32 CAJ YACHACHICUY
44 CAJ CANCIÓN Ruwacuycarla caycäshaj
Lapanchi arrepenticunanchitami Jehová munan
Jehovaga “manami munantsu pipis jutsacho wanunanta. Tsaymi shuyaraykan runakuna jutsankunata kacharir payta cäsukärinanta” (2 PED. 3:9).
¿IMATAJ YACHACUSHUN?
Imata rurartaj pipis arrepenticunman, imanirtaj arrepenticunman y imanotaj runacunata Jehová yanapash juchancunapita arrepenticärinanpaj.
1. ¿Imatataj pipis ruranman juchancunapita arrepentido caycarga?
IMA juchatapis ruraptinchega arrepenticunanchirämi. Bibliaga nin pipis arrepenticuptenga mananami munanchu juchacunata yapay rurayta y yapay rurananpäga mananami yarpaylapis yarpannachu.
2. Arrepenticunapaj cajpita, ¿imanirtaj lapanchicuna yachacunanchi? (Nehemías 8:9-11).
2 Adanpa miraynincuna cashpanchimi waran waran juchacunata ruraycanchi, chaymi lapanchicuna yachacunanchi juchanchicunapita imanir arrepenticunapaj cajpita. Jina Adanpa miraynin carmi wanunchipis (Rom. 3:23; 5:12). Lapanchimi juchayoj canchi. Diosta sirvej apóstol Pablupis alicunata rurayta munaycarpis pantaj runalami cargan (Rom. 7:21-24). Pero Jehovaga manami munanchu ‘juchata ruraj runalami cä’ nir laquicuycarla cacunanchita, payga laquipäcojmi y cushi cushila cawacunanchita munan. Nehemías cawashgan wichan judiucunaman yarpäshun (leiriy Nehemías 8:9-11). Jehovaga munarganchu jucha rurapäcushganpita pasaypa laquicuycarla caycänanta sinoga cushi cushila sirvipäcunanta. Jehovaga musyanmi arrepenticuptinchiraj cushishgala ricacunapaj, chaymi yachachimanchi imanir arrepenticunapaj cajta. Segurumi caycanchi Taytalanchi Jehovaga laquipäcoj carmi juchanchicunapita arrepenticuptinchi perdunamäshun.
3. ¿Imatataj canan yachacushun?
3 Canan maslata yachacushun imano arrepenticunapaj cajpita. Naupataga yachacushun imatataj Jehová israelitacunata yachachishga arrepenticärinanpaj. Jina imanotaj Jehová yanapashga jucha rurajcuna arrepenticärinanpaj y imatataj Jesuspa gatejnincunapis chaypita yachacushga.
JEHOVÁ ISRAELITACUNATA IMATA YACHACHERGAN ARREPENTICUNANPAJ
4. ¿Imatataj Jehová israelitacunata yachachergan paycuna arrepenticärinanpaj?
4 Israelitacuna sirvejnin cananpaj Jehová paycunawan juc acuerdutami rurargan y Leynincunata cäsucäriptenga bendiciunninta chasquipäcunanpaj cayno nergan: “Kanan junaq tantiyatsishqä mandamientukunaqa manami aläpa sasatsu kaykan tantiyapäkunaykipaq ni cumplipäkunaykipaqpis” (Deut. 30:11, 16). Pero, ¿imaraj pasanman cargan contrancho ticrar juc dioscunata adurapäcuptenga? ¿Mananachuraj Jehová paycunata perdunanmanchu cargan? Manami. Diosninchipa Leyninga nergan paycuna cutipäcamuptenga pay chasquinanpaj cajta (Deut. 30:1-3, 17-20). Jehovaga munarganmi arrepenticärinanta jina yapay pushananpaj y bendicinanpäpis.
5. ¿Imatataj Jehová rurargan israelitacunata yanapänanpaj? (2 Reyes 17:13, 14).
5 Israelitacunaga Jehovapa contrancho cutin cutin juchalacärergan, luta dioscunapa naupancho gongurpacur melanaypaj ruraycunatapis rurapäcurgan. Chaymi mana alicunamanpis chayapäcurgan pero Jehovaga jaguirinanpaj trucanga, profetancunawanmi yanapargan arrepenticärinanpaj y payman cutimunanpaj (leiriy 2 Reyes 17:13, 14).
