1. ¿Imataj ‘Diosninchipa jauca cawaynin’, y imanotaj yanapämanchi? (Filipenses 4:6, 7).

 CAY munduga manami tantiacunchu “Diosninchipa jauca cawayta” ima cashganta. Chayga caycan pipis Dioswan ali amigo cashganraycur jaucala cawacushganmi. Diosninchipa jauca cawayninta chasquicurga segurumi sienticunchi (leiriy Filipenses 4:6, 7, Biblia Ambo Pasco). Cushishgalami goyäcunchi Jehovata cuyajcunawan caycar y jaucala cawayta gocoj Dioswan ali amigo captinchipis (1 Tes. 5:23). Taytalanchita reguiycuptinchi, yäracuptinchi y cäsucuptinchi Diosninchipa jauca cawaynintami chasquiyculanchi. Chay jauca cawayta chasquicuptinchi shongunchita ancashyarcachin sasacunapa pasaptinchi.

2. ¿Imanirtaj seguro caycanchi Diosninchipa jauca cawayninta chasquinapaj?

² ¿Rasunpacu sasacunapa pasaptinchi Diosninchipa jauca cawayninta chasquiycushwan? ¿Jaucalachuraj caycashwan peste gueshyacuna yurircamuptin, ilajpita ima desgraciacunapis pasaptin, pleitucuna captin o autoridäcuna gaticachamaptin? Chay sasacunaga pitapis manchacächinmanmi. Pero Jesusga discipuluncunata caytami consejaycurgan: “Ama llaquicunquichu ni manchacunquipischu” (Juan 14:27). Chaychica waugui panicunami Jesús nishganta rurargan. Jehová yanapaptinmi sasacunapa pasarpis, jaucala caycashganta sienticärergan.

3. ¿Imanotaj juc peste gueshya o juc pandemia sientichimashwan?

³ Peste gueshya o pandemia yurircamuptin, ali cawacuycashganchipita  alapa sasachi ticracurinman. Yarparcushun COVID-19 gueshyaraycur chaychica runacuna imano sienticärishganman. Juc encuestachoshi tapucärishgan runacuna pulanpitapis más covid gueshya wichan punuytapis mana puedishganta nipäcurgan. Jinamanpis runacuna masraj yarpachacärergan y alapa laquicärergan, waquincuna masraj upiacärergan y drogata utilizapäcurgan, familiancho peliapäcurgan y wanuchicuytapis munapäcurgan. Tiyashgayquicho peste gueshya yurishgana captenga, ¿imataraj ruranquiman Diosninchipa jauca cawayninta chasquinayquipaj?

4. ¿Imanirtaj cay último tiempupaj Jesús wilacushganta musyar jaucala cawanapaj yanapämanchi?

⁴ Jesusmi nergan último tiempucho “juc-lächo juc-lächo” peste gueshyacuna cananpaj (Luc. 21:11). Chayta musyarga jaucala caycänapämi yanapämanchi. ¿Imanir? Musyaycarnaga peste gueshya yurimuptenga manami alapaga yarpachacunchinachu. Canan Jesús nishgannolami pasacuycashganta ricanchi. Chaymi cay último tiempucho cawaycarga Jesús nishgantami cäsucunchi. Pay nergan: “Ama mancharinquicunachu” (Mat. 24:6).

5. 1) Filipenses 4:8, 9 nishganno, ¿imatataj Jehovata ruwacushwan peste gueshya yurircamuptin? 2) ¿Imanotaj Bibliapita grabaciuncuna juc panita yanapargan, y chaypita imataj yachacunchi?

⁵ Peste gueshya yurircamuptin yarpachacunchi y manchacunchimi. Chaynomi Desi jutiyoj pani sienticurgan. b Primun, tiyun y doctorninpis COVID-19 gueshyawan wanucäriptin, ‘cananga contagiacushächi y mamätapis contagiashächi’ nir manchacurgan. Jina ‘aruynëtapis ograshächi y cuartuta paganäpaj, micuycunapaj maychoraj guellayta tariycushaj’ nirpis yarpachacurganmi. Chaycunalaman yarpachacur punuytapis puedirganchu. Pero calpachacurganmi yapay jaucala caycänanpaj. ¿Imano? Jehovata ruwacurgan yanaparcunanpaj (leiriy Filipenses 4:8, 9). Jehovata wiyananpaj Bibliapita grabaciuncunata churaj. Pay nin: “Grabaciuncunaga alapami gustaman, alapa mana yarpachacunapämi yanapaman y Jehová cuyapäcoj cashgantami yarpachiman” (Sal. 94:19).

