1, 2. ¿Imanirtaj canan wichan ancianucunaga Pablupita yachacunman?

 APÓSTOL Pablo cristiano masincunatami alapa cuyar paycunaraycur imaycacunata rurargan (Hech. 20:31). Chaymi chay cristianucunaga Pablutami alapa cuyaj. Juc cuticho, Éfeso marcaman Pablo manana cutinanpaj musyarir, chay cristianucunaga “Pabluta macallaycur-macallaycur wagaran” (Hech. 20:37). Pablunomi canan wichan ancianucunapis cristiano masincunata cuyashpan imaycacunata ruran yanapänanpaj (Filip. 2:16, 17). Pero öraga chaycunata rurananpäga manami facilchu. Chauraga, ¿imaraj paycunata yanapaycunman?

² Musyanchimi ancianucunapäga achca ruraynincuna cashganta, chaymi Pablupita shumaj yachacunman (1 Cor. 11:1). Pabluga noganchino juchasapa runa cargan, payga imaypis calpachacoj alicunata rurananpaj (Rom. 7:18-20). Achca sasacunapa pasarpis Pabluga guepaman cutirganchu, sinoga cushi cushilami Jehovata adurargan. Chaura ancianucunapis Pablupita yachacuptenga, cushi cushilami Jehovata sirvingapaj imayca sasacunapa pasarpis. Mä ricärishun imatash Pablupita yachacunman.

3. ¿Imapitataj canan parlarcushun, y pipitataj yachacushun?

³ Cay yachachicuychomi parlarcushun imatash ancianucuna ruran Diospita yachachicunanpaj y juc ruraynincunatapis cumplinanpaj, hermanucunawan cuyacoj cananpaj, imalachopis pantarcuptin laquishgala mana cacunanpaj y waquincuna pantarcuptinpis cuyacuywan trataycunanpaj. Cay lapanchoga apóstol Pablo ali ejemplo caycan ancianucunapaj, paypis chay lapancunapa pasargan. Mä ricärishun.

4. ¿Imanirtaj öraga ancianucunapaj sasa canman shumaj predicananpaj?

⁴ ¿Imanirtaj chaycunata rurananpaj sasami? Ancianucunaga manami predicaciunlacho yanapacärin, paycunapäga achca ruraynincuna caycan. Tantiarinapaj, öraga semanacho reuniunta pushananpaj o Bibliapita juc libruwan yachachinanpaj caycan. O juc discursuta gonanpäpis mayna preparacuycan. Jina tiempuntapis camacächin siervo ministerial cajcunata yachachinanpaj y hermanucunatapis shacyächinanpaj (1 Ped. 5:2). Y mana chaylachu, waquincunaga construcciuncho, Diosta aduranapaj wasicunata o localcunata sharcachiycho yanapacärin. Pero chay lapanta rurananpaj captinpis, ancianucunaga imaypis tiempunta camacächin waquincunata Diospita yachachinanpaj. Paycunapäga chay ruraymi más ali caycan, waquin publicadurcunapaj cashganno (Mat. 28:19, 20).

5. ¿Imanirtaj ninchi Pabluga calpachacoj runacunata yachachicunanpaj?

⁵ ¿Imatataj Pablo rurargan? Bibliaga wilacunmi imanir Pablo ali yachachicoj cashganta. Filipenses 1:10 textuchoga nin: “Ali kaqkunata ruranaykipaq tantiyakärinki”. Pabluga chaytami rurargan. Payga acrashga cargan runacunata yachachinanpaj, chaymi cawaynincho imaypis calpachacoj runa masincunata yachachinanpaj. Pabluga wasin wasin y “runakunapa nawpanchöpis” yachachicoj (Hech. 20:20). Payga munashgan horalachu o semanachoga manami juc ishcay horacunalachu yachachicoj, sinoga imay horapis y maycho caycarpis Diospita yachachej. Juc cuticho, Atenascho Timoteuta Silastawan shuyaraycaptin, chaycho israel runacunata y mana israel runacunatapis Tayta Diospa wilacuyninta tantiachergan. Y juc ishcay runacuna Diosman yäracur galaycärergan (Hech. 17:16, 17, 34). Jina wasilancho wichgarashga caycarpis lapan watucamojcunata Diospita parlapaj (Hech. 28:16-24; Filip. 1:13, 14).

