1. ¿Ima ali wilacuytataj judiucuna chasquipäcurgan?

 ACHCA watapana babiloniucunapa munaynincho judiucuna carcaycaptin, Persiapa reynin “Ciruta TAYTA DIOS yarpayta qorqan Israel runakunata nacionninman kutitsinanpaq”. Ciruga “shimipapis y cartawanpis wilakatsirqan” judiucuna marcanman cutipäcamunanpaj y Jerusalenman chayaycur Tayta Diospa templunta sharcachipäcunanpaj (Esd. 1:1, 3). ¡Chayta wiyar judiucunaga alapachi cushicärergan! Canan ichanga yapay unayno Jehovata rasunpa adurapäcunanpaj cargan.

2. ¿Imatataj judiucuna rurapäcurgan Jerusalenman chayaycur?

² 537 wata wichan Jesús manaraj shamuptin, waquin judiucuna Jerusalenman chayapäcurgan, chayga caycargan Judá marcacho. Chayaycurlami jucla arur galaycärergan, y 536 watapäga mayna templupa cimientuncuna churashgana caycargan.

3. ¿Ima pruebacunapataj judiucuna pasargan?

³ Pero ichic tiempo pasariptinla, chay particho tiyaj runacuna michäcuyta galaycärergan, “Judá runakuna aruyta mana sïguinanpaq desanimatsiyta munapäkurqan” (Esd. 4:4). Ichanga mana chaylachu cargan, más pruebacunaraj shamunanpaj caycargan. 522 watapaj Persia naciuncho Artajerjes * mandar galaycurgan. Chaura chiquicojcunaga imaycacunatapis rurar galaycärergan judiucuna templuta mana sharcachipäcunanpaj, “leykunata mana cäsurmi runakunata” nacachipäcurgan (Sal. 94:20). Jina judiucuna reypa contrancho sharcupäcuycashganta tumpargan (Esd. 4:11-16). Artajerjes  paycunata creirmi templuta manana sharcachinanpaj mandargan (Esd. 4:17-23). Chaura judiucuna templuta cushishgala sharcaycächishganpita, cacharinanpämi cargan (Esd. 4:24).

4. Judiucuna templuta sharcachinanpaj chiquicojcuna michäcuptin, ¿imatataj Jehová rurargan? (Isaías 55:11).

⁴ Jerusalenpa cercalancho caycaj marcacuna, y Persia naciuncho reypa waquin mandäshejnincunaga imaycanopapis michäcuyta munargan templo sharcachishga mana cananpaj. Ichanga Jehovaga munarganmi templo sharcachishga cananpaj, y payga munashgantami imaypis ruran (leiriy Isaías 55:11). ¿Imataj rurargan? Zacariasta wilacojnin cananpaj churargan y pusaj visiuncunata ricächergan. Chauraga Zacariasnami judiucunata shacyächinanpaj ima ricashgancuna wilanan cargan. Chaynopa judiucuna chiquejnincunata mana manchacunmanchu cargan, y templutapis jinala sharcachipäcunanpaj calpachacunman cargan. Pichga caj visiunchoga Zacarías ricargan juc candelabruta y ishcay olivo yoracunata.

5. ¿Imatataj canan yachacushun?

⁵ Zacarías pichga caj visiuncho ricashganga, chay wichan judiucunatami shacyächergan. Noganchipis öraga calpaynaj ricacunchi, chaymi cay visiunga yanapämäshunmi Jehovalata sirvinapaj gaticachashga carpis, ima cambiucunapa pasarpis o ima wilacuycunata shumaj mana tantiacuptinchipis. Chay lapanta canan yachacushun.