6. ¿Imanotaj yanapämanchi jinala Bibliapita yachacuptinchi y reuniuncunaman aywaptinchi?

⁶ Aumi, peste gueshya yurircamuptin lapanchitami nacachimanchi. Ichanga permitishwanchu Bibliapita yachacunapaj y reuniuncunaman aywanapaj impidimänanchipaj. Hermanunchicuna ima pasashgancunapita publicaciuncunacho y videucunacho caycaj yarpächimanchi ima nacaycunata pasaptinpis Jehovataga manami cachaycunchu (1 Ped. 5:9). Reuniuncunaga yanapämanchi  alicunaman yarparänapaj, waquincunata shacyächinapaj y shacyächishga canapäpis (Rom. 1:11, 12). Jehovapa sirvejnincuna gueshyaptin, manchacuptin, japalanla sienticuptin Jehová imano yanapashganman yarpararga, masrämi yäracushun y segurumi caycäshun noganchitapis yanapämänanchipaj.

7. ¿Imanotaj Juan rurashgannola noganchipis rurashwan?

⁷ Hermanunchicunawan cada cadala parlanapaj imaycanopapis calpachacushun. Juc peste gueshya o juc pandemia impidimashwanmi waquincunawan y hermanunchicunawan tincuycunapaj. Chaycunapa pasarga apóstol Juannochi sienticushwan, payga Gayo amigunwan tincuyta munargan (3 Juan 13, 14). Ichanga musyarganmi juc tiempuraj Gayuta ricayta mana puedishganta. Pero puedishgantami rurargan, paytami cartacamurgan. Hermanunchicunawan tincuyta mana puedirga, gayaycushwan llamadalapa o videupa, o mensajilatapis apachicushwan. Chayno rurarga manami japalanchichu sienticushun y jaucalami caycashun. Pasaypa laquishga y alapa yarpachacuycarga ancianucunawan parlapacushun y consejamashganchicunata shumaj chasquicushun (Is. 32:1, 2).

8. ¿Imanotaj sienticushwan ima desgraciapis pasaptin?

⁸ Yacu alapa shuntacaptin, terremoto captin o nina rupar imaycatapis ushaptin, chaycunapa mayganlapapis pasashga carga, achca tiempuchi pasaypa yarpachacuycanquiman. Y castalayquita wanupäcushga car o imaycayquicunata ograshga carga laquicunquichi o rabiashgapis caycanquichi. Chayga manami ninanchu cosasniquicunata alapa cuyaycashgayquita ni yäracuyniqui ushacaycashganta. Desgraciapa pasaycashgayquita ricar, mana ali sienticushgayquitaga waquincuna tantianmanmi (Job 1:11). Pasaypa nacaycarpis jaucala sienticushwanmi. ¿Imano? Chayta ricärishun.

9. ¿Imanotaj yanapämanchi Jesús nishgan desgracia pasaptin listo caycänapaj?

⁹ Cay munduchoga juc ishcay runacuna yarpapäcun ima desgraciapapis mana pasananpaj. Noganchicunami ichanga Jesús nishganta manami gongaycunchichu. Musyanchimi desgraciacuna may chaychopis cananpaj y nacachimashwanmi. Ushacay junaj manaraj chayamuptin discipuluncunata Jesús nergan manchanaypaj terremotucuna y ima desgraciacunapis cananpaj (Luc. 21:11). Jina nergan runacuna pasaypa fiyu ticrananpaj, chaytaga ricanchi may chaychopis suwacuna captin, pasaypa magacoj runacuna ticraptin y terroristacuna captinpis (Mat. 24:12). Chaycuna pasacuptin, Jesusga manami imaypis nerganchu discipuluncuna mana nacananpaj. Chaynomi, desgracia pasaptin achca Jehovapa sirvejnincunami nacapäcun (Is. 57:1; 2 Cor. 11:25). Lapan desgraciacunapitaga Jehová manachi chapaycalämäshunchu, chayno captinpis jaucala caycänapaj necesitaycashganchitami goycalämäshun.

10. ¿Imanirtaj ninchi yäracoj cashganchita ima desgraciapis manaraj pasacuptin alistacuptinchi? (Proverbios 22:3).

