1, 2. 1) ¿Imanirtaj lapanchi shuyarashwan pruebacunapa pasanapaj? 2) ¿Imapitataj cay yachacuycho ricärishun?

 JEHOVAPA sirvejnincunaga musyanchimi imayca pruebacunapa pasanapaj. Bibliapis nimanchi Diospa Gobiernuncho cawanapäga “nacachisharag canapag canganta” (Hech. 14:22, AP). Jina musyanchimi waquin problemanchicunaga mushoj pachachoraj ushajpaj alchacächishga cananpaj, chay wichanga “manam wañuypis, laquicuypis, wagaypis, nanaypis canganachu” (Apoc. 21:4, AP).

² Jehová lapan pruebacunapita mana chapämaptinchipis, calpanta gomanchi aguantanapaj. Romacho caycaj cristianucunata apóstol Pablo nishganta ricärishun. Chay wichan cristianucuna y Pablupis imayca pruebacunapa pasashganpitana wilacur cayno escribergan: “Taytanchi [Jehová] cuyaycämashaga llapanchöpis allimi llojshishun” (Rom. 8:35-37). Chauraga sasa pruebacunapa pasaptinchipis Jehovaga yanapämanchimi lapanta aguantanapaj. Ricärishun imano Jehová Joseta yanapargan lapancho ali yargunanpaj y imano canan wichan noganchitapis yanapämanchimi.

3. ¿Imanotaj Josepa cawayninga ilajpita cambiargan?

³ Lapancuna musyargan Jacobpa más cuyaynin wamran José cashganta (Gén. 37:3, 4). Chaymi mayor caj wauguincunaga Joseta chiquir galaycärergan. Y juc junajcho Joseta esclavuno ranticurgan madianita runacunata. Chay runacunaga Joseta Egiptuman apacärergan, chayga caru marcata cargan. Chaychona ranticuycurgan Potifar jutiyoj runata. Payga  cargan faraunpa guardiancunapa mandaj capitannin. Josepa cawayninga ilajpita cambiargan; taytanpita más cuyashgan wamran caycashganpita canan Egiptucho esclavunona caycargan (Gén. 39:1).

4. ¿Ima pruebacunapätaj öraga pasashwan?

⁴ Bibliaga nin: “Pitapis öraga allimi llojshipan; öraga mana allimi llojshipan” (Ecl. 9:11). Öraga waquin runacuna ima pruebacunapa pasaycashganno pasanchi (1 Cor. 10:13). Jesuspa discipuluncuna cashganchiraycur waquincuna burlacunman o chiquimashwanpis (2 Tim. 3:12). Imano captinpis, Jehovaga listo caycan yanapämänanchipaj aguantanapaj. Joseta imano yanapashgantami ricärishun.

5. ¿Imanotaj Potifarga cuentata gocurgan Josewan Jehová caycashganta? (Génesis 39:2-6).

⁵ (Leiriy Génesis 39:2-6). Potifarga ricargan José ali cholo y arucoj cashganta. Payga cuentata gocurgan “Josëwan TAYTA DIOS caycashanta. Llapan rurashanpis alli” cargan. b Tiempuwanga, lapan charashgan cajcunata Josepa maquincho churargan ricananpaj. Chayta rurashganpita achca bendiciuncunata chasquirgan.

6. ¿Imanoraj Josega ricacurgan?

⁶ José imano ricacushganno yarpachacushun. ¿Imataraj payga más munargan? ¿Potifarpa ricaynincho ali ricashga caytachuraj munargan? Josega libre caytachi masraj munargan papäninpa wasinman cutimunanpaj. Achca cargucunata charaycarpis, jinala esclavo caycargan luta dioscunata aduraj runapita. Jehovaga manami juc milagruta rurarganchu Potifar Joseta libre cachaycunanpaj. Chaypa trucan más mana alicunapäraj pasananpaj caycargan.

7. ¿Imanirtaj ninchi Josega más mana alimanraj chayashganta? (Génesis 39:14, 15).

⁷ Génesis 39 caj capítulo wilacushganno Potifarpa warminga Joseta cutin cutin nergan punucunanpaj. Ichanga payga manami munarganchu. Chaura juc junajcho alapa rabiacushpan Joseta tumpargan a las malas chariyta munashganpita (leiriy Génesis 39:14, 15). Potifar chayta mayar, Joseta  carcelcho wichgarachergan, chaycho achca watacuna caycargan (Gén. 39:19, 20). ¿Imanotaj carcelcho cawayga cargan? Hebreo rimaycho carcelpita parlar Josega nergan juc uchcuno cashganta. Cayga ninan chaycho pasaypa chacaycashganta y pipis chaycho captenga laquicuypämi cashganta (Gén. 40:15). Jina Bibliaga nin carcelcho Joseta chaquincunapita y cuncanpita cadenawan watashganta (Sal. 105:17, 18). Joseta pasashganga laquicuypämi cargan: patronninpa yäracuypaj esclavo cashganpita canan carcelchona wichgarashga caycargan.

8. ¿Imataj ama gongashwanchu imapis más mana alimanraj ticraycuptin?

