Cielucho caycarga Jesuspis yachacurganchi waquincunawan cushi cushila arunanpaj. Pachachona caycarga jinala cushicurgan waquincunawan juntula arupacur. ¿Imatataj paypita yachacunchi? Quimsa caycan yachacunapaj. Mä imanoshi waquincunawan juc shongula mana raquicaypa arushwan.

Waquincunawan yanapänacur aroj runaga runa masintaga valuranmi, manami ali tucunchu, ñanpu shongumi. Mayraj Jesús yachacurgan chayno Papänin cashganpita. Jehová Diosninchilami Camacojga, chayno captinpis churin Jesustaga valurarganmi yanapacamushganpita. Camashgancho yanapäshinanpämi cayno Jehová nergan: “Kananqa runata kamashun kikintsi niraqta” (Gén. 1:26). Chayta wiyarga ‘Papänega humildimi’ nirganrächi Jesusga (Sal. 18:35).

Jesuspis humildimi cargan cay Pachacho caycar. Rurashgancunapita runacuna alabapaptenga Jesusga Papäninta alabapäcunanpaj nej (Mar. 10:17, 18; Juan 7:15, 16). Gatejnincunawanpis piñashgala cacärejchu, jucnin jucnintaga amiguntano ricaj, manami ashmaynintanoga (Juan 15:15). Humilde canapaj yachachinanpämi juc cutichopis gatejnincunapa chaquinta maylapargan  (Juan 13:5, 12-14). Jesusnolami waquincunatapis valurashwan, manami yarparaycashwanchu quiquinchipaj cajlamanga. Jucninchi jucninchi respetanacurga y pipis alabamänanchita mana ashiycarga cawayninchega más cushicuypämi ticracurenga (Rom. 12:10).

“Yätsikuqkunata tapukurir ruraptinmi itsanqa ali kanqa” chayno Biblia nishgantami humilde runacunaga chasquicun (Prov. 15:22). Imaycata ruranapaj puedirpis, imaycata yachacushga carpis, rasunpa cajchoga manami lapanta musyanchichu. Quiquin Jesuspis juc cuticho nergan ‘Papänïlami chayta musyan’ nir (Mat. 24:36). Gatejnincuna parlacaramuptinpis manami pengacächejchu (Mat. 16:13-16). Chaychi pï maypis Jesusmanga mana manchacuypa guelicoj. Chauraga noganchipis humilde carga, y waquincuna yanapämänanchipaj ashirga jauca jaucalami cawacushun y Biblia nishganno lapanpis ali canga.

Congregaciuncho ancianuno yanapacojcunaga Jesusnomi humilde capäcunman. Yarpapäcunmanmi imacunapis ali camacänanpäga espíritu santuga mayganlatapis parlachinmanmi. Reuniunnincunacho caycar jucnin jucninpis mana manchacuylapa parlacaramuptenga congregaciunpis alimi ricacunga.

Ali runa cashganchega ricacämunmanmi, chaymi ninchichu ‘noga rurashgälami ali caycan’ nir. Jesusga ricarganmi Taytan Jehová yanapacoj Dios cashganta. Chaymi lapan runacunata salvananpäpis cuyashgan churin Jesusta mandamurgan (Juan 3:16).

Jesuspis ‘mana’ ninanpaj caycaptinpis öraga ‘aumi’ nergan. Chayta ricanchi juc warmita yanapaptin. Jesusga Israel naciunlata yanapänanpämi shamurgan, pero chay warmiga fenicia marcapita cargan (Mat. 15:22-28). Gatejnincunapitapis Jesusga imaycataraj rurananta shuyararganchu. Quimsa cuti Pedro niegashga captinpis, Jesusga perdunaycurganmi y congregaciuncho yanapacunanpäpis nerganmi (Luc. 22:32; Juan 21:17; Hech. 2:14; 8:14-17; 10:44, 45). Jesús rurashganman yarpachacurmi, tantiarcunchi ali runaga canchi waquincunapis yanapacunanta jaguirmi (Filip. 4:5).

