1. ¿Imanirtaj Abrahanga seguro caycargan ima shuyarashganta rasunpa cumplicunanpaj?

 JEHOVÁ amigun Abrahanta aunirgan miraynincunaraycur lapan Pachacho runacuna bendecishga cananpaj (Gén. 15:5; 22:18). Jehovaman alapa yäracushpan Abrahanga seguro caycargan Dios aunishganta rasunpa cumplinanpaj. Pero Abrahán 100 watayojna y Sarapis 90 watayojna caycar wamranga manami carganrächu (Gén. 21:1-7). Chayno captinpis Bibliaga nin “tsay promitishqanta Tayta Dios imanöpa cumplinanpaq kashqanta mana tantiyarpis Abrahamqa criyirqanmi” (Rom. 4:18). Y Abrahán shuyarashganga rasunpa cumplicurgan, cuyashgan wamran Isaac yurirgan. ¿Imanirtaj Abrahanga seguro caycargan Jehová aunishganta rasunpa cumplinanpaj?

2. ¿Imanirtaj Abrahán convencido caycargan Jehová aunishganta rasunpa cumplinanpaj?

² Abrahanga ali reguirgan Jehová pï cashganta, chaymi “payqa criyirqan promitishqanta Tayta Dios cumplinanpaq” (Rom. 4:21). Ali yäracoj captin Jehovaga alita ruraj runatano ricargan y juchaynajtano chasquirgan (Sant. 2:23). Romanos 4:18 nishganno Abrahanga Jehovaman yäracurgan y paylaman shuyarargan. Cananga Romanos 5 caj capitulucho ricärishun imata apóstol Pablo nin imata shuyaraycashganchipita.

3. ¿Imatataj Pablo nin ima shuyarashganchipita?

³ Pabluga shumaj tantiachicurgan imanir shuyaraycashganchega “manami yangallapächu shuyaycanchi” (Rom. 5:5). Jina yanapämanchi más convencido caycänapaj ima shuyaraycashganchi rasunpa cumplicunanpaj. Romanos 5:1-5 textucunapita yachacur, yarpachacuy watacuna  pasashganmanno ima shuyarashgayquita imano masraj mirachishcanqui. Y canan yachacunapaj cajga yanapäshunqui ima shuyarashgayquita masraj mirachinayquipaj. Pero puntataga ricärishun imanirtaj Pablo nergan ima shuyarashganchega manami manacajlapächu cashganta.

4. ¿Imapitaj parlaycan Romanos 5:1, 2 textucho?

⁴ Ricärishun Romacho caycaj congregaciuncho hermanucunata Pablo guelgashganta (leiriy  Romanos 5:1, 2, TDI) b. Paycunaga Jehovapita y Jesuspitapis yachacur, paycunaman yäracushpan cristianucunaman ticrapäcushga cargan. Chaymi ali yäracoj runacuna cashganraycur Tayta Dios ali ricargan y santo espiritunwan acrargan. Chaura chaypita pacha paycuna ima shuyarashganga cushicuypämi cargan.

5. ¿Imataj shuyaraycan cielupaj acrashga cristianucuna?

⁵ Tiempuwanna Éfeso marcapita cielupaj acrashga cristianucunata Pablo shumaj tantiachirgan Dios ima aunishganta. Paycunata nergan “chasquinayquipaj caycaj erensya fiyupa alli cashanta” (Efes. 1:18, TDI). Y Colosas marcacho cristianucunatana nergan ima shuyarashganga caycan cielucho imaycamapis cawananpaj cashganta (Col. 1:4, 5). Chay cristianucunaga shuyaraycan cawarircamur cielucho imaycamapis cawananpaj y Jesuswan gobernapäcamunanpaj (1 Tes. 4:13-17; Apoc. 20:6).

6. ¿Imataj juc hermanunchi nergan ima shuyarashganpita?

⁶ Cielupaj acrashga cristianucunaga cushicärinmi ima shuyarashgancunaman yarpar. 1991 watacho Frederick Franz hermanunchi cayno nergan: “Musyanchimi imata shuyarashganchicunaga rasunpami  cumplicunanpaj. Aumi, 144.000 cajcunapita lapäcuna seguro carcaycä ima shuyaraycashganchi cumplicuptenga yarpashganchipitapis masraj canga”. ¿Imanotaj payga sienticurgan achca watacunapa Jehovata mana cachaypa sirvishganpita? Payga nin: “Imata shuyaraycashganchitaga cada cadalami masraj valuranchi. [...] Y achca watacunataraj shuyanapaj captinpis cushi cushila shuyaraycanchi. Chaymi ayca watapis pasacuchun, imata shuyaraycashganchitaga jinala shuyaraycäshaj”.

7, 8. ¿Imataj achca Diospa sirvejnincuna shuyaraycan? (Romanos 8:20, 21).

