1. ¿Ima nacaycunapataj Davidga pasaycargan?

 REY Saulga pasaypami Davidta chiquej, wanuchiytami munaj. Chaura David Saulpita gueshpicuycashgancho, Nob marcaman pasar imapis micunanpaj mana captin, Ahimelecta mañacurgan pichga tantacunata garananpaj (1 Sam. 21:1, 3). Nircur soldaduncunawan juc machaycho pacacärergan (1 Sam. 22:1). ¿Imanirtaj chay jinanpa Davidga pasaycargan?

2. 1 Samuel 23:16, 17 nishganno, ¿imatataj Saulga rurashga Diospa contrancho churacänanpaj?

² David achca guerracunata ganashganraycur pï maypis payta cuyaj, chaymi Saulga pasaypa nanaparaj. Payga musyarganmi mana cäsucushganraycur Davidta Jehová acrashganta Israelcho rey cananpaj paypa trucan (leiriy 1 Samuel 23:16, 17). Davidga musyarganmi achca runacuna Saulta yanapashganta y munaynincho aypala soldaducuna cashganta, chaymi gueshpi gueshpila cawaj. ¿Saulga yarpaycarganchuraj Jehová camacächishganta michäcunanpaj? (Is. 55:11). Manami musyanchichu, Bibliaga chayta mana wilacunchu. Saúl ichanga Davidta gaticachar Diospa contranchomi churacaycargan, y pipis Diospa contrancho churacaptenga mana alichomi ushanga.

3. ¿Imanotaj David ricacurgan nacaycunapa pasaycarpis?

³ Davidga ñanpu shongu runami cargan. Payga ‘noga rey cayta munä’ mana nirganchu, quiquin Jehovami acrashga  (1 Sam. 16:1, 12, 13). Chayno captinpis, Saulga gaticachargan wanuchinanpaj. Chay jinanpa David pasaycarpis manami Jehovawan piñacurganchu. Payga ‘imalapis micunäpaj mana canchu o machaycunalacho pacacuyta yamacashcäna’ manami nirganchu. Chaypa trucan Davidga imayca nacaycunapa pasarpis Jehovapaj juc cuyaylapaj canciunta escribergan, chayga caycan 2022 watapaj acracämushga texto, chaycho nin: ‘Jehovaman yaracojcunapäga manami ima aycanpis pishengachu’ (Sal. 34:10).

4. ¿Ima tapucuycunatataj canan contestashun, y imanirtaj chaycunapita parlarcushun?

⁴ Canan wichan achca hermanunchicuna micuyraycur nacarcaycan, imapis tarinanpäga sasami. * Pandemia wichancho chayta masraj ricashcanchi. Y ‘Jatun nacay’ chayamunanpäna caycaptenga más sasarämi canga (Mat. 24:21). Chaycunaman yarparcur canan caycunapitami yachacushun: ¿Imanirtaj ninchi Davidtaga “ima-aycanpis” mana pishirganchu?, ¿imanirtaj charashganchicunalawan contentacushwan?, ¿imanirtaj yäracunchi Jehová cuidamänanchipaj?, y ¿imatataj canan rurashwan shamoj tiempupaj?

5, 6. Diospa sirvejnincunata ‘mana imapis pishengachu’ David nishgantaga, ¿imanotaj Salmo 23:1-6 yanapämanchi shumaj tantianapaj?

⁵ Davidga nergan Jehovapa sirvejnincunata ‘imapis mana pishinanpaj’, ¿imataj chaywan niycargan? Chayta shumaj tantiarcunapaj ricärishun Salmo 23 cajcho David ima escribishganta (leiriy Salmo 23:1-6). David cayno escribir galaycurgan: “TAYTA DIOSMI michimajnë. Chaymi imapis mana pishëmangachu”. Davidga Jehovatami alabaj achca bendiciuncunata chasquishganpita, payga nin ‘ali nänipa pushaman’ y ‘imaypis yanapaycämanmi’. Davidga musyarganmi Jehová payta cuyaptinpis, öraga  problemacunaraycur calpaynaj “yanauyaycaj ragracunapa” purejno ricacushganta y chiquejnincunapis cananpaj. Pero Jehovata michejnintano ricashpan Davidga nin “manami imapitapis manchacushächu”.

