1. ¿Imataj mozu cristianucuna ruranman imapis ali yargupänanpaj?

 APÓSTOL Pablo cayta nergan Corinto cristianucunata: “Wamrakuna mana tantiyakuypa yarpashqanno ama yarpapäkuytsu. Tsaypa trukanqa awkis runakunano shumaq tantiyaykur yarpachakäriy” (1 Cor. 14:20). Pablo nishgantaga lapan mozu cristianucuna cäsucärinman. Cawaynincho imapis ali yargupänanpäga Jehovapa mandätuncunata cäsucärinman y Biblia nishganno cawacärinman (Luc. 2:52). ¿Imanirtaj mozucunaga calpachacärinman pogushga cristianuman ticrananpaj?

2, 3. ¿Imanirtaj mozucunaga calpachacärinman pogushga cristianuman ticrananpaj?

² Olgu cristianucunapäga achca ruraycuna caycan familiancho y congregaciunchopis. Mozularaj caycarga yarpachacuycanquinachi shamoj watacho imacunata rurayta munanquiman. Capazchi yarpaycanqui precursor canayquipaj, siervo ministerial o ancianupis. Jina casaracuyta y wamrayquicuna canantapis munanquichi (Efes. 6:4; 1 Tim. 3:1). Pero chay lapanta lograyta munarga, pogushga cristianumanraj ticranayqui. b

³ ¿Imataj yanapäshunqui pogushga cristianuman ticranayquipaj? ¿Imacunata ruraytaj cananlapitana yachacunquiman? Y, ¿imatataj cananlapitana ruraycanquiman shamoj  watacunacho ima rurashgayquipis ali yargupäshunayquipaj? Waquilanlata ricärishun.

4. ¿Pïcunapitataj yachacunquiman? (Fotucunatapis ricay).

⁴ Ali cristianucunapita yachacuy. Bibliacho wilacun unay tiempucho waquin runacuna imano Jehovata cuyashganta y marcantapis tucuynopa yanapashganta. Familiayquicho y congregaciunchopis chayno hermanucunaga caycanchari paycunapita yachacunayquipaj (Heb. 13:7). Jina Jesuspitapis yachacunquimanmi (1 Ped. 2:21). Chayta rurashgana captiqui, yarpachacuy jucnin jucnincunapita imataj yachacunqui (Heb. 12:1, 2). Nircur yarpachacuy imacunata ruranquiman paycunano canayquipaj.

5. ¿Imataj ruranquiman ali yarpachacoj mozu canayquipaj? ¿Imanirtaj calpachacunquiman chayta ruranayquipaj? (Salmo 119:9).

⁵ ‘Shumaq yarpachakurir imatapis ruray’ (Prov. 3:21). Shumaj yarpachacoj olgucunaga imatapis jucla manaraj decidir shumajraj yarpachacun. Gampis calpachacuy chayno ruranayquipaj. Cay munducho jovincunaga shongun munashgalanta y yarpashgalantami ruran (Prov. 7:7; 29:11). Jina televisiuncho, peliculacuna y internetcho yargamushgancuna jucnopana yarpächishunquiman. Chauraga, ¿imataraj ruranquiman shumaj yarpachacoj mozu canayquipaj? Puntata yachacuy Jehovapa mandätuncunata y yarpachacuy imanirtaj chaycuna ali cashganta. Nircur yachacushgayquimanno imatapis ali cajta decidiy Jehovata cushichinayquipaj (leiriy Salmo 119:9). Shumaj yarpachacoj mozu captiquirämi pogushga cristianuman ticranqui (Prov. 2:11, 12; Heb. 5:14). Ricärishun imanotaj ali yarpachacoj cashgayquega yanapäshunqui hermanacunata respetuwan tratanayquipaj y visticushgayqui horapis alita acranayquipaj.

