi. Chaymi öraga sasami ticracurinman Jehovalata sirvir caycänanchipaj. Chayno captinpis mana manchacushwanchu, chaypitami cay yachachicuycho ricashun. Taytalanchi Jehovaga ricaycämanchimi, lapantami musyan y yanapämänanchipaj listo caycan. Bibliapita ishcay wilacuycunata ricar cayta tantiashun: “TAYTA DIOSGA manami cachaycunchu payta rispitajcunataga, payman yäracojcunatapis” (leiriy Salmo 33:18-20).

3. ¿Imacunapa pasartaj japalanchi ricacushwan?

³ Jehovapa jatun familiancho caycarpis öraga japalanchimi ricacushwan. Tantiarinapaj, jovincunaga japalan imachi ricacun escuelancho creenciancunata defendinanpaj captin o congregaciunpita juc congregaciunman aywacuptin. Mayganchilapis laquishga imachi caycanchi, y ‘pipis yanapämänanpaj canchu’ nirchi öraga yarpaycashwan. ‘Yarpachacuycashgäpita waquincunata wilaptë manami tantiamangachu’ nir yarpachacuycashwan. ‘Nogapäga manami pipis yarpachacunchu’  nirpis yarpashwanchi. Imano captinpis japalanchi ricacuptinchega calpaynaj y laquishgachi caycashwan. Ichanga japalanchi ricacunapaj Jehová manami munanchu. ¿Imanir?

4. ¿Imanirtaj Eliasga “nogallanami cawaycä” nergan?

⁴ Profeta Eliaspita parlarcushun. Jezabel wanuchiyta munaptinmi payga 40 junajpitapis masraj gueshpicuycargan (1 Rey. 19:1-9). Juc machaycho japalanla caycar Jehovata nergan: “Nogallanami cawaycä” (1 Rey. 19:10). Japalanla caycashgantami yarpargan, ichanga Abdías 100 profetacunatami pacaycurgan Jezabel mana wanuchinanpaj (1 Rey. 18:7, 13). Eliasga chay profetacunata Jezabel wanuchishganta yarpar imarchi japalanla ricacurgan. Israel masincuna Carmelo jircacho Baalpa profetancunata pasashganta ricarpis ni maygan Jehovata mana aduraptinchi japalan ricacurgan. Jina paypaj pipis mana yarpachacushganta o chiquejnincuna wanuchinanpaj ashiycashganpita pipis mana musyashgantachi yarpargan. Lapanta Biblia mana wilacuptinpis Jehovaga musyarganmi imanir Eliasga japalanla ricacurgan y imano yanapänanpäpis musyarganmi.

5. ¿Imatataj Jehová rurargan profetan Elías japalanla mana ricacunanpaj?

⁵ Eliasta yanapänanpäga Jehová imaycatarämi rurargan, shonguncho caycajta wilacunanpaj ishcay cuti tapurgan cayno: “Elías, ¿imatataq kaycho ruraykanki?” (1 Rey. 19:9, 13). Y Jehovanami chay ishcay cuticho Eliasta lapanta wiyar paywan caycashganta y alapa poderyoj cashgantapis ricächergan. Jina wilargan Israel naciuncho sirvejnincunaga achcajraj caycashganta (1 Rey. 19:11, 12, 18). Eliasga mayraj ancashyashga ricacurgan Jehovata lapanta wilarcur y nishgantapis wiyaycur. Jinamanpis Eliasta Jehová mandargan Hazaelta acrananpaj Siriapa reynin cananpaj, Jehuta acrananpaj Israelpa reynin cananpaj y Eliseutapis acrananpaj profeta cananpaj (1 Rey. 19:15, 16). Chaycunawanmi Eliasta Jehová yanapaycargan  ali cajcunaman yarpänanpaj, y Eliseo ali yanagajnin cananpäpis nergan. ¿Imataraj rurashwan japalanchi ricacuptinchi y Jehovapa yanapacuyninta necesitaptinchi?

6. ¿Imatataj Jehovata wilashwan japalanchi sienticuptinchega? (Salmo 62:8).

