1-3. ¿Imacunaraycurtaj öraga waganchi?

 ¿YARPANQUICHU imaytaj chaylaraj wagashgayquita? Öraga cushicuypitami waganchi, pero masga laquicuypitami. ¿Manachu maygan castanchicuna o cuyashga amigunchicuna wanuriptenga alapa waganchi? Estados Unidos naciunpita Lorena * jutiyoj pani nergan: “Wamrä wanushganpita alapami laquicurgä, shongüpis nanashgarämi. Öraga juc jatun rumi shongüta nitiycajtano ricacurgä”.

² Y öraga manami chaylapitachu waganchi. Japonpita Hiromi jutiyoj juc precursora cayno nin: “Predicaycaptë mana pipis chasquimaptenga, laquicömi y öraga wagarmi Jehovata mañacö yanapämänanpaj, ali shonguyoj runata tarinäpaj Bibliapita yachachinäpaj”.

³ Noganchipis öraga paninchicuna ricacushganno ricacushcanchi ¿au? (1 Ped. 5:9). Lapanchimi cushi cushila Jehovata sirviyta munanchi. Ichanga castanchicuna wanuptin calpaynaj caycaptinchi, o Diosta sirvishganchiraycur pruebacunapa pasaycaptinchega sasa canman. Chaymi laquicur waganchi (Sal. 6:6; 100:2). Chauraga, ¿imataraj rurashwan chayno ricacuptinchega?

4. ¿Imatataj canan yachacushun?

⁴ Jesuspitami parlarcushun. Bibliami wilacun öraga pasaypa laquishga captin “Jesuspis wagaran” (Juan 11:35; Luc. 19:41; 22:44; Heb. 5:7). Cananmi yachacushun imacunaraycur payga wagargan, y chayga imatash yachachimanchi Jesuspitawan Jehovapita. Jina ricashunpis imatash rurashwan wagashpanchi hora.

5. Juan 11:32-36 textucunachoga, ¿imataj Jesuspita yachacunchi?

⁵ Lazaruga Jesuspa amigunmi cargan, payga panincunawan Marta y María Betania marcacho tiyargan (Juan 11:3, 14). Jesusga paycunatami alapa cuyaj. Ichanga tiempuwan Lazaruga mana ali ricacur wanurgan. Chaura panincunaga pasaypa laquishga carcaycargan. Lázaro wanushgana captin, Jesusga Betaniaman aywargan, y chayta mayaycur Martaga jinan hora Jesuswan tincunanpaj aywargan. Y alapa laquicurmi cayno Jesusta nergan: “Tayta, gam caycho captiquega turë manami wañunmanchu caran” (Juan 11:21). Chaura Marta y waquin runacunapis wagarcaycajta ricarmi “Jesuspis wagaran” (leiriy Juan 11:32-36).

6. ¿Imanirtaj Jesús wagargan?

⁶ ¿Imanirtaj Jesusga wagargan? Perspicacia para comprender las Escrituras libruga nin: “Jesusga pasaypami laquicurgan amigun Lázaro wanuycuptin, y panincunapis alapa laquishga carcaycajta ricar, chaymi wagargan”. * Jesusga nirganchi ‘amigulä Lazaruga alapachi nacargan chay gueshyawan, y ichiclacho wanunanpaj cajta musyarpis laquicurganchi’. Jina Martawan Mariapis pasaypa laquishga carcaycajta ricarchi wagargan. Gampis maygan castayquicuna o amiguyquicuna wanupacushga carga, chaynochi ricacushcanqui; alapachi wagashcanqui. ¿Imatataj caycunapita yachacunchi? Ricärishun.

7. Jesús amiguncunapaj wagashganpita, ¿imatataj Jehovapita achachimanchi?

⁷ Laquicuptinchega, Jehovapis laquicunmi. Jesusga ‘musyatsimantsi Tayta Dios imano kashqanta’ (Heb. 1:3). ¿Chayga ima ninantaj? Noganchi laquicuptinchi Jehovapis laquicunmi (Juan 14:9). Chauraga, maygan castayquicuna wanushganpita laquicuycaptiquega, Jehová musyanmi imapa pasaycanqui y shongunpis nananmi.  Payga yanapäshunayquitami munan, Jehovaga laquishga caycajcunatami shacyächin (Sal. 34:18; 147:3).

8. ¿Imanirtaj ninchi Jesusga wanushga castanchicunata cawarachimunga?

⁸ Jesusga castayquicunata cawarachimuyta munan. Jesús Martata nergan: “Turiquega cawarimongami”, payga chayman yäracurganmi (Juan 11:23-27). Marta Jehovatami aduraj, y musyarganmi unaycho Eliaswan Eliseo waquin runacunata cawarachimushganta (1 Rey. 17:17-24; 2 Rey. 4:32-37). Waquincunata Jesuspis cawarachimushganta runacuna parlapäcojta wiyarganchi (Luc. 7:11-15; 8:41, 42, 49-56). Martano noganchipis yäracushwanmi ichiclacho castanchicuna cawarimuptin paycunawan yapay tincunapaj. ¿Imataj yachacunchi Jesús amiguncunapaj wagashganpita? Payga shongupita pacha munaycan wanushgacunata cawarachimunanpaj, amigun Lazaruta cawarachimushganno.