6. Zacarías 4:1-3 textucho caycaj visiunga, ¿imanotaj judiucunata yanapargan? (Garancho caycaj dibujuta ricäriy).

⁶ (Leiriy Zacarías 4:1-3). Zacarías ricashganga judiucunatami yanapargan valurcharcunanpaj, chiquejnincunata mana manchacunanpaj. ¿Imanirtaj chayta ninchi? Zacariasga visiuncho ricargan ishcay olivo yoracunapita juc maticho aceitin shuntacashganta, y candelabrupa ganchis lamparancunaman yaycuycashganta, chaymi imaypis manami upicäcunchu. Zacariasga angelta tapurgan: “Tayta ¿imapätaj chayga?” nir. Chaura angelna Jehovapa jutincho nergan: “Manami suldärucunatarächu, manami callpataräpischu nistan, chaypa ruquenga Espiritullätami. Noga munayniyoj Tayta Diosmi chayno në” (Zac. 4:4, 6). Caycho ishcay olivucunapa aceitinpita parlaptenga, Diospa santo espiritunpämi parlaycan. Persia naciunpa soldaduncuna achca captinpis, Jehovapa poderninwanga ni ichiclapis tincurganchu. Chaura judiucunaga manami manchacunmanchu cargan. Sinoga Jehovapa poderninwanga templutapis sharcachipäcunman cargan, chiquicojnincuna michäcuptinpis. ¡Y chayga judiucunatami shacyächergan! Chaymi paycunaga Jehovaman yäracur, yapay templuta sharcachir galaycärergan.

7. ¿Ima mastaj pasargan judiucuna templuta sharcachipäcuyta ushananpaj?

⁷ Ichic tiempo pasariptinna, 520 watacho Persia naciuncho Darío I mandar galaycurgan, y chayga alimi cashga judiucunapaj. ¿Imanir? Ishcay watana mandaycashgancho Darío I cuentata gocurgan Artajerjes rurashganga mana ali caycashganta, chaymi yapay permisuta goycurgan judiucuna templuta sharcachipäcunanpaj (Esd. 6:1-3). Rey mandashganga judiucunata cushicherganmi. Y manami chaylachu, jina mandargan cercalancho caycaj marcacuna yanapänanpaj guellaywan, uywacunawan, micuycunawan y maspis (Esd. 6:7-12). Chaura judiucunaga walca tiempulacho templuta  sharcachipäcuyta ushargan, chayga cargan 515 watacho (Esd. 6:15).

8. Chiquishga carpis, ¿imanirtaj manchacunquimanchu?

⁸ Canan wichanpis Jehovata sirviycajcuna achcajmi gaticachashga carcaycan. Waquincunaga Testigucunata chiquishgan marcacunacho tiyapäcun. Chaychoga juccunata gobernadorcunaman y reycunamanpis apapäcun Diosta sirvishganraycur (Mat. 10:17, 18). Öraga juc autoridäna mandar galaycuptin leycunata camacächinman o juc juezpis decidishganga, hermanunchicunapaj favornin canman gaticachashga manana cananpaj. Waquin testigucunana gaticachashga mana carpis castancunami michäcun Jehovata sirvipäcunanpaj (Mat. 10:32-36). Ichanga Jehovata jinala sirvipäcuptenga, familiancunaga cuentata gocärergan rurashgancunaga yangalapaj cashganta, chaura michäcunnachu. Waquincuna unaycho chiquiycarpis, tiempuwanga Jehovapa testiguncunaman ticrapäcurgan. Chauraga Jehovata sirvishgayquiraycur chiquishga carga, guepaman ama cutiychu. Jehovaga gamwanmi caycan y espiritunwan yanapäshunqui. ¡Ama manchacuychu!

9. ¿Imanirtaj waquin judiucunaga laquishga carcaycargan?

⁹ Mushoj templupa cimientuncuna churashgana caycajta ricar, más auquinna caycajcunaga wagar galaycärergan (Esd. 3:12). ¿Imanir? Punta caj templuta ricashga cajcunaga musyapäcurgan cuyaylapaj y jatun cashgantami. Canan ichanga mushoj templuga tacshalami canan cargan, chaymi wagapäcurgan (Ageo 2:2, 3). Chauraga visiuncho Zacarías ricashganga, ¿imanotaj judiucunata yanapargan yapay cushicärinanpaj?