⁶ Jehovaga munan shongunchita mashtapänapämi, chaymi lapanta wilaptinchi imay hora captinpis wiyamanchimi (1 Tes. 5:17). Jehovaga cushicunmi sirvejnincuna mañacuptin (Prov. 15:8). Japalanchi sienticuptinchi, ¿imataraj Jehovata wilashwan? Unay profetan Eliasno lapan yarpachacuyninchita wilashwan (leiriy Salmo 62:8). Aumi, ima yarpachacächimashganchi y imano ricacushganchita wilashwan. Jina imata ruranapaj cajta tantiacunapäpis mañacushwanmi. Joven cashpayqui escuelayquicho japalanla ricacur y Jehovapita parlacunayquipaj manchacuptiquega, ¿imataraj ruranquiman? Valurta y yachayta Jehovata mañacunayqui, chaynopa mana manchacuylapa creenciayquicunapita parlacunayquipaj (Luc. 21:14, 15). ¿Y imataraj ruranquiman mana valishgayquita yarpachacuycunawan luchaycaptiquega? Jehovata ruwacuy juc pogushga yäracoj masiquiwan parlanayquipaj y pay shumaj tantiashunayquipäpis. Imaypis manami japalanchichu ricacushun shongunchita Jehovata mashtapaptinchi y imano contestamashganchita altanto caycaptinchi. Jina waquincuna yanapämänanchipaj jaguiptinchipis.

7. ¿Imatataj yachacunqui Mauricio rurashganpita?

⁷ Lapanchimi Jehovapaj ruranapäga imaycacunami caycan. Y payga ricaycanmi y valuranmi congregaciuncho, predicaciunchopis ruraycashganchipita (Sal. 110:3). Cada cadala Jehovata sirvinapaj calpachacuptinchega manami japalanchichu ricacushun ¿imanir? Mauricio jutiyoj mozo pasashganta ricashun. * Mauricio bautizacushganpita ichiclachoshi cuyashgan amigun ichiclapa ichiclapa Jehovapita carupäcurgan. Pay wilacun: “Amigü ichic ichicla Jehovapita carupacushganta ricar yarpachacächimargan, ‘jinalachuraj Jehovata sirviycäshaj y familianchopis caycäshaj’ nir. Japalämi ricacurgä y ‘manami pipis tantiamanchu’ nirpis yarpargä”. Imataj yanapashganta cayno wilacun: “Waquincunata masraj yachachicushgämi yanapämashga yarpachacächimashganman y quiquiläman mana yarpachacunäpaj. Hermanucunawan predicaptëmi cushishga ricacoj cä”. Aumi, calpatami tarinchi hermanucunawan tiemputa pasaptinchi. Waquincunata yachachir telefonupa captin o cartacunata rurar captinpis. ¿Ima mastaj Mauriciuta yanapargan? Paymi  cayno yarpan: “Congregaciuncho masraj yanapacunäpaj calpachacurgä. Aumi, discursucunata y demostraciuncunata ruranäpaj nimashgancunata más aliraj ruranäpaj calpachacurgä. Chaynopa Jehová cuyaycämashganta y hermanucunapis cuyaycämashgantami tantiacurgä”.

8. ¿Imanotaj ricacushwan sasa problemacunapa pasaptinchi?

⁸ Cay ushanan tiempucho lapanchimi problemacunapa pasashun (2 Tim. 3:1). Ichanga manchacächimashwanmi ima problemacunapis ilajpita chayamuptin. Chaycunaga canmanmi guellayta tarinapaj sasa captin, pasaypa gueshyawan caycashganchita doctor nimaptinchi o cuyashga familianchita wanupacuptinchi. Chauraga laquishgachi ricacunchi jucnin jucnin o ilajpita achca problemacuna chayamuptin. Ichanga ama gongashunchu ima pruebacuna captinpis Jehovaga ricaycämanchimi y yanapacuyninta ruwacuptinchega yanapämäshunmi.

9. ¿Ima pruebacunapataj Job pasargan?