9. ¿Imata rurartaj Jesusno noganchipis laquicuycajcunata yanapashwan?

⁹ Gampis laquicuycajcunata yanapanquimanmi. Martawan María wagarcaycajta ricar Jesusga manami wagarganlachu, paycunata wiyargan y ali shimilapa shacyächergan. Noganchipis wanupacushga cajcunataga ali shimilapa shacyächishwan. Australiapita Dan jutiyoj anciano cayno nin: “Warmë wanushganpita pilapis yanapämänanta necesitaj cämi. Waquin casaracushgacunaga imay horapis shumajla wiyapäcamaj imano ricacushgäta wilapaptë. Y alapa wagaptëpis, mana pengachimaylapa shogamaj. Öraga calpaynaj ricacuptë, wasëman shapäcamur carrötapis maylacärej, mercaduman aywapäcurpis yanucärejmi. Jina Jehovata mañacärej yanapämänanpaj. Sasa tiempucunacho rasunpa amigücuna capäcushganta musyachimargan” (Prov. 17:17).

10. Lucas 19:36-40 textucunacho, ¿imataj Jesuspita wilacamun?

¹⁰ Jesusga Jerusalenman aywargan 9 de nisán 33 caj watacho, y achca runacuna chayta mayaycur shuyarpaycargan Reynintano chasquicärinanpaj. Chauraga yaycunan puncucho punchuncunata, jacuncunatapis mashtapäcurgan Jesús pasananpaj. Chay junajga cushicuypämi cargan (leiriy Lucas 19:36-40). Ichanga “Jerusalén cercaman chrayarna ricärir, chay marcachru tiyag runacunapag Jesús wagaran”. Chayta ricaycur discipuluncunaga almiracärirganchi. Jesusga laquicushpan wilacurgan tiempuwan imata pasananpaj Jerusalencho tiyajcunata (Luc. 19:41-44).

11. ¿Imanirtaj Jesusga wagargan Jerusalencho tiyajcunapaj?

¹¹ Chay junaj cushicuypaj captinpis, Jesusga laquishga caycargan. ¿Imanir? Payga musyargan chay runacunaga Diospa wilacuyninta mana chasquicärinanpaj. Chaymi Jesús wilacurgan Jerusalén ushacächishga cananpaj y waquin judiucunata preso apacärinanpaj (Luc. 21:20-24). Y chaynomi cashga, Jesús yachachicushganta runacunaga wiyayta munarganchu. Canan wichanpis marcayquichoga capaz waquincuna manami chasquicärinchu Diospita parlapaptiqui. Chauraga, Diospita waquincunata parlapänayquipaj imaycata ruraptiquipis, pero mana chasquishuptiquega, ¿imatataj Jesuspita yachacunquiman? Quimsalata ricärishun.

12. Runa masincunapaj Jesús wagashganpitaga, ¿imataj Jehovapita yachachimanchi?

 ¹² Jehovaga runacunatami cuyan. Jesús runa masincunapaj wagashganga, yarpächimanchi Jehovapis “manami munantsu pipis jutsacho wanunanta. Tsaymi shuyaraykan runakuna jutsankunata kacharir payta cäsukärinanta” (2 Ped. 3:9). Chaura runacunata cuyashganchita musyachicunapäga, calpachacunanchi cushi cushila Diospita yachachicunapaj (Mat. 22:39). *

13, 14. 1) ¿Imatataj Jesús rurashga runacunata laquipar? 2) ¿Imataj yachacunchi Jesús rurashganpita?

¹³ Jesusga lapancunatami yachachej. Payga runacunata alapami cuyaj y ogracashga uyshatano ricaj (Luc. 19:47, 48). Chaymi paycunata laquipar Diospita yachachej. Öraga runacunata yachachishganraycur “Jesuspawan disïpuluncunapaga manana luwarnin [o tiempun] carannachu micunanpäpis” (Mar. 3:20). Y juc cuticho Nicodemuta Jesús yachachergan chacaylapa pay cajman aywaptin (Juan 3:1, 2). Jesusga cushicunmanchi cargan chay lapan runacuna discipulunman ticraptenga, ichanga chaynochu cashga. Chayno captinpis payga yachachicurganlami. Canan wichanpis munanchi lapan runacuna Diospa ali wilacuyninta wiyananpaj (Hech. 10:42). Chaypäga cambiucunatarächi rurashwan juc horacunacho y jucnopa predicanapaj.

¹⁴ Cambiucunata ruray más runacunata tarinayquipaj. Imaypis jinan horalacho cutin cutin predicaptinchega, öraga manami pipis chasquimäshunchu. Matilda jutiyoj precursora cayno wilacun: “Runäwan calpachacärë tucuy horacunacho predicapäcunäpaj. Tutacunapaga negociucuna cashganman aywapäcö. Pulan junajchona achca runacuna purishgancho carrituwan yachachipäcö. Y tardicunapapis runacunata wasincunacho carcaycajtana taripäcö”. Chauraga munashganchi horacunalachochu predicanapaj trucanga, tucuy horacunacho predicashwan más runacunata tarinapaj. Chayta ruraptinchega, Taytalanchi Jehová cushicungami.