6. Ali yarpachacoj mozuga, ¿imanotaj ricächicun jipash hermanacunata respetashganta?

⁶ Shumaj yarpachacoj carga warmicunata respetuwan tratanqui. Capazchi juc jipash cristiana gustashuptiqui maslata reguiyta  munanquiman. Pero casaracuyta manaraj munarga, cuidacunquiman imalatapis mana ninayquipaj o mensajipapis mana apachicunayquipaj payman interesacushgayquita mana creinanpaj. Chay lapantaga ruranquiman paywan casaracuyta munaptiquirämi (1 Tim. 5:1, 2). O maygan hermanawanpis noviuna caycarga, chay jipash ali ricashga cananpaj pilapis yanagäshunayquipaj ashinquiman, ishcalayqui imaypis mana canayquipaj (1 Cor. 6:18).

7. Ali yarpachacoj mozuga, ¿imacunataj cuentaman churanga visticushgan hora?

⁷ Jinamanpis juc mozu shumaj yarpachacoj cashgantaga ricächicun imano visticushgancho y najchacushganchopis. Canan wichan moda nishgan ropacunata rurajcunaga Jehovata respetacärinchu ni cäsucärinchu. Chaymi chiri chiri ropacunata ruran olgucuna warmicunano ricacänanpaj. Pero juc mozu pogushga cristianuman ticrananpaj calpachacuycarga Diospa mandätuncunata cuentaman churan y congregaciuncho ali cristianucunapitapis imano visticushganpita yachacun. Cayno tapucunquiman: “¿Visticushgächo ricacämunchuraj ali yarpachacoj mozu cashgäta y waquincunamanpis yarpachacuycashgäta? ¿Imano visticushgächo ricacanchu Diosta sirviycashgäta?” (1 Cor. 10:31-33; Tito 2:6). Mozucuna ali yarpachacoj captenga, hermanucunapa respetunta gänacunga y Jehovatapis cushichenga.

8. ¿Imanotaj juc mozuga ricächicunman confiacuypaj cashganta?

⁸ Confiacuypaj canquiman. Chayno captiquega ima ruraytapis gänas gänaswan ruranqui (Luc. 16:10). Jesusman yarpachacuy. Payga Taytan mandashganta imaypis cumplejmi, chayta rurananpaj sasa captinpis. Discipuluncunata cuyajmi, chaymi paycunaraycur y lapan runacunaraycur wanurganpis (Juan 13:1). Jesusno ima cargutapis chasquirga, calpachacuy lapanta cumplinayquipaj. Y imano ruranayquipaj mana yacharga, humilde canquiman pogushga cristianucunapa yanapacuyninta mañacunayquipaj. Ama conformacuychu ichiclata rurarga (Rom. 12:11). “Imata rurarpis runakunapaqnölaqa ama rurapäkuytsu, sinöqa [Jehovapajno] lapan shonquykiwan rurapäkuy” (Col. 3:23). Jina imalachopis pantaycurga humilde cashpayqui calpachacuy mejoranayquipaj (Prov. 11:2).

9. ¿Imanirtaj mozucunaga imalatapis rurayta yachacunman?

⁹ Pogushga cristiano canayquipaj imalatapis rurayta yachacunquiman. Chaycunaga yanapäshunqui aruyta tarinayquipaj, congregaciuncho masraj yanapacunayquipaj, familiayquitapis manteninayquipaj y waquincunawan ali apanacärinayquipaj. Ricashun chaycuna imacunataj caycan.

10, 11. ¿Imanirtaj mozucunaga yachacärinan shumaj leiyta y escribiytapis? (Salmo 1:1-3, fotutapis ricay).

 ¹⁰ Yachacuy shumaj leiyta y escribiytapis. Bibliaga nin cushishga y ali goyäcoj runaga Tayta Diospa Palabranta junaj junaj lein y leishganman yarpachacun (leiriy Salmo 1:1-3). Chayta rurar cuentata gocun Jehová imano yarpashganta y chayga yanapan shumaj yarpachacur-raj imatapis rurananpaj (Prov. 1:3, 4). Chayno olgucunatami congregaciuncho necesitanchi. Ricärishun imanirtaj chayta ninchi.