⁹ Jobta ima pasashganta ricashun. Jobga ichic tiempulachomi achca pruebacunapa pasargan. Juc junajlachomi mayargan lapan uywancunata ograshganta, sirvejnincunata wanuchishganta y más laquicuypaj wamrancuna wanushganpita (Job 1:13-19). Nircurpis quiquinna manchariypaj fiyu gueshyawan nacaycargan (Job 2:7). Chaymi pasaypa nacar quiquinpita cayno nergan: “¡Manami kawaytapis munänatsu! ¡Imapaqnataq kawashaqpis!” (Job 7:16).

10. ¿Imanotaj Jehová Jobta yanapargan pruebacunata aguantananpaj? (Garancho caycaj dibujuta ricäriy).

¹⁰ Jehovaga ricaycarganmi Job imacunapa pasaycashganta. Chaymi payta cuyar aguantananpaj yanapacuycunata camacächishga. Quiquin Jehová Jobwan parlarmi ricächergan lapan camashgancunata cuyacuywan y yachaywan ricashganta. Almiraypaj achca uywacunapitapis parlargan (Job 38:1, 2; 39:9, 13, 19, 27; 40:15; 41:1, 2). Jina Jehovaga Elihuta cachargan Jobta shacyächinanpaj y shogananpaj. Paymi Jobta yarpächergan pipis Jehovata mana cachaypa sirviptenga aypala bendiciuncunata chasquinanpaj cashganta. Jina Jehová munargan Elihú cuyapaylapa Jobta tantiachinanpaj runacunapitaga Jehová alapa poderyoj cashganta (Job 37:14). Chaymanpis Jehová Jobta mandargan juchalicushgan amiguncunapaj ruwacunanpaj (Job 42:8-10). Canan wichan, ¿imanotaj Jehová yanapämanchi sasa pruebacunapa pasaptinchi?

11. ¿Imanotaj Bibliaga shacyächimanchi pruebacunapa pasaptinchi?

¹¹ Unaycho Jobta Jehová parlapashganno canan wichanga manami parlapämanchinachu. Chaypa trucan Palabran Bibliawanmi parlapämanchi (Rom. 15:4). Shacyächimanchi shamoj tiempucho ali cawayta chasquinapaj aunicuyninwan. Mä ricärishun waquilanlata Bibliapa shogacoj yachachicuycunata. Palabranchomi Jehová aunimanchi ni ima sasa pruebacunapis “paypa kuyakuyninpita mana rakimäshuntsu” (Rom. 8:38, 39). Caytapis aunimanchi: “Llapan shongunpa mañacojcunata yanapanmi”. Aumi, mañacuptinchega Pay wiyamäshunmi (Sal. 145:18). Jina Jehová nimanchi ima nacaycho caycarpis mana ajayaypa payman yäracuptinchega cushishgami cawacushun (1 Cor. 10:13; Sant. 1:2, 12). Jinamanpis Diospa Palabranga yarpächimanchi canan wichan ima  pruebacunapis ushacajla cashganta. Shamoj tiempuchomi ichanga imaycamapis cawacushun, chaytaga Jehovami gomäshun (2 Cor. 4:16-18). Jehová lapanta cumplej aunimanchi, ushajpaj Satanasta ushacächinanpaj y maquincho caycajcunatapis lapancunata ushacächinanpaj (Sal. 37:10). ¿Maynacu umachicushcanqui shacyächicoj textucunata, shamoj tiempucho pruebacunata aguantanayquipaj?

12. ¿Imatataj rurashwan Palabranwan Jehová yanapämänanchipaj?

¹² Jehová Palabranwan yanapämashganchita shumaj provechanapäga, cada cadala Bibliata leinapämi y yachacushganchiman yarpachacunapämi Jehovaga munan. Y cäsucuptinchega yäracuyninchi mirangapämi Jehovawanpis más amigo cashun. Jina calpata tarishun problemacunata aguantanapaj. Y Palabranman yäracuptinchega santo espirituntami gomäshun. Chay espirituwanmi calpayoj ricacushun ima pruebacunatapis aguantanapaj (2 Cor. 4:7-10).

