1. ¿Imanirtaj ali ricacunchi pacienciacoj runacunawan caycar?

 LAPANCHIMI ali ricacunchi pacienciacoj runacunawan caycar. Cushicunchimi paycuna mana piñacuylapa shuyarämaptinchi, y imalachopis pantarcuptinchi jucla mana rabiacuptin. Jina agradecicunchi Bibliapita yachachimajninchita pacienciawan shumaj tantiachimashganchipita Biblia nishganta, y ichiclapa ichiclapa yanapämashganchipitapis Jehová munashganno cawacunapaj. Ichanga imapitapis masga, ¡Jehovata agradecicunchi noganchiwan pacienciacoj captin! (Rom. 2:4).

2. ¿Imacunachotaj öraga sasa canman pacienciacoj canapaj?

² Waquincuna pacienciacoj captenga alapa alimi. Y noganchega, ¿pacienciacojchu canchi? Capaz öraga viajipa aywar carreteracho ima chapapis captenga sasami canman jaucala caycänapaj, masraj apurado caycarga. Capaz pilapis rabianächimaptinchi jucla piñacunchi. Y Mushoj Pachaman yarpar ‘imayraj chayga chayamunga’ nir yarpanchi. Chaymi canan yachacurcushun pacienciacoj runaga imanotaj canman y imanirtaj calpachacushwan chayno canapaj. Jina ricärishun imacunata yanapämäshun pacienciacoj runaman ticranapaj.

3. ¿Pacienciacoj runaga imataj ruran pipis ashlipar rabianächiptin?

³ Pacienciacoj runaga jucla mana rabiacunchu. Imayca yarpachacuycunawan caycarpis calpachacunmi jaucala caycänanpaj y pipis ashlipar rabianächiptenga manami cutichinchu. Bibliacho Jehovapita parlar nin payga ‘ali shonqu y kuyapäkuqmi. Juklaqa manami rabyakuntsu. Kuyapäkuq y rasun kaqlata rimanmi’ (Sal. 86:15).

4. ¿Ima nishwantaj imatapis mana ajayaylapa shuyaraj runapita?

 ⁴ Pacienciacoj runaga mana ajayaylapa imatapis shuyaran. Chaymi munashganno imapis mana yarguptenga manami piñacunchu (Mat. 18:26, 27). Imacunachotaj pacienciacoj cananchi, pilapis problemancunapita wilapämaptinchega paciencialawan wiyashun (Job 36:2). Jina maygan Bibliapita yachacuycajcunapis jucla imalatapis mana cäsucuptin o imatapis rasla mana tantiarcuptenga paciencialawan yanapänanchi.

5. ¿Ima mastataj rurananchi pacienciacoj runa carga?

⁵ Pacienciacoj runaga shumaj yarpachacur-raj imatapis ruran. Öraga alapa ali caycan imatapis rasla ruraptinchi. Ichanga maygan ruraypis shumaj yarpachacur-raj ruranapaj captenga, pacienciacoj runaga manami jucla ushayta munangachu ni yalinacuypapis ruranchu. Chaypa trucanga, shumaj yarpachacun imano chay lapanta rurananpaj, nircur tiempunta camacächin ali rurananpaj.

6. ¿Pacienciacoj runaga imanotaj aguantan ima nacaycunapis captin?

⁶ Pacienciacoj runaga nacaycarpis mana ajayaypa aguantan. Pacienciacoj cajga imatapis aguantanmi. Öraga laquicuyninchicunapita maygan yäracuypaj amigunchicunata wilapaptinchega ama yarpashwanchu mana ali cashganta. Ichanga, pacienciacoj caj runaga imaycanopapis calpachacunmi imaycacunapa pasarpis Jehovata cushishga sirvinanpaj (Col. 1:11). Ricärishun imanirmi cristianucunaga cay lapancho pacienciacoj cananchi.

7. ¿Imanirtaj pacienciacoj cananchi Santiago 5:7, 8 nishganno? (Dibujucunatapis ricay).

⁷ Salvaciunninchega canga pacienciacoj captinchirämi. Unay Diospa sirvejnincunapis pacienciayoj cashganraycur Jehová  prometishgancunatami chasquipäcunga (Heb. 6:11, 12). Chacracho aroj runapis imatapis mururga manami musyanchu imaytaj winananpaj cajta, ichanga pacienciayoj captin musyanmi imaylapis cosechananpaj cajta (leiriy Santiago 5:7, 8). Chaynolami cristiano cajcunapis imaycacunata ruran Jehovata sirvinanpaj, Señorninchi cutimunanpaj cashganta imay junaj mana musyarpis (Mat. 24:42). Jehovaman yäracurmi musyanchimi tiempulancho lapan aunishgancunata cumplinanpaj cajta. Pero ¿imaraj pasanman pacienciacoj mana captinchega? Capaz yamacäcushwanmi Jehovata sirvir y paypitapis raquicäcushwanchi. Jina shongunchi munashgalantana ruraytapis galaycushwanchi. Ichanga pacienciacoj captinchega cay mundo ushanancama aguantaycashwan y salvaciuntapis tarishun (Miq. 7:7; Mat. 24:13).