⁶ Chauraga, Diospa sirvejnincunata ‘mana imapis pishengachu’ David niptenga parlaycargan Dioswan amigo cashganpita. David imaycacunata mana chararpis, charashgancunalawan contentacurgan, cushishga caycargan. Paypäga más ali cargan Diospa ricaynincho ali cayta, chaynopa bendiciunninta chasquinanpaj y chiquejnincunapita chapänanpaj.

7. Lucas 21:20-24 textucuna nishganno, ¿Judeacho caycaj cristianucunaga imacunapataj pasargan?

⁷ David nishganga yachachimanchi alapa ali cashganta charashganchicunalawan cawacunapaj. Öraga imaycacunata chararga cushicuypämi canman. Chaycunalamanga alapa mana yarpachacushwanchu. Y chaytami unay Judeacho tiyaj cristianucuna tantiacärinman cargan (leiriy Lucas 21:20-24). Jesusga nergan “soldädukuna Jerusalénta tumaparaykaqta rikarmi” lapan imaycancunata cachaycur jucla jircacunapa gueshpicärinanpaj, chaynopa salvacärinanpaj. Guepa watacunacho, La Atalaya revista nergan: “Judiucunaga wasincunata chacrancunata jaguirergan jaticushganlawan y amänuncho caycajcunalata aptacurcur jircacunapa gueshpicärergan. Paycunapäga lapan charashgancunapitapis más alimi cargan Jehovata sirvipäcunanpaj, paycunaga yaracärergan Jehová imapitapis chapänanpaj”.

8. ¿Imatataj yachachimanchi unay Judea cristianucunata pasashganta?

⁸ ¿Imataj yachacunchi Judea cristianucunata pasashganpita? Näga parrafucho La Atalaya revistaga caynopis nergan: “Noganchipis ichiclacho imayca pruebacunapa pasashunmi. Chayno captenga ¿lapan charashganchicunatachuraj masta cuyashun?, o ¿Diostachuraj cäsucushun salvacunanchipaj? Noganchipis ichiclacho jatun nacay galaycuptenga, capazchari unay Judea cristianucunano lapan charashganchicunata cachaycur gueshpicushun y imalanchipis mana cangachu. Chaymi cananlapitami charashganchicunalawan contentacushwan”. *

9. Pablo unay cristianucunata consejashganga, ¿imanotaj yanapäshunqui?

⁹ Alapa sasachari cashga unay cristianucuna lapan charashgancunata jaguirinanpaj y juclächo yachacänanpaj. Chaymi Jehovaman lapan shongunwan yäracärinman cargan mana imapis pishinanpaj. Pichga watacuna pishiycaptin soldaducuna Jerusalenta tumarpänanpaj, apóstol Pabluga cristianucunata juc shumaj consejuta goycurgan. Payga nergan: “Guellaylapäga ama cawapäcuychu. Charangayquiwan contentacäriy. Tayta Diosninchi nisha: ‘Imaypis manam jaguirishayquichu ni gongashayquichu’. Chaynuy niycamashaga yäracur lapan shongunchipa nishun: ‘Tayta Dios imaypis yanapaycämanmi. Manam manchacushächu. Runacuna imatapis manam ruramangachu’” (Heb. 13:5, 6, Biblia Ambo Pasco). ¿Imanotaj cäsucoj cristianucunataga Pablo nishganga yanapashga? Paycunapäga manami alapa sasanachu cargan juc marcacunacho yachacänanpaj. Jehovaman yäracärergan lapanta camaripänanpaj. Pablo nishganga noganchitapis yanapämanchi unay cristianucunano Jehovaman yäracunanchipaj.

