1. ¿Ima ninquimantaj Santiagupa familianpita?

 SANTIAGUGA Jesuspa shulca caj wauguinmi cargan. Taytancuna Josewan Mariaga Jehovatami alapa cuyapäcoj, y calpachacärergan Jehovapa voluntäninta rurapäcunanpaj. Santiagupäga alapa cushicuypächi cargan wauguin Jesús, Mesías cananpaj acrashga cashganta musyaptin.

2. ¿Imanirtaj ninchi Santiaguga wauguinpita yachacunman cargan?

² Jesús imano cashganta Santiaguga imaycacunatachi yachacurgan (Mat. 13:55). Jesusga 12 watayojla caycar Diospa Palabranta shumaj reguirgan, chaymi Jerusalenpita waquin ancianucunaga almiracärergan (Luc. 2:46, 47). Jina Santiaguga carpinteruno Jesuswan arurganchi y chaychopis wauguintaga shumajchi reguirgan. Chaypita parlarmi, wauguilanchi Nathan Knorr cayno nej: “Piwanpis arurga, pay imano cashganpita alitami yachacunqui”. * Santiaguga ricarganchi ‘winaylan tupumi Jesús más yachaq rikakushqanta. Tsaymi Tayta Diospis y runakunapis kuyarqan’ (Luc. 2:52). Alichi canman cargan Jesús yachachicur galaycushganpita Santiago discipulunman ticraycuptenga, ichanga chaynochu cashga.

3. ¿Imataraj Santiago yarpargan Jesús yachachicuyta galaycuptin?

³ Cay Pachacho Jesús yachachicushgan wichancho Santiaguga discipulunman manami ticrarganchu (Juan 7:3-5). Waquin hermanuncunaga yarpapäcurgan Jesús “löcuyashqa kaykashqanta”, Santiagupis chaynochi yarpargan (Mar.  3:21). Jina Bibliaga manami wilacunchu Jesús guerucho warcuraycaptin, mamanwan Santiago chaycho caycashganta (Juan 19:25-27).

4. ¿Imatataj canan yachacushun?

⁴ Tiempuwan Santiaguga Jesusman yäracurganmi y congregaciunchopis ali cristianumi cargan. Canan caycunatami Santiagupita yachacushun: 1) ¿Imanirtaj ñanpu shongu cananchi? y 2) ¿imanotaj ali yachachicoj cashun?

5. ¿Imatataj Santiago rurashga Jesús cawarircamur yuripaptin?

⁵ ¿Imaytaj Santiaguga Jesuspa discipulunman ticrashga? Chayga cargan Jesús cawarimushgana captin, payga “Santiagutapis yuriparan, llapan apostulnincunatapis” (1 Cor. 15:7). Santiagupäga chay junajta mana gongaycunanpächi cargan. Payga apostolcunawan Jerusalencho shuntacashga carcaycargan espíritu santuta chasquinanpaj (Hech.1:13, 14). Nircur tiempuwan Santiaguga waquin wauguicunawan unay Jerusalencho cuerpo gobernantino yanapacurgan (Hech. 15:6, 13-22; Gál. 2:9). Y 62 caj wata manaraj chayamuptin, Santiaguga acrashga hermanucunata cartacamurgan. Canan wichanpis chay cartaga, cielupaj acrashga cajcunata y cay Pachacho cawananpaj cajcunatapis yanapämanchi (Sant. 1:1). Chay wichan Josefo jutiyoj runa wilacushganno, judiucunapa sumo sacerdote Ananías (Anán) mandargan Santiaguta wanuchinanpaj. Santiaguga wanushgancamami Jehovata sirvirgan.

6. ¿Ima nishwantaj Santiagupita y chay wichan pushacoj religiosucunapita?

