1. ¿Imanotaj cada cadala sirvejnincunapa mañacuyninta Jehová contestaycun?

 ¿MUSYASHCANQUICHU pilapis ruwacushganta Jehová gamwan contestamunanpaj cajta? Chaynomi, anciano, siervo ministerial, precursor, publicador, joven, edayashga, olgu o warmi captinchipis. Jehovata cuyaj pipis yanaparcunanpaj ruwacuptenga, Diosninchega ancianucunawan o waquin sirvejnincunawanmi ‘sumaj shacyächin’ (Col. 4:11). Jehovata y hermanunchicunata chayno sirviptinchega cushicunchimi. Chaytaga rurashwanmi juc peste gueshya yurircamuptin, ima desgraciacuna pasacuptin o chiquishga captinchipis.

2. ¿Imanirtaj hermanunchicunata yanaparcunapaj sasa canman peste gueshya yurircamuptin?

² Juc peste gueshya yurircamuptin sasachi canman jucninchi jucninchi yanapacunapaj. Tantiarinapaj, mayganlapapis wasinman aywayta munashwanmi, ichanga peligrosumi canman. O waccha hermanunchicunata wasinchicho imalatapis micupacunapaj invitayta munashwan, ichanga puedicanchu. Imaycanopapis waquincunata yanapayta munashwanmi, ichanga quiquinchipa familianchipis nacaycan. Chayno captinpis, hermanunchicunataga imalawanpis yanapayta munar imaycanopapis yanapaycunchi, Jehová chayta ricar cushicunmi (Prov. 3:27; 19:17). Chauraga, ¿imatataj rurashwan?

3. ¿Imataj yachacunchi pani Desi caycashgan congregaciuncho ancianuncuna rurashganpita? (Jeremías 23:4).

³ Ancianucuna rurayta puedishganta. Congregaciuncho anciano captiquega, cristiano masiquicunata shumaj reguiy (leiriy Jeremías 23:4). Pasashgan yachachicuycho parlashganchi Desi panipita, pay wilacun: “Ancianucuna grupo  caycashgächoga cada cadala nogawan y waquincunawanpis predicapäcoj”. b Chayno rurapäcuptinmi cay ancianucunapaj más facilna cargan Desi panita yanapananpaj COVID-19 pandemia galaycuptin; chay gueshyawan familian wanucäriptinpis.

4. ¿Imanirtaj ancianucunaga Desi panita yanapänanpaj puedirgan, y imataj yachacunchi?

⁴ Desi wilacun: “Ancianucunaga amigöcunanami cargan, chaymi shongücho caycajta wilarcurgä”. Chaypita, ¿imataj ancianucuna yachacunman? Hermanucunata shumaj shacyächinman y reguinman imayca sasacuna manaraj pasacuptin. Pandemiaraycur hermanucunapa wasinman aywayta mana puedirga, jucnopana yanaparcunayquipaj calpachacäriy. Desi yarpan: “Öraga juc junajlachomi achca ancianucuna celularpa mensajicunata apachimaj. Textucuna mayna leishgä captëpis, apachimashgancunaga shongümanmi chayaj”.

5. ¿Imanotaj ancianucuna musyapäcunman hermanucuna imano caycashganta, y imanotaj yanapacunman?

⁵ Hermanucuna imano caycashganta musyapacunanpäga ancianucuna shumaj yarpachacurcur tapupäcunman (Prov. 20:5). ¿Micuynincuna y jampincuna caycanrächuraj? ¿Aruyninta o wasinta ograpäcunmanchuraj? ¿Yanapaycunapächuraj caycan autoridäcuna camacächishgan yanapacuycunata chasquinanpaj? Desi panitaga, juc ishcay hermanucuna necesitaycashgancunawanmi yanapaycurgan. Ichanga masraj payta yanapargan ancianucuna shogaptin y Bibliawan shacyächiptinmi. Pay nin: “Ancianucunaga nogawanmi mañacärej. Imata mañacushgantaga manami yarpächu, ichanga imano sienticushgätaga yarpämi, chayga cargan ‘manami japalayquichu caycanqui’ Jehová nimashgannomi” (Is. 41:10, 13).

6. ¿Imanotaj congregaciuncho jucninchi jucninchipis yanapanacushwan? (Fotucunatapis ricäriy).