10. Zacarías 4:8-10 textucunacho nishganga, ¿imanotaj judiucunata yanapargan cushicärinanpaj?

¹⁰ (Leiriy Zacarías 4:8-10). Plomadata churapaylapa templuta Zorobabel sharcaycächejta ricarmi judiucunaga cushicäringapaj ángel niptenga, ¿imataj niycargan? Wasicunata sharcachejcunaga plomadawanmi musyapäcun ruraycashgancuna ali cashganta. Chauraga angelga niycargan mushoj caj templutaga judiucuna sharcachiyta ushananpaj y Jehová munashganno cananpaj. Chay templuwan Jehová cushishga caycaptenga, ¿imanirtaj waquincunaga mana cushicunmanchu? Jehovapäga más alimi cargan judiucuna mushoj  templucho pay munashganno adurapäcunanpaj. Chaura judiucuna chayta rurananpaj calpachacäriptenga, cushicärinanpämi cargan.

11. ¿Ima cambiucunataj sasa canman waquin Jehovapa sirvejnincunapaj?

¹¹ Ima cambiulapis captenga achcajpämi sasa canman. Waquincunaga achca watapami misionerucunano, precursor especialcunano o betelitacunano sirvircaycaptin mushoj asignaciunta chasquipäcurgan. Waquincunana edäninraycur carguncunata jaguirirgan, y chaycunapa pasarga laquicushwanchi. Öraga capazchi manami tantianchichu imanir chay cambiucuna cashganta y acuerduchopis manachi caycashwan. Jina ‘unayga cayta wacta rurargä, canan ichanga imatapis ruranäpäga mana camäpacönachu’ nirpis laquicushwanchi (Prov. 24:10). Ricärishun noganchitapis imanotaj yanapämanchi Zacarías visiuncho ricashgan Jehovata cushishga sirvinapaj.

12. Visiuncho Zacarías ricashganga, ¿imanotaj yanapämanchi ima cambiucuna captinpis cushishgala caycänapaj?

¹² ¿Imaraj yanapämäshun ima cambiucunapa pasarpis cushishga caycänapaj? Yarpachacushun imacunata Jehová canan wichan ruraycan y cushicushun paypa arojnincuna cashganchita (1 Cor. 3:9). Cayta yarpäshun: ima cambiucuna captinpis, Taytalanchi Jehovaga jinala cuyaycämäshunmi. Chauraga ima cambiulapis laquichishuptiquega, unaylamanga yarparäcuychu ‘unayga más ali cargan’ nir. Chaypa trucanga, Jehovata mañacuy yanapäshunayquipaj canan puedishgayquimanno payta cushishga sirvinayquipaj (Ecl. 7:10). ‘Unay rurashgäcunata ruräman’ nir yarpachacuychu, sinoga canan wichan imacunata ruranayquipaj cajman yarparay. Visiuncho Zacarías ricashganga yachachimanchi, ima cambiucuna captinpis Jehovalata cushishga sirvir caycänapaj.

13. ¿Imanirtaj waquin judiucunaga manchacuycargan templuta sharcachinanpaj?

¹³ Tayta Diospa templunta sharcachinanpaj permiso mana captinpis, sumo sacerdote Josué y gobernador Zorobabelga “Diospa templunta Jerusaléncho yapay arutsiyta qalaykatsirqan” (Esd. 5:1, 2). Y chayga waquin judiucunapäga mana alinomi cargan. ¿Imanir? Chiquicoj runacunaga cuentata  gocärinman cargan templuta sharcaycächishganta y yapay michäcunman cargan. Chauraga Zorobabelwan Josuega musyayta munargan Jehová paycunawan caycashganta. Ricärishun imataj Jehová rurargan yanapänanpaj.

14. Zacarías 4:12, 14 textucuna nishganpitaga, ¿imatataj sumo sacerdote Josué y Zorobabelpis tantiacärergan?

¹⁴ (Leiriy Zacarías 4:12, 14). Cay visiuncho angelga Zacariasta ricächergan ishcay olivucunata y chayga caycan Diospa acrashgan ishcay runacunami: Josué y Zorobabelmi. Chay ishcay runacunashi “caycan munayniyoj Tayta Diosta sirbinanpämi”. Cayga ninanmi Jehová Dios paycunata yanapaycashgantami. Chauraga waquin judiucunaga paycuna ima nipäcushganta cäsucärinman cargan. ¿Imanir? Jehovaga paycunawanmi marcanta pushaycargan.

