35 CAJ YACHACHICUY
123 CAJ CANCIÓN Ali shongulanchiwan cäsucushun
Imanotaj yanapashwan congregaciunpita jorgushga cajcunata
“Jana patsachöpis kushikärin juk runalapis jutsa rurayta kacharir Tayta Dios munashqannöna kawaptin. Tsayno kushikärin isqun chunka isqun (99) ali ruraq runakunapaq kushikushqanpitapis masraqmi” (LUC. 15:7).
¿IMATAJ YACHACUSHUN?
Yachacushun imanirtaj waquincunaga congregaciunpita jorgushga capäcun y imanotaj ancianucunapis yanapacun paycuna yapay Jehovapa favorninta taripäcunanpaj.
1, 2. 1) ¿Imaraj pasanga mana arrepenticur juchata ruraycarla cacojcunawan? 2) ¿Imatataj Jehová munayculan juchalicojcuna imata rurananpaj?
JEHOVAGA manami pitapis cachapanchu juchata rurarla cacunanta (Sal. 5:4-6). Payga munayculan Palabrancho lapan mandamashganchicunata cäsucunanchita. Ichanga musyanmi juchayoj car imalachopis pantashganchita (Sal. 130:3, 4). Pero nawinpäga mana alimi caycan cayno nipäcojcuna: “Tayta Dios perdonamänantsipaq kaykaptinqa jutsata rurashqapis manami imananpistsu” (Jud. 4). Chaymi Bibliapis nin mana arrepenticojcuna o ‘jutsalata ruraj runakunapis ushakanqa’ Armagedón guerracho (2 Ped. 3:7; Apoc. 16:16).
2 Chayno captinpis, Jehovaga manami munanchu maygalanpis ushacänanta. Guepa yachachicuycho ricashganchino Bibliaga clarumi wilacun Diosga munayculan lapan runacuna arrepenticunantami (2 Ped. 3:9). Ancianucunaga Jehovanola pacienciawan calpachacärin jatun juchata rurajcuna arrepenticunanpaj y Jehovapa favorninta yapay taripäcunanpaj. Pero waquincunaga Jehová yanapänanta chasquicunchu (Is. 6:9). Waquincunaga jinalami juchata ruraycarla cacärin ancianucuna cutin cutin yanapaycaptinpis. Chayno captenga, ¿imataraj ancianucuna rurapäcunman?
“GAMCUNAPITA JORGUPÄCUY”
3. 1) Diospa Palabran nishganno, ¿imaraj ruracanman pipis juchanpita mana arrepenticuptin? 2) ¿Imanirtaj nishwan pipis congregaciunpita jorgushga cananpäga quiquin decidicushganta?
3 Pipis juchanpita mana arrepenticuptenga ancianucunaga 1 Corintios 5:13 texto nishgantami cäsucärin, chaycho nin “jucha ruragtaga gamcunapita jorgupäcuy” (Mushog Testamento, MT). Jorgushga cananpäga quiquinmi decidicush; chaymi Bibliapis nin ima murushganchitami cosechanchi (Gál. 6:7). Ancianucuna cutin cutin yanapaycashgantapis chasquicärishgachu (2 Rey. 17:12-15). Juchalata ruraycashganchomi ricacämun Jehovapa mandätuncunata ichiclapis mana respetapäcushganta (Deut. 30:19, 20).
4. Pipis jorgushga cananpäga, ¿imanirtaj congregaciuncho juc wilacuyraj ruracämunman?
4 Pipis juchanpita mana arrepenticushganraycu congregaciunpita jorgushga cananpäga, congregaciunpa naupanchomi juc wilacuy ruracämun ‘payga mananami Jehovapa testigunnachu’ a nir. Chayga ruracämun manami jucha rurajta pengacächinanpächu sinoga Bibliapa mandätuncunata cäsucunanchipämi, chaycho nin: “Paykunawan mana juntakänaykipaqmi niykä. Paykunawanqa mikunalaykipaqpis ama juntakaytsu” (1 Cor. 5:9-11). Chayno Jehová consejacushganga alimi caycan. Chaymi apóstol Pablupis cayno nergan: “¿Manaku musyapäkunki tsay jutsaqa walka levadürala mäsata jakatsishqanno kashqanta?” (1 Cor. 5:6). Jucha rurajcuna jinala congregaciuncho cacuptenga, waquincunaga ‘imapänataj Diosta cäsucuycäshaj’ nirpis jamurpar galaycunmanchi (Prov. 13:20; 1 Cor. 15:33).