⁶ Congregación rurananpaj puedishganta. Musyanchimi naupataga ancianucunami hermanucuna necesitaycashgancunacho yanapacärishganta. Ichanga Jehová lapanchitami nimanchi waquincunata shacyächinapaj y yanaparcunapäpis (Gál. 6:10). Pipis gueshyaycaptenga shacyächinapaj imalatapis ruraptinchega alapachi cushichinman. Wamracunaga juc hermanuta shacyächinanpaj  ichic papelcho ima dibujulatapis ruranmanmi. Juc pani yanapacuyta necesitaycaptenga jovincuna “imalachopis yanaparcushayqui o rantipäshayqui” niptenga alichi canman. Waquincunaga gueshyaycajcunapaj micuyta yanucunmanmi, nircur wasinman apapänanpaj. Aumi, juc peste gueshya captenga lapanchimi pilapis shacyächimänanchipaj necesitanchi. Chaymi, alichi canman reunión usharcuptin hermanunchicunawan ratulapis parlarcunapaj quedacuptinchega. Ancianucunapis shacyächishga cayta necesitapäcun. Waquin hermanucuna juc notata escribiycurmi ancianucunata agradecicärin, paycunaga juc peste gueshya yurircamuptin masraj calpachacärin yanapacunanpaj. Alapa alimi lapanchi calpachacuptinchi cay consejuta cäsucunapaj: “Imaypis shakyätsinakushqaykinöla jukniki juknikipis tantiyatsinakur shakyätsinakäriy” (1 Tes. 5:11).

7. ¿Imanotaj ricacushwan juc desgracia pasacuptin?

⁷ Ilajpitami mana ali ricacushwan juc desgracia pasacuptin. Imayca cosasniquicunata, wasiquita ograycunquimanmi o cuyashga castayquitapis wanupacunquimanmi. Chaycunaga hermanunchicunatapis pasanmi. ¿Imanotaj yanapaycushwan?

8. ¿Imatataj ancianucuna y taytacuna rurapäcunman juc desgracia manaraj pasacuptin?

⁸ Ancianucuna rurayta puedishganta. Ancianucuna, hermanucunata yanapay preparacunanpaj ima desgraciapis manaraj captin. Congregaciuncho lapancunami musyanman salvacunanpaj imata rurananpaj y gamcunata celularpa gayashunayquipäpis. Pasashgan yachachicuycho Margaretpita parlashganchi, paymi wilacun: “Congregaciunpa cajcunacho juc discursucho ancianucuna yarpachipäcurgan incendiucunaga manaraj ushacashganta, chaymi autoridäcuna aywacunapaj nimaptinchega o cawayninchi peligrucho caycaptenga jucla aywacunapaj nipäcamargan”. Chay discursutaga tiempulanchomi wiyacärishgä, pichga semanacuna pasacuptinnami nina bunyar-raj rupar galacuycurgan. Taytacuna, Diosta aduranapaj horacho wamrayquicunawan parlapacäriy ima desgraciacunapis pasacuptin jucniqui jucniqui imata ruranayquipaj. Gamcuna wamrayquicunawan listuna caycarga, manami alapaga manchacärinquichu.

9. ¿Imatataj ancianucuna rurapäcunman juc desgracia manaraj pasacuptin y pasashga captinna?

⁹ Ancianuno juc grupucho encargado caycaptiquega, hermanucunapa numeruncunata mayna musyanquiman ima desgraciapis manaraj pasacuptin. Juc listata ruray y calpachacuy hermanucunapa mushoj numerunta charanayquipaj. Chaynopa, juc desgracia captin, jucnin jucninta gayaycur ima necesitaycashgancunata musyanquipämi. Y chaycunata ancianucunacho pushacoj cajta apachicuy, paynami congregaciuncunata watucamojta wilanga. Jucninchi jucninchi yanapacurga, lapanpis alimi canga. Incendio pasarcuptinna, Margaretpa congregaciunpita watucamoj waugui manami punurganchu 36 horacunano, payga ancianucunata gayacamurgan wasinpita aywacoj 450 hermanucunata ashinanpaj y necesitashgancunacho atiendinanpaj (2 Cor. 11:27). Chayno rurapäcushganpitami, lapan necesitaycajcunapaj maycho posadacunanpaj taripäcurganmi.

