1. ¿Imaraj yanapämäshun profeciacunapita cushi cushila yachacunapaj?

 BEN jutiyoj mozularaj cristianuga cushicunmi profeciacunapita yachacuptin. Profeciacunaga caycan Dios wilacushgancuna imataj pasananpaj. ¿Gampis Benno cushicunquichu profeciacunapita yachacurga? ¿O yarpanquichu alapa sasa temacuna cashganta? Ichanga, Diospa Palabrancho imanir profeciacuna caycashganta shumaj tantiarcuptiquega, Ben jutiyoj mozuno ricacunquipämi.

2. ¿Imapitataj canan yachacushun?

² Cananga ricärishun, imanirtaj Bibliacho caycaj profeciacunapita yachacunanchi y chaycunata tantiarcunapaj imataj rurashwan. Nircur Daniel librucho wilacushgan ishcay profeciacunapitapis yachacur shumaj tantiarcushun cawayninchicho imata más puntaman churanapaj.

3. ¿Profeciacunata shumaj tantiayta munarga imatataj rurananchi?

³ Jucpa yanapacuyninwanrämi shumaj tantiarcunchi profeciacunataga. Gamshi pasiaj aywanquiman juc mana reguishga marcaman, ichanga chay marcata shumaj mana reguirga manchacunquichi ogracunayquipaj, pero chay marcata ali reguej amiguyqui gamwan caycaptenga cushicunquichi. Payga nishunqui caypa wacpa o maypa aywanayquipaj. Jehovapis chay ali amiguno musyanmi shamoj watacunacho imacuna pasananpaj cajta. Chaymi, profeciacunata shumaj tantiarcunapäga, ali shongulanchiwan Jehovata mañacushwan yachayta gomänanchipaj (Dan. 2:28; 2 Ped. 1:19, 20).

4. ¿Imanirtaj Bibliacho profeciacunata tarinchi? (Jeremías 29:11, fotutapis ricay).

⁴ Cuyacoj taytacunaga imaypis munapäcun wamrancuna ali cawapäcunanpaj, chaynola Jehovapis sirvejnincunapaj  munan (leiriy Jeremías 29:11). Runacunaga musyapäcunchu shamoj watacunacho imata pasananpaj, Jehová ichanga musyanmi. Chaymi Palabrancho guelgachimurgan imacunata pasananpaj cajta musyanapaj (Is. 46:10). Jehová amatar cuyamashpanchimi profeciacunata goycalämashcanchi. Ichanga, ¿imanirtaj ninchi chay profeciacunaga rasunpa cumplicunanpaj cajta? Ricärishun.

5. ¿Imataj jovincuna yachacunman Max rurashganpita?

⁵ Escuelacho caycaj jovincuna Biblia nishganta mana respetapäcushganta ricar, öraga Testigo caj jovincuna capaz dudar galaycunman yachacushganpita. Chaytami pasargan Max jutiyoj mozuta. Payga nin: “Escuelachoraj caycaptë cayno tapucur galaycurgä, ‘¿Testigucunaga rasunpa religiunchuraj caycan y Bibliapis Diospa Palabranchuraj caycan?’” nir. Chayta taytancunata alapa yarpachacächiptinpis, paycunaga piñacärerganchu. Chaypa trucan pacienciawan Max lapan tapucushgancunata Bibliawan shumaj tantiachipäcurgan. Maxpis wilacun cayta rurashganta: “Calpachacurgä Bibliacho caycaj profeciacunapita yachacunäpaj y nircur congregaciunpita waquin jovincunawan yachacushgäpita parlapacärej cä”. Chay lapanta rurashganpita Max cayno nin: “Lapan rurashgämi, yanapämargan quiquëmi yäracunäpaj Bibliaga rasunpa Diospa Palabran cashganta”.

6. ¿Imatataj rurashwan yachacushganchipita dudar galaycuptinchi, y imanir?

