1. Jesús manaraj wanuptin, ¿imataj suwacoj runata nergan? (Lucas 23:39-43).

 ISHCAY suwacojcunawanmi Jesusga wanuyta nacaycargan (Luc. 23:32, 33). Chay ishcay suwacuna Jesuspita burlacur carcaycargan, chayga ricächicurgan discipuluncuna mana cashganta (Mat. 27:44; Mar. 15:32). Jucnin cajga cuentata gocur mana burlacurgannachu. Y nergan: “Mandayta qalaykurqa noqata yarparkalämanki, tayta”. Jesusnami nergan: “Rasunpami kayno nï: [...] paraísuchömi noqawan kankipaq” (leiriy Lucas 23:39-43). Diospa Gobiernunpita yachachicur Jesús puriptin, clarumi caycan chay suwacoj mana chasquicushganta. Jesusga manami imaypis nirganchu chay runa Diospa Gobiernunman yaycunanpaj (Mat. 4:17). Jesús parlaycargan shamoj tiempucho cay Pacha Paraíso cananpaj. ¿Imanotaj chayta musyanchi?

2. Arrepenticoj suwa, ¿imanirtaj nishwan judío runa cashganta?

² Arrepenticoj suwaga judío imachi cargan. Chay runa juc caj suwacojta cayno tapurgan: “Qampis payno nakaykarqa ¿manaku Tayta Diosta mantsakunki?” (Luc. 23:40). Judiucunaga Dioslatami adurapäcoj, waquin naciuncunami ichanga achca dioscunata adurapäcoj (Éx. 20:2, 3; 1 Cor. 8:5, 6). Chay runacuna judiucuna mana captenga caynochi tapucunman cargan: “¿Manachu dioscunata manchacunqui?”. Jinamanpis Diosga Jesusta cachamurgan “ogracasha  uyshacunanöpis caycaj Israel runacunallamanmi”, manami waquin naciuncunamanchu (Mat. 15:24). Diosga israelitacunata wilacurgan wanushgacunata cawarachimunanpaj. Arrepenticoj suwaga chayta musyarganchi, chaymi nishganga ricächicurgan Jesusta Jehová cawarachimunanpaj y Gobiernuncho mandacamunanpaj tantiacushganta. Jina yäracuycarganchi shamoj tiempucho paytapis cawarachimunanpaj.

3. ¿Imamanraj yarpachacurgan arrepenticoj suwa Paraisupita Jesús parlaptin? (Génesis 2:15).

³ Arrepenticoj suwa judío captinmi musyargan Jehová Adantawan Evata juc cuyaylapaj Paraisucho churashganta. Chauraga Jesusta wiyaycur cay Pachacho juc cuyaylapaj paraíso cananpachi suwaga yarpachacurgan (leiriy Génesis 2:15).

4. ¿Imamantaj yarpachacächimashwan suwa runata Jesús nishganta?

⁴ Suwa runata Jesús nishganga noganchitapis Paraisumanmi yarpachacächimashwan. Chaypaj Salomón mandacamushgan wichan imano cawacärishganman yarpararga yanapämäshun. Biblia Jesuspita parlar “Salomónpita mas yachaq” cashgantami nin. Chauraga convencido caycashwan Jesuswan 144.000 cajcunaga cay Pachata cuyaylapaj Paraisuman ticrachinanpaj (Mat. 12:42). Y waquin uyshacunapis canan wichanpitami ali cajcunata rurananpaj yachacunan, chaynopa Paraisucho imaycamapis cawapäcunapaj (Juan 10:16).

5. ¿Paraíso imano cananpätaj yarpachacunqui?

⁵ ¿Paraíso imano cananpätaj yarpachacunqui? Unay Edén huertano jatuncaray cuyaylapaj huertamanchi yarpachacunqui (Gén. 2:7-9). O yarpanquichi Miqueas escribishgan profeciata, chaycho nin Diospa sirvejnincunaga “cada-ünunnami jamarpäcongapaj übas yöranpa, ïgus yöranpa llantuncunacho” (Miq. 4:3, 4). O achca micuycuna cananpaj textucuna wilacushgantapis yarpanquichi (Sal. 72:16; Is. 65:21, 22). Chauraga, ricacunquichi juc cuyaylapaj huertacho y juc mesacho achca mishqui micuycuna naupayquicho caycashganta. ¿Ricacunquichu waytacuna y plantacuna mushcuycashganta musquiycashgayquita? ¿Castayquicunawan amiguyquicuna cushishga asicuycajta wiyanquichu? Paycunaga mayganlapis cawarimojcunachi caycan. Chay lapancunaga manami cuentulachu. Chaycuna cay Pachacho rasunpami pasanga. Ichanga Paraisucho cushichimaj aruypis cangami.