⁶ Ñanpu shongu runami Santiaguga cargan. Dios cachamushgan Wamra Jesús cashganta, Santiago shumaj tantiaycurna ñanpu shongu cashpan payman yäracurganmi. Ichanga chay wichan Jerusalencho caycaj sacerdoticunaga Jesusta chiquipargan. Lazaruta Jesús cawarachimushganta mayaycarpis, chay pushacoj religiosucunaga yäracärirganchu Diospa Wamran Jesús cashganta, chaypa trucanga Lazarutawan Jesusta wanuchiyta munargan (Juan 11:53; 12:9-11). Nircur soldaducunatapis pacapaylapa guellayta goycurgan Jesús rasunpa cawarimushganta mana wilacärinanpaj (Mat. 28:11-15). Chay ali tucoj pushacoj religiosucunaga ni ichiclapis  Jesusman yäracärirganchu, ichanga Santiaguga payman yäracorgan.

7. ¿Imanirtaj ali tucoj cashwanchu?

⁷ ¿Imataj yachacunchi? Jehová yachachimänanchipäga ali tucoj cashwanchu. Imanomi juc gueshya ichic ichiclapa shongunchita malogranman, chaynolami pasan pipis ali tucuptin, ichic ichiclapa Dios nishgancunata mana cäsucur galaycunman. Fariseucunapa shonguncunaga chucrucashgami caycargan, chaymi Jesús achca milagrucunata ruraycashganta ricarpis manami creipäcurganchu, ni Diospa Wamran cashgantapis yäracärirganchu (Juan 12:37-40). Chaymi Jesusga nirgan wanuycho paycuna ushacänanpaj (Mat. 23:13, 33). Caypitaga yachacunchi Diospa Palabranpita yachacunapaj alapa ali cashganta y Jehovapa espirituntapis mañacushwanmi, chaynopa Dios munashganno yarpänapaj y ali cajcunata acranapaj (Sant. 3:17). Santiaguta Jehová yachachergan ñanpu shongu runa captinmi, chaymi tiempuwanga ali yachachicojmi cashga. ¿Imanirtaj chayta ninchi? Ricärishun.

8. ¿Imataj yanapämäshun ali yachachicoj canapaj?

⁸ Pushacoj religiosunapäga “mana sumaj estudiasha” runami Santiaguga cargan, Pedruwan Juan cashganno (Hech. 4:13). Chayno captinpis Santiaguga ali yachachicojmi cashga, chaytaga ricanchi jutinta apaj cartachomi. Santiaguno noganchipis mana shumaj estudiashga runa caycarpis Jehovapa espiritunpa yanapacuyninwan y congregaciuncho caycaj yanapacuycunawanga ali yachachicojman ticrayta puedinchi. Maslata Santiagupita parlarcushun, mä imatash paypita yachacunchi.

9. ¿Imanotaj Santiaguga yachachej?

⁹ Santiaguga tantiacaj palabracunalawanmi yachachicoj. Chaymi Santiaguta runacuna mayaptenga, imata rurananpäpis tantiacärejmi. Ricaycushun cristianucunata Santiago imano yachachishganta imayca nacaycunapa pasarpis pitapis mana nanapärananpaj. Payga escribergan: “Fiyupa nacarpis mana yamacaypa yäracogcunaga alim canga. Chaynuy Job pasaypa nacaycarpis  Diosninchiman yäracuran. Diosninchim cuyapäcog car nacanganpita payta mas aliman churaran” (Sant. 5:11, Biblia Ambo Pasco). Santiaguga manami yarpayninpitachu yachachicurgan, sinoga Diospa Palabranwanmi runacunata yanapaj tantiacärinanpaj sirvejnincunata Jehová imaypis bendicinanpaj cashganta; Jobta bendicishganno. Santiaguga Jehovatami alabayta munargan, manami quiquintachu. Chaymi tantiacaj palabracunalawanmi yachachicurgan.

10. ¿Imanotaj noganchipis Santiaguno yachachicushwan?

