31 CAJ YACHACHICUY
12 CAJ CANCIÓN Jehová, amatarmi ali
¿Imatataj Jehová rurash wanuypitapis juchapitapis libramänanchipaj?
“Runakunata kuyashpanmi juklayla Tsurinta Tayta Dios kachamurqan” (JUAN 3:16).
¿IMATAJ YACHACUSHUN?
Imatataj Jehová rurash juchapita libramänanchipaj y cuyapäcoj cashpan imatataj rurashga wanuylacho mana ushacänanchipaj.
1, 2. 1) ¿Imataj jucha rurayga, y imanotaj chaypita libracunchi? (WILACUY nejta ricäriy) 2) ¿Imacunapitataj canan yachacushun y gatejnin yargamoj cajcunachopis cay Wilacamoj revistapita? (32 caj paginacho ricäriy “Liejcunapa wilacuy” nejtapis).
AMATAR Jehová cuyashushgayquita musyayta munarga, Bibliacho yachacunayqui imatataj pay rurash wanuypitapis juchapitapis librashunayquipaj. Juchaga a chiquimajninchi japuymi caycan, japalanchega chaypita libracuyta puedinchichu. Lapanchimi juchayoj car waran waran imalachopis pantaycanchi, chaymi wanunchipis (Rom. 5:12). Pero ama laquicushunchu Jehovaga yanapämäshun juchata ruraycarla wanuylacho mana ushacänanchipaj.
2 Adanpa tiempunlapitanami Jehovaga imaycata rurash runacuna juchasapa captinpis amigunman chayananpaj. Camamashganchi wichanlapitanami Jehovaga cuyapämashpanchi almiraypaj cosascunata rurashga ima juchapitapis libramänanchipaj. Juchaga wanuylamanmi apamanchi pero Jehovaga mana munanchu pipis wanunanta, salvacur imaycamapis cawacunanchitami munan (Rom. 6:23). Gampäpis chaytami munan. Canan caycunapita yachacushun: 1) ¿imatataj Jehová rurash juchayoj car wanuylacho mana ushacänanchipaj?, 2) ¿imatataj unaycho Diosta cuyaj runacuna rurashga juchasapa caycarpis Diosta cushichinanpaj? y 3) ¿imatataj Jesús rurashga juchapitapis wanuypitapis salvamänanchipaj?
¿IMATATAJ JEHOVÁ RURASH JUCHAYOJ CAR WANUYLACHO MANA USHACÄNANCHIPAJ?
3. ¿Imataj pasashga Edén huertacho?
3 Adantawan Evata Jehová camargan cushi cushila cawacärinanpämi. Chaymi ali cawapäcunanpaj shumaj huertata gorgan. Ishcancunata majachacächergan y cay Pachata shumajyächir lapan miraynincunawan cawananpaj nergan. Cuyacoj cashpan juc mandätulata gorgan cäsucärinanpaj, mana cäsucur imarga wanupäcunan cargan. Pero runacunata y Diosta mana cuyaj juc mana ali ángel yurircamurgan y musyanchina Adantawan Evata juchaman chayachishganta. Y cuyacoj Taytanta cäsucärinanpaj trucan, chay mana ali angelta cäsucärergan. Chaypitana juchancunaraycu chachayargan y gueshyar wanupäcurganpis. Y Jehová nishgannola alpaman cutergan (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Imanirtaj Jehovaga jucha rurayta chiquin y imanotaj yanapämanchi payman guelicunanchipaj? (Romanos 8:20, 21).
4 Palabranchoga Jehová wilapämanchi Edén huertacho Adanwan Eva ima rurashganta; chaynopa tantiachimänanchipaj jucha rurayta pay imano chiquishganta. Jucha rurayga wanuylamanmi apamanchi y Taytalanchi Jehovapitami raquichimanchi (Is. 59:2). Chay mana ali angelga runacunatawan Jehovata chiquir juchalacho cacunanchita munan, chaymi cananyaj lapan runacunata engañaycan. Satanasga yarparganchi ‘Adanwan Eva juchalacärishgana, cananga Diospa voluntänin ruracanganachu’ nir. Ichanga musyarganchu Adanpa lapan miraynincunata Jehová amatar cuyashganta; payga jinan horala aunicurgan runacuna ali cawayta shuyaränanpaj cajta (leiriy Romanos 8:20, 21). Musyarganmi Adanpa miraynincunapita achca runacuna payta cuyananpaj y cäsucunanpäpis. Cuyacoj Taytalanchi y Camacojninchi carmi imaycata ruran chasquimänanchipaj, chaynopa juchapitapis wanuypitapis libramänanchipaj. ¿Y imatataj Jehovaga ruranan cargan?
5. ¿Imata shuyaränanpätaj runacunata Jehová aunicush y imaypita chayta rurash? (Génesis 3:15).