⁷ Diosta sirvej chaychica runacuna shuyaraycan cay Pachacho Diospa Gobiernuncho imaycamapis cawananpaj. Y chaytami Abrahanpis shuyarargan (Heb. 11:8-10, 13). Pablupis chaypita guelgamurgan (leiriy Romanos 8:20, 21). Shamoj tiempupaj Biblia wilacushganta yachacushgayquipita, ¿maygan cumplicänantataj munanquiman? ¿Cushicunquichu mana wanuypa y mana nacaypa cawanayquipaj cajta musyar? ¿Alapachu cushicushcanqui paraisucho wanushga castayquicunawan tincunayquipaj yachacur? Jehová aunimashganchiman yarparga gamtapis cushichishunquichi.

⁸ Lapaninchimi alapa cushicunchi cielucho o Pachacho imaycamapis cawanapaj shuyaraycashganchipita. Y tiempuwanga imata shuyaraycashganchicuna masraj cumplicunanpaj munanchi. Chayno cananpäga ricärishun chaypita Pablo ima guelgashganta. Pay nishganga yanapämäshun shuyarashganchicuna rasunpa cashganta musyanapaj y manami manacajlapächu shuyaraycanchi.

9, 10. ¿Imataj musyanchi pasamänanchipaj? (Romanos 5:3, fotucunatapis ricay).

⁹ (Leiriy  Romanos 5:3, TDI) c. Pabluga nergan sasacunapa pasaptinchiraj masraj  confiacushwan ima shuyarashganchiman. Lapan cristianucuna musyanchi imayca sasacunapa pasanapaj, chaymi Pablo Tesalónica caycaj cristianucunata cayno nergan: “Qamkuna kaqcho kaykar wilarqä Jesucristuman yärakushqantsipita runakuna chikimänantsipaq kashqanta. Tsay nishqänölami lapanpis pasaykan” (1 Tes. 3:4). Y Corinto cristianucunatana nergan: “Runakuna [...] tsayjinanpa nakatsimaptin mana awantar kawanäpaq kashqantapis manami yarparqänatsu” (2 Cor. 1:8; 11:23-27).

¹⁰ Canan wichan Diospa sirvejnincunapis musyanchi runacuna chiquimänanchipaj (2 Tim. 3:12). Gampis Jesuspa discipulunman ticrashgayquiraycur amiguyquicuna o familiayquipis burlapäshunquichi o mana ali runatanopis ricashunquichi. ¿Cuentata gocushcanquichu honrado runa captiqui runacuna chiquishushgayquita? (Heb. 13:18). ¿Gobiernucho caycaj autoridäcuna michaycäshunquichu Diospita mana parlapänayquipaj waquincunata? Pabluga nimanchi imayca sasacunapa pasarpis cushicärinapaj. Ricärishun imanirtaj chayno nimanchi.

11. ¿Imanirtaj ima captinpis jinala aguantaycäshun?

¹¹ Imayca nacaycunapa pasarga cushicushwanmi. Romanos 5:3 textuga nin nacaycunaga yachachimanchi aguantananchipaj. Lapan cristianucuna nacanchi, chaymi lapanchi jinala aguantaycäshun. Chayta ruraptinchirämi lapan shuyarashganchi cajcunata chasquishun. Jesús waquin runacunapita parlarmi nergan “paykunaqa Diospa wilakuyninta mayar kushishqami chaskikärin” pero “runakuna chikiptin qepaman kutikärin”, noganchega manami paycunanochu cayta munanchi (Mat. 13:5, 6, 20, 21). Pipis munanchu nacaytaga, chayno captinpis pruebacunapa pasar Jehovata jinala sirviptinchega imayca alicunata yachacunchi. Ricärishun imanirtaj chayno ninchi.

12. ¿Nacaycunapa pasarga imataj yachacunchi?

¹² Ima nacaycunapa pasarpis jinala aguantanapaj cajpita parlarmi, discípulo Santiago cayno nergan: “Mana ajayaypa yärakurqa Tayta Dios munashqanno kawanaykipaqmi shumaq yachakärinki” (Sant. 1:2-4). Chauraga nacaycunapa pasarga quiquinchi yachacunchi más pacienciacoj canapaj y Diosmanpis masraj yäracunapaj. Pero manami chaylachu, ricärishun imano masta yanapämanchi.

13, 14. Pruebacunapa pasar mana yamacashgaga, ¿imataj pasanga y chayga imanotaj yanapämanchi? (Romanos 5:4).

¹³ (Leiriy  Romanos 5:4, TDI) d. Pabluga nimanchi nacaycunapa pasar mana yamacashgaga Tayta Diosninchi ‘alita rurashcanqui’ nimäshun (Rom. 5:4). Jehovaga manami cushicunchu nacaycunapa pasaptinchi, chaypa trucanga aguantashganchipita cushicun. Gampis ima captinpis Jehovalata mana yamacaypa sirviptiquega paytami cushichinqui (Sal. 5:12).