 Yanapacoj y ali runa carga pï maywanpis arunapaj caycaptenga ali nawilanchiwanmi ricaycäshun. Jesusga lapancunawanmi ali shongu caj, chayta ricarmi chiquicoj runacuna piñacärej, ‘payga juchata rurajcunawan micun upun’ nipäcoj (Mat. 11:19). Jesusnolami noganchipis pï mayta cuyapar juc shongula arushwan. Louis wauguipita parlarcushun, payga congregaciuncunata watucar Betelcho yanapacurgan, may chaypita shamoj hermanucunawan arushganpita cayno wilacun: “Nogapäga hermanuläcunaga caycan juc paredta sharcachinapaj yaycoj achca tamaño rumicunanomi. Rumicunata ali ricapaycur ricapaycur churaparga, ima paredpis shumajmi ricacun. Nogapis ali runa canäpaj calpachacurgä, piwanpis cuyapänacur y jauca jaucala caycänapaj, chaynopa trabajücunapis ali yargunanpaj”. ¡Ali ruraj runa ¿au?!

¿Imanotaj congregaciuncho waquincunawanpis yanapänacur caycashwan? Ichanga predicanapaj grupunchicho caycanman mayor cajcuna, wamracuna o familianta manteninanpaj alapa aroj taytacuna. Paycunawan Diospita yachachicurga alichi canman yarpachacuptinchi imay hora paycuna tiempunta camacächinanpaj cajta, chayta rurarga cushi cushilami predicapäcunga.

Ali amigo carga ‘waquin runacunataga yanapäshunmi’ (1 Tim. 6:18). Taytan Jehovata Jesús yanapaptenga ricarganchi payga imatapis pacapaylapa mana rurashganta. Jesusga ricarganmi cielucho imaycacunata Jehová camashganta, chaypitaga payga yachacurganchi (Prov. 8:27). Pachacho caycarga gatejnincunatami Jesús wilapargan Taytanpita yachacushganta (Juan 15:15). Jehová rurashgannolami noganchipis hermanunchicunata wilapashgan imatapis yachacushganchita. Chauraga juc ali amiguga wilacunmi ima yachacushgancunatapis manami pacaycunchu ‘nogala más yachaj canäpaj’ nir. Aumi, cushi cushilami ima yachacushganchicunataga waquincunata wilapayta munanchi.

Waquincunata shacyächinapäpis calpachacunchimi. Alimi ricacunchi pilapis calpachacuycashganchita ricar ‘alitami ruraycanqui’ nimaptinchega. Jesusga tiempuntami camacächej gatejnincunatapis y waquincunatapis shacyächinanpaj (Mateo 25:19-23; Luc. 10:17-20 textucunawan tincuchiy). Juc cutichoga ‘rurashgäcunapitapis mastarämi rurapäcunqui’ nergan (Juan 14:12). Wanunanpäna caycaptinpis gatejnincunata felicitarmi cayno nergan: “Imano ñacaptëpis gamcunaga nogawanmi imaypis caycashcanqui” (Luc. 22:28). Chayta wiyarga gatejnincunaga masrächi calpachacärergan. Noganchipis hermanunchicunata felicitarga cushi cushilami capäcunga y yarpashganchipitapis mastarächi rurapäcunga.

Kayode jutiyoj hermano cayno nin: “Manami juchaynajrächu canayqui ali amigo canayquipäga, pero ali yanapäcoj y shacyächicojga cashwanmi arushganpita waquincunata felicitar”. ¿Gampis chayno ali amigucu canqui? ¿Tapupanquimanchuraj waquincunata ali amigo cashgayquipita o mana? ¿Amiguyquicunaga guelicamuncu gamman, Jesuspa gatejnincuna rurashganno? Chauraga ali amigo carga apóstol Pablunopis caynomi ninqui: “Nogacunaga munä cushisha yäracunayquipaj yanapayllatanami” (2 Cor. 1:24).