6. ¿Imanotaj Pabluga waquincunata yachachergan?

⁶ Pabluga tiempunta ali camacächej yachachinanpaj. Y cada cadalami waquincunata nergan yanagänanpaj. Tantiarinapaj, naupa caj viajinchoga Juan Marcusta nergan yanagänanpaj, y ishcay caj viajinpäga Timoteutana nergan yanagänanpaj (Hech. 12:25; 16:1-4). Pabluga paycunatami yachachergan ali yachachicoj capäcunanpaj, hermanucunata ali cuidananpaj y congregaciuncunatapis shumaj camacächinanpaj (1 Cor. 4:17).

7. ¿Imata rurartaj ancianucunaga Efesios 6:14, 15 textucuna nishganta cäsucärinman?

⁷ ¿Imataj yachacunchi? Ancianucunaga Pablo rurashgannopis manami wasin wasin aywarlachu yachachicunman, sinoga may  chaycho caycaptinpis (leiriy Efesios 6:14, 15). Chaytaga ruranman rantipacoj aywar o aruynincho caycaptinpis. Y pipis Diosta aduranapaj wasicunata sharcachiycho yanapacuycaptenga, vecinucunata y materialcunata ranticojcunatapis Bibliapita parlapärinman. Jina Pablo rurashgannopis, predicashgan hora siervo ministerial cajcunata yachachinmanmi congregaciuncho imano yanapacunanpaj.

8. ¿Ancianucunaga lapantachuraj rurananpaj aunicunman?

⁸ Ancianucunaga imaypis tiempunta raquinman predicaciuncho yanapacunanpaj, manami congregaciunpa cajcunalata rurar caycanmanchu. Y alichi canman öraga waquin ruraycunata rurananpaj mana aunicuptin. ¿Imanir? Payla chay lapanta rurayta munaptenga, más alinnin caj ruraycunata manacajman churanga. Chayno carga, familianwanpis cada semana mana yachacunganachu, predicaciuncho yanapacunanpaj y wamrancunatapis yachachinanpäga tiempun manami canganachu. Waquincunaga lapantami rurananpaj aunicun, sasami mayganlatapis ‘mana’ ninanpaj. Pero Jehovaga munan puedishgayquimanno yanapacunayquipaj, manami shuyaranchu lapantaraj ruranayquipaj.

9. Ancianucunapa achca ruraynincuna caycaptenga, ¿öraga imaraj sasa canman paycunapaj?

⁹ ¿Imanirtaj chayta rurananpaj sasami? Ushanan junajcunacho cashganchiraycur Jehovapa sirvejnincunaga imayca sasacunapa pasanchi. Chaymi pipis shacyächimänanchipaj, yanapämänanchipaj y consolamänanchipaj munanchi. Waquincunaga consejaycunapaj caycan juchaman mana ishquinanpaj (1 Tes. 5:14). Ancianucuna lapan problemanchicunata alchayta mana camäpacurpis, Jehovami paycunata acrashga sirvejnincunata shacyächinanpaj y cuidananpaj. Pero tapucushun: ancianucunapa achca ruraynincuna caycaptenga, ¿maypitaraj tiemputa jorgunman hermanucunata yanapänanpaj?

10. 1 Tesalonicenses 2:7 wilacushganno, ¿imanirtaj ninchi Pabluga cristiano masincunata cuyashganta?

¹⁰ ¿Imatataj Pablo rurargan? Payga cristiano masincunata imaypis felicitajmi, y cuyapar shacyächejmi. Ancianucunapis chaynolami ruranman, hermanucunata cuyacuywan trataycunman (leiriy 1 Tesalonicenses 2:7). Pabluga cristiano masincunatami yarpächej Jehová y paypis cuyashgantami (2 Cor. 2:4; Efes. 2:4, 5). Cristiano masincunata amiguncunatano ricaj, y tiempuntapis camacächej paycunawan caycänanpaj. Pabluga manami pengacojchu cristiano masincunata wilapänanpaj imacunata manchacushganta y imacunawan luchaycashgantapis (2 Cor. 7:5; 1 Tim. 1:15). Payga problemancunalamanchu yarpachacoj, sinoga cristiano masincunata yanapänanpämi calpachacoj.

11. ¿Imanirtaj Pabluga cristiano masincunata consejaycoj?

