1. ¿Imanirtaj Jesús nergan gatejnincunaga uysha japuy cashganta?

JESÚS gatejnincunawan caycarga juc uyshero japuymi cargan. Chaytami quiquin igualachergan uysherupita y uyshancunapita parlar (Juan 10:14). Igualachishganga rasunpami, uyshacunaga reguinmi uysherunpa vozninta, chaymi gayapaptinpis guepalanpa aywan. Chaytash juc runa ricargan y cayno wilacurgan: “Videuta ruranäpämi uyshacunata shuntayta munapäcurgä, pero gayacäriptëga maygan uyshalapis cäsucojchu. Chayno caycar michicojnin mozo yurircamurgan, pay gayacuptin ichanga uyshancunaga cäsuparganmi”.

2, 3. 1) ¿Imacunata rurartaj wiyacunchi Jesuspa vozninta? 2) ¿Imatataj yachacushun canan y gatejnin caj yachachicuychopis?

² Chay runa wilacamushganga yarpächimanchi Jesuspa gatejnincunapis uyshano caycar imata rurapäcunanpaj. Jesusmi nergan: “Paykunapis voznïta reqirmi cäsukamanqa” (Juan 10:16). Ichanga pipis ninman ‘Jesusga cieluchomi caycan, ¿imanotaj payta wiyäman?’ nir. Pero Jesustaga wiyanchi lapan yachachimashganchicunata cäsucurmi (Mat. 7:24, 25).

³ Cay yachachicuycho y gatejnin cajchopis Jesús ima yachachicamushganpita parlashun. Yachacunapaj canga imacunata mana ruranapaj Jesús nimashganchi, imacunata ruranapaj nimashganchipis. Naupata yachacushun imacunata mana ruranapätaj uysherunchi Jesús nimanchi.

4. Lucas 12:29 wilacushganno, ¿imacunaraycurtaj öraga laquicuycarla caycashwan?

⁴ (Leiriy Lucas 12:29). Gatejnincunatami Jesús nergan: “Ama lakikäriytsu: ‘¿Imataraq mikushaq? ¿Imataraq upushaq?’” nir. Chayno parlashganga yanapacunmi cawayninchicho.  Chayno captinpis cäsucunapaj öraga sasami o ajami canman. ¿Imanir?

5. ¿Imacunaraycurtaj waquin hermanunchicunaga laquicuycarla caycanman?

 ⁵ Öraga maygan hermanulanchipis laquicuycanmanmi ‘¿imataraj micushaj?, ¿imataraj visticushaj?’ nir. Guellayta tarinanpäpis marcanchoga sasa canman. Aumi, familianta manteninanpäga trabajupis guellaypis öraga canmanchu. Jina laquicuypaj canman familiacho aroj caj o guellayta apamoj caj wanushga captin. Masraj nacanapaj caycan cay COVID-19 gueshya wichanga (Ecl. 9:11). Mayganchilapis caycunapa pasashga carga, ¿imanotaj ‘ama laquicäriychu’ Jesús nishganta cäsucushwan?

6. Wilacamuy imataj juc cuticho Pedruwan pasargan.

⁶ Juc cutichomi Pedruwan waquin apostulcuna Galilea marcapa lamarnincho carcaycargan y fiyupa wayrar galacaycamuptinmi yacu jananpa Jesús shaycämojta ricapäcurgan. Chauraga Pedro nergan: “Rasunpa qam karqa noqapis yaku jananpa shamunäpaq niykalämay, tayta”. “¡Shamuy!”Jesús niptenga, “büquipita yarqurir yaku jananpa Jesús kaqman aywayta qalaykurqan. Fiyupa wayraptinmi mantsakashpan talpukarqan. Tsaymi qapararqan kayno nir: ‘¡Salvaykalämay, tayta!’”. Chauraga Jesús maquinta chutarcur salvaycurgan. Ali ¿au?, Pedruga lamar jananpa purergan Jesuslata ricaraycashgan horami, ichanga talpucar galaycurgan yacu pulchachaycajta ricar y fiyupa wayra imatapis cumamushganta ricarmi (Mat. 14:24-31).

