Chay estudiucho yachacushcanchi caway vidachoga imapitapis masga, lapan runacunapis lapan angelcunapis yarpashwanmi Jehovapa jutin respetashga cayculänanpaj. Nircurpis mana gongashwanchu Jehovapa gobiernunla ima gobiernupitapis más ali caycan. Y pï runacunapis Jehovalata adurar mana raquicaylapa caycaptenga, Diospa jutintapis respetaycanmi.

¿Imanirtaj yachacuycanchi imapitapis más puntataga Jehovapa jutin respetashga y santificashga cayculänanpaj? Quimsalata ricärishun.

Naupataga, Edén huertachomi Satanasga Jehovapa jutinta mana respetar manacajpaj churargan. Evata imata tapupashganchomi cuentata gocunchi Satanás imano cashganta, payga Diosta tumparmi nergan mana cuyapäcoj cashganta, y ima mandacushgancunapis sasa cumplinapaj cashganta. Jina nerganchi ‘imata micunayquipaj munashgayquitaga Dios michaycäshunquimi’ nir. Satanás pasaypa lulacoj cashgan chaycho ricacämush. Jinamanpis Jehovapita lutanta parlarga Diabluman ticrash, chayga ninan tumpacoj cashganta (Juan 8:44). Evaga cäsuparganmi Satanasta, chayta rurar autoridäyoj Diospa contranman ticrargan (Gén. 3:1-6). Canan wichanpis chaynola Satanasga Diospa jutinta manacajman churar ganrataycächinla. ‘Diosga pitapis cuyapanchu’ nirmi imaycata ruran pï runacunapis Diosta manana cäsucunanpaj. Cay lapanta ricarga Jehovapa sirvejnincunaga laquicunchimi Diosninchipa santo jutilanpita pipis lutanta parlapäcuptin. Diablo galaycunancho lulacushganraycurmi canan wichan imayca mana alicunala miraycämun.

Ishcay cajchoga, lapan camashgancuna munashgannola cananpäraycurmi Jehovaga decidido caycan jutinta respetachinanpaj. Imapitapis chaytarämi cumplichiyta munan Jehovaga. Chaymi payga cayno nin: ‘Jutï santu kashqanta runakunata musyatsishaq’ (Ezeq. 36:23). Padre nuestro oraciuncho Jesús nergan: “Jutiki respitashqa kaykulätsun”. Caychoga claro ricaycanchi imatapis mañacurga puntataga Diospa jutilantaraj alabaycunapaj (Mat. 6:9). Bibliaga cutin cutinmi wilacun Jehovapa jutinta alabaycunapaj. Waquin textucuna cayno nin: “TAYTA DIOSPA jutinta joqarir adorapäkuy” (1 Crón. 16:29; Sal. 96:8). “Jutinta joqarishpayki adorapäkuy” (Sal. 66:2). “Jutikita joqarirmi imaypis adorashayki” (Sal. 86:12). Jinamanpis juc cuticho quiquin Jehová jutinpita parlarmi Jesusta nergan: “Munayniyuq kashqäta musyatsishqänömi yapaypis musyatsishaq”. Chayta nergan Jesús mañacushgancho ‘jutiqui glorificashga cayculächun’ niptinmi (Juan 12:28). a

Quimsa cajcho, Jehová munan jutin imaypis alabashga cananpaj. ¿Imanoraj Jehovapa jutin ricashga canga Jesús Gobernamuptin Mil Watacuna pasariptin y ushanan prueba pasarcuptinpis?  ¿Imanoraj ricapäcunga runacunapis angelcunapis Jehovapa jutin chay wichan respetashgana y alabashgana caycaptenga? Chay wichanpitaga manami pipis juzgashganachu canga Jehovapa jutinta respetashganpita o manapis. Runacunaga ushanan pruebata pasar juchaynajna carcaycanga y mana wanuypana cawarcaycanga. ¿Imanoraj chay wichan Jehovala autoridäyoj cashgan ricashga canga? Cieluchopis Pachachopis claro caycanga Jehovapa gobiernunla lapanchipaj ali cashganta. Jehovapa maquinchoga pï maypis cushi cushilachi carcaycanga. ¿Ima mastataj nishwan Jehovapa jutinpitaga?

Ni imaraycurlapis canganachu Jehovapa jutin ganratashga cananpäga. Mana wanuypana cawaycarpis Jehovapa jutintaga cieluchopis Pachachopis respetaycäshunlami. Chay wichancunacho imaycacunataraj Jehovaga jutinraycur ruraycanga. Jesús gobernar ushar autoridäninta Papäninta cutichiptenga, quiquin Diosninchipa maquinchonami lapanchi cayculäshun (1 Cor. 15:28). Y Pachacho lapan cawajcunaga cushi cushilami Jehovapa wamrancuna car libre goyäcushun (Rom. 8:21). Mayraj Jehová cushicuyculanga cieluchopis y Pachachopis juc familialana lapan caycajcunata ricar (Efes. 1:10).

¿Jehovapa familiancho caycajcunaga imataraj cushi cushila rurayta munapäcunga? Jehovapa cuyaylapaj jutintachi alabayta munashun imaycamapis. Salmuta guelgaj David, Diospa jutinpita parlar cayno nergan: “TAYTA DIOS alabashqa kaykulätsun […]. Imayyaqpis alabashqa kaykulätsun” (Sal. 72:18, 19). Caycashganchicho caypa wacpa ricachacurga yarpächimäshunchi Jehovapa jutinta masraj alabaycunapaj.

Jutinpita shumaj yachacurga, quiquin Jehová imano cashganpitami yachacuycanchi, Payga cuyacoj Diosmi (1 Juan 4:8). Mana gongaylapami yarpaycäshun cuyacoj cashpan camamashganchita, Churintapis mandamushganta noganchiraycur wanunanpaj; jina cuyacoj cashpan yachachimanchi imano mandacoj pä caycan. Chay wichanpis ricayculäshunmi amatar cuyacoj cashpan imacuna mastaj goycalämanchi. Manami uticäshunchu Taytalanchi Jehovata sirvir jutinta alabayparaj cantapänapaj (Sal. 73:28).