1. Pilapis jatun juchata ruraptenga, ¿arrepenticuyta puedinmanchuraj?

 PASAJCHO yachacushcanchi imatataj apóstol Pablo consejacurgan Corinto congregaciunpita mana arrepenticoj jatun juchata ruraj runata jorgunanpaj. Acracämushga texto nishgannopis, Taytalanchi Jehovaga yanaparcunmanmi juchanpita pipis arrepenticunanpaj (Rom. 2:4). ¿Imanotaj Jehová ancianucunawan pitapis arrepenticunanpaj yanapan?

2, 3. ¿Imatataj rurashwan maygan hermanunchipis jatun juchata ruraptin y imanir?

² ¿Upälalachuraj cacushwan maygan hermanunchipis jatun juchata ruraptin? Manami. Ancianucuna yanapänanpäga ima jucha rurashganta wilaj aywananpaj nishwan. Chayta ruraptinraj ancianucunaga yanapanga (Is. 1:18; Hech. 20:28; 1 Ped. 5:2).

³ ¿Chay hermano jucha rurashganta ancianucunata wilapayta mana munaptenga? Chay hermanuta yanapayta munar y alapa cuyarmi, quiquinchina ancianucunata wilacoj aywashwan. Juchancunata mana cachariptenga, Jehovapa amistänintapis ograrinmanchi y culpanraycu waquincunapis Jehovapa jutinpita lutanta parlar galaycärinmanchi. Sasa captinpis Jehovata y chay hermanuta cuyarmi, valurcharcur ancianucunawan parlashwan (Sal. 27:14).

 IMANOTAJ ANCIANUCUNA JATUN JUCHA RURAJCUNATA YANAPAN

4. Jucha rurajcunawan ancianucuna juntacaptin, ¿ima ruraytataj masga munapäcun?

⁴ Pilapis jatun juchata ruraptin ancianucunaga paycunapita quimsa cajcunata acran a jucha rurajwan parlacärinanpaj. Paycunaga ñanpu shongulanwan arrepenticunanpaj yanapaptinpis manami obliganmanchu juchanta cacharinanpaj (Deut. 30:19). Davidga jucha rurashganpita arrepenticushga cargan (2 Sam. 12:13). Pero waquincunaga Jehová anyapashgantapis cäsucuyta munanchu (Gén. 4:6-8). Chayno captinpis, ancianucunaga imaycatarämi ruranga jucha rurajcuna arrepenticunapaj. ¿Biblia ima nishgantataj ancianucuna yarpanman?

5. Anyapashgan hora, ¿imanoraj ancianucunaga tratanman jucha rurajcunata? (2 Timoteo 2:24-26; dibujutapis ricay).

⁵ Ancianucunaga pï jucha rurajtapis ricapäcun ogracashga uyshatano (Luc. 15:4, 6). Chaymi paycunawan juntacaptenga cuyapaylapa y ali shimilanwan anyapan. Ancianucunaga toscuypaga ni jagayächiypaga parlanmanchu. 2 Timoteo 2:24-26 (leiriy) nishganman yarparar ali tratananpaj calpachacärin. Cuyapashpanmi imaycataraj ruran shongunta yatananraycu.

6. Jucha rurajwan manaraj juntacar, ¿imataraj rurapäcunman ancianucuna ali yanapacunanpaj? (Romanos 2:4).

⁶ Jehová pushananpäga shumajrämi preparacärin. Pablo cayno nishgantami ancianucunaga yarpapäcunman: Diosga “kuyapäkuq, pacienciakuq y perdonakuq karmi jutsa ruraykunata” cacharinanpaj yanapacuycan (leiriy Romanos 2:4). Paycunaga calpachacärin Jehovano jucha rurajcunata cuyapänanpaj, uysha michicoj japuy Cristo mandashganno rurananpaj (Is. 11:3, 4; Mat. 18:18-20). Manaraj jucha rurajwan juntacuptin, ancianucunaga Jehovata mañacun jucha ruraj arrepenticunanpaj y yanapänanpaj. Bibliata y publicaciuncunatapis shumajraj yachacunan jucha ruraj imapa pasashganta ali tantiacärinanpaj. Jinamanpis ancianucunaga parlapacun imacunaparaj chay hermano pasashga y imacunaraj juchamanpis chayachishga (Prov. 20:5).

7, 8. ¿Imata rurartaj ancianucunaga Jehovano pacienciacoj canman?