⁸ ¿Imaylapis ricashcanquicu pasashgayqui pruebacuna más mana alimanraj ticrashganta Jehová Diosta cutin cutin mañacuycaptiquipis? Chayga pasanmanmi. Cay mundo Satanaspa maquincho caycaptinmi öraga Jehová permitin ima pruebacunapäpis pasanapaj (1 Juan 5:19). Chayno captinpis ama gongashunchu Taytalanchi Jehová altanto caycashganta ima pasamashganchicunapita, Payga noganchipaj yarpachacun (Mat. 10:29-31; 1 Ped. 5:6, 7). Jina Palabrancho cayno nimanchi: “Imaypis manami cachaycushayquichu. Gamcunataga imaypis yanapäshayquimi” (Heb. 13:5). Chauraga Jehovapa yanapacuyninwanga imayca sasa pruebacunapa pasarpis aguantashunmi. Chayta Josetapis pasargan.

9. ¿Imanirtaj ninchi José carcelcho caycaptin Jehová Dios paywan caycashganta? (Génesis 39:21-23).

⁹ (Leiriy Génesis 39:21-23). José carcelcho caycaptinpis Jehová yanaparganmi lapan rurashgancuna ali yargunanpaj. Joseta Potifar ali ricashganno carcelcho cuidaj runapis ricargan José lapan rurashgancuna ali cashganta, chaymi lapan presucunata Josepa munayninman churargan cuidananpaj. Bibliapis nin: “Chaymi Josëpa maquincho cajtaga carsilcho cuydaj runa mana yarparajnachu”. Chayta Joseta yanapargan ima pasaycashgancunaman yarpar mana laquicunanpaj. Josega tumpashga cargan juc warmita a las malas chariyta munashganpita. Ichanga carcelcho caycar achca autoridäta chasquirgan. Pero, ¿imanotaj chay lapanta logrargan? Génesis 39:23 nin: “Josëwan TAYTA DIOS captinmi paytaga ima rurashanpis alli llojshipaj”.

10. ¿Imanir-raj Josega manami yarparganchu lapan rurashgancuna ali yargushganta?

¹⁰ Yapay José cashgayquita yarpay. ¿Josega yarparganchuraj lapan rurashgancuna ali cashganta carcelcho caycarpis tumpashga cashganpita? Yarpachacushun: ¿Imataraj payga masraj munargan?, ¿carcelcho cuidaj runa ali ricananpächuraj munargan? Manachi, chaypa trucan libre caytachi masraj munargan. Chaymi carcelpita yargunanpäna caycaj runatapis nergan faraunta paypita parlapänanpaj carcelpita jorguchinanpaj (Gén. 40:14). Ichanga chay runaga Josepita faraunta mana parlaparganchu, chaymi Josega ishcay wata masraj carcelcho caycargan (Gén. 40:23; 41:1, 14). Chayno captinpis Jehovapa yanapacuyninwanmi, José rurashgancuna ali yargurgan. ¿Imanotaj chayga cargan?

11. ¿Imata rurananpätaj Jehová Joseta yanapargan, y cayga imanotaj yanapargan Jehovapa munaynin cumplicänanpaj?

¹¹ José carcelchoraj caycaptin, Egiptupa reyninta Jehová ishcay sueñuta sueñuchergan. Faraunga musyayta munargan sueñushgancuna ima ninantaj. Chaura José sueñucunata revelaj cashganta wilaptin, faraunga gayachergan ima sueñushgancunata tantiachinanpaj.  Jehová Joseta yanapargan faraón ima sueñushgancunata tantiachinanpaj y imacunata rurananpäpis ninanpaj. Chayta ricar faraunga pasaypa almiracurgan. Josewan Jehová caycashganta musyar lapan Egipto marcacho micuycunata ricananpaj churargan (Gén. 41:38, 41-44). Tiempuwanga, muchuy cashganga manami chayarganchu Egipto marcalaman, sinoga Josepa papänin tiyashgan Canaán marcamanpis. Chaura José micuycunata ricaj encargado captinmi familiancunata yanapargan; tiempuwanga paycunapita Mesías shamunan cargan.

12. ¿Imataj Jehová rurargan Josepa ruraynincuna ali yargunanpaj?

¹² Yarpachacushun José imacunapa pasashganta. ¿Pitaj Potifarta yarpächergan Joseta ali ricananpaj juc esclavula caycaptin? ¿Carcelcho caycaj runata piraj yarpächergan Josepa munayninman lapan presucunata churananpaj? ¿Piraj faraunta ishcay sueñucunata sueñuchergan y Joseta yanapargan tantiachicunanpaj? Egipto marcacho micuycunata ricaj José cananpäga, ¿piraj guepancho caycargan? (Gén. 45:5). Cuentata gocunchi quiquin Jehová Joseta yanapashganta lapan rurashgancuna ali yargunanpaj. Wauguincuna Joseta mana alita ruraptinpis, Jehová chaypita välicurgan munayninta cumplinanpaj.

13. ¿Lapan pasamashganchicunata Jehová controlaycanchuraj?