15. Jehová Palabranwan pushaycalämashganchita valuranapäga, ¿imatataj rurashwan?

¹⁵ Canan wichan Jehovaga Palabran Bibliawanmi pushamanchi, chaycho pay nimanchi imano adurananchipaj. Chauraga Jehová Palabranwan pushaycalämashganchita valuranapäga, ¿imatataj rurashwan? Tiempunchita camacächishwan Bibliata leinapaj y tantianapaj. Tapucuy: “Bibliata o publicaciuncunatapis leicuptëga, ¿shumajchu yarpachacö leishgäman? Imalapis tantianapaj sasa captenga, ¿calpachacöchu ali tantianäpaj? O ¿imatapis janalanpa janalanpachu leicuycä?” (2 Ped. 3:16). Jehovapita yachacushganchiman yarpachacunapaj tiempunchita raquiptinchega, paytami cäsucushun y munaynintapis rurashun (1 Tim. 4:15, 16).

16. Ali tantiaj y yäracuypaj esclavo apachicamushgan wilacuycunata shumaj mana tantiaycarpis, ¿imaraj yanapämäshun cäsucunapaj?

¹⁶ Jina ali tantiaj y yäracuypaj esclavuwan Jehová canan wichan marcanta pushaycalämanchi (Mat. 24:45). Öraga capazchi esclavo apachicamushgan wilacuycunata shumaj manami tantianchichu. Tantiarinapaj, ima desgraciacuna pasaptin imata ruranapaj wilacuycuna chayamuptenga, capazchi nishwan ‘chaycunaga manami nogapächu, marcächoga quevä chayga pasanman’ nir, o pandemiaraycur esclavo rurashganga ‘pasaypa estricto’ nirpis yarpashwanchi. Chauraga ¿imatataj rurashwan ima wilacuycunapis noganchipäno mana cashganta yarpaptinchega? Yarpachacushun unay judiucuna rurashganman, paycunaga  Josuewan Zorobabel nipäcushgantami cäsucärergan, y biennincunapämi cargan. Jina yarpänanchi Bibliacho leishganchipita imano yanapämanchi. Waquincunaga Jehová ima nishganta rurananpaj shumaj mana tantiaycarpis cäsucärergan y nircur cawaynintapis salvarganmi (Juec. 7:7; 8:10).

17. Visiuncho Zacarías ricashganga, ¿imanotaj judiucunata yanapargan?

¹⁷ Visiuncho Zacarías ricashgan ichicla captinpis, judiucunatami yanapargan mana manchacärinanpaj, sinoga Jehovalata sirvir caycänanpaj. Y Zacarías ricashganta shumaj yachacur y cäsucurmi, judiucuna cuentata gocärergan Jehová yanapaycashgantami y cuyashgantapis. Jehovaga santo espiritunwanmi judiucunata yanapargan templunta sharcachipäcuyta ushananpaj y yapay cushicärinanpäpis (Esd. 6:16).

18. Zacarías visiuncho ricashganga, ¿imanotaj yanapäshunquiman?

¹⁸ Juc candelabruta y ishcay olivucunata Zacarías ricashganga gamtapis yanapäshunqui: calpata tarinayquipaj, chiquishga captiquipis Jehovata sirvinayquipaj, ima cambiucuna captinpis cushishga canayquipaj y ima wilacuycunatapis shumaj mana tantiacuptiquega Jehovaman yäracunayquipaj. Chauraga ¿imataraj ruranquiman cawayniquicho ima problemalapis yurircamuptenga? Juc, cuentata gocuy imano Jehová marcanta yanapaycashganta. Ishcay, Jehovaman yäracuy y lapan shonguyquiwan payta aduray (Mat. 22:37). Chayta ruraptiquega, Jehovami yanaparcushunqui cushishgala imaypis sirvinayquipaj (Col. 1:10, 11).