6. ¿Imatataj Paraisucho rurashun? (Dibujutapis ricäriy).

⁶ Jehovaga camamashcanchi arushganchipita cushicunapämi (Ecl. 2:24). Waranga watacunapa Jesús mandacamuptin  imaycacunata ruranapämi canga. Jatun nacaycunata cawaycar pasajcuna y wanushgacuna chaychicaj cawarimojcunaga necesitapäcunga micuycunata, ropata y wasicunatapis. Chay lapancuna cananpäga arunapaj aypalami caycanga, ichanga cushicuypämi canga. Adanwan Eva Edén huertata cuidananpaj cashganno noganchipis cay Pachata cuyaylapaj huertaman ticrachinapämi arushun. Jina yarpachacuy imanoraj canga chaychicaj cawarimojcunata Jehová imano cashganta, y imacuna munashgantapis yachachiptinchi. Jinamanpis unayna Jehovata sirvejcunata wilapäshun Jesucristo ima rurashgancunapita y último tiempucho ima pasacushganpitapis.

7. ¿Imapitataj seguro caycashwan, y imanir?

⁷ Segurumi caycashwan Paraisuchoga jaucalanami goyäcushun, lapanpis ordenado canga y ima rurashganchicunapis alimi caycanga. ¿Imanir? Salomón mandacamushgan wichan imano cashganwan Jehová yanapämanchi yarpachacunapaj Jesús mandacamuptin imano cananpaj.

8. ¿Imanotaj Salmo 37:10, 11, 29 textucuna unaycho cumplicurgan? (Ricäriy cay revistacho “Liejcuna tapucärishgan” nejcho).

⁸ Juc ali y yachaysapa mandacoj mandacamuptin runacuna imano cawacärinanpaj David escribinanpämi Jehová wilacurgan (leiriy Salmo 37:10, 11, 29). Runacunawan Paraisupita parlaptinchi Salmo 37:11 textutami leipanchi. Chayga alimi, Jesuspis juc jircacho yachachicuptin chay textupitami parlargan. Chaynopa ricächicurgan chay texto nishganga shamoj tiempuchopis cumplicunanpaj cajta (Mat. 5:5). Ichanga David escribishganga ricächicurgan Salomón mandacamushgan wichan runacuna imano cawacärinanpäpis. Chay wichan israelitacuna may chaychopis jaucalami goyäcurgan y chaycho “lëchipis, mishquipis” aypalami caycargan. Diosga nergan: “Laynëcunata cumliptiquega [...]. Tiyashayqui nasyunchöga jaucallami goyäcunquipaj. Mishquilla puñucunquipaj” (Lev. 20:24; 26:3, 6). Chaycunaga cumplicurgan  Salomón mandacamushgan wichanmi (1 Crón. 22:9; 29:26-28). Y Jehovaga aunicurgan fiyu runacuna mana cananpäna (Sal. 37:10). Chauraga Salmo 37:10, 11, 29 textucuna nishganga unaycho cumplicurgan y shamoj tiempuchopis cumplicungami.

9. ¿Sabapita reyna, imataj nergan Salomón mandacamushganpita?

⁹ Sabapita reynapis Salomón mandacamuptin israelitacuna jaucala y imaycancunapis aypala cashgantami wiyargan. Chaymi carupita Jerusalencama aywargan, chayta quiquin ricananpaj (1 Rey. 10:1). Salomón imano mandacaycamushganta ricaycurmi nergan: “Manami willamashachu caran ni pullallantapis. [...] ¡Ima cushisharaj warmiquicuna, sirbishojniquicuna goyan! Paycunaga imaypis ñaupayquichömi caycan fiyupa yachaj cayniquiwan parlashayquita wiyar” (1 Rey. 10:6-8). Salomón mandacamushgan wichan israelitacuna imano cawacärishganga ichiclata ricächicurgan runacunapaj Jehová imataj rurananpaj Wamran Jesucristo cay Pachata mandacamuptin.