¹⁰ Juc desgracia pasacuptin listuna caycarga manami alapaga manchacushunchu. ¿Chayga manachuraj ricächicunga Jehovaman mana yäracuycashganchita? Manami. Imapis manaraj pasacuptin shumaj alistacuptinchega, Jehová yanapämänanchipämi yäracuycanchi. ¿Imanirtaj chayta ninchi? Bibliami consejamanchi ima mana alicuna manaraj pasacuptin alistacunapaj (leiriy Proverbios 22:3). Diospa marcanga publicaciuncunawan, reuniuncunawan y wilacuycunawan  cutin cutin niycämanchi ima desgraciacuna manaraj pasacuptin listuna caycänapaj. c ¿Imataraj rurashun Jehovaman yäracuycarga? Cananpitanami cay consejucunata cäsucushwan ima desgraciapis manaraj captin.

11. ¿Imataj yachacunchi Margaret rurashganpita?

¹¹ Margaret panita pasashganta yarparcushun. Tiyashganpa cercalancho nina pasaypa rupaycaptinmi, autoridäcuna payta nergan wasinpita aywacunanpaj. Yalinacur-raj lapan runacuna gueshpicäriptinmi carreterapa achca carrucuna aywaptin pase mana cargannachu. Pasaypa goshtataptinmi Margaretga carrunpa rurilancho quedacurgan. Shumaj listuna caycaptinmi salvacurgan. Bolsancho juc mapata charaptinmi, musyargan juc carreterapana gueshpinanpaj. Chay carreterataga reguirgannami ima desgraciapis pasacuptin gueshpicunanpaj. Shumaj alistacushganraycurmi salvacurgan.

12. ¿Imanirtaj cäsucunchi desgracia pasacuptin imata ruranapaj nimaptinchi?

¹² Desorden mana cananpaj o chapämänanchipäga autoridäcuna mandamashwan wasilanchicho quedacunapaj o aywacunapäpis, o juc ruraycunata ruranapaj mandamashwanmi. Waquin runacunaga wasinta cachayta mana munar cäsucärinchu. Pero ¿cristianucunaga cäsucunchicu? Bibliami nimanchi: “Señor Jesucristuta pipis manakaqman mana churananpaq lapan mandashuqnikikunata cäsukäriy. Tsayno cäsukäriy nación mandaq rey kaptinpis y autoridäkuna kaptinpis” (1 Ped. 2:13, 14). Jehovapa marcanpis chapämänanchiraycur nimanchi imata ruranapäpis. Cada cadalami nimanchi ancianucunata wilanapaj utilizaycashganchi celularninchipa numerunta y maycho tiyaycashganchitapis. ¿Quiquinchipitaga maynacu wilashcanchi? Diospa marcanga nimashwanchi wasilanchicho quedacunapaj, yargunapaj o micuycunata shuntanapaj. O nimashwanpis imano y imay waquincunata yanaparcunapaj. Mana cäsucushgaga quiquinchipa cawayninchita y ancianucunapitapis peligrumanmi churaycashwan, paycunaga imaycatami ruran chapämänanchipaj (Heb. 13:17). Margaret nergan: “Ancianucunata y Diospa marcanta cäsucushgämi salvacunäpaj yanapämargan”.

13. ¿Imatataj rurapäcun marcancunapita aywacärej chaychica cristianucuna cushishga y jaucala caycänanpaj?

 ¹³ Juc desgracia, juc guerra o pleitucuna captin chaychica hermanucuna marcancunapita aywacärin. Ichanga imaycanopapis calpachacärin yachacänanpaj y Jehovata jinala sirvir caycänanpaj. Unay cristianucuna gaticachashga captin may chay marcacunaman aywar predicapäcushganno, cananpis hermanucunaga jinalami “alli willacuyta willacuran” (Hech. 8:4). Predicapäcuptinmi masga yarpapäcun Diospa Gobiernunman y problemancunamanga mana. Chaycunami yanaparcun cushishgala y jaucala caycänanpaj.

14. ¿Imanirtaj jaucala manana caycashwan chiquishga captinchi?

¹⁴ Autoridäcuna chiquimaptinchega Jehovata cushishgala y jaucalaga sirviyta puedishwannachu, predicajpis libre yargushwannachu y reuniunmanpis aywashwannachu carcelman apamänanchita manchacushganchiraycur. Chaycunata rurayta mana puedirga yarpachacunchi ‘cananga imaraj pasanga’ nir. Mana ali sienticuptinchipis cuidacushwanmi yäracuyninchi mana ushacänanpaj discipuluncunata Jesús wilacushganno (Juan 16:1, 2). Chauraga chiquishga captinchipis, ¿imatataj rurashwan jaucala caycänapaj?

