1, 2. 1) ¿Imaytaj wanushga castanchita masraj yarpanchi? 2) ¿Imataj Jesús nergan manaraj wanuptin?

 MAYGAN castanchipis achca watana wanushga caycaptinpis manami gongaycunchichu. Y masraj paycunataga yarpanchi wanushgan junaj chayaycämuptinna.

² Chaynolami wata wata entero munducho aypala runacuna juntacanchi Señorninchi Jesús wanushganta yarpänanchipaj (1 Ped. 1:8). Chay junajga yarpanchi pay noganchiraycur wanushganta, chaynopa juchanchipita y wanuypitapis libramänanchipaj (Mat. 20:28). Jesusga wanuyninta discipuluncuna yarpapäcunanpämi munargan. Chaymi chay chacaycho manaraj wanuptin paycunawan juc micuyta camacächergan, y nergan: “Qamkuna rayku wanushqäta yarpapäkunki” (Luc. 22:19).

3. ¿Imatataj canan yachacushun?

³ Señorninchi Jesús wanushganta yarpananchipäga chaychicaj runacunami juntacanchi y chay lapancunapitaga walcajlami shuyaran cielupaj aywapäcunanpaj, waquincuna ichanga cay Pachacho cawananpaj shuyaran. Cananmi tantiarcushun imanirtaj lapancuna Conmemoraciunman aywapäcun. Jina yachacushunpis imanotaj chayga yanapämanchi. Naupataga cielupaj acrashga cajcunapita parlarcushun.

4. ¿Imanirtaj cielupaj acrashga cajcunaga tantata micupäcun y vinutapis upupäcun?

⁴ Cielupaj acrashga cajcunaga watan watan Conmemoraciunman  aywapäcun tantata micupäcunanpaj y vinutapis upupäcunanpaj. ¿Imanirtaj chayta rurapäcun? Chayta musyanapäga yarparcushun chay chacaycho manaraj wanuptin imataj Jesús rurashga. Jesusga chay chacaycho Santa Cenata camacächergan. Chaycho Jesusga 11 apostolnincunata tantata y vinutapis macyaycorgan micupäcunanpaj y upupäcunanpaj. Chaywanga paycunata yarpächergan mushoj pactupita y Diospa Gobiernuncho mandapäcamunanpäpis (Luc. 22:19, 20, 28-30). * Chauraga chay pactucunaga ninanmi apostolcuna y waquin cristianucunapis cielucho reycunano y sacerdoticunano capäcunanpaj (Apoc. 5:10; 14:1). Chaymi cay Pachacho waquin cielupaj acrashga cajcunaga Conmemoraciuncho tantata micupäcun y vinutapis upupäcun, chaytaga rurapäcun cieluman aywanancama.

5. ¿Imatataj cieluman aywajcunaga rurapäcunga?

⁵ Cielupaj acrashga cajcuna Conmemoraciunman aywapäcuptenga yarpachacärin cielucho imano cawananpaj y imataj rurananpäpis. Jehovaga paycunatami acrargan cielucho mana wanuypaj y juchaynaj cawapäcunanpaj. Paycunaga waquin cielupaj acrashga cajcunawan Jesuswan junto gobernapäcamunga, chaypitapis paycunaga Jehovapa naupancho carcaycanga (1 Cor. 15:51-53; 1 Juan 3:2). Chaura ungiducunaga musyapäcunmi cielucho imata rurapäcunanpaj, ichanga cieluman aywapäcunanpäga wanunancama Jehovalata sirvipäcunman (2 Tim. 4:7, 8). Paycunaga alapami cushicärin cieluman aywapäcunanpaj musyarirga (Tito 2:13). ¿Y ima nishwantaj cay Pachacho cawananpaj cajcunapita? (Juan 10:16). ¿Imanirtaj paycunaga Conmemoraciunman aywapäcun? Mä ricärishun.