10. ¿Imanirtaj ancianucunaga hermanucunata cuidapäcunman? (Juan 21:15).

¹⁰ Ancianucunaga caycan hermanucunata shogananpaj y Bibliawan shacyächinanpäpis (1 Ped. 5:2). Juc desgracia pasacuptin, puntataga  ricanman hermanucuna ali y seguro caycänanpaj, micuynincuna, ropancuna y maycho posadacunanpäpis cananpaj. Ichanga achca quillacunachi desgracia pasajcunaga shogashga y Bibliawan shacyächishga cananpaj necesitapäcunga (leiriy Juan 21:15). Harold, juc sucursalcho yanapacoj waugui, desgraciapa pasashgancunawan parlashganpita nin: “Tiempo pasananrämi yapay ali caycänanpaj. Hermanucunaga yapaynachi alila cawar galaycärinman, ichanga ilajpita yarpapäcunmanmi castanta wanupacushganpita, imalantapis cuyashganta ograpäcushganta o pasaypa mana alipa pasashgantapis. Chaycunata yarpapäcushganga yapaymi laquichinman. Chayga manami ninanchu Diosman mana yäracushgantana; lapanchimi chayno sienticushwan”.

11. ¿Ima yanapacuycunatataj juc tiempuraj familiacuna necesitapäcunga?

¹¹ Ancianucunaga cäsucärinman cay consejutami: “Wagajcunawan wagay” (Rom. 12:15). Juc desgraciapa pasar cawajcunaga Jehová y hermanucuna paycunata jinala cuyaycashganta yarpachinanpaj necesitapäcun. Ancianucunaga familiacunata yanapanmanmi Jehovata mañacunanpaj, reuniunman aywananpaj y predicaciunman yargunanpäpis. Jinamanpis taytacunata shacyächinman, wamrancunata tantiachinanpaj imayca ali cajcunata juc desgracia pasacuptin imaypis mana ushacächinanpaj cajta. Taytacuna, wamrayquicunata yarpachipäcuy Jehová paycunapa amigun cashganta y laduncho imaypis caycashganta. Tantiachiy waugui panicuna familian japuy entero munducho imaypis caycashganta y yanaparcunanpaj listo caycashganta (1 Ped. 2:17).

12. ¿Imanotaj congregaciunga yanapacunman desgraciapa pasajcunata yanapacojcunata? (Fotutapis ricäriy).

¹² Congregación rurananpaj puedishganta. Tiyashgayquipa cercalancho juc desgracia pasacuptenga, ancianucunata tapupay imalachopis yanapacunayquipaj. Desgraciapa pasajcunata o yanapacojcunata wasiquicho juc tiempulapis posadachinquimanmi. Jina yanapacunquimanchi micuycunata y ima necesitaycashgancunata apar. Juc desgracia tiyashgayquipita carucho pasashga captinpis yanapacuyta puedinquimi. ¿Imano? Desgraciapa pasajcunapaj mañacur y obra mundial nishganpaj donaciunniquita apachicur (2 Cor. 1:8-11; 8:2-5). Juc desgracia pasashgancho  cajman viajayta puediptiquega ancianucunata tapupay imano yanapacunayquipaj. Invitashga captiquega, yachachipäcushunquichi imay y maycho yanapacunayquipaj.

13. ¿Ima nacaycunapataj hermanunchicuna pasan chiquishga capäcuptin?

¹³ Hermanucuna ali cawapäcunanpaj más sasarämi ticracurin gaticachashga o chiquishga capäcuptin. Autoridäcuna michäcoj naciuncho tiyaj hermanucunaga guellaynin walcala captin nacapäcun, gueshyapäcun y cuyashgan castancunatapis wanupacun. Chayraycur ancianucuna maymanpis libre aywananpaj manachi camäpacunchu o hermanucunata watucar shacyächinanpaj puedinchu. Chaytami pasargan Andréi wauguita, paypitami pasashgan yachachicuycho parlarganchi. Grupuncho caycaj juc panipa guellayninshi ushacargan, jina accidentacurganpis. Chaymi achca cuti operacurgan y aruytapis puedirganchu. Michashga cashganraycur y pandemiaraycur hermanucuna yarguyta mana puedirpis, panita yanapacunanpaj lapan puedishganta rurapäcurgan, y Jehovaga chay lapantami ricaycargan.