¹⁰ ¿Imataj yachacunchi? Bibliawan y tantiacaj palabracunalawan yachachicushun. Pitapis yachacherga Jehová pasaypa yachaj cashganta yachachicushwan y paycunata amatar cuyashgantapis, manami noganchita alabamänanchipächu (Rom. 11:33). Chaymi imaypis Diospa Palabranpitami yachachicushwan. Tantiarinapaj, ama imaypis estudiantinchicunata nishwanchu ‘noga gam captëga, cayta o wacta ruräman’ nir. Chaypa trucanga Bibliacho caycaj ejemplucunawanmi yachachishwan, chaynopa Jehová imano yarpashganta musyananpaj. Chayta rurarga, quiquincunami ali tantiacärenga Jehovata imanir cäsucärinanpaj; y manami noganchi nishganchitachu ruranga.

11. ¿Ima problemacunapataj unay cristianucuna pasaycargan, y imataj Santiaguga consejargan? (Sant. 5:13-15).

¹¹ Santiaguga rasun cajtami parlaj. Santiago cartacamushganchoga ricanchi payga musyaycargan hermanuncuna ima problemacunapa pasaycashganta, y imata rurananpäpis consejacurgan. Waquin cristianucunashi consejucunata jucla manami cäsucärejchu (Sant. 1:22). Juccunaga ricucunalatashi ali ricaj (Sant. 2:1-3). Y waquincunapäga sasashi cargan shiminta dominananpaj (Sant. 3:8-10). Chay cristianucuna sasa problemacunapa pasaycaptinpis, Santiaguga yanapayta munargan. Chaymi paycunata ali shimilapa y mana manchacuypa parlapargan cambiananpaj. Jina nirganmi pipis espiritual cajcho mana ali caycaptenga ancianucunapa yanapacuyninta ashinanpaj (leiriy Santiago 5:13-15).

12. ¿Imanotaj estudiantinchicunata yanapashwan?

¹² ¿Imataj yachacunchi? Waquincuna pantarcuptinpis, yanapashwanmi. Waquin estudianticunaga Biblia nishganta manami jucla cäsucärinchu (Sant. 4:1-4). Juccuna Dios munashganno cawananpäga ichiclapa ichiclaparaj ima cambiucunatapis rurarin. Chauraga Santiago rurashganno, noganchipis mana manchacuypa estudiantinchicunata nishwan imacunacho mejorananpaj. Y cayta ama gongashunchu: Pipis ali shonguyoj captenga, quiquin Jehová marcanman apamunga y calpatapis goycunga cawaynincho cambiucunata rurananpaj (Sant. 4:10).

13. ¿Imatataj quiquinpita Santiaguga yarpargan? (Sant. 3:2).

¹³ Santiaguga waquincunapita manami ali tucurganchu. Jesuspa wauguin caycarpis, Santiaguga manami nirganchu ‘noga waquincunapita más ali cä’ nir, y cargunpitapis alabananta munarganchu. Chaymi waquin hermanucunapaj parlarmi “cuyashä ermänucuna” nergan (Sant. 1:16, 19; 2:5). Jina juchaynaj cashgantapis manami  yarparganchu, sinoga “llapanchïmi imanöllapapis llutanta” ruranchi nergan (leiriy Santiago 3:2).

14. ¿Imanirtaj imalachopis mana pantashganchita musyachicushwanchu?

¹⁴ ¿Imataj yachacunchi? Noganchipis juchayojmi canchi. Chaymi yarpaylapis yarpashwanchu Bibliata yachaycächishganchipita más ali cashganchita. ¿Imanir? Imalachopis mana pantashganchita pilatapis musyachicuptinchega, paycunaga yarpapäcunga Diosta sirvipäcunanpaj alapa sasa cashganta. Ichanga chayno mana cananpäga estudiantinchicunata wilapashwan noganchipis öraga imalachopis pantashganchita, y Jehová imano yanapämashcanchi cawayninchicho cambiucunata ruranapaj. Chayta rurarga estudiantinchicuna nipäcunga, ‘chauraga nogapis Jehovata sirviyta puedëmi’.

