1. ¿Imacunata rurartaj Jehovaman más guelicunchi?

 CUYASHGANCHI cajcunawan tiemputa pasaptinchega cushichimanchi ¿au? Casaracushga cajcunaga cushicarcärin ishcancuna imalatapis rurapäcuptin. Joven cajcunapis amiguncunawan caycarga cushicarcärin. Y noganchipis hermanunchicunawan imalatapis rurapäcurga cushicunchimi. Ichanga Jehovaman más guelicunapaj imalatapis ruraptinchega, chayga imapitapis más ali caycan. Chaymi payta mañacunanchi, Palabranta leinanchi, aunishgancunaman y imano cashganman yarpachacunanchi. Chay lapanta rurarga cushichimanchimi (Sal. 139:17).

2. ¿Imanirtaj öraga sasa canman Jehovaman guelicunapaj?

² Jehovaman guelicuyta munaptinchipis öraga sasami canman. ¿Imanir? Rurayninchicunaraycur nitipacashga caycarga tiempunchipis cannachu espiritual caj ruraycunapaj. Öraga aruyninchiraycur, familianchiraycur o ima ruraycunaraycurpis calpaynaj ricacunchi y chayno captenga tiempunchipis cannachu mañacunapaj, estudianapaj y yachacushganchiman yarpachacunapäpis.

3. ¿Imaraj pasanman cushicunapaj ruraycunalacho jatiräcurga?

³ Pero chay lapancunapitapis caycanrämi juc ruraycuna michamänanchipaj Jehovaman más guelicunapaj. ¿Imapitataj parlaycanchi? Cushicunapaj ruraycunapitami. Tantiarinapaj, öraga lapanchimi jamayta munanchi, ichanga  cushicunapaj ruraycunalacho jatiräcurga tiempunchipis canmannachu Jehová mandamashganchita ruranapaj. Chaymi alapa ali canga yarpaycaptinchi imata más ali caycan puntaman churanapaj (Prov. 25:27; 1 Tim. 4:8).

4. ¿Imatataj canan yachacushun?

⁴ Cananmi ricaycushun imacunatash más puntaman churashwan. Jina yachacushunpis imacunata rurartaj Jehovaman más guelicushwan y chaycuna imanotaj yanapämanchi.

5. Efesios 5:15-17 textucuna nishganga, ¿imanotaj jovincunata yanapanman ali cajta acrananpaj?

⁵ Más ali cawayta acrashun. Jovincunaga yarpachacärin cawaynincho imacunata rurananpaj, chaymi waquin profesornincuna y mana Testigo caj familiancunapis nipäcun profesiunyoj cananpaj y cay munducho reguishga cananpaj. Ichanga chaycunalata rurarga tiempunpis cannachu juc ruraycunapaj. Jina taytancunapis y hermanucunapis shacyächin Jehovata sirvinanpaj. Chauraga, ¿imaraj juc jovintaga yanapanga ali cajta acrananpaj? Efesios 5:15-17 (leiriy) textucuna nishganta leinquimanmi y nircur yarpachacunayqui. Chaypita cayno tapucunayqui: “¿Imatataj Jehová nogapita shuyaran? ¿Maygan cajta acräman? ¿Imanoraj tiempöta shumaj camacächëman?” nir. Jovincuna yarpapäcuy: cay munducho caycajcunaga Satanaspa maquincho caycan y chaycunaga ushacajlami caycan. Chauraga más ali canman Jehovata sirvinayquipaj, payta cushichinayquipaj.

6. ¿Imataj María acrargan, y imanirtaj ninchi chayga ali cashganta?

