1. ¿Imatataj Pedro consejacurgan chay wichan cristianucunata, y imanirtaj cäsucunapaj sasano canman?

CIELUCHO o Pachacho cawanapaj captinpis alapa ali canga unay acrashga cristianucunata apóstol Pedro ima yarpächishgancunata yachacuptinchi. Paymi escribergan: “Akramaqnintsi Tayta Dios santu kashqanno qamkunapis santu kapäkuy. Tayta Diospa palabranchöpis kaynömi qelqaraykan: ‘Noqaqa santumi kä. Qamkunapis santu kapäkuy’” (1 Ped. 1:15, 16). Chauraga Jehová cashgannola canapämi calpachacushwan, paylami santo Diosninchega. Sasa ticracuriptinpis calpachacushwanmi Dios munashganno cawacoj runa canapaj, juchasapa carmi imalachopis pantarcunchi. Quiquin Pedrupis cutin cutin pantargan, pero calpachacurganmi santo runa cananpaj.

2. ¿Ima tapucuycunapitataj canan yachacushun?

² Canan yachacuycashganchicho cay tapucuycunapita yachacushun: ¿imano runatataj santo cashganta nishwan?, ¿imatataj Biblia yachachicun Jehová santo cashganpita?, ¿imano cawacurtaj noganchipis santo cashwan?, y ¿ima nishwantaj santo cashganchipita y Jehovapa amigun cashganchipita?

3. ¿Imamantaj runacuna yarpachacärin santo runapaj parlarga, pero maychotaj rasun cajta musyanapaj caycan?

³ Santo runapaj parlarmi waquincuna yarpachacärin laquicuycarla cawacoj religioso runapaj, cayga ricacämun öraga dibujucunacho o chay nirajta rurapäcushgan monumentucunacho. Ichanga Bibliaga wilacunmi Jehová santo Dios cashganta y cushishgala cawacoj Dios cashganta (1 Tim. 1:11). Jina noganchipaj parlarpis wilacun Diosta adurar cushishgala caycashganchita (Sal. 144:15). Jesusga parlarganmi ishcay cara religioso tucojcunapita, paycunash waquincuna ricanalanpaj ali cajcunata rurapäcoj (Mat. 6:1; Mar. 12:38).  Noganchega musyanchimi imano santo runa canapaj Bibliapita yachacushganchiraycur. Y amatar cuyacoj Diosninchipa consejuncunaga manachi sasa cangachu cäsucunapaj. Chaymi “santu kapäkuy” Jehová nimaptinchega santo canapaj camäpacushunmi. Pero chaypäga yachacunanchiraj imano santo runaman ticranapaj.

4. ¿Imapätaj parlaycanchi santo runapaj parlarga?

⁴ ¿Imano runatataj santo cashganta nishwan? Bibliacho “santo” canapaj parlarga, parlaycämun ali cajcunalata rurar cawanapaj y chaynola Diosta aduranapaj. Santo canapaj nirpis Diosta sirvinapaj raquishga cashganchitapis nishwanmi. Chauraga santo runamanga ticrashun ali cajcunalata rurarmi, Jehovalata adurar y paypita imaypis mana raquicäcurmi. Cushicuypämi, santo Diosninchipa amigunman chayanchi juchasapa runacuna caycarpis.

5. Santo angelcunapita parlarga, ¿imatataj Jehovapita yachachimanchi?

⁵ Jehovaga lapancho amatar santo Diosmi. Chaytami nipäcurgan tronunpa laduncho caycaj serafines nishgancuna. Cayno nir: “Munayniyoj TAYTA DIOSGA Santo, Santo, Santumi” (Is. 6:3). Cay angelcuna santo capäcushganraycurmi Diospa naupalancho imaypis carcaycan. Santo capäcushganpis ricacämurgan unaycho jucnin caj Moisesta yuripashgan wichan, maycho yuripashgan sitiuga sagradumanshi ticracurergan (Éx. 3:2-5; Jos. 5:15).

6, 7. 1) Éxodo 15:1, 11 wilacushganno, ¿imatataj Moisés nergan Diosninchi santo cashganpita? 2) ¿Imanotaj israelitacuna cuentata gocärej Jehová rasunpa santo Dios cashganta? (Garancho caycaj dibujuta ricäriy).