⁷ Ancianucunaga Jehová pacienciacoj cashgannolami caycan. Yarpapäcunmi imanotaj unay wichan jucha rurajcunata  yanapashga. Caintaga tantiachiylapämi Jehová parlapash, mana arrepenticuptenga mana aliman chayananpaj cajta y alita ruraptenga bendicishga cananpaj nergan (Gén. 4:6, 7). Juc cuticho Jehová Natanta mandargan David juchata rurashganraycu anyapänanpaj, y juc tincuchicuywan tantiachicurgan juchanpita arrepenticunanpaj (2 Sam. 12:1-7). Jinamanpis cutin cutin mana cäsucoj Israel naciunman Jehovaga profetancunata mandargan (Jer. 7:24, 25). Shuyararganrächu juchata ruraycälar cashganpita arrepenticärinanta, payga imaycata rurargan yanapacunanpaj juchata rurarcaycaptinpis.

⁸ ¿Imatataj ancianucuna rurapäcun jatun juchata rurajcunata Jehovanola yanapananpaj? Alimi caycan 2 Timoteo 4:2 texto nishganno “mana ajayaypa” paycunata tantiachiptin. Ancianucunaga olgüpaypa parlanmanchu, chaypa trucanga pacienciawanmi jucha rurajcunata yanapanman corrigicunanpaj. Ancianucuna rabiaycar anyapaptenga, jucha rurajcunaga imatapis chasquicungachu ni arrepenticuytapis munangachu.

9, 10. ¿Imatataj ancianucuna rurapäcunman pipis imanir juchalicushganpita cuentata gocunanpaj?

⁹ Ancianucunaga aliraj musyapäcunman juc hermano imanirtaj juchata rurash. Capazchi Bibliatapis mana leir y predicaciunmanpis mana yargur Jehovapita raquicar galaycush. Jehovatapis shongupita mañacuycashganachu o capazchi shongunchopis mana ali yarpaycuna winar galaycush. Piwan juntacashgan y imacunata ricashganpis capaz manacajcunata yarpächish. ¿Cuentata gocunchu ima rurashgancunawanpis Jehovapa shongunta laquichishganta?

¹⁰ Ancianucunaga tapupanmanmi juchata ruraj hermanuta, cuentata gocunanpaj imanir juchalicushganpita. Tapucuptenga respetulawanmi ruranman mana pengachiylapa (Prov. 20:5). Jinamanpis ancianucunaga Davidwan Natán rurashgannomi ima tincuchicuylawanpis tantiachinman jucha rurashgan imanir mana ali cashganta. Chayno captenga chay juchata ruraj hermanuga capazchi punta caj reuniuncho ancianucunawan caycar juchanpita pësacunman o arrepenticurpis galaycunman.

11. ¿Imanotaj jucha rurajcunata Jesús ricaj?

¹¹ Ancianucunaga calpachacärin Jesusno cananpaj. Tarso marcapita, Sauluta juc cuticho Jesús cayno nergan: “Saulo, Saulo, ¿imanirtaq qatikachaykämanki?”. Chaynoga tapurgan ima ruraycashgan mana ali cashganta cuentata gocunanpaj (Hech. 9:3-6). Y Apocalipsis 2:20, 21 textucuna nishganno “Jezabel” warmipaj parlar Jesús nergan: “Jutsa ruraykunata kacharinanpaq niykaptïpis tsay warmi manami kacharintsu”.

12, 13. ¿Imataraj ancianucuna rurapäcunga tiemputaraj gonanpaj jucha rurajcuna arrepenticunanpaj? (Fotucunatapis ricay).

¹² Jesusno ancianucunaga manami jucla yarpapäcunchu juchayoj runa manana arrepenticunanpaj. Waquincunaga ancianucunawan punta juntacashganlachomi arrepenticärin ichanga waquincunaga tiemputaraj necesitan. Paycuna capazchi reuniunpita yargurir mana ali rurashganpita cuentata gocunman y Jehovatapis perdunta mañacunman (Sal. 32:5; 38:18). Chayno captin yapaycho juntacäriptin arrepenticushgana caycanman.

¹³ Pipis juchata rurashganpita arrepenticunanpaj ancianucuna yarpachacächinanpäga cuyaparmi bonitula parlapanman. Jina  Jehovata mañacärin juchayoj runa cutimunanpaj y arrepenticunanraycu imayca rurashgancunata bendicinanpaj (2 Tim. 2:25, 26).

14. Pipis juchanpita arrepenticushgana captenga, ¿rasunpa cajchoga pitaj yanapashga y imanirtaj chayta nishwan?

¹⁴ Pipis juchata rurashganpita arrepenticuptenga, amatar cushicuypämi (Luc. 15:7, 10). Pero pipis arrepenticunanpäga Jehová yanapashganpita caycan. Chaymi apóstol Pablupis cayno nergan: “Capazchari Tayta Dios yanapanqa jutsankunata kacharir pay munashqannöna kawapäkunanpaq” (2 Tim. 2:25). Aumi, maygan cristianupis juchata rurashganpita jucnopana yarpänanpaj y alicunata rurarna galaycunanpäga, quiquin Taytalanchi Jehovami yanapan. Maspis apóstol Pabluga tantiachicunmi: arrepenticojcunaga masräshi Bibliapita rasunpa cajta yachacun y Diablupa trampanpita gueshpicur Diospa maquinchona cawar galaycun (2 Tim. 2:26).

