1, 2. ¿Imanotaj Diosta adurashwan y imanir?

 JUC waugui Jehovata adurar camanpa laduncho gongurpacur shongupita Diosta mañacun y juc taytapis familianwan Bibliapita yachacärin.

² Ichanga tapucushun: ¿paycuna rurashgantaga Jehová chasquinchuraj? Aumi, Jehovaga aduraciunninchita chasquinmi pipis payta cuyashpan respetuwan y munashganno ruraptin. Jehovata alapami cuyanchi, chaymi pay munashganno lapan shongunchiwan adurayta munanchi.

3. ¿Imapitataj canan yachacushun?

³ Cay yachachicuychomi ricashun imanomi unaycho runacuna Jehovata sirvipäcurgan y canan wichan imacunata rurartaj Jehovata aduranchi. Chauraga jucnin jucninta shumaj tantiaycur yarpachacushun imano Jehovata más aliraj sirvinapaj. Yachacushwanpis imanir Jehovata adurar-rämi cushishga cawanchi.

4. ¿Imanirtaj ninchi unay Diospa sirvejnincunaga Jehovata cuyashganta y respetashgantapis?

⁴ Unay runacuna Abel, Noé, Abrahán y Jobga Jehová mandashgantami cäsucärergan. Payman yäracur imaycacunatami rurapäcurgan, chaynopa ricacämurgan paycuna Jehovata respetashganta y cuyashgantapis. Bibliaga manami  wilacunchu imano paycuna Jehovata adurapäcushganta, ichanga Diostami respetapäcurgan; chaymi Jehová aduraciunninta chasquergan. Tiempuwanga israelitacunatami Jehová leynincunata goycurgan. Chaychoga claro wilacamurgan imano payta adurapäcunanpaj.

5. ¿Jesús wanushganpita pacha imanotaj Jehovata aduranchi?

⁵ Jesús wanushganpita pacha Jehovapa sirvejnincunaga unay leycunata mana cäsucärinmannachu cargan (Rom. 10:4). Chaypa trucanga canan cristianucunaga Jesucristo yachachishgantami cäsucärinan cargan (Gál. 6:2). Chaura cristianucunaga manami yarpachacunmanchu cargan leycunata umachicunanpaj, sinoga Jesús rurashganpita y yachachicushganpita shumaj yachacunman cargan. Canan wichan cristianucunaga Jesús rurashgannomi calpachacärin Jehovata adurananpaj (Mat. 11:29).

6. ¿Cay yachachicuyga imanotaj yanapämäshun?

⁶ Canan Jehovata imano aduraycashganchipita yachacushganchimanno tapucushun: “¿Jehová munashgannochu aduraycä, o imalapis caycanchuraj aliyarcunäpaj?” nir. Canancama Jehovata adurashganchi ali captinpis, alimi canga Jehovata mañacuptinchi imalachopis mejuranapaj.

7. Oraciunnichicuna ali “inciensuno” cananpaj, ¿imanotaj mañacushwan?

⁷ Mañacuptichimi Jehovata aduraycanchi. Unaychoga tabernaculucho y nircur templuchopis inciensutami goshtachipäcoj, Bibliaga chaywanmi oraciunninchicunata tincuchin (Sal. 141:2). Goshtachishgan inciensuga Diostami cushichej. Chaynolami Payga cushicun shongupita mañacuptinchi (Prov. 15:8; Deut. 33:10). Imaycacuna caycan Jehovata cuyashganchita y agradecicushganchita oraciunninchicunacho ninapaj. Jehovataga wilapashwanmi yarpachacuyninchicunata y ima munashganchicunatapis. Aumi, lapanta payta wilapänanchi. Pero manaraj mañacur alichi canman shumaj yarpachacunayquipaj imapita mañacunayquipaj. Chaynopa mañacuyniqui ali “inciensuno” goshtachiycashgayqui japuy cangapaj.

8. ¿Imata rurartaj Jehovata alabanchi?

⁸ Jehovata aduraycanchi payta alabaptinchimi (Sal. 34:1). ¿Y imanotaj chayta ruranchi? Jehová ali y cuyacoj Dios cashganta waquincunata parlapaptinchi. Shongunchicho agradecido caycarmi Jehovata alabanchi. Waran waran gomashganchicunaman yarpachacorga imaycacunami canga payta cutin cutin ‘gracias’ ninapaj. Jina waquincunata yachachiptinchimi Jehovata “llapan shongunchïwan alabashun” (Heb. 13:15). Chauraga, imanomi mañacunapaj shumajraj yarpachacushwan, chaynolami shumaj yarpachacunanchi imacunapita runacunata parlapänapaj. Runacunata “llapan shongunchïwan” yachachicuyta munanchi, chaymi shumaj preparacuptinchi shongupita yachachicushun.

9. ¿Imanotaj reuniuncunaman aywaptinchi yanapämanchi? ¿Imanotaj gamta yanapäshushcanqui?