⁶ Israelitacunata Puca lamarta chimparcachirmi Moisesga Jehovapita nergan santo Dios cashganta (leiriy Éxodo 15:1, 11). Egipto naciuncho juc dioscunata adurajcunaga ni ichiclapis santo capäcurganchu. Chaytami nishwan Canaán naciuncho juc dioscunata adurajcunapitapis. Paycunaga wamrancunatami rupachipäcoj y diosnincunapa naupancho pasaypa mana alicunatami rurapäcoj (Lev. 18:3, 4, 21-24; Deut. 18:9, 10). Taytalanchi Jehovaga manami chay lutan dioscunanochu caycan, chaymi imaypis mañamanchichu mana alicunata ruranapäga. Diosninchega amatar Santo Diosmi. Unay Israelcho mayor caj sacerdotipa goripita vinchan nirajcho cayno palabracuna escribiraycaj: “TAYTA DIOSPA karmi santu” (Éx. 28:36-38).

⁷ Chayno palabracuna escribiraycajta pipis ricarga cuentatachi gocurgan Jehovaga rasunpa santo Dios cashganta. Y maygan israelitalapis chay sumo sacerdotipa naupancho mana chayashga carga ¿‘nogaga musyächu santo Dios Jehová cashganta’ ninmanchuraj?, manami. Chay wichanga Diospa Leyninta leipäcojmi runacunapa, warmicunapa, wamracunapa naupancho (Deut. 31:9-12). Noganchipis chaycho carga, cayno leipäcojtapis wiyashwanchi cargan: “Noqaqa TAYTA DIOSNIKIMI kaykä. […] Noqaqa santumi kaykä. Tsayno kaykaptïqa qamkunapis santu kapäkuy”, y caytapis yapay wiyashwanchi cargan: “Santu kaykaptïqa qamkunapis santu kapäkuy” (Lev. 11:44, 45; 20:7, 26).

8. ¿Imatataj yachacunchi cay textucunapita: Levítico 19:2 y 1 Pedro 1:14-16?

⁸ Lapan israelitacuna ima masta wiyashganta musyanapäpis Levítico 19:2 textuta ricärishun. Chaychomi Moisesta Jehová cayno nergan: “Israel runakunata kayno ninki: ‘Noqa TAYTA DIOSNIKI santumi kaykä.  Qamkunapis santu kapäkuy’”. Ichanga chayman yarparchi apóstol Pedrupis cristiano masincunata nergan: “Qamkunapis santu kapäkuy” (leiriy 1 Pedro 1:14-16). Moisés escribishgan Ley nishganno canan wichan mana cawaycarpis, apóstol Pedro escribishganga yarpächimanchi Levítico 19:2 textuman. Jehovaga amatar santo Diosmi y payta sirvejcunaga paynola canapaj calpachacushwan. Aumi, lapanchi calpachacushwan cielupaj acrashga cajcunapis y cay Pachacho cawanapaj cajcunapis (1 Ped. 1:4; 2 Ped. 3:13).

9. ¿Imanirtaj ali caycan Levítico 19 caj capitulupita yachacunapaj?

⁹ Jehová Diosninchita cushichiyta munarmi imano santo canapaj yachacuyta munanchi. Jehovapa consejuncunaga alapami yanapämäshun. Waquincunaga caycan Levítico 19 caj capituluchomi. Cay capitulupaj parlarmi Marcus Kalisch runa cayta escribergan: “Lapan Levítico librupitapis o Pentateuco nishgan cajpitapis más alincajmi cay capituluga, ima aycapita yachacunapaj caycan, jucnin jucninpitami wilacamun”. Mä cawayninchipita parlaj juc ishcay versiculucunapita yachacurishun. Y yachacunanchipaj shumaj caycan, cay 19 caj capituluga “santu kapäkuy” nirmi galaycamun.

10, 11. ¿Imata rurar santo runa canapätaj parlaycämun Levítico 19:3 texto, y imanotaj chaytaga cäsucushwan?

¹⁰ ‘Santo capäcuy’ nishgalanchomi Jehovaga caytapis nergan: “Mamaykita y taytaykita respitapäkunki. […] Noqaqa TAYTA DIOSNIKIMI kaykä” (Lev. 19:2, 3).

¹¹ Ali claro caycan, Diosninchita cäsucurmi taytanchicunataga respetashwan. Juc cutichomi Jesusta juc runa cayno tapurgan: “Maestru, ¿ima allicunatataj ruräman imaycamapis cawayta tarinäpaj?”. Jesusga nerganmi imata rurananpaj, jina nerganmi taytanta mamanta respetananpaj (Mat. 19:16-19). Cay mandatutaga fariseucunapis escribacunapis manami cäsucärejchu. Chaymi Jesusga paycunata alapa piñapargan, y ‘Tayta Diospa palabranta manacajpaj churashganta’ nergan (Mat. 15:3-6). ‘Diospa Palabran’ Jesús nishganchopis caycarganmi Chunca Mandamientucuna y canan leiycashganchi  Levítico 19:3 textupis (Éx. 20:12). Chauraga cay Levítico 19:3 textuchoga mandato caycan taytanchicunata respetanapaj, pero yarparcushun, guepan cajchoga mayna Jehová nergan: “Noqa TAYTA DIOSNIKI santumi kaykä. Qamkunapis santu kapäkuy”.