⁶ Gampis Maxno yachacushgayquipita dudar galaycuptiquega yarpachacuychu, ichanga calpachacunayqui yäracuyniquita sinchiyächinayquipaj. ¿Imanir? Puyucuna guerucunata micur galaycuptenga, tiempuwan chay gueruga paquir ushacanman. Chaynolami imapitapis dudaycarla caycaptinchega yäracuyninchipis ushacäcunmanmi. Ichanga chayno mana cananpäga, cayno tapucunayqui: ¿Shamoj tiempupaj Biblia wilacushganga yäracöchu rasunpa cashganta? Chaypita seguro mana caycarga ali canman maygan profeciacuna cumplicushgantana yachacunayquipaj. Chaypäga, ¿imaraj yanapäshunqui?

7. ¿Imataj Danielta yanapargan profeciacunata tantiananpaj? (Daniel 12:10, fotutapis ricay).

⁷ Profeciacunata ali tantiarcunapäga Danielpita yachacunanchi. Payga ali shongulanwan yachacur rasun cajta musyayta munargan. Jina humilde cashpanmi, tantiargan Jehovaga ñanpu shongu cajcunata y cäsucojcunata yanapashganta palabranta tantiananpaj (Dan. 2:27, 28; leiriy Daniel 12:10). Juc cuticho humilde cashpan Jehovapa yanapacuyninta ashirgan (Dan. 2:18). Nircur, yachacushganman ali yarpachacoj y chay wichanpaj cashgan waquin profeciacunawanpis tincuchergan (Jer. 25:11, 12; Dan. 9:2). ¿Imataj paypita yachacunchi?

8. ¿Imanirtaj waquin runacunaga profeciacunapita yachacärin y imapitataj noganchega cuidacushwan?

⁸ Yarparay imanir profeciacunapita yachacunayqui. Pipis rasun cajta musyayta  munar profeciacunapita yachacuptenga, Jehová listo caycan yanapänanpaj (Juan 4:23, 24; 14:16, 17). Ichanga waquincunaga mana ali yarpaywan profeciacunapita yachacärin. Chaytaga ruran Bibliata manacajman churananpaj. Paycunaga shongun munashgalanta rurayta munar quiquincuna ali cajta y mana ali cajta acrayta munapäcun. Ichanga, profeciacunapitaga ali shongulanchiwan yachacunanchi. Pero, ¿ima mastataj yanapämäshun tantiarcunapaj?

9. ¿Imano runataj cananchi profeciacunata tantiarcunapaj y imanir?

⁹ Humilde canquiman. Jehovaga aunicun humilde cajcunata yanapänanpaj (Sant. 4:6). Chaymi profeciacunata tantiarcunapäga, Jehovata mañacunanchi yanapämänanchipaj. Jina ali tantiaj y yäracuypaj esclavo nimashganchicunatapis chasquicushwanmi, Jehovaga canan paycunawan tiempulancho yachachimanchi (Luc. 12:42). Diosnilanchega imatapis ordenado cananta munan, chaychi canan wichan ali tantiaj y yäracuypaj esclavulawan yachachimanchi (1 Cor. 14:33; Efes. 4:4-6).

10. ¿Imataj yachacunqui Esther rurashganpita?

¹⁰ Shumajla yachacunquiman. Maygan profeciapita yachacuyta munashgayqui cajta acrarcuy. Chaytami rurargan Esther jutiyoj cristiana. Payshi yachacuyta munargan Mesías chayamunanpaj wilacushgan profeciacuna. Cayno nin: “15 watayoj caycaptë, quiquëmi yachacuyta munargä chay profeciacuna Jesús cay Pachaman manaraj shamuptin escribishga cashganta”. Chayshi Rollos del mar Muerto nishgancho taricashgancunata yachacur galaycurgan, yachacushganga cushicuypämi cargan. Payga nin: “Waquin rollucunaga escribishga cargan Jesús cay Pachaman manaraj shamuptin. Chauraga chaycho caycaj profeciacunaga Diospitami shamunan cargan”. Ichanga chaycho wilacushganta shumaj tantiarcunanpäga cutin cutinräshi leinan cargan. Pero calpachacushganga alipämi cargan. Esther chay lapanta rurashganpita cayno wilacun: “Cananga musyämi Biblia wilacushganga rasunpa cashganta, quiquëmi chayta tantiacurgä”.

11. ¿Imanirtaj calpachacunanchi musyanapaj Biblia rasun cajta wilacushganta?