6. Israelitacuna arrepenticärinanpaj, ¿ima yachachiytataj Jehová munaycargan profetancunata mandarga? (Dibujutapis ricay).
6 Israelitacuna mana cäsucäriptinmi Jehovaga profetancunata cutin cutin mandargan corriginanpaj, ichanga mana arrepenticäriptenga mana aliman ushapäcunman. Profeta Jeremiaswan cayno wilachicurgan: “Noqaman kutikamuy […]. Kuyapäkuq karmi mayjina rabyashqa karpis perdonashayki. Itsanqa conträ sharkur jutsayuq kashqaykita tantiyakäriy” (Jer. 3:12, 13). Profeta Joeltapis cayta escribichergan: “Llapan shonguyquipa arpinticuy” (Joel 2:12, 13, TDI). Isaiastapis escribichergan: “¡Lushuk lushuk kanaykipaq armakäriy! ¡Lutan ruraykunata kachapäkuyna! Mana alikunata ama rurapäkuynatsu” (Is. 1:16-19). Ezequieltapis mandargan cayta guelgananpaj: “Lapan runakunapis jutsa rurashqankunata kacharir alilatana rurapäkunantami noqa munä […]. Jutsa ruraylacho wanunaykita manami munätsu. Jutsa ruraykunata kacharirqa kawapäkunkipaqmi” (Ezeq. 18:23, 32). Jehovaga cushicunmi pï runapis arrepenticuptin, payga munanmi mana wanuypa cawananta. Pero, Jehovaga jucha rurajcunapaj yarpar, ¿niycanchuraj ‘munarga cuticamungami’ nir?, manami ¿au?
Jehová profetancunawan marcanta yanapash arrepenticärinanpaj. (6 y 7 caj parrafucunata ricay).
7. ¿Imatataj Jehová marcanta yachachergan Oseas warminwan imapa pasashganwan?
7 Ricärishun imatataj Jehová marcanta yachachergan profetan Oseas y warmin Gomer imapa pasashganwan. Cay warmiga Oseas runantash engañargan y tiempuwanga juc runacunawan aywacurgan. ¿Perdunaycunmanchuraj chay warmita Jehová? Payga pipa shongunchopis ima cashganta musyanmi, chaymi profetan Oseasta cayno nergan: “Warmiki juk runawan jarukuykäshuptikipis paywan amistakuy. Tsaynöpami Israel runakuna tantiyakärinqa runanta jarukuykaq warmino kaykaptinpis paykunata imaypis kuyashqäta” (Os. 3:1; Prov. 16:2). Cay warmi juc runawan tiyaycaptinpis Jehová Oseasta nergan ashinanpaj y perdunaycur amistacärinanpaj. a Oseas ima rurananpaj Jehová mandacushganwanmi yachachicuyta munaycargan perdonacoj cashganta. Israelitacuna mana alicunata rurarcaycaptinpis Jehovaga cuyaycashgalami, chaymi profetancunata mandargan tantiachinanpaj, chaynopa paycuna juchancunata cacharir arrepenticärinanpaj. Jehovaga musyanmi pipa shongunchopis umanchopis ima cashganta, chaymi imaycata ruranga pï jucha rurajtapis perdunananpaj (Prov. 17:3). Mä chaypita masla yachacushun.
IMANOTAJ JEHOVÁ YANAPAN JUCHA RURAJCUNATA ARREPENTICUNANPAJ
8. ¿Imataj Jehová rurash Caín arrepenticunanpaj? (Génesis 4:3-7; dibujutapis ricay).
8 Adanwan Evapa guechpa wamran Caín cargan y payga juchayojlami yurish, jina Bibliaga nin “rurayninkuna mana ali” cashganta (1 Juan 3:12). Chayraycurmi Cainpa ofrendanta “mana chaskirqantsu”. Arrepenticunanpaj trucan “pasaypa rabyaptin cäranpis jukaqyarqan”, chaymi Jehová paywan parlargan (leiriy Génesis 4:3-7). Cuyapaylapa parlapargan y tantiachergan mana arrepenticuptin mana alicho ushananpaj, payga mana wiyacur Jehovapa yanapacuynintapis chasquicurganchu. Caín mana wiyacushganpita Jehová nerganchuraj ‘cananpita pï jucha rurajtapis arrepenticunanpaj yanapäshänachu’ ¿nir?, ¡manami!