5 (Leiriy Génesis 3:15). Jehová Diospa naupa caj ali wilacuyninga cash Satanasta ushacächinanpämi y nerganpis ‘juc miray’ shamunanpaj y lapan runacunata salvananpaj. Jesusga Satanasta y lapan camacächishgantapis ilgächingami (1 Juan 3:8). Pero chay mirayga (Jesús) nacar imaycaparämi pasanan cargan y wanushgancama Satanasga imaycataraj ruranan cargan. Chay lapanta ricarga mayraj Jehovapis laquicunman cargan. Pero Jehovaga musyarganmi wamran wanuptinraj juchapitapis wanuypitapis lapan runacuna salvacunanpaj.
JUCHASAPA CARPIS IMANOTAJ JEHOVAPA FAVORNINTA CHASQUISHWAN Y PAYMAN GUELICUSHWAN
6. Diosman yäracushganraycu, ¿imatataj rurapäcurgan Abelwan Noé?
6 Jehová ichic ichiclapa wilacamush runacuna juchasapa caycarpis imata rurar payman guelicamunanpaj. Adanwan Eva Diospa contrancho churacashgan wichanlachomi, Diosta cäsucoj juc runa Abel cargan. Diospa favorninta ashirmi, uyshancunata pishtaj sacrificiucunata rurananpaj. Diosninchega ali ricarmi chay sacrificiuncunata “kushishqa chaskirqan” (Gén. 4:4). Chaynola tiempuwanpis Jehovaga chasquergan ali shongu runacunapa sacrificiunta, jucnin caj cargan Noé (Gén. 8:20, 21). Chaycho ricacämurgan, Diospa favorninta ashej runacunaga Jehová chasquiyta puedishganta. b
7. ¿Imatataj yachacunchi Abrahán wamran Isaacta wanuchinanpaj listo cashganpita?
7 Jehová mandargan yäracoj sirvejnin Abrahán wamran Isaacta sacrificananpaj. Chaypitaga mayraj payga laquicurgan. Pero Diosta cäsucunanpaj listo caycargan. Wanuchinanpäna caycaptin, Jehová nergan chayta mana rurananpaj, chauraga Abrahán churin nacashganta ricargannachu. Rurashganpitaga yachacunchi Jehovapis tiempuwan wamran Jesusta mandamunanpaj y cuyashgan runacunaraycu wanunanpaj (Gén. 22:1-18).
8. ¿Imatataj Jehová tantiachicuycargan israelitacuna sacrificiucunata rurananpaj mandaptin? (Levítico 4:27-29; 17:11).
8 Achca watacuna pasaptin, israelitacunata juc Leyta Jehová gorgan perdunta chasquinanraycu sacrificiucunata rurananpaj (leiriy Levítico 4:27-29; 17:11). Chayno mandarga Jehová tantiachicuycargan tiempuwan Wamranta mandamunanpaj y juchasapa runacunaraycu juc sacrificiuno wanunanpaj. Profetancunawanmi Jehová wilachicurgan cuyashga Wamran Jesús nacananpäpis y wanunanpäpis. Jina juc uyshano sacrificashga cananpäpis (Is. 53:1-12). Chauraga, Jehová cuyashga Wamrantami mandamushga runacunata wanuypitapis juchapitapis librananpaj. Ama gongaychu gamraycurmi wamranta mandamush.
¿IMATATAJ JESÚS RURASH SALVAMÄNANCHIPAJ?
9. ¿Imatataj wilacurgan Bautizacoj Juan? (Hebreos 9:22; 10:1-4, 12).
9 29 watacho, Bautizacoj Juan Jesusta ricaycur cayno nergan: “¡Tayta Dios kachamushqan Carnishmi pay kaykan!” (Juan 1:29). Chaycho wilacaycämurgan Jehová aunicushgan miray Jesús cashganta y paymi salvamänanchipaj yawarninta jichanan cargan. Chaynopa chipyaypa cumplicunan cargan runacunata juchanpita librananpaj Jehová aunicushgan (leiriy Hebreos 9:22; 10:1-4, 12).
10. ¿Imatataj Jesús rurargan juchasapa runacunaraycu?
10 Jesusga runacuna juchata rurashganraycu laquishga caycajcunatami yanapaj, paycunapis discipulun cananpaj munargan. Payga musyarganmi pï runacunapis jucharaycu nacapäcushganta. Chaymi juchancunaraycu mana ali ricashga warmicunatapis, olgucunatapis ashej aywaj. Chaymi, cayno nir tantiachicurgan: “Gueshyajcunami mëdicupäga caycan. Sänucunaga manami nistanchu”. Y caytapis nerganmi: “Shamushcä juchallancho goyaycajcunata gayajmi” (Mat. 9:12, 13, TDI). Y nishgannolami rasunpa ruraj. Juc cutichomi, weguinwan chaquinta maylapaj warmita juchancunata perdunargan (Luc. 7:37-50). Juc samaritana warmi achca runacunawan cacushganta musyaycarpis, ali wilacuycunata yachachergan (Juan 4:7, 17-19, 25, 26). Jehovapa poderninwanmi Jesusga olgucunatapis, warmicunatapis y wamracunatapis cawarachimurgan, chaycho musyacargan wanuytapis venciyta puedishganta (Mat. 11:5).