14. ¿Imanotaj ancianucunaga ricachicun Jehovaman yäracushganta?

¹⁴ Ancianucuna rurayta puedishganta. Andréi Jehovata mañacurgan y puedishganta rurargan. ¿Y imanotaj Jehová contestargan? Waugui panicunatami utilizargan chay panita yanapananpaj. Waquincuna doctorman aywananpaj yanagaj y juccuna guellaywan yanapaj. Juc shongula y mana manchacuypa yanapacärishganga Jehová bendicirganmi (Heb. 13:16). Ancianucuna, gaticachashga captinchega waquincuna yanaparcunanpaj mañacuy (Jer. 36:5, 6). Imapitapis masga, Jehová yanapäshunayquipaj ruwacuy. Paymi yanapäshunquipaj hermanucunata atiendinayquipaj.

15. ¿Imataraj rurashwan juc shongunola caycänapaj gaticachashga caycaptinchi wichan?

¹⁵ Congregación rurananpaj puedishganta. Gaticachashga captinchega walca grupucunalachochi shuntacäshun. Chaymi calpachacunanchi jucninchi jucninchi ali apanacärinapaj. Satanaspa contranchomi caycashwan, manami hermanunchicunapa. Hermanunchicuna pantashgancunata perdunaycushun y rabiachinacushga caycarga jucla alchashun (Prov. 19:11; Efes. 4:26). Jucninchi  jucninchi rasla yanapanacunanchipaj calpachacushun (Tito 3:14). Andréi caycashgan grupucho hermanucuna panita yanapacushganga alipämi cargan. Juc shongula familianorämi caycargan (Sal. 133:1).

16. Colosenses 4:3, 18 nishganno, ¿imatataj rurashwan chiquishga caycaj hermanunchicunapaj?

¹⁶ Autoridäcuna michäcuptinpis chaychica hermanunchicunami Jehovata sirvipäcun. Waquincunaga yäracushganraycur carcelarashga caycan. Paycunapaj mañacushun, familiancunapaj y libre caycashganta peligruman churar tucuynopa yanapacojcunapäpis (leiriy Colosenses 4:3, 18). c Imaypis ama gongashunchu mañacushganchicunaga alapami yanapacun (2 Tes. 3:1, 2; 1 Tim. 2:1, 2).

17. ¿Imanotaj gaticachashga manaraj car mayna preparacushwan?

¹⁷ Gaticachashga manaraj car mayna familiayquiwan preparacunquiman (Hech. 14:22). Mana alicuna pasananpaj cajman yarparaychu. Chaypa trucanga, Jehovawan más ali amigo canayquipaj calpachacäriy y chayta rurananpaj wamrayquicunatapis yanapay. Imaylapis alapa yarpachacuptiquega Jehovata ruwacur lapanta wilapay (Sal. 62:7, 8). Familiayquiwan junto parlapacuy Jehová imaypis yäracuypaj cashganta. d Juc desgracia manaraj pasacuptin Jehovaman yäracushpayqui listuna caycaptiquega, wamrayquicunapis alapaga mana manchacunganachu y jaucalami caycanga.

18. ¿Imatataj shamoj tiempucho chasquishun?

¹⁸ Diosninchipa jauca cawayninmi seguro caycänapaj yanapämanchi (Filip. 4:6, 7). Chaywanmi Jehovaga yanapämanchi jaucala caycänapaj juc peste gueshya yurircamuptin, imayca desgraciacuna pasacuptin o chiquishga captinchipis. Ancianucunatami churashga hermanucunata ricananpaj, jinamanpis jucninchi jucninchi yanapacunapaj munan. Jina yanapämanchi listuna caycänapaj shamoj tiempucho más sasa pruebacunapa pasacuptinchi, y masraj jatun nacay chayamuptin (Mat. 24:21). Chay wichanga jaucala caycänapaj calpachacunanchi y waquincunapis jaucala caycänanpaj yanapashwanmi. Jatun nacay pasarcuptinmi ichanga imapitapis manami yarpachacushunnachu. Chayrämi Jehová munashganno imaycamapis jaucala cawacushun (Is. 26:3, 4).