5. ¿Imanotaj tratashwan congregaciunpita jorgushga cajcunata y imanir?
5 Chauraga, ¿imanotaj tratashwan congregaciunpita jorgushga cajcunata? Paywanga mananami juntacanchinachu, pero manami yarpashwanchu payga imaypis manana cutimunanpaj cajta, ogracashga uysha japuynola caycan. Chay jorgushga cajcunaga unaycho Jehovata sirvinanpaj aunicärish, canan ichanga Bibliapa consejuncunata mana cäsucushganraycu Dios aunicushgan imaycamapis cawananpaj bendiciunta ogrananpaj caycan (Ezeq. 18:31). Imano captinpis Jehová perdunaptenga, tiempo cashganyaj, chay runaga congregaciunman cuticamuyta puedinmi. Chauraga, ¿imanotaj ancianucunaga yanapanman congregaciunpita jorgushga cajcunata?
ANCIANUCUNA IMANOTAJ YANAPAN CONGREGACIUNPITA JORGUSHGA CAJCUNATA
6. ¿Imacunataraj ancianucuna rurapäcunga congregaciunpita jorgushga cajcunata yanapänanpaj?
6 Pilapis congregaciunpita jorgushga captenga ancianucunaga jinalami yanapacuyta munapäcun. Jorgushga cananpaj quimsa yanapacoj ancianucuna wilapaptenga nipäcungami cutimuyta munaptenga imacunataraj rurananpaj cajta. Jina nipäcungami juc ishcay quillacuna pasarcuptin yapay juntacärinanpaj. Chaycho ancianucuna cuentata gocäringa juchanta cacharishgacu o manacush. Yapay juntacärinanpaj chay runa acuerducho caycaptenga ancianucunaga chay junaj shacyächiylapa parlapanga congregaciunman cutimunanpaj. Chay runacush ima cambiulatapis ruranrächu ancianucunaga jinalami payta yanaparcaycanga.
7. Tayta Jehovanola, ¿imacunata rurartaj ancianucunaga laquipanga congregaciunpita yargucojcunata? (Jeremías 3:12).
7 Ancianucunaga Tayta Jehovanola cuyaparmi laquipan congregaciunpita yargucojcunata. Unaycho mana cäsucoj israelitacuna juchalicuycaptinpis, Jehovaga manami nirganchu ‘arrepenticuptinraj yanapäshaj’. Chaypa trucanga paycunataga imaycata rurar yanapashgalami. Ishcay caj yachachicuycho yachacushganchino Oseas imapa pasashgan ejempluwanmi Jehovaga tantiachicurgan alapa laquipäcoj cashganta. Oseasta nergan warmiqui juc runawan jarucuycäshuptiquipis paywan amistacuy (Os. 3:1; Mal. 3:7). Jehová cashgannolami ancianucunaga imaycata rurapäcunga jucha rurajcuna congregaciunman shacamunanpaj, cuticamunanpäga imata rurarpis michäcungachu (leiriy Jeremías 3:12).
8. Aywacoj mozupita yachacushganchi, ¿imatataj tantiachimanchi Jehová laquipäcoj cashganpita? (Lucas 15:7).
8 Ishcay caj yachachicuycho parlashcanchi aywacoj mozupita. Mä chayta yarparcushun. Chay mozuta “karulataraq kutiykaqta rikärirshi papäninqa kushikushpan warakayla aywar makalakurkur mutsarqan” (Luc. 15:20). Cuyapashpanmi papäninga nirganchu ‘perduntaraj mañacamächun’ nir. Chaynolami ancianucunapis calpachacärin congregaciuncho ogracashga uyshano mayganlapis caycajta cutichimunanpaj (Luc. 15:22-24, 32). Jucha ruraj mayganlapis cuticamuptenga ¡amatar cushicun Taytalanchi Jehová, Jesús, angelcuna y lapan congregaciunpis! (leiriy Lucas 15:7).