15. ¿Imata rurartaj ancianucunaga arrepenticojcunata jinala yanapaycanman?

¹⁵ Maygan juchayojpis arrepenticushgana captenga, ancianucunaga watucaramungami yanapananpaj, chaynopa yäracuynin sinchiyänanpaj ima tentaciuncunamanpis mana ishquinanpaj y Jehovapitapis mana raquicärinanpaj (Heb. 12:12, 13). Ancianucunaga wilapacur manami puringachu ‘tagay hermano cay juchata rurash’ nir. Pero imapis wilanapaj captenga congregaciuntaga wilapäcungami.

“LAPANPA NAWPANCHO ANYAPANKI”

16. 1 Timoteo 5:20 texto nishganno, ¿lapanpa naupancho nerga picunapätaj Pablo parlaycargan?

¹⁶ (Leiriy 1 Timoteo 5:20). Timoteutami Pablo nergan jucha rurajcunata “lapanpa nawpancho” anyapänanpaj. Chayno nerga manami parlaycarganchu lapan congregaciunpaj, sinoga ima jucha cashganta musyaj cajcunapa naupancho. Paycunalatami ancianucuna  nipäcunga jucha ruraj hermanuta anyapar corrigipäcushganta.

17. Congregaciuncho lapancuna jucha ruracashganta musyapäcuptenga, ¿imatataj ancianucuna wilacaramunga y imapaj?

¹⁷ Öraga lapan congregación musyapäcunnachi chay hermanupa ima juchan cashganta o tiempuwanpis waquincunaga musyapäcungachi. Chayno captenga juc ancianumi congregaciuncho lapanpa naupanpita wilacamunga hermanuta anyapar corrigipäcushganta. ¿Imapätaj wilacaramunga? Quiquin Pablo nergan chaynopa “wakinkunapis tantiyakunqa jutsata mana rurapäkunanpaq”.

18. Manaraj 18 wataman chayar maygan wamrapis juchalicuptenga, ¿imataraj ancianucuna rurapäcunga? (Fotutapis ricay).

¹⁸ ¿Imaraj pasanga 18 wataman manaraj chayar maygan cristianupis bautizacushgana caycar juchalicuptenga? Chay congregaciunpita ancianucuna ishcay ancianucunata acranga chay wamrawan y cristiano taytancunawan b parlapäcunanpaj. Cay ancianucunaga taytancunata tapupanga imatataj rurapäcush wamranta yanapänanpaj arrepenticunanpaj. Juchata ruraj maygan wamrapis taytancunapa consejuncunata chasquicur corrigicuycaptenga, chauraga chay ishcay ancianucunalami decidipäcunga taytancuna jinala wamrancunata yanapänanpaj y quimsa ancianuwanpis manana juntacärinanpaj. Ancianucunaga musyapäcunmi taytancuna wamrancunata corriginanpäga Diospa mandätun cashganta (Deut. 6:6, 7;  Prov. 6:20; 22:6; Efes. 6:2-4). Jinamanpis ancianucunaga taytancunata tapupaycangami imanotaj wamran portacuycan. Pero, ¿maygan wamrapis mana arrepenticur jinala jucha ruraylacho caycaptenga?, chayno carga quimsa ancianucunami paywan y cristiano taytancunawan juntacäringa.

JEHOVAGA “ALI SHONQU Y KUYAPÄKUQ” CAYCAN

19. ¿Imatataj ancianucuna Jehovanola rurapäcun jucha rurajcunawan juntacäriptin?

¹⁹ Jehovami ancianucunata mandash yanapacunanpaj lapan congregación ima juchapitapis libre caycänanpaj (1 Cor. 5:7). Y paycunaga imaycata rurarpis ganas ganaslami yanapacäramun jucha rurajcuna arrepenticärinanpaj. Chayno rurarga Jehovanolami “ali shonqu y kuyapäkuq” carcaycan (Sant. 5:11). Edayashgana caycar apóstol Juan cristiano masincunata cuyapaylapa cayno nergan: “Kuyay wamräkuna, kay cartata apaykätsimü jutsata mana rurapäkunaykipaqmi. Jutsata ruraptintsiqa Tayta Diospa nawpancho favornintsi sharkunanpaq abogäduntsi kaykanmi” (1 Juan 2:1).

20. ¿Imapitataj yachacushun gatejninchona?

²⁰ Öraga maygan cristianupis jucha rurashganpita arrepenticunchu, chayga laquicuypämi. Mana arrepenticuptenga, congregaciunpitami jorgushga canga. ¿Imata rurartaj ancianucuna decidin jorgushga cananpaj? Chaypitaga gatejninchona yachacushun.