1, 2. ¿Imacunapa pasar wagashwan?

 LAPANCHIMI wagaytaga wagaycunchi, öraga cushicuypita. Iti yuriptin o ali amiguwan tiempupita tincuptinchi, jina vidanchicho ali pasashgantapis yarpaptinchi.

² Pero masraj wagacunchi laquishga caycaptinchi. Capazchi chayno ricacunchi pipis nacachimaptinchi, gueshyaptinchi o castanchi wanuptinpis. Ayvecisga Jeremías profetanomi ricacushwan, payga laquishga caycargan babiloniocuna Jerusalenta ushacächishganpita. Chaymi payga caynomi nergan: “Weqïpis mayunöraq aywan. Mana chawaypami waqaykä. Kushikuytapis manami tarïnatsu” (Lam. 3:48, 49).

3. Jehovapa sirvejnincuna wagaptin, ¿imanotaj payga sienticun? (Isaías 63:9).

³ Lapan vidanchicho ima wagachimashganchitapis Jehová musyanmi. Bibliaga wilacun Dios altantumi caycan nacachimashganchipita y payta mañacuptinchega listumi caycan yanapämänanchipaj (Sal. 34:15). Wagaptinchega Jehová manami ricämanchilachu ni wiyamanchilachu sinoga yanapämanchimi. Jehová cuyacoj papäninchinomi wagaptinchega laquicunmi y listo caycan yanapämänanchipaj (leiriy Isaías 63:9).

4. ¿Pïcunapitataj yachacushun y Jehovapita imatataj yachacushun?

⁴ Jehová Palabrancho wilamanchi imano payga ricacun sirvejnincunata wagashganta ricar. Yachacushun  imapa pasashganta Ana, David y Ezequías. ¿Imanirtaj paycuna wagapäcurgan? ¿Imanotaj Jehová paycunata yanapargan? ¿Y paycuna pasashganta imanotaj shogamanchi laquishga caycaptinchi, pipis nacachimaptinchi o ima problema alchachiyta mana puediptinchi?

NACAYCAR WAGAPTIQUI

5. ¿Anaga imanotaj sienticurgan?

⁵ Anaga pasaypa wagargan mana alicunapa pasar. Runanga ishcay warmiyojmi cargan, juc caj warmin cargan Peniná, paypa wawancunami cargan. Pero Anapaga wawan manami carganchu, chaymi Peniná Anata asipar ajayächej (1 Sam. 1:1, 2). ¿Imanotaj sienticunquiman Anano chaycunapa pasar? Anaga pasaypa ‘lakikur waqashpan mikuytapis manami munaqtsu’ (1 Sam. 1:6, 7, 10).

6. ¿Anaga imata rurargan jaucalana ricacunanpaj?

⁶ ¿Anaga imata rurargan jaucalana ricacunanpaj? Puntataga payshi tabernaculuman aywargan. Chaycho caycar, capaz tabernaculupa patiuncho, “pasaypa lakikurmi TAYTA DIOSTA waqapar” ruwacurgan cayno nir: “pasaypa lakishqa kaykä” (1 Sam. 1:10b, 11). Anaga lapan laquesancunapita Jehovata wilapargan. Jehovapäga cuyashgan wamrannomi cargan, chaymi pasaypa wagaycashganta ricar yanapayta munargan.

7. ¿Imanotaj sienticurgan Ana Jehovata laquesanpita wilapar?

⁷ ¿Imanotaj Ana sienticurgan Jehovata laquesanpita wilapar y Elí shacyächiylapa parlashganman yarpar? Bibliaga paypita cayno wilacun: “Nirkurmi [...] kushishqana mikurqan. Tsay junaqpitaqa mananami lakikurqannatsu” (1 Sam. 1:17, 18). Ana jinala nacaypa pasarpis cushishgana caycargan. Payga lapan yarpachacushganta Jehovapa maquinman jaguirgan. Jehová Ana laquicushganta musyargan y ruwacur mañacushgantapis wiyargan, chaymi wawancunata tarinanpaj bendicergan (1 Sam. 1:19, 20; 2:21).

8, 9. Hebreos 10:24, 25 texto nishganno, ¿imanirtaj mana faltaypa reuniuncunaman aywananchi? (Fotuta ricay).

⁸ ¿Imataj yachacunchi? Canan horacho ima nacaypa pasarpis, ¿wagachishgayquicu? Capazchi castayqui o maygan amiguyquipis wanushga, chayno carga japalan cayta munanquichi. Ichanga Anaman yarpay, payga tabernaculuman aywar alina sienticurgan, chaycho Jehová payta shogargan. Gampis utishga o calpaynaj ricacur reuniunman aywaptiquega Jehová  shogashunquimi (leiriy Hebreos 10:24, 25). Reuniunchoga Bibliapita textucuna wiyar shacyächimanchi. Chaynomi Jehová yanapämanchi, laquesaman manana yarparänapaj y ichic ichiclapa laquicushunnachu problemanchicuna jucla mana alchacaptinpis.