⁶ Más alin cajcunata acrarcuy. Öraga ishcay ruraycuna alino captinpis, juclaylata acrashwan ruranapaj, chaynopa tiempunchi aypämäshun. Chaytami ricanchi Martawan Mariata Jesús watucamuptin. Marta ali pachächicoj warmi cashpanmi, imaycacunataraj rurayta munargan Jesusta garananpaj chaynopa pay cushishga caycänanpaj. Ichanga Mariaga Jesuspa laduncho jamacurgan pay yachachishganta wiyananpaj. Marta rurashganta ali captinpis, Jesusga nirgan Mariaga “acrasha allinnin cajta” (Luc. 10:38-42). Tiempuwanga María gongashgachi chay junajcho ima micushganta, ichanga Jesuspita yachacushgantaga manami gongashgachu. Payga cushicurganmi Jesuspita más yachacuptin y noganchipis cushicunchi Jehovaman guelicuptinchi y paypita más yachacuptinchi. Chauraga, ¿imanotaj tiempunchita shumaj camacächishwan?

7. ¿Imanirtaj mañacunanchi, estudiananchi y yachacushganchiman yarpachacunanchi?

⁷ Mañacunanchi, estudiananchi y yachacushganchiman yarpachacunanchi. Mañacuptinchega cuyashga Taytalanchi Jehovawan parlaycanchi, payga cuyamanchimi (Sal. 5:7). Bibliata estudiaptinchega Jehovata más reguinchi, payga pipitapis más yachajmi (Prov. 2:1-5). Y yachacushganchiman yarpachacuptinchega tantiarcushun imapätaj Diosninchi cay Pachata camashga, jina yachacushun pay imano cashganta. Cay lapanta rurarga ali canga, chaynopa Jehovata aduranchi.  Ichanga tiempunchi cay lapanpaj aypämänanchipäga, ¿imataraj rurashwan?

8. ¿Imataj yachacunchi chunyaj sitiucho Jesús caycashganpita?

⁸ Japalanchi caycänapaj sitiuta ashishun. Yachachicur galaycunanpämi Jesús chayta rurashga. Payga 40 junajcuna chunyaj sitiucho japalanmi caycargan (Luc. 4:1, 2). Chaychomi payga mañacurgan y Papäninpa voluntäninman yarpachacurgan, chayga yanapargan nircur pruebacunata aguantananpaj. ¿Imataj yachacunchi? Familianchi jatun captenga, öraga sasachi canman japalanchi caycänapaj. Chayno captenga wasinchipita yargushwan bulla mana cashgan sitiuman. Paninchi Julie chayta rurargan Jehovata más mañacunanpaj. Payshi runanwan juc tacsha cuartulacho tiyaj, y japalan caycänanpaj sitio mana captinmi, payga nin: “Cada junaj parquiman aywä y chaycho Jehovata lapanta wilapä, chayta rurarga alimi ricacö”.

9. ¿Imataj Jesusga ruraj Papäninman más guelicunanpaj?

⁹ Jesuspa ruraynincunaga achcajmi cargan. May chaypa aywaptinpis, runacunaga pay cajman shapäcamoj yanapänanpaj y yachachinanpaj. Bibliaga nin juc cuticho “marcacho tiyajcunaga wasi-puncuman llapan gotucaran” Jesusta ricänanpaj. Chayno captinpis payga chaca chacala chunyajman aywaj Papäninta mañacunanpaj (Mar. 1:32-35).

10, 11. Mateo 26:40, 41 textucuna nishganno, ¿imataj Jesús discipuluncunata consejargan, y imataj paycuna rurargan?

¹⁰ Jesús wanunanpaj ichiclana pishiycaptin Getsemaní jardinman aywacurgan, chaycho Papäninta mañacunanpaj y voluntäninman yarpachacunanpaj (Mat. 26:36). Jina chaycho discipuluncunatapis juc consejuta goycurgan.

¹¹ ¿Imataj cargan? Jesús discipuluncunawan pulan pagaschona Getsemaní jardinman chayaycurmi, paycunata nirgan Taytanta mañacushganyaj chaylacho mana punuylapa shuyarpänanpaj (Mat. 26:37-39). Chaypita cutimur discipuluncunata tarirgan punushgana carcaycajta, chauraga yapay nirgan: “Rikchapäkuy. Tayta Diosta manakäriy” (leiriy Mateo 26:40, 41). Jesusga musyargan discipuluncuna uticashga y yarpachacuycunawan carcaycajta. Chaymi paycunata laquipar nergan: gamcuna alita rurayta “munarpis kikilaykikunapitaqa manami kamäpakunkitsu”. Chayno captinpis ishcay cuti masraj mañacunanpaj aywargan y cutiycamurna discipuluncuna  jinala punurcaycajta tarirgan (Mat. 26:42-45).