6. Cay Pachacho cawananpaj cajcunaga, ¿imanirtaj watan watan Conmemoraciunman aywapäcun?

⁶ Pachacho cawananpaj cajcunaga Conmemoraciuncho tantata micupäcunchu ni vinutapis upupäcunchu sinoga ricanlami, y paycunaga 1938 watapita pacha chayta rurar galaycärergan. 1938 watapita La Torre del Vigía revistaga wilacamurgan “alapa ali cashganta” cay Pachacho cawananpaj cajcunaga Jesuspa wanuyninta yarpänapaj reuniuncho “caycänanpaj, chaycho ruracashganta ricärinanpaj”. Jina wilacurganpis “paycunapaj chay junaj cushicuypaj cashgantami”. Imanomi pipis casaracuptin waquincuna aywapäcun casaracuycajcunata cushishga ricärinanpaj, chaynolami cay Pachacho cawananpaj cajcunapis Conmemoraciunman aywapäcun cushishga ricärinanlapaj.

7. Cay Pachacho cawanapaj cajcunaga, ¿imanirtaj Conmemoraciunpaj discursuta wiyanchi?

⁷ Cieluman mana aywajcunaga yarpachacunchi cay Pachacho imano cawananchipaj. Chaymi Conmemoraciunpaj discursuta shumaj wiyanchi, chaychoga tantiachicamun Señorninchi Jesús y 144.000 cielupaj acrashga cajcuna imata rurapäcunga waranga watacunacho cay Pachata gobernapäcamuptin. Cieluman aywajcunaga Jesustami yanapanga cay Pachata juc shumaj Paraisuman ticrachinanpaj y runacunapis juchaynaj cashganman chayananpaj. Alapa cushicuypämi canga ichiclacho cay Pacha juc shumaj Paraisuman ticraptenga, chay wichanga Isaías 35:5, 6; 65:21-23 y Apocalipsis  21:3, 4 cumplicushganta ricärishun. Mushoj Pachacho cuyashga castanchicunata yapay ricänapaj musyarerga cushichimanchi y yanapämanchi Jehovapita mana imaypis raquicänapaj (Mat. 24:13; Gál. 6:9).

8. Pachacho cawanapaj cajcunaga, ¿imanir mastaj Conmemoraciunman aywanchi?

⁸ Pachacho cawanapaj cajcunaga cielupaj acrashga cajcunatami cuyanchi y yanaparcunchi, chaymi Conmemoraciunman aywanchi. Chaypita parlarmi Diospa Palabranga nergan: Cielupaj acrashga cajcuna y cay Pachacho cawananpaj cajcunaga juc yarpayla juc shongula capäcunanpaj. Ricaycushun waquin profeciacunata.

9. Zacarías 8:23 nishganno, ¿imanirtaj cay Pachacho cawananpaj cajcunaga ungiducunata yanapan?

⁹ Zacarías 8:23 (leiriy) textucho ‘juc judío runa’ y ‘gamcuna’ niptenga parlaycan cielupaj acrashga cajcunapämi. Cay profeciaga tantiachicun cielupaj acrashga cajcuna cay Pachacho cawananpaj cajcunawan juc yarpayla capäcunanpaj (Rom. 2:28, 29). ‘May chay naciunpita ima idiumata parlaj chunca runacunapita’ parlaptenga, cay Pachacho cawananpaj cajcunapämi parlaycan. Paycunaga cielupaj acrashga cajcunawan yanapänacur calpachacärin juc shongunola Jehovata sirvipäcunanpaj. Chaymi cay Pachacho cawananpaj cajcuna Conmemoraciunman aywaptenga musyachicun ungiducunata cuyashganta y yanapashgantapis.