¹¹ Congregaciuncho hermanucunaga, pogushga cristianucuna Bibliawan yachachinanta y consejananta ashin (Tito 1:9). Chaymi leiyta y escribiytapis shumaj yachacurga, ali discursucunata ruranqui y comentariuyquiwanpis waquincunata shacyächinqui. Jina Bibliata estudiar, reuniuncho y asambleachopis discursucunata wiyar notayquicunata ruranqui mana gonganayquipaj. Chaywan quiquiquipa yäracuyniquita y waquincunapitapis sinchiyächinqui.

12. ¿Imataj ruranquiman waquincunawan shumaj parlapacunayquipaj?

¹² Yachacuy waquincunawan shumaj parlapacuyta. Caytaga lapan olgu cristianucuna yachacärinman. Chaynoparaj yachacunqui waquincunata shumaj wiyayta y ima yarpashganta imano sienticushgantapis tantianayquipaj (Prov. 20:5). Waquincunawan parlapacur-raj vozninpa tonuncho o gajlanchopis cuentata gocunqui imano sienticushganta. Pero celularpa, mensajilapa o correulapa waquincunawan parlapacurga, sasami canga cara cara piwanpis parlapacunayquipaj. Chaymi calpachacuy waquincunawan imalatapis rurar parlapacärinayquipaj (2 Juan 12).

13. ¿Imanirtaj juc mozuga yachacunman quiquinta mantenicunanpaj? (1 Timoteo 5:8, fotutapis ricay).

¹³ Quiquiqui mantenicunayquipaj yachacuy. Pogushga cristianucunaga calpachacunmi quiquinpaj y familianpäpis lapanta camaripänanpaj (leiriy 1 Timoteo 5:8). Waquin naciuncunacho mozucunaga taytanpita o maygan familianpitapis juc oficiuta yachacun, waquincunana estudiaptinrämi imalatapis yachacun. Chaymi alichi canman gampis imalatapis yachacur quiquiqui mantenicunayquipaj (Hech. 18:2, 3; 20:34; Efes. 4:28). Ali arucoj carga imata ruranayquipaj captinpis lapantami cumplinqui. Chaura runacunapis ali ricashunqui y juc trabajuta tariycurga calpachacunqui mana  ogranayquipaj. Caycama yachacushganchega yanapäshunqui shamoj watacunachopis más cargucunata chasquiycur shumaj cumplinayquipaj. Waquilanlata ricärishun.

14. ¿Imataj juc mozuta yanapanga Jehovata lapan tiempunwan sirvinanpaj?

¹⁴ Lapan tiempuyquiwan Jehovata sirvinquiman. Canan wichan achca pogushga cristianucunaga mozularaj caycar precursorno sirvir galaycurgan. Gampis precursor captiquega, yachacunqui waquincunawan imano arunayquipaj y guellayniquitapis shumaj aypächinayquipaj (Filip. 4:11-13). Chaymi alichi canman canan precursor auxiliarno galaycunayquipaj. Achcajmi chayta rurashganpita canan precursor regularno, localcunata sharcachiycho o Betelchopis yanapacurcaycan.

15, 16. ¿Imataj juc mozu ruranman siervo ministerialno o ancianuno yanapacuyta munarga?

¹⁵ Siervo ministerial o ancianupis canquimanmi. Lapan hermanucuna calpachacunmanmi congregaciuncho ancianuno yanapacunanpaj. Biblia nin pipis chayno yanapacuyta munarga “alitami yarparkaykan” (1 Tim. 3:1). Pero anciano canayquipäga, siervo ministerialraj canayqui. Siervo ministerialcunaga ancianucunatami tucuynopa yanapan. Paycunaga humilde cashpan yäracoj masincunata cuyacuywan yanapan y cushi cushila predicapäcun. Pipis mozuyaycarna siervo ministerialno yanapacuyta puedinna. Y congregaciuncho ali yanapacuycaptenga 20 watayoj caycaptin ancianupis canmanna.