¹¹ Bibliacho caycaj waquin profeciacuna mayna cumplicushganta musyarga Jehovaman masraj yäracunchi y mandamashganchicunatapis cäsucunapaj shacyächimanchi. Jina calpatapis gomanchi shamoj tiempuman yarpachacunapaj y canan wichan imacuna captinpis jaucala o tranquilula carcaycänapaj. Cananga Daniel librucho wilacushgan ishcay profeciacunapita yachacushun, chayga canan wichan cumplicuycan. Chayta tantiarcurga yanapämäshun cawayninchicho imaypis ali cajta acranapaj.

12. ¿Imataj caycan runa niraj monumentupa chaquincuna fierruwan mitu tacushga captin? (Daniel 2:41-43).

¹² (Leiriy Daniel 2:41-43). Rey Nabucodonosor sueñuynincho ricashgan jatuncaray  runa niraj monumentupa chaquincunaga fierruwan mitu tacushga caycargan. Cay profeciata Daniel y Apocalipsis librucunacho waquin profeciacunawan tincuchiptinchega, tantiarcunchi canan wichan Reino Unido y Estados Unidos naciuncuna cashganta; chay naciuncunaga canan wichan alapa munayniyoj caycan. Rey Nabucodonosor sueñushganta Daniel tantiachiptin nergan: “Tsay nacioncuna aybësis fiërruno fuerti kanqa y aybësis mituno débil kanqa”. ¿Imanitaj aybësis débil canman cargan? Chay naciuncunacho tiyaj runacunaga gobiernucunapa contranman sharcupäcuptin manami jaguirinchu autoridäcuna munashgancunata camacächinanpaj. b

13. ¿Ima shumaj yachachicuycunataj cay profeciapita yachacunchi?

¹³ Nabucodonosor sueñuynincho ricashganpita Daniel wilacushganga imaycata yachacunapaj caycan. Juc, Reino Unido y Estados Unidos naciuncuna alapa munayniyoj car Punta caj y Ishcay caj Jatun Guerracuna wichan waquin naciuncunata vencirgan. Ichanga chay naciuncunacho runacunaga quiquincunapura chiquinacärin y autoridäcunapa contranchopis sharcupäcun, chaymi munashgancunata rurayta camäpacunchu. Ishcay, cay ishcay naciuncunaga jinala munayniyoj caycanga Diospa Gobiernun cay Pachacho gobiernucunata ushacächiyta galaycuptin. Capaz öraga waquin naciuncunapis contranman churacayta munanga, ichanga camäpacungachu. Bibliacho caycaj profeciaga nin Diospa Gobiernun chay jatuncaray monumentupa chaquincunata shalurachenga (Dan. 2:34, 35, 44, 45).

14. Daniel wilacushgan profeciata shumaj tantiarcurga, ¿imatataj rurananchi?

¹⁴ Daniel wilacushgan profeciata shumaj tantiarcurga cawayninchicho ima acrashganchicunacho ricacämunman. Cay mundo ushacänanpäna cashganta musyar manami yarpachacushwanchu imaycayoj cayta y achca guellayta ashinapäpis (Luc. 12:16-21; 1 Juan 2:15-17). Chaypa trucan cay profeciata ali tantiarcurga calpachacushunmi masraj predicanapaj y waquincunatapis yanaparcunapaj Jesuspa gatirajnincunaman ticrananpaj (Mat. 6:33; 28:18-20). Chaymi ali canman cayno tapucunayquipaj: ¿Ichiclacho Diospa Gobiernun runacunapa gobiernuncunata ushacächinanpaj caycaptenga cawaynëcho chayga ricacämungachuraj?

15. ¿Pïcunataj caycan “norte caj rey” y “sur caj reyga”? (Daniel 11:40).

¹⁵ (Leiriy Daniel 11:40). Daniel 11 caj capitulucho wilacun ishcay reycunapita o ishcay gobiernucunapita, paycunaga chiquinacärin y peliapäcun cay munduta gobernananpaj. Bibliacho caycaj waquin profeciacunawan tincuchiptinchi, tantiarcunchi “norte caj reyga” caycan Rusia y yanapajnin nacioncuna, y “sur caj reyga” caycan Reino Unido y Estados Unidos naciuncuna. c

16. “Norte caj rey” mandashgan naciuncho Diospa sirvejnincunaga, ¿ima sasacunapataj pasapäcun?