¹³ José cawaynincho imacunapa pasashganpita achcatami yachacunchi. ¿Imaypis shuyarashwanchuraj Jehová libramänanchipaj sasacunapa pasaptinchi? ¿Lapan pasamashganchicunata Jehová controlaycanchuraj mana ali cajpita ali cajman ticrachinanpaj? Bibliaga chayta manami yachachicunchu (Ecl. 8:9; 9:11). Ichanga cayta mana gongashunchu: pruebacunapa pasaptinchega Jehová altanto caycan lapan pasamashganchicunapita y shongupita ruwacuptinchipis wiyamanchimi (Sal. 34:15; 55:22; Is. 59:1). Y mana chaylachu, ima sasacunatapis aguantanapaj yanapämanchimi. ¿Imanotaj chayta ruran?

14. ¿Imanotaj Jehová yanapämanchi sasacunapa pasaptinchi?

 ¹⁴ Jehovaga musyanmi imano y imay shogamänanchipaj y shacyächimänanchipäpis (2 Cor. 1:3, 4). Chaytami ricargan Turkmenistán naciunpita Eziz jutiyoj hermanunchi. Payga ishcay wata carcelcho wichgarashga caycargan creenciancunaraycur. Paymi nin: ‘Juiciuta ruramänanpaj manaraj galaycuptin, juc waugui ricächimargan Isaías 30:15 nishganta, chaycho nin: “Lakishqa kawapäkunaykipa trukanqa noqaman yärakamay. Tsayno yärakamaptikiqa ali kawapäkunaykipaqmi yanapashayki”. Chayga yanapämargan jaucala ricacur Jehovaman yäracunäpaj, jina calpatapis gomargan preso caycashgä wichancho’. ¿Yarpanchicu imaylapis Jehová shacyächimashganchita y yanapämashganchita necesitashganchi horacho?

15, 16. ¿Imataj yachacunchi hermananchi Tori imapa pasashganpita?

¹⁵ Öraga ima pruebacunapa pasar cuentata manami gocunchichu Jehová yanapaycämashganchita, tiempo pasariptinraj chayta cuentata gocunchi. Tori jutiyoj cristiana chayno ricacurgan. Mason jutiyoj wamranshi wanucurgan sojta watapa cancerwan luchaycashganpita. Chayshi hermananchi Toriga pasaypa laquishga ricacurgan. Payga nin: “Nogata pasamashgannoga, quëva pï mamatapis chaynoga pasanmanmi”. Caytapis nin: “Taytacunaga musyapäcunmi más sasa cashganta wamrayqui nacashganta ricaptiqui, quiquiqui nacashgayquipitapis”.

¹⁶ Tori imapa pasashgan alapa sasa caycaptinpis, tiempuwan yarpachacur galaycurgan imano Jehová yanapashganta. Payga nin: “Guepaman yarpachacuptëga, cuentata gocö Jehová cuyacuywan yanapämashganta wamrä gueshyaj caycashgan wichan. Yarpämi  Mason pasaypa calpaynaj caycaptinpis hermanucuna ishcay horacunaraj viajar shamushganta wamräta watucananpaj. Imaypis hospitalchoga pilapis caycargan yanapämänanchipaj. Waquincunaga guellaywanpis yanapämashcanchi. Sasacunapa pasarpis, mana imapis pishimarganchichu”. Jehovapa yanapacuyninwanmi hermananchi Tori y wamran Masonpis imapa pasashganta aguantargan (“ Lapan necesitashganchi cajcunata Jehová tiempulancho gopäcamargan” recuadruta ricay).

17, 18. ¿Imaraj yanapämäshun cuentata gocunapaj pruebacunapa pasaptinchi Jehová yanapaycalämashganchita? (Salmo 40:5).

¹⁷ (Leiriy Salmo 40:5). Pipis juc wasitaga sharcarcächin nircur chaycho tiyananpaj. Chayno captinpis, öraga ichic pararcur shumaj ricayta puedinmi imano quedashganta ricananpaj. Chaynolami ali canman cada cadala yarpachacunapaj pruebacunata aguantanapaj imano Jehová yanapaycalämashganchiman. Caynopis tapucushwanmi: “¿Ima bendiciuncunatataj canan chasquishgä Jehovapita? Imapa pasaycashgä mana ilacaptinpis, ¿imanotaj Jehová yanapaycäman aguantanapaj?” nir. Lapan junajcuna yarpachacushun chay junajcho imano Jehová bendicimashganchita.

¹⁸ Lapanchi pruebacunapa pasarga Jehová jucla chayta ushacächinanpaj munashwanchi, ichanga ama gongashunchu canan wichan Jehovapita chasquishganchi bendiciuncunata (Filip. 4:6). Taytalanchi Jehovaga aunimanchi calpata gomänanchipaj imatapis aguantanapaj. Chaymi imaypis Payta gracias nishwanmi. Chayta ruraptinchega, ima pruebacunapa pasarpis cuentata gocushun Jehová yanapaycalämashganchita Joseta yanapashganno (Gén. 41:51, 52).