15. ¿Imanotaj Santiaguga yachachicoj? (Sant. 3:2-6, 10-12).

¹⁵ Santiaguga ali tincuchicuycunawan yachachej. Chaypäga espíritu santumi yanapargan. Jina Santiaguga ricashga wauguin Jesús imano ali tincuchicuycunawan yachachishganta, chaypitapis yachacurganchi. Santiago cartacushganchoga tarinchi facil-la tantiacaj tincuchicuycuna, y chaycunapitaga alitami yachacunchi (leiriy Santiago 3:2-6, 10-12).

16. ¿Imanirtaj shumaj tincuchicuycunawan yachachicushwan?

¹⁶ ¿Imataj yachacunchi? Shumaj tincuchicuycunawan yachachicushun. Chayta rurarga wiyamajninchicunaga musyapäcunga imapita parlaycashganchita. Jina Bibliapita yachacushganchitapis manami jucla gongangachu, sinoga lapan yachacushgancunatami yarparanga. Jesusga shumaj tincuchicuycunawanmi yachachicoj y wauguin Santiagupis chaytami ruraj. Mä juclaylata ricärishun y imatash chaypita yachacunchi.

17. ¿Imanirtaj ninchi Santiago 1:22-25 caycaj tincuchicuyga ali cashganta?

¹⁷ (Leiriy Santiago 1:22-25). Santiaguga juc espejupitami parlargan. Chaywanga yachachicuyta munaycargan Diospa Palabran yanapämänanchipäga ama leishwanlachu, sinoga calpachacushwanmi cäsucunanchipaj. Juc runa espejucho gajlanta ricacushganta nirga, runacunaga tantiacäringami  imapita parlaycashganta. Payga nirgan: pipis espejucho ricacuptin imapis alchananpaj captin pero mana ruraptenga yangalami canga. Chaynolami Bibliata cutin cutin leiptinchega yarpachacunanchi imalachopis cambianapaj, chayta mana rurarga yangalami canga.

18. Tincuchicuycunawan yachachicurga, ¿imatataj yarpashwan?

¹⁸ Santiaguno tincuchicuycunawan yachachicurga caycunatami rurashwan: 1) parlashganchi temawan tincuchishwan; 2) wiyamajninchicuna facil-la tantiacärinman, y 3) imano yanapämashganchita wilacushwan. Maygan tincuchicuycunawan yachachicuyta mana musyarga Índice de las publicaciones Watch Tower cajman yaycuriy. Nircur “Ejemplos” nishgancho tarinqui achca tincuchicuycunata. Imanomi juc micrófono yanapacun vozninchi shumaj wiyacänanpaj, chaynolami tincuchicuycunawan yachachicurga, alin caj yachachicuycuna shumaj tantiacänanpaj yachachicushwan. Chauraga ama nishwanchu ‘ali yachachicojman ticrashaj waquincuna ali ricamänanpaj’ nir. Chaypa trucanga, waquincunata yanaparcunapaj canman, Jehovata alabapäcunanpaj y familiancho caycänanpaj.

19. ¿Imata rurartaj hermanunchicunata cuyanchi?

¹⁹ Juc juchaynaj mayor wauguiwan mana winashga carpis, ichanga cushicunchimi Jehovapa familian rurincho cuyashga hermanunchicunawan caycaptinchega. Chaymi paycunawan cuyanacushwan y paycunapita yachacushwan. Jina Jehovata juc shongunola sirvipäcushwan, predicaciuncho yanagänacur y Bibliapitapis yachachicur. Santiaguno ñanpu shongu captinchi, ali shimilapa parlaptinchi y shumaj yachachicuptinchega Taytalanchi Jehovatami alabaycanchi, jina ali shonguyoj runacunatapis yanapaycanchi Jehovaman guelicunanpaj.