¹⁶ Juc mozu cristiano Jehovata, familianta, congregaciuncho caycajcunata cuyaptin y Biblia nishganta cäsucuptenga, siervo ministerialno o ancianunopis nombrashga canmanmi (1 Tim. 3:1-13; Tito 1:6-9; 1 Ped. 5:2, 3). Ama yarpaychu juc lista cashgantaraj imacunata ruranayquipaj, chaypa trucan Bibliacho caycaj requisitucunata tantianquiman y Jehovatapis mañacunquiman yanapäshunayquipaj. c

17. ¿Imataj juc mozu cananlapita ruranman ali maja cananpaj y familiantapis ali pushananpaj? (Fotutapis ricay).

¹⁷ Casaracurga familiayquita pushanqui. Jesusga nergan waquin pogushga cristianucuna solterula quedacunanpaj decidishganta (Mat. 19:12). Pero gam casaracuptiquega, warmiquipaj majanman ticranqui  y familiayquitapis pushanqui (1 Cor. 11:3). Jehová munan runa caj warminta cuyananpaj, imaycancunata mana pishichinanpaj, espiritual cajcho pushananpaj y laquicushgan horachopis yanapänanpaj (Efes. 5:28, 29). Chaymi canancama ricashganchino cananlapita ali yarpachacoj captiqui, warmicunata respetaptiqui y confiacuypaj captiquega yanapäshunqui ali maja canayquipaj y familiayquitapis ali pushanayquipaj.

18. ¿Imataj juc mozu cananlapita ruranman ali tayta cananpaj?

¹⁸ Wamrayquicunapis canmanmi. Casaracuptiquega wamrayquicunapis yurinmanchi. Chaura ali tayta canayquipäga Jehovapita yachacunquiman (Efes. 6:4). Payga nergan Jesús cuyay churin cashganta y paypita cushishga caycashgantapis (Mar. 1:11). Gampis taytana carga, wamrayquicunata cuyashgayquita ninquiman y alicunata rurashganpita felicitanquiman. Jehová wamranta cuyashganno taytacunapis chayno ruraptenga wamrancunata yanapanga pogushga cristianuman ticrananpaj. Chauraga, ¿imataj cananlapita ruranquiman ali tayta canayquipaj? Familiayquita y congregaciuncho caycaj hermanucunatapis cuyacuywan tratanquiman, jina ninquimanpis paycunata cuyashgayquita y valurashgayquitapis (Juan 15:9). Chaycunata ruraptiquega wamrayquicuna captin ali tayta canquipaj, jina cananlapitanami alapa valuryoj canqui Jehovapaj, familiayquipaj y congregaciunpäpis.

19, 20. ¿Imataj ruranman mozu caj cristianuga pogushga cristianuman ticrananpaj? (Garancho caycaj fotucunata ricay).

¹⁹ Mozularaj cristiano captiqui, yarpachacuy pogushga cristianuman ticranayquipäga manami jinaylapitachu canga. Chaymi ali cristianucunapita yachacunquiman, ali yarpachacoj y confiacuypäpis canquiman. Jina imalatapis rurayta yachacunquiman y shamoj watacunapäpis camaricushgala caycanquiman.

²⁰ Mozu cashpayqui imaycata ruranayquipaj cashganta yarpar capazchi ninquiman ‘nogapäga sasami chay lapanta ruranäpaj’ nir. Pero ama manchacuychu, ¡gamga puedinquimi! Jehovapis listo caycan yanapäshunayquipaj (Is. 41:10, 13). Congregaciuncho caycaj hermanucunapis yanapäshunayquita munan. Jehová munashganno runaman ticraptiquega alapa cushishgami cawacunqui. Mozucuna, gamcunataga amatar cuyayculanchi y Jehovapis bendiciyculäshunqui lapan calpachacushgayquita pogushga cristianuman ticranayquipaj (Prov. 22:4).