10. Ezequiel 37:15-19, 24, 25 textucunacho caycaj profeciaga, ¿imanotaj cumplicargan?

¹⁰ (Leiriy Ezequiel 37:15-19, 24, 25). Ezequielga ishcay guerucunapitami parlargan. Chay profeciapa cumplimientunga cananmi ricanchi cielupaj acrashga cajcuna cay Pachacho cawananpaj cajcunawan juc shongulawan arupäcushganta ricarmi. “Judá” guerupita parlarga, cielupaj acrashga cajcunapämi parlaycanchi (unaychoga pipis rey cananpaj Judá tribupitami acrapäcoj). Y “Efraín” * guerupita parlarga, cay Pachacho cawananpaj cajcunapämi parlaycanchi. Jehovaga nergan tiempuwan chay ishcay guerucunata ‘juclachananpaj’. Chayga ninanmi chay ishcan grupucuna Jehovalata adurapäcunanpaj y Jesuslatami reynintano chasquicärinanpaj. Cada watami paycunaga shuntacärin Jesús wanushganta yarpapäcunanpaj, chaynopa ricacärin michicojnin juclaylana cashganta (Juan 10:16).

11. Mateo 25:31-36, 40 textucuna nishganno, ¿imanotaj canan wichan cay Pachacho cawananpaj cajcunaga ungiducunata yanaparcaycan?

¹¹ (Leiriy Mateo 25:31-36, 40). Cay textucunacho ‘uyshacunapita’ parlaptenga, ushanan junajcunacho Jehovata sirviycajcunapämi parlaycan; paycunaga cay Pachacho cawananpaj shuyaran. Paycunaga cielupaj acrashga cajcunatami cushi cushila yanaparcaycan Jesuspita chasquishgan carguta cumplipäcunanpaj, chayga caycan: predicanapaj y runacunata yachachicunapaj (Mat. 24:14; 28:19, 20).

12, 13. ¿Imata rurartaj cay Pachacho cawananpaj cajcunaga ungiducunata yanapan?

¹² Cada watami juc ishcay semanacuna pishiycaptin Conmemoraciunpaj cay Pachacho cawananpaj cajcunaga ungiducunata yanapan. Chaymi cushi cushila pï may ali shongu runacunata invitapäcun Conmemoraciunman shacäramunanpaj (“ Caycunatami ruranayqui Conmemoraciunpaj” recuadruta ricäriy). Jina congregaciunnincunacho cielupaj acrashga cajcuna mana  captinpis imayca arreglucunata camacächin Conmemoración ruracänanpaj. Y paycunaga chay lapanta cushi cushila rurapäcun, chaynopa ungiducunata yanapacushganta musyachicun. Jina chayno ungiducunata yanapacurga quiquin Jesusta yanapacushgantano ricacärin (Mat. 25:37-40).

¹³ Chauraga cielupaj acrashga cajcuna y cay Pachacho cawananpaj cajcunaga, ¿imanirtaj imaypis Conmemoraciunman aywanman?

14. ¿Imanirtaj ninchi Jehovawan Jesusga amatar cuyamashganchita?

¹⁴ Jehovawan Jesús amatar cuyamashganchita agradecicunchi. Jehová tucuynopa musyachimashcanchi amatar cuyamashganchita. Ichanga más jatun cuyacuynintaga ricacämurgan cuyashga Wamranta cachamuptin noganchiraycur wanunanpaj (Juan 3:16). Jesuspis cuyamashpanchi cay Pachaman shamurgan noganchiraycur wanunanpaj (Juan 15:13). Öraga Jehovawan Jesús cuyamashganchita pagayta munarga guellaypis manami aypanmanchu, ichanga Jehová munashganno cawacuptinchega shongupita pacha agradecido cashganchita musyachicuycanchi (Col. 3:15). Chaymi Conmemoraciunman aywaptinchega Jehovata Jesustawan agradecido cashganchita musyachicunchi.

15. ¿Imanirtaj ungiducuna y cay Pachacho cawananpaj cajcunaga Jesús wanushganta agradecido carcaycan?