12. Öraga uticashga ricacuptinchipis mañacunapäga, ¿imataraj rurashwan?

¹² Imay horalachopis mañacunapaj acrashwan. Öraga rurayninchicunaraycur o alapa yarpachacuyninchicunaraycur calpanchipis canmannachu Jehovata mañacunapaj. Chayno captenga, ¿imaraj yanapämäshun? Waquincunaga pununanpäna caycaptinshi Jehovata mañacärej, ichanga más temprano ruraptinga más ali cashganta cuentata gocärishga. Juccunaga gongurpacur o jamacur mañacäriptinshi ali ricacärergan. Y alapa laquishga caycaptinchi o guelanashga ricacuptinchi mañacunapäga, ¿imataraj rurashwan? Jehovatami chay lapanta wilapashwan, payga cuyapämanchi y musyanmi imata ninapaj cashgantapis (Sal. 139:4).

13. ¿Imanotaj celularcuna y waquin maquinacunapis pantachimashwan estudiashganchi hora?

¹³ Estudiashganchi hora, imapis pantachimashwanchu. Diospa Palabranta estudiaptinchi y reuniuncunaman aywaptinchega yanapämanchi Jehovawan más amigo canapaj. ¿Imalapis caycanchuraj yanapämänanchipaj Bibliata leiptinchi shumaj yachacunapaj y reuniuntapis ali wiyanapaj? Aumi, chaypäga celularta, televisorta o radiutapis upirächishwan. ¿Imanir?, ¿manachu estudiashganchi hora pipis gayamaptinchega pantachimanchi?, o ¿ima mensajilapis o correulapis chayamuptenga chaycunata ricarga pantarcunchi? Chaycuna alino captinpis, yachaj runacunaga nipäcun öraga chaycuna pantachimanchimi estudiashganchi hora. Juc profesorga nin: estudiaptinchi celularta o imatapis ricaycarga yarpayninchi juclächo caycanga. ¿Manachu asambleachopis nimanchi celularninchita upirachinapaj mana pitapis pantachinanpaj? Chauraga ¿manachuraj ali canman chayta ruraptinchi estudiashganchi hora mana pantachimänanchipaj?

14. Filipenses 4:6, 7 textucuna nishganno, ¿imanotaj Jehová yanapämäshun imapis mana pantachimänanchipaj?

¹⁴ Jehovata mañacushun imapis mana  pantachimänanchipaj. Bibliata leiycaptinchi o reuniuncho caycaptinchi juc ruraycunaman yarpar galaycuptinchega Jehovata mañacushun yanapämänanchipaj. Chauraga imalapis yarpachacächishuptiquega calpachacuy chaycunaman mana yarparänayquipaj. Chaynopa reuniuncho ali yachacunayquipaj y Bibliatapis cushishga leinayquipaj. Jina Jehovatapis mañacushun “paymi shonquykitapis yarpaynikitapis cuidanqa” (leiriy Filipenses 4:6, 7).

15. Jehovaman guelicurga, ¿imanotaj yanapämanchi?

¹⁵ ¿Imanotaj yanapämanchi Jehovata mañacuptinchi, Palabran Biblia nishganta wiyaptinchi y voluntäninman yarparaptinchega? Punta caj, ali cajcunatami acrashun. Bibliaga nin ‘tantiyakuq runawan purirqa tantiyakuqmi rikakushun’ (Prov. 13:20). Y pipitapis más yachaj o tantiacojga Jehovami, chaura payman más guelicurga noganchipis yachajmi cashun. Jina tantiarcushun payta imano cushichinapaj y mana ali ruraycunata mana ruranapaj.

16. ¿Imanotaj yanapämanchi ali yachachicoj canapaj Jehovaman guelicurga?