12. Levítico 19:3 texto ima mandacushganman yarpar, ¿imatataj tapucushwan?

¹² Jucninchi jucninchimi tapucunanchi, Taytanchita respetanapaj Dios mandacushganta cäsucuycashganchita o mana. Masraj cäsucunapaj captenga calpachacushwanmi chayta ruranapaj. Taytancunawan imano cawacushganman yarpar öraga pipis ninman ‘unayga taytäcunata alapa respetashcächu’ nir. Chayno captenga alichi canman respetayta y cäsupayta galaycuptenga. Paycunaraycur tiempunchita camacächir imayca caycan ruranapaj. ‘¿Diosta adurananpaj imalanpis pishiycanchu?, ¿micunanpaj, upunanpaj caycanchu?’ nirpis tapucushwanmi. Chay lapanta rurarga Levítico 19:3 texto ima nishgantami cäsucuycäshun.

13. 1) ¿Ima masta ruranapätaj mandacun Levítico 19:3 texto? 2) Lucas 4:16-18 texto wilacushganno, ¿imata yachacunapätaj caycan Jesús ima rurashganpita?

¹³ Santo runa canapaj Levítico 19:3 textupitaga mastaraj yachacunapaj caycan, chaycho niycan sábado junajta respetanapaj. Semanacho juc junaj jamapänapaj Leyga manami cananpänachu. Chayno captinpis imayca caycan israelitacunapita yachacunapaj, chay junajcho imata rurapäcushganpita y ima bendiciunta taripäcushganpita. Chay sábado junajga Diosta adurar jamapänanpäshi cargan. * Jesuspis chay junajmi sinagogacunaman aywaycur Diospa Palabranta liej (Éx. 31:12-15; leiriy Lucas 4:16-18). Sábado junajcho jamapäcunanpäga quiquin Jehovami mandacurgan, cayman yarpachacushganchimi yanapämashwan imayca rurashganchicunacho noganchipis tiempunchita raquir Jehovalata aduranapaj. Tapucushwanmi ‘¿lapan calpäwancho Jehovata aduraycä?’ nir. Maslata ruranapaj captenga jucla ruraycushun ari. Chayno captenga Diosninchiman masraj guelicushun.

14. ¿Diosninchita imano ricänapätaj yachachicun Levítico 19 caj capítulo?

¹⁴ Levítico librupa 19 caj capitulunchoga cutin cutinmi parlaycämun imataj yanapämashwan santo runa canapaj. Chuscu caj versículo ushashgancho cayno nin: “Noqaqa TAYTA DIOSNIKIMI kaykä”. Cayno palabracunanoga 16 cutinomi cay capitulucho yurimun. Y chayga yarpächimanchi Chunca Mandamientucunapa naupa cajman, chaycho nin: “Noqaqa TAYTA DIOSNIKIMI kaykä. [...] Juk dioskunamanqa ama yärakunkitsu” (Éx. 20:2, 3). Cristiano caycar y santo runaman ticrashga carga manami imapis raquichimashwanchu Jehovapita, amigun cashganchega imapitapis más puntachomi caycanman. Jehovapa testigun jutiwan reguishga carga manachi mana alicunata rurarga Diosninchipa jutinta ganratächishwanchu (Lev. 19:12; Is. 57:15).

15. Levítico 19 caj capitulupis parlanmi sacrificiucunapaj, ¿imamantaj chayga yarpachacächimanchi?

¹⁵ Israelitacunaga Diosnintano Jehovata chasquicoj lapan mandacushgancunata cäsucurmi. Levítico 18:4 texto nin: “Noqa nishqäkunata cäsukäriy. Leynïkunata cumplipäkuy. Nishqänöla kawapäkuy. Noqaqa TAYTA  DIOSNIKIMI kaykä”. Caycho Jehová nishgancunaga 19 caj capituluchopis yurimunmi. 5-8, 21 y 22 versiculucunaga wilacun animalcunata rupachinapaj. Lapan rupachishgancunaga Jehová munashgannomi ruracänan cargan. Cay versiculucunata leishganchimi yarpachacächimashwan noganchicunapäpis imanotaj sacrificiunchi caycan Jehovapaj. ¿Pay munashgannochu caycan? Chay lapancho calpachacunapämi Hebreos 13:15 textupis wilacun.