10. ¿Imataj Pablupäga más ali cashga, y imataj chaypita yachacunchi?

¹⁰ Timoteuta Pablo ima consejashganta ricärishun, chayga noganchitapis yanapämäshun. Payga nergan: “Micunanchipag y jaticunanchipag caycaptinga cushisha cawashun” (1 Tim. 6:8, Biblia Ambo Pasco). Chauraga imaylapis mishqui micuyta micurga, ropatapis ranticuptinchega, ¿nishwanchuraj mana ali cashganta? Manami chaynochu. Pabluga cay textucho niycargan charashganchicunalawan cushishga cawacushun (Filip. 4:12). Quiquin apóstol Pablo chaytami rurashga. Paypäga más alimi cashga Jehovawan ali amigo cashganta, lapan charashgancunapitapis (Hab. 3:17, 18).

11. Moisés israelitacunata nishganpitaga, ¿imataj yachacunchi?

¹¹ Öraga yarpashganchicunaga manami Jehová yarpashgannochu canman. Ricaycushun imataj Moisés israelitacunata nishga chunyaj jircacunacho purishganpita 40 watacuna pasashgana captin. Payga nergan: “Llapan rurashayquichömi TAYTA DIOSGA bindisyunta gosha-cashunqui. [...] Cay chunyajpa puriptiqui yan’gaycäshunqui. Gamcunata ricaycäshunqui imapis mana päsashunayquipaj. Chaymi mana imapis pishëshurayquichu” (Deut. 2:7). Jehovaga 40 watacunapaj israelitacunata micuyninta camaripargan, maná nishgan. Y  ropanpis Egipto yargushganpita chaynolami caycargan, manami macwayarganchu (Deut. 8:3, 4). Ichanga waquin israelitacunaga manami cushishga caycarganchu chaycunawan. Chaymi Moisesga paycunata yarpächergan chay lapanpita Jehovata agradecicärinanpaj. Jehovaga cushicunmi charashganchicunalawan cushishga cawacuptinchega, payga imaycacunata goycalämanchi. Chaymi, ichicla captinpis lapan shongunchipita payta ‘graciaslä’ nishun.

12. ¿Imanirtaj ninchi Davidga quiquilanman mana yäracushganta?

¹² Davidga musyarganmi Jehová payta imaypis mana jaguirinanpaj. Jehovaga sirvejnincunata imaypis chapanmi. Saúl gaticachaycaptinpis Salmo 34 cajta David escribiptenga Diosman lapan shongunwanmi yäracuycargan, Jehovapa angelnin imapitapis chapashgantano ricargan (Sal. 34:7). Imanomi juc soldado ricachacuycan chiquejnincuna shamuptin, chaynomi Davidga Jehovapa angelninta ricargan. Israelcho rey cananpaj Jehová acrashganta musyaycar y peliayta yachaycaptinpis, Davidga quiquilanman yäracurganchu chiquejnincunata vencinanpaj (1 Sam. 16:13; 24:12). Sinoga quiquin Jehová y angelnincuna imapitapis chapänanpämi yäracurgan. Noganchega manami shuyaranchichu Jehová juc milagrutaraj rurananpaj chapämänanchipaj. Ichanga musyanchimi imayca nacaycunapa pasarpis Jehovaga manami gongamäshunchu.

13. Gog de Magog atacamaptinchega, ¿imanirtaj chay wichanga manchacushwanchu? (Garancho caycaj dibujuta ricäriy).

¹³ Ichiclacho ricacanga rasunpachush Jehovaman lapan shongunchiwan yäracunchi o manachush. Ichiclacho Gog de Magog nishgan o chiquicoj achca naciuncuna atacamaptinchega, öraga japalanchinochi ricacushwan o corraläni uyshacunanochi ricamäshun. ‘Cananga wanushächari’ nishwan, chayno captenga ama manchacushwanchu. Chay wichanga Jehovami chapämäshun, paymi salvamäshun (Ezeq. 38:10-12). Chiquimajninchicunaga yarpapäcunga jucla ushacächimänanchipaj, ichanga noganchega musyanchimi aypala Jehovapa angelnincuna listo caycashganta yanapämänanchipaj, ichanga chiquimajninchicunaga chayta musyapäcunchu. Paycunaga ni ichiclapis Jehovaman yäracärinchu. Chaymi Jehová angelnincunawan salvamaptinchega paycunaga manchacaypita ni ima ruraytapis camäpacunganchu (Apoc. 19:11, 14, 15).