11. ¿Imanirtaj jatun juchata rurajcunapis Jesusta ashej?
11 Jesusga yachanaylapaj y piwanpis laquipäcoj captinmi jatun juchata rurajcunapis mana manchacuylapa payta ashej (Luc. 15:1, 2). Yäracärishganpita felicitaparmi waquincunapaj imaycata ruraj (Luc. 19:1-10). Taytannolami Jesusga piwanpis laquipäcoj cargan (Juan 14:9). Parlashganwan y rurashganwanmi, Jesusga musyachimashcanchi Jehová laquipäcoj y amatar cuyapäcoj cashganta y yanapämänanchipaj listo caycashgantapis. Jesusga yanapajmi pipis arrepenticur payta gatinanpaj (Luc. 5:27, 28).
12. ¿Imatataj Jesús yachachicush wanuyninpita?
12 Jesusga musyarganmi paywan ima pasananpaj cajta. Gatejnincunata achca cuti wilacurgan traiciunashga cananpaj y guerucho warcurcur wanuchipäcunanpaj (Mat. 17:22; 20:18, 19). Jina musyarganmi Bautizacoj Juan y waquin profetacuna wilacushganno pay wanuptinraj lapan runacuna salvacunanpaj. Jinamanpis, yachachicurganmi cawarircamur gatejnin cananpaj may chay runacunata shuntamunanpaj (Juan 12:32). Cäsucojcunaga y payman yäracojcunaga Diospa favorninta ashir juchancunapita libracuyta puedinman (Rom. 6:14, 18, 22; Juan 8:32). Jesusga nacaycaptinpis, valurta charircurmi listo caycargan wanunanpaj (Juan 10:17, 18).
13. ¿Imanotaj Jesusta wanuchipäcush, y imatataj quiquin Jehová Diosninchipitapis yachacunchi? (Dibujutapis ricay).
13 Jesustaga traiciunapäcurgan, magayparaj charipäcurgan, insultapäcurgan y mana cajlapita preso apar acusapäcurgan. Y mana chaylachu, soldaducunaga guerucho warcurcur wanuchipäcurgan. Lapan nacaycunapa pasarpis Jesusga jinalami aguantargan, chay lapanta ricarga mayraj Jehovapa shongun nanaycurgan. Pay Lapanta Puedej carpis, Wamranta alapa cuyarpis ricaraycashgalami. ¿Imanir?, noganchita cuyapämashpanchimi. Jesús nergan: “Runakunata kuyashpanmi juklayla Tsurinta Tayta Dios kachamurqan. Tsaymi pipis payman yärakuq kaqqa mana ushakanqatsu, sinöqa mana ushakaq kawayta tarinqa” (Juan 3:16).
Jehovaga laquicuytapis nanaytapis aguantarganmi Wamran Jesús wanushganta ricar, payga juchapitapis wanuypitapis libramänanchipaj wanurgan. (13 caj parrafuta ricay).
14. ¿Ima ninquitaj gamraycu Jesús wanushganpita?
14 Adanpa culpanraycu juchasapa captinchipis noganchiraycu Jesús wanushganchomi ricanchi Jehová amatar cuyapämashganchita y gamtapis cuyayculäshunqui. ¿Manachuraj alapa agradecido caycashwan Jehovawan Jesús noganchiraycu lapan rurashganpita? (1 Juan 4:9, 10). Jehovaga jucninchi jucninchitami yanapämänanchita munan juchata rurar wanuylacho mana ushacänapaj.
15. Pantar imarga, ¿imatataj rurashwan Jesús wanushgan yanapämänanchipaj?
15 Japalan Churinta noganchiraycu wanunanpaj Jehová goycalämashganchega juchanchicuna perdunashga cananpämi caycan. Perdunninta chasquinapäga ¿imatataj rurananchi? Bautizacoj Juan y Jesús cayno nishgantami rurananchi: “¡Tayta Dios mandaykashqan chayamushqanami! ¡Jutsa rurayta kacharir Tayta Dios munashqannöna kawapäkuy!” (Mat. 3:1, 2; 4:17). Chauraga, juchalacho mana cacuyta munarga y Jehová Diosninchiman cutinapäga, ima juchatapis cacharishwanmi. ¿Pero imacunata rurartaj juchataga jaguirinchi y pantar imarga imanotaj Diospa favorninta chasquinchi? Chaycunapita gatejnincho yachacushun.
18 CAJ CANCIÓN ¡Salvaycalämashcanqui!
a WILACUY: Juchapita Biblia parlaptenga juc caj caycan Jehová mandacushganta mana ruraptinchi o contrancho juchalicuptinchi y jucajna caycan Adanraycu juchasapa cashganchi y chaylapita wanunchipis.