⁹ Reuniuncunachoga hermanunchicuna cuyamashpanchimi ali shimilapa parlapamaptinchi shacyächiman (1 Tes. 5:11, 14). Juc precursor especial warmin wanushganpita cayno wilacun: “Warmëpaj alapa laquicö. Wasëpa cuchuncho jamaycur mana chawaypami wagacö. Pero reuniunman aywaptëga waugui panicuna ali parlapamaptin shacyächiman, jaucala ricacunäpaj. Öraga Salonman chayaptë laquishga caycä, pero chaycho caycarga laquicuypis aywacun”. Reuniuncunaman aywaptinchega, Jehovaga hermanunchicunawan yanapämanchi.

10. Pasaypa laquishga caycaptiquega, ¿imataj Anano ruranquiman?

¹⁰ Ana lapan laquesancunapita Jehovata wilapar jaucalana ricacurgan. Gampis payta mañacunquimanmi, 1 Pedro 5:7 texto nishganno lapan laquesayquicunata Jehovapa maquinman cachaycuy, payga wiyashunquimi. Juc hermana cayno wilacun runanta suwacojcuna wanuchishganpita: “Fiyupa laquicur yarpargämi ‘imaypis laquishgala caycäshaj’” nir. ¿Imataj yanapargan? Payga cayno nin: “Cuyapäcoj Taytalanchi Jehovata mañacurga tranquilana ricacurgä. Öraga musyargächu sienticushgäta imano wilapänäpaj, pero payga tantiamaj. Pasaypa laquishga caycaptë Jehovata mañacoj cä, paymi calpata gomaj jaucala ricacunäpaj”. Jehovata wagayparaj ruwacur mañacuptiquipis payga imano ricacushgayquita musyanmi. Nacachishushgayqui mana ilacaptinpis, Jehovaga yanapäshunquimi jaucala ricacunayquipaj (Sal. 94:19; Filip. 4:6, 7). Jina bendecishunquipaj (Heb. 11:6).

JEHOVÁ RICANMI PIPIS WAGACHISHUPTIQUI

11. Davidpa contrancho waquincuna sharcuptin, ¿imanotaj ricacurgan?

¹¹ Davidga caway vidancho imayca mana alicunapa pasar alapa wagargan. Achca runa payta chiquej, castancuna y amiguncunapis contrancho sharcur nacachej (1 Sam. 19:10, 11; 2 Sam. 15:10-14, 30). Chaycunapa pasar caynomi escribergan: “Pasaypa iktsuypa iktsurmi waqaykä. Cada paqas waqaptïmi jawnäpis weqïwan ushmashqa kaykan”. ¿Imanirtaj chayno ricacush? Quiquinmi cayno nergan: “Runakuna conträ sharkuptin pasaypa waqaylawanmi nawïpis yawartaykan” (Sal. 6:6, 7). Runacunaga Davidta fiyupa nacachiptin payga ayvecisga pasaypa wagargan.

12. Salmo 56:8 texto nishganno, ¿imataj David ali musyargan?

¹² David pasaypa nacarpis musyargan Jehová payta cuyashganta. Chaymi payga cayno escribergan: “Waqashqäta TAYTA DIOS mayamashqami” (Sal. 6:8). Juc cutichona Salmo 56:8 (leiriy) textuta shumaj escribishga. Cay textuta leirga tantiachimanchi Jehová alapa cuyamashganchita, pay ricaycanmi nacachimashganchita. Davidga nergan ayca  cuti wagashganchitapis Jehová libruncho apuntaycashganno caycan. David Jehovaman yäracurgan, chaymi ima nacaypa pasarpis musyargan Jehová lapanta ricaycashgantami.

13. Pilapis nacachimaptinchega, ¿imamantaj yarpänanchi? (Fotutapis ricay).

¹³ ¿Imataj yachacunchi? ¿Pilapis engañashushgayquicu o nacachishushgayquicu? ¿Pasaypa laquishga caycanquicu capaz casaracunayquipaj cajga jaguirishushgayquipita o majayqui engañashushgayquipita? ¿O capaz laquishga caycanqui amiguyqui o castayqui Jehovata manana sirvishganta? Juc hermanutashi warmin traiciunaycur jaguiricush. Payga cayno wilacun: “Yarpaylapis yarpargächu warmë traiciunamänanpaj cajta. Chaymi pasaypa laquishga, rabiashga y mana valejno ricacurgä”. Ama gongaychu, Jehovaga imaypis jaguishunquichu pilapis nacachishuptiqui o engañashuptiquipis. Hermanunchi cayno nin: “Jehovaga gagano caycan. Chaymi imapa pasaptinchipis ladunchicho caycanga yanapämänanchipaj. ‘Pay munashqanno kawaqkunataqa imaypis manami kachantsu’” (Sal. 37:28). Jehová cuyamashganchino manami pipis cuyamanchichu. Capazchi pilapis nacachishushgayqui, chayno captinpis ama gongaychu Jehovapa nawinpaj alapa valuryojmi canqui (Rom. 8:38, 39). Pipis mana ali tratashuptiquipis Taytalanchi Jehovaga amatar cuyashunquimi.