¹⁶ Ishcay caj, más ali yachachicojmi cashun. Bibliata pilatapis yachacherga Jehovaman guelicamunanpämi munanchi. Chauraga Taytalanchi Jehovawan cada cadala parlaptinchega, paytami más cuyashun y estudiantinchicunapis payta cuyananpämi yanaparcushun. Jesusmi chayta ruraj. Payga Papäninta cuyacuywan y shongupitami mañacoj. Y chayga discipuluncunatapis yanapargan Jehovata cuyananpaj (Juan 17:25, 26).

17. ¿Imanotaj mañacushganchi y estudiashganchega yanapämanchi yäracoj runa canapaj?

¹⁷ Quimsa caj, yäracoj runaman ticrashun. ¿Manachu cada cadala Diosta mañacuptinchi yanapämänanchipaj, pay contestamaptinchega yäracuyninchi masraj miraycun? (1 Juan 5:15). Y Bibliata cadala estudiaptinchipis yäracoj runaman ticranchi. Chaymi Bibliapis nin “wiyar-raj pipis yäracun” (Rom. 10:17). Ichanga yäracoj runa canapäga manami yachacushwanlachu, sinoga ¿ima mastataj rurashwan?

18. ¿Imataj yachacunchi 77 caj Salmuta guelgaj runapita?

¹⁸ Yachacushganchicunaman yarpachacunanchi. Chaytami 77 caj Salmuta guelgaj runapis rurashga. Payga laquishga caycargan Jehová israelitacunata y paytapis gongashganta yarpargan. Chayshi payga  yarpachacuycarla caycargan y punuytapis camäpacurganchu (2-8 versiculucuna). Chauraga ¿imataj rurashga? Jehovata nirgan: “Lapan rurashqaykitami yarpäshaq. Munaynikiwan rurashqaykita manami qonqashaqtsu” (versículo 12). Payga musyarganmi unaycho Jehová marcanta imano yanapashgantami. Chayno captinpis tapucurgan: “¿Cuyapäcoj cashanta Tayta Diosga gongaycushachuraj? ¿Fiyupa rabyasha cashpan mananachuraj cuyapämäshun?” nir (versículo 9). Cay salmuta guelgajga yarpachacurgan unaycho Jehová almiraypaj ruraycunata rurashganman y cuyapäcoj cashganmanpis (versículo 11). Chayga yanapargan Jehovaman yäracunanpaj marcanta imaypis mana jaguirinanpaj (versículo 15). Noganchipis yarpachacuptinchi Jehová imano marcanta yanapashga y noganchitapis yanapämäshun más yäracoj runaman ticranapaj.

19. ¿Imano mastaj yanapämanchi Jehovaman guelicuptinchi?

¹⁹ Chuscu caj, Jehovatami más cuyashun. Y cayga imawanpis manami igualanchu. Jehovata cuyarga paytami cäsucushun, shonguntami cushichishun y ima pruebacunatapis aguantashun (Mat. 22:37-39; 1 Cor. 13:4, 7; 1 Juan 5:3). Taytalanchi Jehovawan amigo cashpanchega mana imawanpis tincunchu (Sal. 63:1-8).

20. ¿Imatataj ruranquiman Jehovaman más guelicunayquipaj?

²⁰ Cayta ama gongashunchu: mañacuptinchi, Bibliata estudiaptinchi y yachacushganchiman yarpachacuptinchega Jehovata aduraycanchi. Jesusnopis bulla mana cashgan sitiucunata ashishwan Jehovata mañacunapaj y paypita yachacunapaj. Jina Bibliata leicuptinchi o reuniuncho caycaptinchega Jehovata mañacushun yanapämänanchipaj shumajla yachacunapaj, chaynopa juc ruraycunaman mana yarpachacunapaj. Cay lapancunata ruranapaj tiempunchita shumaj camacächiptinchega, Taytalanchi Jehová canan bendecimäshun y shamoj tiempuchoga imaycamapis cawashun (Mar. 4:24).