15. ¿Imanirtaj chiquishga canapaj manchacushwanchu? (Juan 15:20; 16:33).

¹⁵ Diospa Palabran nimanchi: “Pipis Washäcuj Jesúspa maquinćhu cawar Tayta Diosninchipa shungun munashanta rurarga, chiquir ushyash cawanga” (2 Tim. 3:12, Biblia Panao). Chayta creinanpaj Andréi jutiyoj wauguipäga sasami cargan tiyashgan marcacho libre predicapäcunanpaj autoridäcuna michäcuptin. Payga yarpaj: “Caychoga chaychica Testigucunami caycanchi, lapanchitaga manachi wichgachimänanchipaj puedinmanchu”. Ichanga manami jaucala caycajchu, sinoga masrämi yarpachacoj. Waquin hermanucunami ichanga lapan yarpachacuynincunata Jehovapa maquincho cachaycoj, y wichgachishga mana cananpaj manami yarpajchu. Imaylapis chayta pasananpaj yarpaj y manami Andréi wauguino alapa yarpachacojchu. Chauraga Andréi decidirgan paycuna rurashganno rurananpaj y Dioslaman  yäracunanpaj. Chaymi jaucala y cushishgala sienticurgan imayca problemacuna captinpis. Noganchipis chaynomi sienticushwan. Jesusga nergan chiquishga captinchipis jinala sirviycar caycänapaj puedishganchita (leiriy Juan 15:20; 16:33).

16. ¿Ima wilacuycunataj cäsucushwan gaticachashga captinchi?

¹⁶ Jehovata libre adurapäcunapaj michashga captinchi, Diospa marcan y ancianucuna chapämänanchipaj, publicaciuncunata jinala chasquicunapaj y puedishganchimanno predicaycänapaj, imataj ruranapaj nimashwanmi. Chayno captenga, nimashganchicunata shumaj mana tantiarpis cäsucushun (Sant. 3:17). Pipis musyananpaj derechuyoj mana caycaptenga, hermanunchicuna pïcuna cashganta y congregaciuncho imacunata rurashganchitapis manami imaypis wilaycushwanchu (Ecl. 3:7).

17. ¿Imacunata ruranapätaj decidido caycanchi apostulcuna rurashganno?

¹⁷ Diospa marcan Jesucristupita yachachicäriptinmi, Satanasga imaycacunami ruran paycunata ushacächiyta munar (Apoc. 12:17). Satanaswan y maquincho caycajcuna manchacächimänanchipaj permitishunchu. Chiquishga carpis jinala yachachicuptinchega cushicunchi y jaucalami caycanchi. Apostulcuna cawashgan wichan, judío autoridäcuna apostulcunata mandapäcurgan Jesucristupita manana yachachicärinanpaj, chayno captinpis Dioslata cäsucur y yachachicur cushi cushila carcaycargan (Hech. 5:27-29, 41, 42). Predicaciunninchi michashga cashganchoga shumaj tantiacushwan pïcunataj yachachinapaj y imano ruranapäpis (Mat. 10:16). Jehovata cushichinapaj y runacuna salvacunanpaj calpachacushganchega jaucala ricacushun.

18. ¿Pipitataj yanapacuyta chasquinchi jaucala caycänapaj?

¹⁸ Segurumi caycashwan alapa sasacunapa pasarpis jaucala caycänapaj puedishganchita. Chay horacunacho yarpänanchi Diosninchipa jauca cawayninta necesitashganchita, chaytaga Jehovalapitami chasquinchi. Payman yäracushun peste gueshyacuna yurircamuptin, ima desgraciapis pasaptin y chiquishga captinchipis. Jehovapa marcanman imaycanopapis guelicushun y shamoj tiempucho imayca bendiciuncunata chasquinapaj yarparaycäshun. Chayno rurarga, “jauca cawachicog Tayta Diosninchi” noganchiwan caycanga (Filip. 4:9, Biblia Ambo Pasco). Gatejnin yachachicuychona ricärishun hermanucuna sasacunapa pasaptin jaucala caycänanpaj imano yanaparcunapaj.