7. ¿Imatataj yachacunchi apóstol Pedrupita?

⁷ ¿Imatataj yachacunchi Pedruwan ima pasashganpita? Buquipita yargurir yacu  jananpa purinanpaj manachi yarpachacurganchu talpucänanpäga. Derechula aywar Jesusman chayananpächi yarpargan, pero juc laducunapa ricachacurmi talpucar galaycurgan. Noganchega Pedrunopis yacu jananpa purishunchu, pero ¿imacunataraj cay munducho ricachacur galaycushwan? Pï maypapis problemancunaga caycanmi, chaymi nawinchega Jehovalaman y aunicushganlaman caycanman, pajta sinoga espiritual cajcho guepapar galaycushwan. Ima laquezacunapapis o problemacunapapis pasar Taytalanchi Jehová yanapämänanchipaj cajman yarparaycäshun. ¿Imanotaj chayta rurashwan?

8. ¿Imataj yanapämäshun imacunapapis yarpachacuycarla mana caycänapaj?

⁸ Chauraga alapa yarpachacuycänapaj trucanga Jehovamanmi yäracunanchi. Paypaj arurmi waran waran paypa cajtaraj ruranchi, amatar cuyapämashpanchi imatapis faltachimäshunchu (Mat. 6:32, 33). Sirvejnincunataga micuyniynaj imaypis jaguirishgachu (Deut. 8:4, 15, 16; Sal. 37:25). Diosninchiraycur pishgucunapis ali micushga captin y waytacunapis cuyaylapaj ricacuptenga manami yarpachacushwanchu ‘¿imataraj visticushaj, imataraj micushaj?’ nir (Mat. 6:26-30; Filip. 4:6, 7). Tayta cajcunaga wamrancunapaj yarpachacur imalantapis faltachinchu, chaynolami Tayta Jehovapis noganchipaj yarpachacur ima pishiycämashganchicunataga goycalämäshunmi. Yarpaylapis ama yarpäshunchu, Jehovaga manami cachaycamäshunchu.

9. ¿Imatataj yachacunqui juc matrimonio imapa pasashganpita?

⁹ Ricärishun imanotaj Jehová imatapis faltachimanchichu. Chaypaj caypita wilacushun: paninchicunash wasiyniynaj juc marcacho carcaycargan; chaypitanash juc matrimonio sagra carrunwan paycuna caycashganpa aywapäcurgan reuniunpa apapäcunanpaj. Reunión usharcuptinshi wauguilanchega panicunata nergan: “Acu wasëpa imalatapis micupacunapaj”. Pero chaypitanash cay matrimonio ninacurgan ‘imapätaj chayta nishcanchi, wasichoga imalapis canchu micunapaj’ nir. Chayno captinpis aywapäcurganshi wasinpa, chayaycurnash puncuncho ricapäcurgan ishcay bolsacunacho achca viviriscuna caycashganta. Chaypita wauguilanchi cayno wilacun: “Musyapäcurgächu pï apamushganta, Jehovaga chapaycalämashcanchimi”. Tiempuwanpis cay matrimoniupa carrun masräshi malogracäcurgan. Predicapäcunanpämi carrunta purichej, pero guellayninshi carganchu alchapänanpaj. Imano captinpis juc mecanicumanshi apapäcurgan. Chaychona caycar juc runa yurircamur tapucurgan: “¿Pipa carruntaj cayga?”. Wauguinchi nergan: “Nogapa carrömi, alchachinäpaj apamushcä”. Chay runana nergan: “¿Ranticamanquimanchuraj? Cayno color carrutami warmë ashiycan, ¿aycataj mañamanquiman?”. Y ranticurgan carrunta, chasquishgan guellaywanga juc carrutana rantinanpäpis ayparganshi. Cayno wilacun: “Chay junajcho lapan pasashganta ricarga cushicuypämi cargan. Musyapäcömi, lapanpa guepanchoga quiquin Jehovami caycargan”.