⁹ Reuniuncunaman aywaptinchi Jehovata aduranchi. Unay israelitacunata Jehová nergan: “Cada watacho kimsa kuti lapan olqu kaqkuna TAYTA DIOS akrashqan sitiuman aywaykur paypa nawpancho  juntakanqa” (Deut. 16:16). Chaypäga wasincunapaj y chacrancunapaj mana yarpachacuylapa aywanman cargan. Jehovaga nergan: “Gamcuna watacho quimsa cuti aduramaj ñaupäman shamuptiqui mana pipis charicurcongapächu gamcuna tiyashayqui chacrataga” (Éx. 34:24). Chaycunacho paycunaga Diospa leynincunata shumaj tantiacärej, Jehová yanapashganman yarpachacärej y israelita masincunawanpis shumaj reguinacärej (Deut. 16:15). Noganchipis reuniuncunaman mana faltaypa aywaptinchega imaycacunatami yachacunchi. Jehovaga mayraj cushicun reuniuncunapaj preparacuptinchi ali comentariunchicunawan alabanapaj.

10. ¿Imanirtaj Jehovata cantapaptinchega payta alabaycanchi?

¹⁰ Jehovata aduranchi hermanunchicunawan cantaptinchi (Sal. 28:7). Israelitacunaga canciuncunawanmi Jehovata adurapäcurgan. Rey Davidpis 288 levitacunatami acrargan templucho Jehovata alabar cantapäcunanpaj (1 Crón. 25:1, 6-8). Nonganchipis alabanzacunata cantapaptinchi Jehovata cuyaycanchi. Vozninchi shumaj mana wiyacaptinpis pengacushwanchu cantanapaj. ¿Manachu parlaptinchega öraga imalachopis pantarinchi? Chayno captinpis congregaciuncho y runacunata yachachicushganchi horapis jinala parlanchi, manami pengacunchichu (Sant. 3:2). Chauraga chaynolami vozninchi shumaj mana wiyacaptinpis pengacushwanchu Jehovata cushishga cantanapaj.

11. Salmo 48:13 wilacushganno, ¿imanirtaj tiempunchita raquishwan familianchiwan Bibliapita yachacunapaj?

¹¹ Bibliapita yachacushganchi wamranchicunata parlapaptinchega Jehovata aduraycanchi. Israelitacunaga sábado junajcunacho jamanan cargan familianwan Diospita yachacärinanpaj (Éx. 31:16, 17). Jehovata cuyaj israelitacunaga wamrancunatami Diospita yachachej. Noganchipis cada cadala tiempunchita raquishwan Diospa Palabranpita yachacunapaj y yachacushganchiman yarpachacunapaj, chayta rurarga Jehovatami aduraycanchi. Yachacushganchega yanapämanchi Jehovaman más guelicunapaj (Sal. 73:28). Jina familianchiwan Diospita yachacuptinchega wamranchicunatami yanaparcushun Jehovaman guelicunanpaj, paypa amigun cananpaj (leiriy Salmo 48:13).

12. ¿Imataj Biblia wilacun tabernáculo sharcachishga cashganpita y imataj chaypita yachacunchi?

¹² Jehovatami aduranchi payta aduranapaj wasicunata sharcachiptinchi y cuidaptinchi. Bibliaga wilacunmi unay tabernaculuta y imaycancunatapis rurananpäga sagrado aruy cashgantami (Éx. 36:1, 4). Canan wichanpis Diosta aduranapaj wasicunata sharcachiptinchi y cuidaptinchega, Jehovaga chayta rican payta aduraycashganchino. Waquin hermanucunaga aypala horacuna chaycho arupäcun. Chaymi paycunata ‘gracias’ ninchi aruyninpita. Y manami chaylapitachu, runacunata yachachicunanpäpis tiempunta raquin y waquincunaga precursorno yanapacuyta munan. Ancianucunapis construcciunta yanapacun chayno hermanucuna precursor regularno yanapacunanpaj camacächiptin. Wasicunata sharcachiyta mana yachaptinchipis lapanchimi yanapacushwan Diosta aduranapaj wasicuna mana malugracänanpaj y limpio caycänanpaj.

13. ¿Imanirtaj aycalawanpis guellayninchiwan yanapacushwan?

 ¹³ Jehovata aduranchi guellayninchiwan yanapacuptinchi Diospa wilacuynincuna may chaymanpis chayananpaj. Jehovaga israelitacunata nergan paypa naupanman jinaylaga mana aywananpaj (Deut. 16:16). Lapancuna puedishganmanno ofrendacunata apapäcunan cargan. Chayta rurashpan ricacämurgan Jehovawan agradecido caycashganta lapan chasquishgancunapita. Chauraga noganchipis, ¿imatataj rurashwan Jehová lapan goycalämashganchicunapita agradecicunapaj? Puedishganchimanno aycalawanpis guellayninchiwan yanapacushun, chaynopa Diospa wilacuynincuna may chaymanpis chayananpaj. Apóstol Pabluga nergan: “Lapan shonquykiwan kushishqa shuntaptikiqa ofrendashqaykita Tayta Dios chaskipäkushunkipaqmi. Itsanqa kashqalanpita shuntapäkuy. Ama lakikäriytsu shuntashqayki ofrenda walkala kaptinpis” (2 Cor. 8:4, 12). Jehovaga cushicunmi lapan shongunchiwan goycuptinchega walcala captinpis (Mar. 12:42-44; 2 Cor. 9:7).