Jehovaga Cainta cuyapaylapa tantiachergan mana aliman mana chayananpaj y favorninta chasquinanpäpis imata rurananpaj wilapargan. (8 caj parrafuta ricay).
9. ¿Imanotaj Jehová Davidta yanapashga arrepenticunanpaj?
9 Jehovaga Davidta cuyar cayno nergan: Davidga “shonqüpaqnömi kaykan” (Hech. 13:22). Ichanga David jatun juchata rurar, jucpa warminwan cacush y runantapis wanuchish. Chayta rurashganpitaga Moisespa Leynin nishganno wanunanmi cargan (Lev. 20:10; Núm. 35:31). Pero Jehovaga laquipäcoj carmi, David manaraj arrepenticuptin Natán profetanta mandargan paywan parlananpaj. b Natán juc tincuchicuywan tantiachergan Davidpa shongunta cuyuchiyta munar, chaypitana cuentata gocurgan Jehovapa contrancho jucha rurashganta y arrepenticurganpis (2 Sam. 12:1-14). Chaymi shongupita arrepentido caycashgan musyacänanpaj juc salmuta escribergan (Sal. 51). Escribishganga achca runacunata yanapash arrepenticunanpaj. Cuyapaylapa Jehová Davidta arrepenticunanpaj yanapashganpita cushicunchimi.
10. ¿Imanotaj sienticunqui Jehová pacienciacoj y perdunacoj cashganta musyar?
10 Ima juchatapis Jehová melananmi (Sal. 5:4, 5). Jehovaga musyanmi lapanchi juchayoj cashganchita, ichanga cuyapämashpanchimi juchata vencinanchipäga yanapämanchi. Payga imaycanopapis jatun jucha rurajcunata yanapan arrepenticunanpaj y payman guelicamunanpäpis, chayman yarparga shogaycalämanchimi. Jina Jehová pacienciacoj y perdunacoj cashganman yarpachacuptinchipis payman masraj yäracuyta munanchi y juchata ruraptinchipis jucla arrepenticunapaj. Ricärishun imata yachacurgan Jesuspa discipuluncuna arrepenticärinanpaj.
IMATAJ JESUSPA GATEJNINCUNA YACHACURGAN ARREPENTICÄRINANPAJ
11, 12. ¿Imapita Jesús wilacurgan Taytan Jehová perdunacoj cashganta tantiachicunanpaj? (Garancho caycaj dibujuta ricay).
11 Punta wata wichanga Mesías chayamunanpaj tiempo cargan. Pasaj caj yachacuycho yachacushganchino Jehová churintawan Bautizacoj Juanta mandargan yachachicunanpaj runacuna arrepenticärinanpaj (Mat. 3:1, 2; 4:17).
12 Jesús yachachicushgan wichan Taytan perdunacoj cashganta runacunata wilapargan. Aywacoj mozupita yachachicur tantiachicurgan chay mozu munashgalanta rurayta munar caru marcapa aywacurgan, tiempo pasariptinshi juiciunman chayar wasinman cuticurgan. ¿Imata rurargan papäninga? Jesús cayno nergan: “Karulataraq kutiykaqta rikärirshi papäninqa kushikushpan warakayla aywar makalakurkur mutsarqan”. Chay mozuga ‘peonniquitanolapis chasquicalämay’ papäninta nergan. Papänenga laquiparmi wasinman yaycachergan, cayno nir: “¡Kay tsurïqa [...] Oqrakashqanpitami yurimushqa!” (Luc. 15:11-32). Jesús cay Pachaman manaraj shamur ricarganchi juchanpita arrepenticojcunata y Jehová laquipar imano perdunashganta. Chaychi Jesusga ali tantiachicurgan papänin laquipäcoj y cuyapäcoj cashganta.
Aywacoj mozupita Jesús wilacushgancho tayta cajga corrila aywar wamranta macalacurcur muchan (11 y 12 caj parrafuta ricay).
13, 14. ¿Imata Pedro yachacush arrepenticunapaj cajpita y chaypita imata yachachicush? (Dibujutapis ricay).