14. ¿Imatataj cananlapitana ruraycashwan shamoj tiempucho aguantaycänapaj?

¹⁴ ¿Imatataj cananlapitana rurashwan shamoj tiempupaj? Guellaylaman yarpachacorga ama cawashunchu. Yarpachacunanchi jatun nacay galaycuptenga, lapan charashganchicunata jaguiriycur gueshpicärinapaj. Jina cushishga cawacushun Jehovawan amigo cashpanchi, y charashganchicunalawan contentacushun. Diosninchita shumaj reguirga yanapämäshunmi payman yäracunapaj chiquicoj naciuncuna atacamaptinchi wichan.

15. ¿Imanotaj Davidga musyargan chiquejnincunapita Jehová librananpaj?

¹⁵ David nacaycunapa pasaycarpis Jehovalaman yäracorgan. Payga nergan: “TAYTA DIOS fiyupa alli cashanta musyanayquipaj masqui camay. Cushishami cawanga payman yäracojcunaga” (Sal. 34:8). Davidga musyarganmi Jehová imaypis payta yanapänanpaj,  chaymi Jehovaman guelicoj. David mozularaj caycaptin jatun runa Goliat-ta wanuchinanpaj nergan: ‘Jehová Diosmi gamta binsinäpaj camacächishga’ nir (1 Sam. 17:46). Nircur, tiempuwan Saúl achca cuti Davidta wanuchiyta munaptinpis Tayta Jehová yanapashga (1 Sam. 18:12). Unaycho imano Jehová yanapashganta musyarmi, Davidga yäracorgan Saulpita Jehová librananpaj. Y caycunata musyarmi noganchitapis yanapämanchi shamoj tiempucho mana manchacunapaj.

16. ¿Imanirtaj ninchi sirvejnincunataga Jehová imaypis yanapashganta?

¹⁶ Cananlapitami imalachopis Jehovapa yanapacuyninta asherga, shamoj tiempucho payman masraj yäracushun. Gamshi aruyniquicho patronniquita permisuta mañacunquiman asambleayquicunaman aywanayquipaj, o reuniuncunapaj predicanayquipäpis más tiemputash mañacunqui. Pero imaraj canman mañacushgayquita mana chasquishuptiquega, chauraga ¿‘cananga imataraj micushaj, trabajütapis ograshächi’ nirchuraj yarpachacunquiman?, o Jehová mana jaguishunayquipaj yäracunquiman (Heb. 13:5). Achca hermanucuna lapan tiempunwan Jehovata sirvej cajcunaga cuentata gocärishga Jehovaga sirvejnincunata manami jaguirinchu, payga imaypis yanapanmi.

17. ¿Maygan textutaj acracämushga 2022 watapaj, y imanotaj yanapämanchi?

¹⁷ Jehová yanapämajninchi captenga shamoj tiempucho imatapis manami manchacushunchu. Jehovaga manami jaguimäshunchu payta lapan shongunchiwan sirviptinchega. Ichiclacho imayca nacaycunapa pasananchipaj cashganta musyarmi, Jehovapa testiguncunata Pushajcunaga Salmo 34:10 textuta acracämushga 2022 watapaj texto cananpaj, chaychoga nin: ‘Jehovaman yaracojcunapäga manami ima aycanpis pishengachu’. Cay textuga yanapämäshunmi ichiclacho imaycacunapa pasarpis Jehovalaman yäracunanchipaj, payga manami jaguimäshunchu.