8. Pacienciacoj carga, ¿yanapämashwanchuraj waquincunawan ali apanacunapaj? (Colosenses 3:12, 13).

⁸ Pacienciacoj carga waquincunawanpis alimi apanacushun. Santiago 1:19 nin “shumagrag mayapäcuy waquincagcuna imapita parlangantapis” (MT). Pacienciacoj carga pï maywanpis jaucalami cawacushun, imapitapis juclaga rabiacushunchu, parlayninchiwanpis laquichishunchu ni paycuna ruramashganchinoga manami rurashunchu. Chaypa trucanga, cuyacuywan aguantanacushun, ayca cutipis perdunanacushun (leiriy Colosenses 3:12, 13).

9. ¿Imanotaj pacienciacoj carga yanapämanchi decidinapaj captin? (Proverbios 21:5).

⁹ Pacienciacoj carga imaypis ali cajcunata acrashwanmi. Imatapis jucla mana ruranapaj trucan, shumaj yarpachacur-raj musyashwanmi maygantaj más ali cashganta acranapaj (leiriy Proverbios 21:5). Öraga aruyniynaj caycar capaz imanopapis aruyta munar, manami yarpachacushwanchu imano chayga reuniuncunaman o predicaciunmanpis aywanapaj michamänanchita. Ichanga pacienciacoj carga tantiarcushwanmi chay trabajo maycho caycashganta, ayca horata arunanpaj cashganta, jina familianchipita y Jehovapitapis mana raquicächimänanchita.

10. ¿Imatataj rurashwan cada cadala más pacienciacoj runaman ticranapaj?

¹⁰ Jehovata mañacushwan yanapämänanchipaj. Santo espiritunwan Jehová yanapämäshun pacienciacoj canapaj, chaymi imaypis santo espiritunta gomänanchipaj mañacushwan (Gál. 5:22, 23). Masraj chayta rurashwan sasa captin pacienciacoj canapaj ima problemacunapäpis pasaycar (Luc. 11:9, 13). Jina mañacuyninchicho nirishwan yanapämänanchipaj pay yarpashganno yarpänapaj, nircur mañacushganchimanno calpachacushwan waran waran pacienciacoj canapaj. Chauraga mana jaguiypa Jehovapa yanapacuyninta ashiptinchi y quiquinchipis shongupita calpachacuptinchega Jehová ichic ichiclapa yanapämäshun pacienciacoj runaman ticranapaj.

11, 12. ¿Imanirtaj ninchi Jehová pacienciacoj cashganta?

¹¹ Bibliaga wilacunmi achca runacuna pacienciacoj cashganta. Chaymi ali canman chaycunaman yarpachacunapaj, chayta rurarga paycunapita yachacushwanmi. Puntataga ricärishun imano Jehová alapa pacienciacoj cashganta, nircur waquincunapitapis parlarcushun.

¹² Edén huertacho, Satanás lulacur Jehovata manacajman churargan y mana ali mandacoj cashganta nergan. Jehovaga Satanasta  jucla ushacächinman cargan, pero alapa yachaj y pacienciacoj car jaguirirgan tiempuraj pasananta musyacänanpaj Paylami derechuyoj cashganta gobernananpaj. Chaycamaga jinala aguantaycan runacuna jutinta ganratananpaj. Jina pacienciacoj car shuyaraycan pï maypis reguipäcunanpaj, chaynopa imaycamapis cawacärinanpaj (2 Ped. 3:9, 15). Jehová pacienciacoj cashganraycur lapan alicuna rurashgancunaman yarpachacurga, yanapämäshun mana yamacaypa shuyaränapaj cay mundupa ushacayninta.

13. Jesús Pachacho caycar, ¿imanotaj Taytanno pacienciacoj cargan? (Fotutapis ricay).

¹³ Jesuspis cay Pachacho caycar Taytanno pacienciacoj cargan. Ali tucoj fariseucunawan y escribacunawanga öraga manami facilchu cargan pacienciacoj cananpaj, ichanga Taytanno car payga manami jucla piñacurganchu. Chay runacuna ashlipaptinpis gayapaptinpis Jesusga manami cutichirganchu, chaypa trucan mana ajayaypa pacienciawan aguantargan (Juan 8:25-27; 1 Ped. 2:23). Chaychi Bibliapis nimanchi Jesucristo imano nacashgantapis tantiacäriy, payga juchasapa runacuna contran sharcuptinpis Tayta Dios munashganno imaypis cawargan (Heb. 12:2, 3). Chauraga Jehovapa yanapacuyninwanga ima pruebacuna captinpis pacienciawan aguantashwanmi.