15. Lucas 22:39-44 nishganno, ¿imatataj Jesús rurargan manaraj wanur?

¹⁵ 14 de nisán 33 caj watacho, Jesús manaraj wanuptin chacaypa Getsemaní jardinman aywargan, y chaycho shongunta mashtapar Papäninta ruwacurgan (leiriy Lucas 22:39-44). Chay cutichoga “waqapayparaq y qayakuyparaqmi Tayta Diosta manakurqan” (Heb. 5:7). ¿Imataj Jesús chay chacaycho Papäninta ruwacurgan? Payga ruwacurgan yanapänanpaj voluntäninta rurananpaj, wanushgancama paylata sirvinanpaj. Jehovaga oraciunninta wiyarmi juc angelninta cachargan Jesusta shacyächinanpaj.

16. ¿Imanirtaj Jesusga wagargan Getsemaní jardincho mañacuycaptin?

¹⁶ Jesusga Getsemaní jardincho Diosta mañacur wagarganrämi. Payga mana munarganchu runacuna yarpapäcunanpaj Taytanpa jutinta manacajman churashganta. Jesusga musyarganmi paypa maquincho caycashganta, Papäninpa jutinta respetachinanpaj o alabashga cananpaj. Gampis Jehovata sirvishgayquiraycur imayca pruebacunapa pasaycarga, ¿imataj Jesús wagashganpita yachacunquiman? Mä quimsalata ricärishun.

17. ¿Imatataj Jehovapita yachacunchi Jesús mañacushganta wiyashganpita?

¹⁷ Jehovaga mañacushgayquitami wiyan. Jesusga musyarganmi mañacushganta Taytan wiyashganta. ¿Imanir? Paypäga imapitapis más ali cashga Papäninlata sirvinanpaj y jutinta respetachinanpaj. Chauraga noganchipis mañacuptinchi yanapämänanchipaj Jehovalata sirvinanchipaj y jutintapis respetachinanchipäga, payga mañacushganchicunata wiyamäshun (Sal. 145:18, 19).

18. ¿Imanirtaj ninchi Jesusga juc ali amigo cashganta?

¹⁸ Jesusga musyanmi imano ricacushgayquita. Laquicushpanchi hora, juc ali amigo cuyacuywan yanapämaptinchega, ¿manachu cushicurinchi? Chay amiguga Jesusmi caycan. Payga noganchino laquishga ricacurgan y jucraj yanapänantami necesitargan. Chaura payga musyanmi imano ricacushganchita y necesitashganchi horami yanapämäshun  (Heb. 4:15, 16). Imanomi Jesús juc angelpa yanapacuyninta chasquirgan, chaynolami noganchipis Jehovapa yanapacuyninta chasquishwan. Öraga chay yanapacuycuna caycanman juc publicaciuncho, juc videucho, juc discursucho o maygan ancianulapis o amigunchipis watucamaptinchi.

19. Jehovalata sirvishgayquiraycur nacaycarga, ¿imataraj ruranquiman ali ricacunayquipaj?

¹⁹ Jehovaga yanapäshunqui jaucala cawanayquipaj. ¿Imanotaj Jehovaga shacyächimanchi? Mañacuptiquega, “Tayta Diosmi alli cawayta goshunquipaj. Chaymi mana yarpachacuypa allillana cawanquipaj” (Filip. 4:6, 7). Jehovapa yanapacuyninga shongunchitami ancashyächin y ali cajcunaman yarpänapaj yanapämanchi. Y chaynoshi paninchi Luz ricacurgan, payga nin: “Öraga japalä ricacö y Jehová mana cuyamashgantami yarpä. Chaura jinan horacho payta wilapä imano ricacushgäta. Y cuentata gocurgä Jehovata mañacuptëga yanapäman ali cajcunaman yarpänapaj”. Paninchi nishgannopis, Jehovata mañacuptinchega yanapämäshun mana yarpachacuylapa cawanapaj.

20. ¿Imatataj yachacushcanchi Jesús wagashganpita?

²⁰ Jesús imacunaraycur wagashganta canan yachacushganchega, shacyächimanchi y yanapämanchimi. Jesús amiguncunapaj wagashganpitaga yachacunchi noganchipis laquicuycaj amigunchicunata yanapänapaj. Jina yarpächimanchi maygan castanchicuna wanuriptenga, Jehovawan Jesús yanapämänanchipaj cajta. Chaypitapis yachacunchi runacunata Diospita cuyacuywan parlapänapaj, Jehovawan Jesusga paycunatami alapami cuyan. Jina Jesús wagashganga shacyächimanchi. ¿Imanir? Payga Papäninwan musyanmi noganchi imacunapa pasashganchita, noganchiraycur laquicun, y yanapämänanchita munan. Lapalanchi calpachacushwan canan yachacushganchita cawayninchicho ruranapaj, ichiclacho Jehovaga lapan runacunata “shoqashpanmi weqinkunatapis pitsapanqa” (Apoc. 21:4).