16. ¿Levítico librupa 19 caj capitulupa maygan versiculuntaj tantiachicun waquin runacunano mana cashganchita yarpänapaj?

¹⁶ Santo runaga canchi mana ali cajcunata rurajcunano mana carmi. Öraga calpachacunapärämi canman; estudiaj masinchicuna, aroj masinchicuna y mana Testigo caj familianchicunaga michämashwanmi cushi cushila Diosninchita sirvicunanchita. Chaypa pasaycarga, ¿imatataj rurashwan? Jucla imata ruranapaj Levítico 19:19 texto ima nishgan yanapämäshun. Waquilanla chaycho nin: “Röpata ama jatikärinkitsu ishkay casta hïluwan awashqataqa”. Caycho yurimoj leyga tantiachimanchi israelitacunaga manami carganchu waquin marca runacunanoga. Canan wichanpis visticunapaj ropanchega alimi ricacan ima hiluwanpis utcuwanpis jirashga captin. Ichanga pasaypa mana aliga canga Biblia mandacushganpa contran mana alicunata rurashganchimi, mayraj waquincunaga niycämanchimi ‘cayta wacta ruray’. Familianchicunata, amigunchicunataga respetanchimi, pero imapitapis más aliga canga Jehová munashganno cawacushganchimi. Ama gongashunchu: santo runaga cashun Jehovalata sirvinapaj acrashga japuy captinchimi (2 Cor. 6:14-16; 1 Ped. 4:3, 4).

17, 18. ¿Imatataj yachacunchi Levítico 19:23-25 textucunapita?

¹⁷ “Noqaqa TAYTA DIOSNIKIMI kaykä”, chayno Jehová nishganga israelitacunataga yarpachacächinmanchi cargan, cuentata gocärinanpaj Dios munashganno cawapäcuycashganta o mana. Yanapänanpäga caycargan Levítico 19:23-25 (leiriy) texto ima nishganmi. Imanoraj israelitacunaga Tierra Prometida nishganchona caycar chay mandatucunata cäsucärergan. Pipa chacranchopis frutacuna wayur galaycuptenga quimsa watacunapash mana micunapaj cargan. Chuscu watacuna pasaptenga Diosninchipaj ofrendano apapänapäshi canman cargan. Pichga wataman chayaycur-räshi dueñuncunaga chacranpa frutancunata  micupäcoj. Mayraj cay leyga israelitacunata yarpächergan quiquinpaj cajcuna más puntacho mana cananpaj. Paycunaga yäracärinman cargan imanlatapis Tayta Jehová mana faltachinanpaj cajta. Jehovaga shuyaraycargan payta adurashgancuna más puntacho cananta. Chaymi marcantapis mañacurgan ofrendancunata lasaj lasajta apapäcamunanpaj.

¹⁸ Levítico 19:23-25 textucunaga yarpächimanchi Sermón del Monte nishgancho Jesús ima nishganmanmi. Jesús nergan: “Ama yarpachakäriytsu […] ¿Imataraq mikushaq? ¿Imataraq upushaq?” nir. Caytapis nerganmi: “Jana patsacho kaykaq Taytayki imata munashqaykitapis musyaykanmi”. Diosga pishgucunatapis micuchinmi, manami jaguimäshunchu (Mat. 6:25, 26, 32). Jehovaga chapaycalämäshunmi, chaypitaga seguro caycanchi. Noganchipis waquicunata yanapayculäshun y congregaciunninchipäpis cushi cushila guellayninchiwan yanapacushun. Chayno ali shongulanchiwan yanapacurga payga bendicimäshunmi (Mat. 6:2-4). Aumi, pï maywanpis ali shongu carga Levítico 19:23-25 textutaga shumajmi tantiapashcanchi.

19. ¿Imanotaj yanapäshushcanqui canan Levítico 19 caj capitulupita yachacushgayqui?

¹⁹ Cushicuypaj cashga Levítico 19 caj capitulupita yachacushganchega, chaycho yachacushcanchi Jehovanola santo canapaj. Chaylaman yarparaycar cawacurga ima rurashganchicunachopis santo cashganchimi ricacämunga (1 Ped. 1:15). Achca runacunami ricapäcushga ali cawacushganchita, chayraycurga Taytalanchi Jehovatapis alabapäcush (1 Ped. 2:12). Pero Levítico 19 caj capitulupitaga masraj yachacunapaj caycan. Gatejnin caj yachachicuychoga cay capitulupa waquin caj versiculunpitapis yachacushun ima mascunata rurartaj cawayninchichoga santo cashwan.