 ¹¹ Öraga cristiano masincunata Pablo consejaycurganmi. Pero manami piñashgaga rurarganchu, sinoga ali shimilapa. Pabluga paycunata cuyajmi y problemacunaman jaticänanpaj mana munarganchu. Payga calpachacojmi consejuncuna waquincuna tantiacärinanpaj y ali chasquicunanpaj. Juc cuticho, Corintupita cristianucunata consejucunata goycurgan. Nircur Tituta cachamurgan consejuncuna imano chasquicushganta musyananpaj. Consejashganta paycuna ali chasquishganta musyar, ¡Pabluga alapa cushicorgan! (2 Cor. 7:6, 7).

12. ¿Imatataj ancianucuna ruranman yäracoj masincunata yanapänanpaj?

¹² ¿Imataj yachacunchi? Pablo rurashgannopis ancianucunaga tiempunta camacächinman hermanucunawan caycänanpaj. ¿Imano? Reuniuncunaman temprano chayaycur hermanucunawan parlapacärinman shacyächinanpaj y cuyashganta musyachicunanpaj. Y chayga manami achcatarächu parlashganpita canga (Rom. 1:12; Efes. 5:16). Jina Pablo rurashgannomi ancianucunapis Bibliawanmi hermanucunata shacyächinman y paycunata cuyashganta ricächicunman. Chaypitapis paycunapita altanto caycanman y rurashgancunapitapis felicitaycunman. Y pitapis consejaycunanpaj captenga, Diospa Palabranwanmi consejaycunman. Shumaj tantiachinman imapita consejaycashganta, pero chaytaga cuyacuywanmi ruranman. Chaynopa consejunta ali chasquinanpaj (Gál. 6:1).

13. ¿Imanotaj ancianucuna ricacun pantashgancunapita?

¹³ ¿Imanirtaj chayta rurananpaj sasami? Ancianucunaga noganchino juchasapa runa capäcun, chaymi pantarcunmi (Rom. 3:23). Öraga shumaj calpachacunanraj ima pantashgalanman mana yarparäcunanpaj. Capazchi waquincunaga ninman ‘cayta wacta rurayta camäpacönachu’, y chayraycur guelanäcurinman. Juccunaga pantashganpita ni ichiclapis yarpachacunchu, lapancho ali cashganta yarpapäcun.

14. Filipenses 4:13 wilacushganno, ¿Pablo ñanpu shongu runa cashpan imataj rurargan?

¹⁴ ¿Imatataj Pablo rurargan? Payga cuentata gocurgan debilidänincunata vencinanpäga manami quiquilanpitachu cananpaj, sinoga Jehovapa yanapacuyninwanrämi. Pablo cristianuman manaraj ticrar, Diospa sirvejnincunata pasaypa chiquir gaticachargan, pero tiempuwan cuentata gocurgan mana alita ruraycashganta y ñanpu shongu runaman ticrananpaj calpachacorgan (1 Tim. 1:12-16).  Jehovapa yanapacuyninwanmi cuyacoj, humilde y ali shongu runaman ticrargan. Unay mana alita rurashganpita laquicuptinpis, Pabluga masraj yarparäcoj Jehová perdunashganman. Chaymi payta sirvir caycargan (Rom. 7:21-25). Juchaynaj runa cayta mana puedirpis, Pabluga calpachacorgan ali cristianuman ticrananpaj y cada cadalami Jehovapa yanapacuyninta ashergan voluntäninta rurananpaj (1 Cor. 9:27; leiriy Filipenses 4:13).

15. ¿Imatataj Jehová shuyaran ancianucunapita?

¹⁵ ¿Imataj yachacunchi? Pipis anciano cananpäga manami juchaynaj cashganpitachu. Pero Jehovaga shuyaran ancianucuna cuentata gocunanpaj pantashgancunapita, y calpachacunanpaj ali cristianucuna cananpaj (Efes. 4:23, 24). Chaypäga Diospa Palabranpita shumaj yachacur cuentata gocunman imano caycashganta y imalachopis mejurananpaj. Chayta ruraptenga, Jehová paycunatami yanapanga y congregaciunchopis cushi cushilami yanapacunga (Sant. 1:25).

16. ¿Imaraj pasanman ancianucuna waquincuna pantashgancunalaman yarparäcuptenga?