10. ¿Imanotaj yanapämanchi Salmo 37:5 ima aycacunapaj yarpachacuycarla mana caycänapaj?

¹⁰ Michimajninchi Jesuspa vozninta wiyarga y imaycayoj canapaj alapa mana yarpachacuycarga, Jehovaga ima necesitashganchicunatapis goycalämäshunmi (leiriy Salmo 37:5; 1 Ped. 5:7).  Pichga caj parrafuchoga  nishganchina imacunapis laquichimänanchipaj cajta. Pero Jehovaga yanapaycämashganchilami wasicho tayta cajwan o arupashganchi maygan patronnichiwanpis. Y ¿familiacho tayta caj arunanpaj mana camäpacurga o maycho arunanpaj mana captenga?, chayno carga Jehovaga imalanchitapis faltachimäshunchu. Cananna ricärishun imata mana ruraycänapätaj niycalämanchi michicojninchi Jesús.

11. Mateo 7:1, 2 textucuna wilacushganno, ¿sasa captinpis imata mana ruranapätaj Jesús nergan?

¹¹ (Leiriy Mateo 7:1, 2). Jesusga musyarganmi juchasapa cashganchiraycur pipis pantashgalanta ricaraycashganchita. Chaymi “ama juzgaytsu” nergan. Calpachacurpis öraga cristiano masinchita juzgar galaycushwan. Chauraga, ¿imaraj yanapämashwan? Jesusta wiyacushganchi y pitapis juzgaychu nimashganchita cäsucurpis.

12, 13. Jehová imano Dios cashganman yarparga, ¿imanotaj yanapämanchi pitapis mana juzganapaj?

¹² Jehová imano cashganmanpis yarpachacushwanmi, payga manami pantashganchilata ricaraycanchu. Rey David jatun juchata rurashga carpis, Bat-Sebawan punucur y paypa runanta wanuchishga carpis Jehovaga yarparaycashgalami ali cajta rurashgancunaman (2 Sam. 11:2-4, 14, 15, 24). David mana alicunata rurashganraycurga familianpis y waquincunapis nacapäcurganmi (2 Sam. 12:10, 11). Juc cutichopis Israelpa marcancunacho sensapäcunanpaj mandacurgan, chaychopis yäracurganchu Jehovaman. Ali tucur imarchi maychicaj soldaduncunalaman yäracurgan. Rurashgancunaga imamantaj chayachergan. Jehovami castigargan, 70.000 israelitacunami gueshyar wanupäcurgan (2 Sam. 24:1-4, 10-15).

¹³ David cawashgan wichan noganchipis cawarga, ¿imataraj nishwan cargan paypita?, ¿Davidta juzgarchuraj galaycushwan?, ¿‘imanirtaj paytaga laquipar Jehová perdunashga’ nir? Jehovaga manami noganchinochu yarpan. Jehovaga yarpachacurganmi lapan cawaynincho David yäracoj cashganman y shongupita arrepentido cashganmanpis. Chaymi lapan juchancunata perdunargan. Musyarganmi Payta cuyashganta y ali cajta rurar galaycunanpaj cajta. Cay lapanman yarparga agradecicunchimi chayno Taytalanchi Jehová cashganpita (1 Rey. 9:4; 1 Crón. 29:10, 17).

14. ¿Imata rurashganchitaj yanapacun waquincunata mana juzgananpaj?