10. ¿Imanirtaj Jesusga Salomonpita lapancho más ali caycan?

¹⁰ Jesusga Salomonpita lapancho más ali caycan. Salomonga juchasapa runami cargan y pantashgancunapita marcan masincunami nacargan. Jesusmi ichanga juchaynaj runa caycan y imaypis pantacunchu (Luc. 1:32; Heb. 4:14, 15). Jinamanpis Satanás sasa pruebacuna churapaptin mana juchalicurganchu. Cristuga imaypis manami juchalicunanpaj ni imaypis Jehovapa sirvejnincunata mana nacachinanpaj mayna ricächicurgan. Pay Reyninchi cananpaj, ¿manachu alapa cushicuypaj?

11. ¿Pïcunataj Jesusta yanapanga?

¹¹ Jesustaga 144.000 reycunami mandäshenga, cay Pachacho cawajcunata yanapanga y Jehová munashgantami rurapäcunga (Apoc. 14:1-3). Chay mandacojcunaga cay Pachacho caycar runano o warmino imayca nacaycunapami pasargan. Chaymi paycunaga shumajmi laquipämäshun. ¿Imataraj rurapäcunga?

12. ¿Ima aruytaj 144.000 cajcunata Jehová goycunga?

¹² Salomón rurashganpitaga, Jesucristuwan acrashgacunaga imaycata rurananpämi caycan. Israel casta chay reyga juc naciunlachomi chaychica israelitacunata gobernapäcurgan. Diospa Gobiernuncho mandacamojcuna ichanga entero Pachacho chaychica runacunatami gobernapäcunga. ¡Shumaj aruytami 144.000 cajcunata Jehová goycunga!

13. ¿Imatataj rurapäcunga Jesuswan mandacamojcunaga?

¹³ Jesusnopis 144.000 cajcunaga reyno y sacerdoticunano yanapacärenga (Apoc. 5:10). Unaycho israelitacuna cawashgan wichan sacerdoticunaga israelitacuna yäracärinanpaj y saludnincho ali caycänanpaj yanapacärinan cargan. Unay leyga “mas alli caj chayamunanpaj cajpa llantuyninnöllami”, chaymi Jesuswan mandacamojcunaga ali aruychomi yanapacärenga: Diospa marcan ali saludyoj caycänanpaj y Jehovawan más amigo capäcunanpaj yanapacärenga (Heb. 10:1). Ichanga musyanchirächu chay reycuna cay Pachacho tiyajcunawan imano parlapacärinanpaj. Imano captinpis segurumi caycashwan Jehová ali camacächinanpaj cajta cay Pachacho tiyajcuna alila cawapäcunanpaj (Apoc. 21:3, 4).

14. ¿Imanotaj yanapacärenga juc uyshacuna Jesuswan mandacamoj uyshacunawan?

¹⁴ Jesusga paywan mandacamojcunapita parlar nergan walca uyshacuna (Luc. 12:32). Jina parlargan juc canchacho caycaj uyshacunapita y nergan juc uyshacuna. Chay ishcay grupucunami juc canchalacho caycaj uyshacunanomi caycan (Juan 10:16). Paycunaga mayna juc yarpayla arupacuycan, y cay Pachata shumaj huertaman ticrachinanpäpis chaynolami arupäcunga. Chay wichanpäga walca uyshacunapita cieluchonami caycanga y juc uyshacunapita cajcunaga cay Pachacho imaycamapis cawapäcunga. Ichanga juc uyshacuna cajcunaga Paraisucho cawapäcunanpaj cananpitami imalatapis rurananpaj caycan.

15. 1) ¿Imanotaj juc uyshacunapita cajcunaga cielupaj acrashgacunata yanaparcunchi? 2) ¿Imanotaj ruranquiman fotucho waugui ruraycashganno?