13 Arrepenticunapaj y perdunacoj canapaj cajpita Pedruga mayraj Jesuspita yachacurgan, payga achca cutimi juchalicurgan y Jesusga listo caycargan perdunananpaj. Juc cuticho quimsa cuti Jesusta niegarishpanga pasaypa laquicushpan wagargan (Mat. 26:34, 35, 69-75). Chaypitaga Jesús cawarircamur Pedrutami yuripargan, payga japalanchi chay hora caycargan (Luc. 24:33, 34; 1 Cor. 15:3-5). Jesusga musyarganchi Pedro arrepentido caycashganta, chaymi perdunashganta nergan (Marcos 16:7).
14 Imaycapa pasashganchomi Pedro yachacurgan arrepenticunapaj cajpita y pipis perdunamaptinchi imanotaj ricacunchi. Pentecostés fiesta pasariptin achca judiucunapa naupancho tantiachicurgan paycuna Jesusta wanuchipäcushganta, pero pitapis mana nanaparaylapa cayta nergan: “Cananga juchayquicunapita arpinticuy [...]. Chayrämi llapan juchayquita Tayta Dios perdunashunquipaj, alli cawaytana tarichishunquipaj” (Hech. 3:14, 15, 17, 19, TDI). Arrepenticunapaj cajpita Pedro tantiachicurgan jucnopana yarpar galaycunapaj, juchacunata cacharir y alicunatana rurar Jehová munashganno cawacunapaj. Paycunata Pedro nergan juchancunata chipyaypa Jehová ilgächinanpaj, tiempuwanga Pedro cayno nergan: Diosga “Manami munantsu pipis jutsacho wanunanta. Tsaymi shuyaraykan runakuna jutsankunata kacharir payta cäsukärinanta” (2 Ped. 3:9). ¡Cushicuypämi jatun juchapitapis Jehová perdunamashganchita musyarga!
Apóstol Pedro arrepenticuptinmi Jesusga perdunargan y cuyapashgantapis nergan. (13 y 14 caj parrafucunata ricay).
15, 16. 1) ¿Imataj Pablo yachacurgan Dios perdunashganpita? (1 Timoteo 1:12-15). 2) ¿Imapitataj gatejnin semanacho yachacushun?
15 Pabluga imaycacunapitami arrepenticurgan caway vidancho, payga cristianucunata chiquir ashi ashiycur wasincunapita garachaypa jorgurgan. Quevä pilapis yarpargan imaylapis Pablo cambiananpaj, pero Jehovawan Jesusga musyapäcurganmi Pablo arrepenticur ali runaman ticrananpaj cajta. Jesusmi nergan: “Wilakuynïta wilakunanpaqmi tsay runata akrashqä” (Hech. 9:15). Y juchancunata jaguirinanpäga juc milagrutarämi Jesús rurargan (Hech. 7:58–8:3; 9:1-9, 17-20). Tiempuwan cristianuna car alapami agradecicurgan Jehovawan Jesús perdunashganpita (leiriy 1 Timoteo 1:12-15). Amatar agradecicushpan cayno nergan: “Payqa kuyapäkuq, pacienciakuq y perdonakuq karmi jutsa ruraykunata kacharinaykita shuyaraykan” (Rom. 2:4).
16 Juc cuticho apóstol Pabluta wilapäcurgan Corinto congregaciuncho juc cristiano jatun juchata ruraycajta, Pablo ima rurashganga yachachimanchi imanotaj Jehová pitapis cuyapaylapa corrigin y imanotaj noganchipis laquipashwan juchancunapita arrepenticojcunata. Gatejnin semanacho chaypita masla yachacushun.
33 CAJ CANCIÓN Tayta Diosta ruwacurcur wilapay
a Oseas profetalatami chayta rurananpaj Jehová mandargan, canan wichanga Jehová manami obliganchu inocente caj maja traiciunacoj majanta perdunananpaj. Chaymi Jesuspis tantiachicurgan inocente caj majapa maquincho caycan traiciunacoj majanta perdunananpaj o manapis (Mat. 5:32; 19:9).
b Caytapis leiriy “¿Qué significa para usted el perdón de Jehová?”, chayga yargamushga 15 noviembre 2012 wata, La Atalaya revistacho, 21 a 23 paginacuna, 3 a 10 parrafucunacho.