¹⁵ Jesús noganchiraycur wanushganta agradecicunchi (Mat. 20:28). Cielupaj acrashga cajcunaga musyapäcun Jesuspa wanuyninman yäracushganraycur cieluman aywapäcunanpaj. Jina chaycho Diospa ricaynincho juchaynaj caycänanpaj y wamrantano ricananpaj (Rom. 5:1; 8:15-17, 23). Y cay Pachacho cawananpaj cajcunapis Jesuspa wanuyninman yäracärin, chaymi Jehovalata sirvipäcun aprobaciunninta chasquicärinanpaj chaynopa ‘jatun nacay’ wichan salvacärinanpaj (Apoc. 7:13-15). Chauraga chay ishcay grupucuna wata wata Conmemoraciunman aywapäcuptenga, musyachicärin alapa valurashganta y agradecido capäcushganta Jesús paycunaraycur wanushganpita.

16. ¿Imanir mastaj Conmemoraciunman aywanchi?

¹⁶ Jesús mandacushgantami cäsucunchi. Cielucho o cay Pachacho cawanapaj shuyaraycarpis, lapanchimi Jesús mandacushganta cäsucunchi. Payga manaraj wanuptin Santa Cenata camacächir discipuluncunata cayno nergan: ‘Gamcunaraycu wanuchimashganta imaypis yarpapäcamanqui’ (1 Cor. 11:23, 24).

17. ¿Imanirtaj Conmemoraciunman aywaptinchega Jehovaman más guelicunchi?

¹⁷ Jehovamanmi más guelicunchi (Sant. 4:8). Conmemoraciunman aywaptinchega yanapämanchi Jehová amatar cuyamashganchita yarpachacunapaj, y shamoj tiempucho ali caway cashganmanpis (Jer. 29:11; 1 Juan 4:8-10). Musyanchimi Jehová aunimashganchicunaga rasunpa cashganta, pay cuyamashpanchimi chay lapanta ruranga. Cay lapancunaman yarpachacurga Jehovata ‘graciaslä’ ninchi y payman masraj guelicunchi (Rom. 8:38, 39).

18. Jesús rurashgancunaman yarpachacorga, ¿imanotaj yanapämanchi?

¹⁸ Jesús cashganno cashun (1 Ped. 2:21). Conmemoraciunpaj juc ishcay junajcuna  pishiycaptinmi, Bibliacho leinchi Jesús wanunanpaj juc semana pishiycaptin imacuna rurashganta. Y nircur cawarimushganpitapis yachacunchi. Chaypitana Conmemoraciunpaj discursuga yarpächimanchi Jesús amatar cuyamashganchita (Efes. 5:2; 1 Juan 3:16). Jesús cuyamashpanchi rurashgancunata leir y chaycunaman yarpachacorga yanapämanchi ‘Jesucristo kawashqanno kawanapaq’ (1 Juan 2:6).

19. ¿Imatataj rurashwan Jehová imaypis ali nawilanwan ricaycalämänanchipaj?

¹⁹ Jehová cuyamashganchipita manami raquicäcushunchu (Jud. 20, 21). Imaycanopapis calpachacuptinchi Jehovata cäsucunapaj, jutinta respetanapaj y shongunta cushichiptinchega Payga ali nawilanwanmi ricaycalämäshun (Prov. 27:11; Mat. 6:9; 1 Juan 5:3). Conmemoraciunman aywaptinchega, calpatami tarinchi Jehová munashganno cawanapaj y caynopis nishwanrämi: “¡Gamlapämi imaypis cawashaj, voluntäniquita rurashaj!” nir.

20. ¿Imanirtaj Conmemoraciunmanga aywashwan?

²⁰ Chauraga, cielucho o cay Pachacho cawanapaj shuyaraycarpis, imapis mana michanmanchu wata wata Conmemoraciunman aywanapaj. Chaynopa musyachicunchi cuyashga Señorninchi Jesuspa wanuyninta yarpashganchita. Jina Conmemoraciunchoga yarpächimanchi Jehová amatar cuyamashganchita, Payga cuyashga Wamrantami cachamurgan noganchiraycur wanunanpaj. Cay wataga Conmemoración canga viernes 15 de abril chacaypa. Jehovatawan Jesustaga cuyanchimi. Chaymi cay watapis calpachacushun Jesús wanushganta yarpänapaj Conmemoraciunman aywar, chaypäga ni ima chapapis canmanchu.