¹⁵ Jesucristo yanapaycushganpita arrepenticoj suwaga agradecido caycashganpita ricachicunanpäga manami puedirganchu. Juc uyshacunapita cajcunami ichanga tucuynopa agradecicunanchipaj caycan. Tantiarinapaj, Jesusta cuyashganchita ricächicunchi cay Pachacho caycaj cielupaj acrashgacunata imano trataycashganchiwanmi. Jesús nergan chaynopami ricacanga pïcunataj uysha japuy caycan (Mat. 25:31-40). Cielupaj acrashgacunata yanaparcunchi cushi cushila runa masinchita yachachiptinchi, paycunapis Diosta sirvipäcunanpaj (Mat. 28:18-20). Chaymi Bibliapita camacächishgan publicaciuncunawan yachachicunanchi, juc caj caycan Cushishgala imaypis cawanapaj librumi. Pilatapis manaraj yachachicuycarga, ¿manachuraj calpachacunquiman pï maytapis Bibliapita yachachicunayquipaj?

16. ¿Imatataj cananpitana ruraycashwan Paraisucho cawacunapaj?

¹⁶ Jehová munashgan runano canapäga manami shuyarashwanchu Paraisuchoraj canapaj. Cananpitanami calpachacushwan imaypis rasun cajta parlanapaj, alicunata  ruranapaj y Jehová munashganno cawacunapäpis. Jinamanpis Jehovata manami cachaycushwanchu, runanchita o warminchita ni hermanunchicunatapis. Canancush cay sasa tiempucunacho Jehovata cäsucunapaj imaycanopapis calpachacunchi, Paraisuchoga más facilrämi canga chayno cawacunapaj. Y imalachopis habilidoso y yachanaypaj runa canapaj calpachacushun, chaynopa Paraisucho cawacuyta munaycashganchita ricacänanpaj; cay revistacho “¿Listunacu caycanqui mushoj Pachata chasquinayquipaj?” yachachicuy nishganno.

17. ¿Imanirtaj unay juchanchicunapita laquicuycarla mana caycashwan?

¹⁷ Jatun juchacunata rurashganchipita laquicuycarla mana caycänapaj calpachacushun. Ichanga Jesús wanushganta manami ricashwanchu “apripösu juchata” ruranapaj (Heb. 10:26-31). Juchalicushganchipita rasunpa arrepentido caycar, Jehovapa y ancianucunapa yanapacuyninta ashishgana carga, y cambiucunatapis rurashgana captinchega segurumi caycashwan Jehová perdunaycalämashganchipita (Is. 55:7; Hech. 3:19). Jesús fariseucunata nishganta yarparcushun: “Manami allita ruraycajcunata gayajchu shamushcä. Chaypa ruquenga shamushcä juchallancho goyaycajcunata gayajmi” (Mat. 9:13). Chaynomi, Jesús wanushganraycur lapan juchanchicunapita perdunashga cashwanmi.

18. ¿Imapitataj parlayta munanquiman Jesuspa laduncho wanoj arrepenticoj suwawan?

¹⁸ Paraisuchoshi caycanqui arrepenticoj suwawan parlapacur. Ishcayquichi Jesús wanushganpita alapa agradecido carcaycanqui. Gamshi tapucunqui maslata wilashunayquipaj Jesús wanucuycaptinna imata pasashganta y mañacushganta aunipaptin imano sienticushganta. Jina paypis tapucushunqui último tiempucho Satanaspa mundun imano cashganta. ¡Mayraj cushicuypaj canga chay runatano waquincunatapis Diospa Palabranpita yachachiptinchi! (Efes. 4:22-24).

19. ¿Imanirtaj Paraisucho cawacuptinchega manami ajayäcushunchu? (Garancho caycaj dibujuta ricäriy).

¹⁹ Paraisuchoga manami imaypis ajayäcushunchu. Pilawanpis reguinacur parlapacunapaj cangami y aruyninchipis pasaypami cushichimäshun. Y lapanpitapis más aliga Taytalanchi Jehovatami waran waran masraj reguiycushun y bendiciunnincunatapis chasquiycushun. Paypita y camashgancunapita yachacuytaga manami imaypis ushashunchu. Diosninchitaga cada cadalami masraj cuyaycushun. ¡Mayraj agradecicuyculanchi Jehovawan Jesús Paraisucho cawacunapaj aunimashganchipita!