¹⁶ ¿Imanirtaj chayta rurananpaj sasami? Congregaciuncho ancianucuna pilawanpis junto aruptin, öraga masrächi paycuna imalachopis pantashganta ricanga. Y chaycunalaman yarparäcuptenga paycunapita quejacunman y tosco runanopis ricacunman. Pabluga cristianucunata nergan chayta pasananpämi chiquicoj Diablo munaycan (2 Cor. 2:10, 11).

17. ¿Hermanucuna imano cashganmantaj Pabluga yarparaj?

¹⁷ ¿Imatataj Pablo rurargan? Payga calpachacorgan hermanucunapa ali ruraynincunaman yarparänanpaj. Chaymi pipis ofendiptenga, chaylamanga yarparäcojchu. Payga cuentata gocoj, pï pantashganta y pï mana ali runa cashganta. Pabluga hermanucunata cuyajmi y ali ruraynincunamanmi yarparäcoj. Y pipis alicunata rurananpaj calpachacuycajta ricarga, payga cuenta gocurgan ali runa cashganta y jucpa yanapacuyninwanga masraj aliyarcunanpaj.

18. ¿Imataj yachacunchi ishcay cristianacunata Pablo imano yanapashganpita? (Filipenses 4:1-3).

¹⁸ Ricärishun imano Pablo ishcay cristianacunata yanapargan Filipos marcacho caycaj congregaciuncho (leiriy Filipenses 4:1-3). Evodiawan Síntique cristianacuna mana ali apanacärishganta ricar, Pabluga paycunata gayaparganchu ni juzgarganchu. Chaypa trucanga, paycunapa ali ruraynincunaman y unaypita Jehovata sirviycashganman yarparaj. Pabluga musyarganmi Jehová paycunata cuyashganta. Chaymi consejargan amistananpaj. Hermanucunapa ali ruraynincunata ricashganga Pablutami yanapargan congregaciuncho waquincunawan ali amigo capäcunanpaj, y Jehovata cushishga sirvinanpaj.

19. 1) ¿Imatataj ancianucuna ruranman hermanucunapa ali ruraynincunaman yarparänanpaj? 2) ¿Imataj yachacunchi fotucho caycaj anciano Diospa wasinta pichapacuycashganpita?

 ¹⁹ ¿Imataj yachacunchi? Ancianucuna, hermanucunapa ali ruraynincunaman yarparay. Paycuna pantarcuptinpis, ali ruraynincunaga caycanmi (Filip. 2:3). Öraga hermanucunata corriginapaj caycaptinpis, Pablo rurashganno pantashgancunalamanga yarparäcuychu. Chaypa trucanga, Jehovata cuyashganta, paylata sirvinanpaj calpachacuycashganta ricay. Jina imalachopis mejurananpaj puedinanpaj cajta yarparay. Hermanucunapa ali ruraynincunaman ancianucuna yarparäcuptenga, yanapacunmi jucnin jucninpis congregaciuncho cuyanacärinanpaj y lapancuna juc yarpayla Jehovata sirvipäcunanpaj.

20. ¿Imatataj ancianucuna ruranman Pablupita maslata yachacunanpaj?

²⁰ Ancianucuna Pablupita maslata yachacuptenga, alimi canga. Chaypäga Índice de las publicaciones Watch Tower cajman yaycuriy, nircur lapircuy “Pablo” nishganman y “ejemplo para los ancianos” cajpita yachacuy. Chaycunapita yachacuycashgayquimanno cayno tapucuy: “¿Imanotaj Pablupa ejemplun yanapaman congregaciuncho cushi cushila yanapacunäpaj?” nir.

21. ¿Imatataj ancianucunaga gonganmanchu?

²¹ Ancianucuna, Jehovaga manami shuyaranchu juchaynaj runacuna capäcunayquipaj, sinoga pay munashganno sirvipäcunayquipaj (1 Cor. 4:2). Jehovaga ali nawilanwan ricargan Pablo imano calpachacorgan pay munashganno sirvinanpaj. Chaynolami gamcunapa rurayniquicunatapis Jehovaga valuranmi. Hebreos 6:10 nin: “Tayta Diosqa manami qonqanqatsu payta kuyar yärakuq mayikikunata yanapaykashqaykita”.