¹⁶ “Norte caj rey” mandashgan naciuncunacho Diospa sirvejnincunaga yäracuyninraycur chiquishga, gaticachashga, magashga y carcelarashga carcaycan. Ichanga hermanunchicunaga manchacärinchu chaycunapa pasar. Paycunaga musyapäcun chiquishga  cananpaj Daniel librucho wilacushganno, chaymi yäracuyninga sinchi caycan (Dan. 11:41). d Noganchipis chay profeciata shumaj tantiarcurga yanapämäshun ima captinpis Jehovata mana cachaycunapaj y shamoj tiempuman yarpar caycänapaj.

17. ¿“Sur caj rey” mandashgan naciuncunacho tiyaj Diospa sirvejnincunaga ima sasacunapataj pasapäcun?

¹⁷ ‘Sur caj reypis’ unaychoga Diospa sirvejnincunata alapa nacachergan punta y ishcay caj jatun guerracuna wichan. Achca hermanucunata carcelcho wichgarachergan y wamracunatapis escuelapita gargupäcurgan. Ichanga guepa watacunapita jucnopana Diospa sirvejnincunata pantachiyta munan, chaytaga ruran campañacuna captin juc mushoj alcalde o presidente cananpaj. Capaz juc cristianuga mayganlatapis yanapacuyta munanman shongulancho o yarpaynilancho. Öraga votaciunninwan jucta mana yanapacurpis capaz shongulancho munanman pilapis ganananpaj. Ichanga lapan shongunchiwan Jehovata  sirvinapäga rurayninchicunata, yarpayninchicho y shongunchicho ima caycashgancunatapis cuidananchi (Juan 15:18, 19; 18:36).

18. ¿Imanotaj ricacunchi cay ishcay reycuna chiquinacushganta ricar? (Dibujucunatapis ricay).

¹⁸ “Norte caj rey” y “sur caj rey” chiquinacur peliaycashganta ricar, Bibliacho caycaj profeciacunaman mana yäracojcunaga manchacashgachi carcaycan (Dan. 11:40). Cay ishcay reycuna alapa munayniyoj car bombawanpis o imawanpis cay pachata ushacächinmanmi. Ichanga Jehovaga manami jaguingachu chayta pasananpaj (Is. 45:18). Chaymi “norte caj rey” y “sur caj rey” chiquinacur peliaycashganta ricarga manami manchacunchichu. Chaypa trucan, yäracuyninchi más sinchiman ticraycun, cayga tantiachimanchi cay mundupa ushacaynin caylachona cashganta.

19. ¿Profeciacunapita yachacurga imatataj cuentaman churashwan?

¹⁹ Manami musyanchichu waquin profeciacuna imano cumplicunanpaj cajta. Diospa wilacojnin Danielpis manami shumaj tantiarganchu escribiycashganta (Dan. 12:8, 9). Chauraga, waquin profeciacuna imano cumplicunanpaj shumaj mana tantiarcurpis yäracuycäshunla rasunpa cumplicunanpaj cajta. Musyanchimi tiempulancho Jehová shumaj tantiachimänanchipaj Bibliacho caycaj profeciacuna imano cumplicuycashganta, unaychopis chaynomi rurargan (Amós 3:7).

20. ¿Maygan profeciacunataj ichiclacho cumplicunga, y imataj jinala ruraycashwan?

²⁰ Ichiclacho runacunaga nipäcunga seguro cawaycashganchita y “imapis mana pasananpaq” (1 Tes. 5:3). Chayno captin, ilajpita gobiernucunaga lapan lutan religiuncunata ushacächir galaycunga (Apoc. 17:16, 17). Nircur Diospa sirvejnincunatapis ushacächiyta munanga (Ezeq. 38:18, 19). Chayno captin Armagedón guerra galaycunga (Apoc. 16:14, 16). Biblia wilacushganga manami lutan wilacuychu. Yäracunchimi ichiclacho rasunpa pasananpaj. Chaymi chaycamaga Taytalanchi Jehovata agradecicur profeciacunapita jinala yachacuycäshun y waquincunatapis yanaparcushun chaycunata tantiarcunanpaj.