¹⁴ Abrahán pruebacunapa pasar ali aguantashganpita Diosninchi ali ricargan. Amigunman ticrargan y Diospa ricaynincho alita ruraj runa cargan (Gén. 15:6; Rom. 4:13, 22). Noganchitapis ali ricamäshun ima pruebacunapapis pasar aguantashganchipita, manami congregaciuncho tucuy carguyoj cashganchipitachu. Y chaytaga lapanchi rurayta puedinchi ima edayoj carpis o ima habilidäta chararpis. ¿Canan wichan ima pruebacunapapis pasaycanquichu? Chayno  captenga, ama gongaychu Jehovata mana cachaycuptiquega pay ali ricashunqui. ¿Manachu chayta musyarga shamoj tiempupaj ima shuyarashganchiman masraj confiacunchi?

15. ¿Ima mastataj Pablo nergan ima shuyarashganchipita? ¿Imataj öraga tapucushwan?

¹⁵ Ricashganchinopis Pabluga nergan pruebacunata aguantaptinchirämi Jehová ali ricamäshunpaj. Chaymi cayta nergan: “Ñacayta mana yamacarga [...] alli cawayta shuyäcuycanchi. Alli cawayta shuyashpanchëga manami yangallapächu shuyaycanchi” (Rom. 5:4, 5, TDI). Y Romanos 5:2 textucho apóstol Pablo Romacho cristianucunata nergan ‘Tayta Diosninchïpa ñaupanman chayananpaj cashganta’. Chay wichan cristianucuna cieluman aywananpaj shuyaraycargan. Chaura, ¿imanirtaj Pablo imata shuyaraycashganpita yapay parlargan?

16. ¿Imanotaj pipis masraj convencicunman ima shuyarashganchipita Biblia wilacushganta? (Fotucunatapis ricay).

¹⁶ Pabluga chay cristianucunata yanapayta munargan más convencido caycänanpaj ima shuyaraycashganpita. Yarpay puntalacho pilapis parlapäshushgayquita paraisucho imano caway cananpaj cajta, chayta wiyarga, ‘¿rasunpachuraj canga?’ nishcanquirächi. Pero ichic ichiclapa Jehovata masraj reguir y Bibliapitapis shumaj yachacur, masrächi convencicushcanqui shamoj tiempucho ali cawayta rasunpa chasquinayquipaj cajta.

17. ¿Imacunataj rurashcanqui ima shuyarashgayquiman masraj confianayquipaj bautizashgana captiquipis?

¹⁷ Bautizashgana captiquipis, Bibliapita jinala yachacur pogushga cristianumanchi ticrashcanqui y shamoj tiempupaj ima shuyarashgayquipitapis más convenciduchi caycanqui (Heb. 5:13–6:1). Romanos 5:2-4 textucuna nishganno pruebacunapa pasashcanquichi,  y chaycunata imano aguantashgayquita ricar Jehová cushicurganchi. Chaura pay ali ricashushgayquita musyar más convencido caycanqui lapan aunishgancunata cumplinanpaj. Chaymi ima shuyarashgayqui rasunpa cananpaj cajman yarpar, cawayniquicho cambiucunata rurashcanqui familiayquita ali tratanayquipaj y ima decidishgayquichopis ricacämun.

18. ¿Imanotaj Jehová musyachimanchi aunishganta cumplinanpaj?

¹⁸ Pablo nergan Diospa ricaynincho ali cashganchita musyar, yanapämanchi aunimashganchiman shuyaränapaj y seguro caycänapaj chaycuna rasunpa cumplicunanpaj. Chaymi Jehová aunishganta rasunpa cumplinanpaj cajta parlar, Pablo cristianucunata caytami nergan: “Alli cawayta shuyashpanchëga manami yangallapächu shuyaycanchi. Tayta Diosninchëga cuyamashanchïta Espíritu Santuwanmi musyachimashcanchi. Chay Espíritu Santutaga Tayta Diosninchïmi noganchïman cachamuran” (Rom. 5:5, TDI). Chaymi gampis seguro canayqui ima shuyarashgayquicuna rasunpa cumplicunanpaj.

19. ¿Imapitataj seguro caycanchi?

¹⁹ Yarparay Abrahanta Jehová ima aunishganta, paytaga Jehová alita ruraj runatano ricargan y amigunmanpis ticrargan. Chaymi Abrahán ima shuyarashganga lapanmi cumplicurgan. Bibliapis nin “Abraham mana ajayaypa shuyarar Tayta Dios promitishqanta chaskirqan” (Heb. 6:15; 11:9, 18; Rom. 4:20-22). Abrahanno noganchipis seguro caycanchi Jehovata mana cachaypa sirviptinchega imata shuyarashganchicuna manami yangalapächu canga. Chaymi cushicunchi ima shuyaraycashganchi rasunpa cashganta musyar (Rom. 12:12). Apóstol Pablupis nergan Diosninchi “yanapayculäshunqui payman yäracur cushisha y jauca capäcunayquipag. Santu espíritu munayniyog cayninpa mana yamacaypa pay promitingancunata shuwäcärinayquipag yanapaycärishunqui” (Rom. 15:13, MT).