14. Proverbios 19:17 wilacushganno, ¿pishipacoj hermanunchicunata yanaparcuptinchega imanotaj Jehová rican?

¹⁴ Hermanunchicunata imalawanpis yanaparcuptinchi Jehovata aduraycanchi. Jehovaga israelitacunata bendecirganmi wacchacunata yanaparcuptin (Deut. 15:7, 10). Chaura noganchipis pishipacoj cristiano masinchita yanaparcuptinchega Jehovapaj ruraycashganchinomi caycan (leiriy Proverbios 19:17). Juc cuticho Pablo wichgarashga caycaptin Filipos marcacho tiyaj cristianucunami juc regaluta paypaj apachicurgan, chaynami paycunata nergan: “Apachimushayquega quiquin Tayta Diospa shongunpäno ofrenda-japuymi casha” (Filip. 4:18). Congregaciunninchicho caycaj hermanucunaman yarpachacur tapucushun: “¿Pilapis yanaparcunäpächuraj caycan?” nir. Jehovaga cushicunmi tiempunchita, calpanchita y ima yachashganchicunatapis camacächiptinchi hermanunchicunata yanapänanchipaj. Chayga Payta aduraycashganchinomi rican (Sant. 1:27).

15. ¿Imanirtaj sasachu Jehová munashganno aduraycunapaj?

¹⁵ Shumaj calpachacunanchirämi y tiempunchitapis camacächishwanrämi Jehová munashganno aduraycunapaj. Ichanga chayga manami sasachu (1 Juan 5:3). ¿Imanir? Paytaga cuyayculanchimi. Imanomi juc wamra taytanta cuyar juc dibujuta ruran regaluno goycunanpaj. Achca horacuna dibujaycar pasaptinpis payga cushicunmi ruraycashganpita. Chaynolami noganchipis cushicunchimi lapan calpanchiwan y tiempunchiwan Jehovata aduraptinchi.

16. Hebreos 6:10 textuga, ¿imanotaj shacyächishunqui Jehovata sirvinayquipaj calpachacuptiqui?

¹⁶ Wamracunaga manami igualchu. Chaymi taytancunata cuyashpan juc regaluta goyguptenga, regaluncunaga manami igualchu canga y taytacunapis chayta musyapäcun. Chaynolami Taytalanchi Jehovapis jucnin jucninchita reguimanchi. Capazchi gamga juccunapita mastaraj rurayta puedinqui. O edäniquiraycur, saludniquiraycur  o familiayoj cashgayquiraycur walcalata rurayta puedinqui. Chayno captenga laquicuychu (Gál. 6:4). Achca o walcala rurashgayquitaga Taytalanchi Jehová gongaycungachu. Payta cuyar lapan shonguyquiwan imalatapis ruraptiquega cushicunmi (leiriy Hebreos 6:10). Jehovaga musyan shonguyquicho ima caycashganta. Payga munan cushishgala aduraycunayquipaj.

17. 1) ¿Imatataj rurashwan Jehovata aduranapaj imalachopis mejuranapaj captenga? 2) ¿“ Cushishga canapaj” recuadrucho caycajcuna mayganlapis yanapäshushcanquichu?

¹⁷ ¿Y Bibliapita masraj yachacunapaj o runacunatapis yachachicunapaj sasa captenga? Calpachacunanchi cada cadala chaycunata ruranapaj y nircur tiempuwanga cushishganami rurashun. Cayman yarparcushun: manachu arpata tucayta yachacuyta munarga, manami juc ishcay cutila practicashganchipitachu canga. Sinoga waran waran ichiclapa ichiclapa y nircur más tiempuparaj practicananchi. Chayta ruraptinchega shumaj tucayta yachacushun, galanancho sasa captinpis puedishunmi. Y tiempuwanga gustamäshun y mastaraj tucaytapis munashunmi. Chaynolami canga Jehovatapis shumaj aduranapaj calpachacuptinchi.

18. ¿Imapätaj Dios camamashcanchi y chayta rurarga imanotaj yanapämanchi?

¹⁸ Jehovaga camamashcanchi paylata lapan shongunchiwan aduranapaj, y chayno rurarga alina y cushi cushila cawacunchi. Jina shamoj tiempuchopis paylatami adurashun (Prov. 10:22). Payga cananlapitanami yanapaycämanchi jaucala caycänapaj ima problemacunapa pasaptinchipis (Is. 41:9, 10). Chauraga imaycacunami caycan Jehovata aduraycashganchipita cushicunapaj. Pay Camacojninchi captin paylata adurananchi y alabananchipis (Apoc. 4:11).