9. ¿Imata rurananpätaj Jehová nin jorgushga cajcunata?
9 Caycama yachacushganchinopis congregaciuncho pipis juchata ruraycälar cacunanta Jehovaga manami cachapangachu. Chayno captinpis manami gongaycur jaguiringachu, sinoga cutimunanpaj yanapanga. Oseas 14:4 nimanchi Jehová imano perdunan arrepenticojcunata, cayno nin: “Rabyashqa kaykashqä pasaptinmi imaypis cäsukamänaykipaq yanapashayki. Jutsata rurashqaykipitapis perdonashaykimi”. ¡Alimi canman ancianucuna altantula caycaptin juchayojcuna cambiucunata rurar galaycuptin! ¡Jina congregaciunpita jorgushga cajcuna rasla Jehovaman cutimuptenga alichi canman!
10, 11. ¿Imanotaj ancianucuna yanapanman unaycho congregaciunpita jorgushga cajcunata?
10 ¿Imanotaj yanapanman ancianucuna unaypitana congregaciunpita jorgushga cajcunata? Capazchi unay juchata rurashganta manana rurarcaycannachu ni yarpapäcunnachu ima jucharaycu jorgupäcushgantapis. Imano captinpis ancianucunaga ashipäcamungami, nircur watucoj aywananpaj. Tarircurga ancianucuna paycunawan Jehovata mañacunga y shacyächenga congregaciunman cutimunanpaj. Unayna congregaciunpita yargucushgana carga yapayrächi caycan Bibliapita yachacunanpaj. Chaymi congregaciunman cutimuyta munaptenga ancianucuna nipäcunga Bibliapita pilapis yachachinanpaj, yapay Testigo cashganta congregaciuncho manaraj wilacaramuptinpis. Pero ancianucunalami acrapäcunga maygan hermanulapis Bibliapita yachachinanpaj cajta.
11 Ancianucunaga Jehovanola laquipäcoj cananpaj calpachacärin. Chaymi lapan jorgushga cajcunata ashipäcamunga cutichimunanpaj, ‘congregaciuncho shuyarpaycanchi’ nipäcunga. Pipis juchanta cacharir arrepenticushgana carga achca tiempo mana pasanmanrächu cutimunanpaj (2 Cor. 2:6-8).
12. 1) ¿Ima juchacuna ruracashga captintaj ancianucunaga shumajraj yarpachacärinan? 2) Pipis jatun juchata ruraptenga, ¿imanirtaj yarpashwanchu paycunata Jehová manana perdunananpaj? (Wilacuytapis ricay).
12 Öraga ancianucunaga aliraj yarpachacärinan congregaciunpita mayganpis jorgushga caj cutimunanpaj, waquincunaga jorgushga cashga wamracunata nacachipäcushganraycu o yatapayparaj abusapäcushganraycu, waquincunaga Diospa contrancho ticrapäcush o imaycata rurar majanpita raquicäcurish jucwan aywacunanpaj. Chauraga ancianucunaga shumajraj musyapacaramunan paycuna rasunpa arrepenticärishganta o mana (Mal. 2:14; 2 Tim. 3:6). Paycunaga congregaciunta washänanpämi carcaycan, pero gongapäcunmanchu: Jehová chasquingami pipis juchanpita rasunpa arrepenticuptin. Pasaypa mana alicunata rurashga cajcuna cutimuyta munaptin ancianucuna shumajraj yarpachacäriptinpis manami yarpanmanchu paycunata Jehová imaypis manana perdunananpaj cajta b (1 Ped. 2:10).
CONGREGACIUNCHO CAYCAJCUNAGA IMATATAJ RURANMAN
13. ¿Imanotaj tratashwan anyapar corregishga cajcunata y congregaciunpita jorgushga cajcunata?
13 Pasaj yachachicuycho ricashganchino, öraga congregaciunpa naupanchomi wilacaramun maygan hermanutapis anyapar corregipäcushganta. Juchancunata cacharir arrepenticushga captinmi paywan jinala juntacanchi (1 Tim. 5:20). Payga cristiano mayilanchimi caycan, shacyächinanchimi jinala Jehovata sirvinanpaj (Heb. 10:24, 25). Ichanga jorgushga cajcunawanmi micunalapäpis juntacanchichu (1 Cor. 5:11).