13. Tantiaj y yäracuypaj esclavo camacächishgan yanapacuycuna, ¿imanotaj yanapämanchi aguantanapaj?

¹³ Jehová yanapaptinmi tantiaj y yäracuypaj esclavuga camacächishga yachachicuycunata, videucunata y grabaciuncunata yäracuyninchi sinchi caycänanpaj y riccha ricchala caycänapaj (Mat. 24:45). Chay lapancuna cada cadalami yargaycämun, chauraga shumaj provechanapaj calpachacushun. Estados Unidos naciunpita juc pani chay yanapacuycunapita cayno nergan: “40 watacunana Jehovata sirviycä, ichanga cutin cutinmi pruebacunapa pasargä”. Chay panipa awiluntashi juc machashga runa carrunta manejaycashgancho jaruycurgan, taytancunaga fiyu gueshyawan wanurgan, jina quiquinpis ishcay cuti cáncer gueshyawan gueshyargan. Paymi imata yanapashganta cayno wilacun: “Jehovaga imaypis cuidaycämanmi. Jina tantiaj y yäracuypaj esclavo camacächishgan yanapacuycunami yanapämashga aguantanäpaj. Chay lapancunapita agradecicömi, y Jobnopis në: ‘¡Cawashgayajga ali cajcunalatami rurashaj!’” (Job 27:5).

14. ¿Imanotaj hermanucunawan Jehová yanapämanchi sasacunapa pasaptinchi? (1 Tesalonicenses 4:9).

¹⁴ Jehovaga yachachimashcanchi jucninchi jucninchi cuyanacunapaj y pruebacunapa pasaptinchi yanapacunapaj (2 Cor. 1:3, 4; leiriy 1 Tesalonicenses 4:9). Hermanunchicunaga  unay Elihunomi yanapämänanchipaj listo caycan (Hech. 14:22). Chaytami Diane jutiyoj panilanchi ricargan, runan pasaypa antsa caycaptin congregaciunninpita hermanucuna shacyächergan y yäracuyninpis sinchi caycänanpaj yanapargan. “Achca quillacunami yarpachacuycarla caycargä, ichanga cuyapaylapa y yachanaylapa Jehová yanapaycämashganchita mayapäcurgä. Hermanucunaga tucuynopami yanapäcamargan telefonupa gayapäcamar, watupäcamar, macalapäcamar y maspis. Carruta manejayta mana yachaptëmi hermanucuna reuniuncunaman y puedishgä hora wasin wasin yachachicunäpäpis apapäcamaj”. ¿Manachu cushicunchi chayno cuyacoj familiacho caycaptinchega?

15. ¿Imanirtaj seguro caycanchi pruebacunata aguantanapaj?

¹⁵ Lapanchimi imaylapis pruebacunapa pasashun ichanga aguantanapäga yanapacuycunami caycan. Cuyacoj Taytanomi Jehovaga imaypis ricaycämanchi. Ruwacuptinchi wiyamanchi y yanapämänanchipäpis listumi caycan (Is. 43:2). Segurumi caycanchi pruebacunata aguantanapaj Jehová imayca yanapacuycunata camacächishga captinmi, chaycunaga caycan: mañacuy, Palabran Biblia, publicaciuncuna y cuyashga hermanucunapis.

16. ¿Imatataj rurashwan Jehová cuidaycämänanchipaj?

¹⁶ Agradecicuyculanchimi Taytalanchi Jehová ricaycämashganchipita. “Payman yärakuptintsiqa shonquntsipis kushikunmi” (Sal. 33:21). Cuyacuywan ricaycalämashganchipita, ¿imanotaj agradecicushwan? Cada cadala Jehovata shongupita mañacuptinchi, Palabranpita y publicaciuncunapita shumaj yachacuptinchi, y hermanunchicuna yanapämaptinchi chasquicuptinchi. Jina quiquinchipis Jehová cuidaycämänanchipäga lapan ali cajcunata ruranapaj nimashganchita cäsucushwanmi. Chayno ruraptinchega imaycamapis cuidamäshunmi (1 Ped. 3:12).