14. ¿Imataj yachachimanchi Salmo 34:18 texto?

¹⁴ Chauraga pipis nacachishuptiqui David escribishgan Salmo 34:18 (leiriy) textucho yanapäshunquimi. Chay textucho “lakikuqkunataqa” nishganpita juc libro caynopis traducinapaj nin: “paycuna ali cawayta manami shuyaranchu”. Laquicojcunataga, ¿imanotaj Jehová yanapan? Chay textucho wilacun laquicojcunapa laduncho Tayta Diosmi caycan. Jehovaga wamranchitanomi ricamanchi y wagaptinchega shongunpis nananmi. Chaymi cuyapämashpanchi jucla shogamanchi. Payga manami munanchu laquicur caycänapaj, sinoga jaucala y cushishgala cawanapaj. Jina ali cawaytapis shuyaraycächimanchi y chayman yarparga masrämi shacyächimanchi ima mana alitapis aguantanapaj (Is. 65:17).

 JEHOVÁ MUSYANMI GUESHYARAYCU WAGAPTIQUI

15. ¿Imanirtaj Ezequías laquicushpanmi fiyupa wagargan?

¹⁵ Judá naciunpita rey Ezequías 39 watayoj caycar, gueshyawan pasaypa wanunanpäna caycargan. Jehová profeta Isaiasta mandargan Ezequiasta wilananpaj pay wanunanpaj cajta (2 Rey. 20:1). Chayta wiyar Ezequías pasaypa laquicushpanmi fiyupa wagar, Jehovata ruwacurgan gueshyanpita aliyächinanpaj (2 Rey. 20:2, 3).

16. Jehová Ezequiasta mañacamushganta mayar y wagashganta ricar, ¿imanotaj ricacurgan y imatataj rurargan yanapänanpaj?

¹⁶ Ezequías mañacushganta wiyar y wagashganta ricarpis Jehovaga alapa laquipargan, chaymi profeta Isaíasta mandargan cayno ninanpaj: “Mayashqämi waqar manakamashqaykita. Tsaymi qeshyashqaykipita aliyätsishayki”. Jehová Ezequiasta cuyashpanmi más watacunaraj cawananpaj y Jerusalén marca asirio runacunapita salvashga cananpäpis nergan (2 Rey. 20:4-6).

17. ¿Imanotaj Jehová yanapämanchi gueshyaptinchi? (Salmo 41:3; fotutapis ricay).

¹⁷ ¿Imataj yachacunchi? Capaz pasaypa gueshyaycanqui y jampipis manami canchu. Chayno carga, ¿imataraj ruranquiman? Laquicushgayquipita wagarpis Jehovata mañacuy. Bibliaga nin: “Paymi kuyapämantsi y imaypis shakyätsimantsi”, chaymi ima pruebacunapa pasarpis payga yanapämäshun (2 Cor. 1:3, 4). Canan tiempucho manami shuyarashwanchu Jehová problemanchicunata ilgächinanpaj, pero calpata gomäshun imatapis aguantanapaj (leiriy Salmo 41:3). Santo espiritunwan yanapämanchi yachaj canapaj, calpata jorgunapaj y tranquilula goyanapaj (Prov. 18:14; Filip. 4:13). Jina aunimanchi paraisucho ima gueshyapis manana cananpaj cajta (Is. 33:24).

18. ¿Gueshyaraycu o imapitapis nacashgayqui horacho ima textutaj yanapäshushgayqui? (“ Wagaptinchi Jehová Palabranwan shogamanchi” nej recuadrutapis ricay)

¹⁸ Rey Ezequiasta Diospa Palabranmi shogargan. Chaynolami noganchitapis Diospa Palabranta leirga shogamäshun. Jehovaga Palabrancho shumaj textucunata escribichishga, laquishga caycaptinchi shogamänanchipaj (Rom. 15:4). África Occidental naciunpita juc hermana öraga alapa wagargan cáncer gueshyaraycu. Payga cayno wilacun: “Isaías 26:3 texto alapa shacyächimashga. Ima problemapis alchayta mana puedirga, cay textucho Jehová  aunimanchi yanapämänanchipaj jaucala goyanapaj y ima nacaytapis aguantanapaj”. ¿Gueshyaraycu o imapitapis nacashgayqui horacho yarpanquicu ima textuta yanapäshushgayquita?

19. ¿Ima bendiciuncunataj chasquishun?

¹⁹ Último tiempuchomi cawaycanchi, chaymi cada cadala masraj nacashun y wagashunpis. Yachacushganchino Ana, David y rey Ezequías pasashgancunapita, Jehová ayca cuti wagashganchitapis ricanmi y ima nacachimashganchitapis musyan. Chaymi laquicushpanchi wagarpis Jehovata mañacushun, hermanunchicunapita raquicäshunchu y Palabranchopis shogayta ashishun. Mana jaguiypa sirviptinchega Jehová bendecimäshun, y ichiclachona paraisucho manami pipis waganganachu (Apoc. 21:4). ¡Mushoj pachachoga cushicuylapitami wagashun!