14. Congregaciunpita jorgushga cajcuna mayganlapis reuniunman shamuptenga, ¿imataraj cada ununchi decidishun? (Fotutapis ricay).
14 Chauraga, ¿niycanchi congregaciunpita jorgushga cajcunata ricaylatapis mana ricänanchipaj? Manami. Paywan mana juntacänanchipaj claro caycaptinpis, familianchi o amigunchi captenga alichi canman reuniunman shacamunanpaj invitaptinchi. Salunman shamuptenga, ¿imanotaj chasquishwan? Unayga ‘alilachu’ niylatapis puedishcanchichu. Canan ichanga Bibliata leir ali tantiarcur quiquinchipita canga imata nirlapis chasquinapaj. Pero saludarpis paycunawanga parlar cacushwanchu ni nishwanchu maylachopis tincur pasiapacunapaj.
Bibliata leir ali tantiarcurmi cada cristiano decidinga jorgushga cajcunata reuniunman shamunanpaj invitananpaj o shamuptin saludananpäpis. (14 caj parrafuta ricay).
15. 2 Juan 9-11 textucho, ¿pïcunapätaj apóstol Juan parlaycargan? (“ ¿Ima juchacunapitataj apóstol Juan y Pablo parlaycargan?” nej recuadruta ricay).
15 Capazchi pilapis tapucunman: “¿Manachu Bibliaga mandamanchi jorgushga cajcunata ni saludarlapis mana chasquinanchipaj y chayno carga ‘lutanta ruraycashganchita’?” (leiriy 2 Juan 9-11). Apóstol Juanga parlaycargan Diospa contrancho ticrar imaycata rurar engañacojcunapaj y mana arrepenticur juchalata rurar cacojcunapaj (Apoc. 2:20). Chaymi ancianucunaga paycunata watucajlapis aywangachu, chayno captinpis capaz paycunaga imaylapis cuticamunga, pero chaycamaga saludashunchu ni congregaciunman shamunanpäpis invitashunchu.
JEHOVANOLA LAQUIPÄCOJ Y PERDUNACOJ CASHUN
16, 17. 1) ¿Jucha rurajcuna ima ruranantataj Jehová munan? (Ezequiel 18:32). 2) ¿Imata rurartaj ancianucunaga Jehovawan junto arupäcun?
16 ¿Imatataj yachacushcanchi cay pichga yachachicuycunacho? Jehovaga manami munanchu pilapis wanuylacho ushacänanta (leiriy Ezequiel 18:32). Munayculanmi pï juchayojpis favorninta yapay tariycunanta (2 Cor. 5:20). Chaymi Payga unaypita imaycata rurashga juchata rurajcuna yapay cuticamunanpaj. Y cushicuypämi caycan canan wichanpis ancianucuna Jehovawan junto arupäcuptin y yanapacäramuptin jucha rurajcuna arrepenticur cutipäcamunanpaj (Rom. 2:4; 1 Cor. 3:9).
17 ¡Mayraj cielucho cushicärin jucha rurajcuna congregaciunman cuticäramuptin! Aumi, amatar Taytalanchi Jehová cushicun, juchata rurajcuna ogracashga uyshano caycar congregaciunman cuticamuptin. Waran waran yarpachacuycäshun Jehová Diosninchi laquipäcoj, perdunacoj y amatar cuyapäcoj cashganman. Chayta rurar Paytaga masraj cuyayculäshun (Luc. 1:78).
CANCIÓN 111 ¡Imanir-raj mana cushish cashwanchu!
a Unayga niycashcanchi gargushga cajcuna, ichanga 1 Corintios 5:13 textucho Pablo nishgannopis cananga nishun jorgushga cajcuna.
b Bibliaga wilacunmi pï runacuna manana perdunashga cananpaj. Paycunaga quiquinmi Diospa contrancho churacärish. Chayno juchalicojcunataga Jehovawan Jesús juzgapäcunga, decidipäcunga juchancuna perdunashga cananpaj o manapis (Mar. 3:29; Heb. 10:26, 27).