¹⁴ Chayno perdunacoj Diosninchi caycaptenga, chauraga noganchipis ¿imanotaj waquincunawan cuyapänacur goyashwan? Öraga waquincunata jucla juzgayta munanchi, ichic pantarishganlapita. Ichanga Diosninchi Jehovano carga piwanpis alimi goyäcushun. Diamanticuna manaraj arupashga captenga rumicunanolanomi ricacun, pero yachaj carga musyanchimi arupashga captenga cuyaylapaj y chaniyoj diamantiman ticrananpa cajta. Chaynolami ricashwan runa masinchita, Jehovawan Jesús rurashgannopis manami janalanpaga ricapaycashwanchu.

15. Pipis imacunapa pasaycashganman yarpachacorga, ¿imanotaj yanapämäshun paycunata alapa mana juzganapaj?

¹⁵ Waquincuna ali rurashgancunalaman yarpachacurpis, ¿ima mastaj yanapämäshun juzgacoj runa mana canapaj? Imano cawaycashganmanpis yarpachacushwanmi. Mä cayta tantiarcushun Jesús cawashgan  wichan juc viudapaj parlar. Juc cutichomi templucho caycar chay viudata Jesús ricargan ishcay monedalanta juc cajaman winaycajta. Jesusga manami nirganchu ‘imanirtaj chaylata ofrendacun’ nir. Ishcay monedacunalata goshganman yarpachacunanpaj trucanga, imano cawaycashganmanmi Jesusga yarpachacurgan, y cushicurmi alicunalata paypita parlargan (Luc. 21:1-4).

16. ¿Imatataj yachacunqui Verónica wilacamushganpita?

¹⁶ Verónica paninchipita parlarcushun, mä imatash payga waquincunapita yachacurgan. Congregaciunninmanshi shamoj juc japalan mama ichic wamralanwan. Verónica pani nin: “Paytaga congregaciuncho alapa ricargächu, chaymi mana alino paypita yarpargä. Pero juc cutichomi predicanäpaj ishcäcuna yargupäcurgä. Chaycho payga wilamargan wamran gueshyashganraycur achca problemacunapa pasashganta. Wamranraycurga imaycatami ruraj, congregaciunman apamunanpaj o micuyninta gonanpäpis”. Chayta ricashganpita Verónica nin: “Yarpachacurgächu problemacunayoj cashganta, cananga valurämi y respetämi Jehovata sirvinanpaj calpachacushganpita”.

17. ¿Imata ruranapätaj mandacun Santiago 2:8 texto, y chaycho nishgantaga imanotaj cäsucushwan?

¹⁷ ¿Imatataj rurashwan juc hermanuta juzgaycashganchita cuentata gocurga? Ama gongashunchu, hermanunchicunataga amatar  cuyashwanmi (leiriy Santiago 2:8). Taytanchi Jehovatapis ruwacushwanmi juzgaj runa mana canapaj. Y mañacurirpis quiquinchimi calpachacushwan pita juzgaycashganchiwan parlanapaj. Chayta rurarga más cushi cushilachi paywan goyäcushun, imalatapis paywan micupacushunchi. Chayno hermanunchicunawan masraj reguinacurga Jehovanola y Jesusnola pipis pantashgancunalamanga yarparaycäshunchu. Chay lapanta rurarga Jesús mandacushgantami cäsucuycäshun, pitapis juzgaycäshunchu.

18. ¿Imacunata rurartaj cäsucunchi uysherunchi Jesuspa vozninta?

¹⁸ Imanomi uysherucuna gayacuptin uyshancuna jucla wiyan, chaynolami Jesuspa gatejnincunapis paypa vozninta wiyacunchi. Imata tarinapaj cajlaman mana yarpachacuycarga y pitapis mana juzganapaj calpachacurga, Jehovawan Jesusga bendicimäshunmi. ‘Walca uyshacunapita’ carpis o ‘waquin caj uyshacunapita’ carpis lapanchimi calpachacunchi uysherunchi Jesuspa vozninta wiyacunapaj (Luc. 12:32; Juan 10:11, 14, 16). Gatejnin yachachicuycho ricärishun ima masta ruranapaj Jesús mandacushganpita.