14. ¿Imatataj yachacunchi Abrahán pacienciacoj cashganpita? (Hebreos 6:15; fotutapis ricay).

¹⁴ Capaz achca watapana shuyaraycanchi cay mundupa ushacaynin chayamunanta, y öraga ‘quevä noga chayta ricaycushaj’ nirpis yarpanchimi. Chayno captenga, ¿imaraj yanapämäshun pacienciawan shuyaränapaj? Chaypäga Abrahanpita parlarcushun.  Paytaga Jehová nergan “qampita miraqkunatami ali rikashaq tsaytsikaman mirar jatun nación rikakunanpaq” nir. Chay wichanpäga Abrahán 75 watayojna caycargan, ichanga wamrancunaga carganrächu (Gén. 12:1-4). ¿Abrahanga ricashgachuraj Jehová aunishganta? 25 watacuna pasarcuptinraj Abrahanpa wamran Isaac yurirgan. Y 60 watacuna masraj pasacuptin Esauwan Jacob wilcancuna yurirgan (leiriy Hebreos 6:15). Ichanga Abrahanga manami ricashgachu miraynincuna jatun naciunman ticrashganta, ni Aunishga Pachamanpis yaycushganta. Chayno captinpis Jehovata sirvir cushishga caycargan (Sant. 2:23). Paraisucho Abrahán cawarimuptenga alapachi cushicunga yäracoj cashganpita Pachacho lapan runacuna bendecishga cashganpita (Gén. 22:18). ¿Imatataj yachacunchi? Capaz manami ricashwanchu Jehovapa lapan promesancuna cumplicushganta canan wichan. Ichanga Abrahanno pacienciacoj captinchega Jehová cananmi bendecimäshun y shamoj tiempuchoga masraj canga (Mar. 10:29, 30).

15. ¿Imacunapitataj ali canman Bibliata leiptinchi yachacunapaj?

¹⁵ Alichi canman unay Diospa sirvejnincuna pacienciacoj cashganpita yachacunayquipaj (Sant. 5:10). Bibliachoga runacuna chayno cashganpita wilacun. b Davidga mozularaj caycar acrashga cargan rey cananpaj, ichanga achca watacunataraj shuyarargan mandacur galaycunanpaj. Simeonwan Anapis Jehovata mana cachaypa sirvipäcurgan Mesías yurircur chayamunancama (Luc. 2:25, 36-38).  Chayno runacunapita yachacur tapucuy: “¿Imataj payta yanapargan pacienciacoj cananpaj? ¿Ima alicunataj chasquergan pacienciacoj cashganpita? ¿Imanotaj payno cäman?” nir. Jina mana pacienciacoj caj runacunapitapis yachacunquimanmi (1 Sam. 13:8-14). Chayno rurarga tapucuy: “¿Imanirtaj chay runaga mana pacienciacoj cargan? ¿Ima mana alicunamantaj chayargan pacienciacoj mana cashganpita?”.

16. ¿Imaraj pasanga pacienciacoj runa captinchega?

¹⁶ Imanirtaj ali caycan pacienciacoj captinchi. Pacienciacoj captinchega imaypis jaucala o tranquilo caycäshun, chayga yanapämäshun saludninchipis ali caycänanpaj. Jina waquincunawan ali apanacur juc shongunola cawacushun. Y imalapitapis jucla mana rabiacurga, mana alicunamanga mana chayashwanchu (Sal. 37:8; Prov. 14:29). Chaycunata rurarga Jehovano pacienciacoj cashun, y payman guelicamur amigun caymanpis chayashun, chayga imapitapis más valuryojmi.

17. ¿Imatataj cada cadala ruraycashwan?

¹⁷ Canan ricashganchinopis alapa alimi caycan calpachacuptinchi pacienciacoj runaman ticranapaj. Öraga chayno runa canapaj sasa captenga, Jehová yanapämäshun pacienciacoj cananchipaj. Chaymi mushoj mundo chayamunancama, Jehovaman mana ajayaypa shuyaraycashwan. Bibliapis nin Diosninchega “kuyakuq kashpanmi payman yärakuqkunata [o shuyaraycajcunata] yanapan” (Sal. 33:18). Chaymi calpachacushwanmi cada cadala pacienciacoj runaman ticranapaj.