1. ¿Imacunaraycurtaj öraga manchacushwan?

 LAPANCHIMI imaylapis manchacushcanchi, pero Bibliacho yachacushcanchi wanushgacunata, supaycunata y ima pasananpaj cajcunatapis mana manchacunapaj. Chayno captinpis entero munducho ricanchi guerracunata, fiyu ruraycunata, gueshyacunata y manchacuypaj cajcuna pasaycashgantapis (Luc. 21:11). Chaypitapis manchacushwanchi gobiernucunata, familianchicunata y waquin Diospa contrancho churacajcunatapis. Waquincunaga manchacärin imayca pruebacunapa pasar mana aguantananpaj cajta yarpar.

2. ¿Imataj pasargan David Gat marcaman chayaptin?

² Davidpita parlarcushun, paypis öraga manchacurganmi Saúl wanuchinanpaj gaticachaycaptin. Davidga Gat marcaman gueshpir aywacurgan pacacunanpaj. Pero Gat marcapa Reynin Akista cayno wilargan ‘achca runacunata wanuchej Davidmi caycho caycan’ nir, chayta mayar David alapami manchacurgan (1 Sam. 21:10-12). Payga yarparganchi rey Akís wanuchinanpaj cajta. ¿Imataj David rurargan manana alapa manchacunanpaj?

3. Salmo 56:1-3, 11 textucuna nishganno, ¿imataj Davidta yanapargan alapa manana manchacunanpaj?

³ Salmo 56 capitulucho David wilacun Gat marcacho caycar imano ricacushganta. Chaycho nimanchi imanir pay alapa manchacushganta y imano Jehovaman yäracushgan  yanapargan alapa manana manchacunanpaj (leiriy Salmo 56:1-3, 11). Jehovapa yanapacuyninwan Akispa naupancho David loco tucurgan, y chay rurashganga alipämi cargan. Rey Akís Davidta manana cäsupargannachu. Chauraga David gueshpicurgan (1 Sam. 21:13–22:1).

4. ¿Imata rurartaj Jehovaman masraj yäracushwan? Tantiachicamuy.

⁴ Jehovaman yäracushganchimi noganchitapis yanapämäshun manana manchacunapaj. Chauraga ¿imata rurartaj Jehovaman masraj yäracushun? Cayman yarpäshun, pasaypa fiyu gueshyawan caycashganchita nimaptinchega alapachi manchacushun. Pero ali doctorpa maquincho caycarga alapaga manachi manchacushunnachu. Chay doctorga unaycho fiyu gueshyawan caj runacunata yanapashganta musyarga masrächi cushicunchi. Cuyacuywan wiyarcamashpanchi jampicunatapis gomanchi aliyarcunapaj. Chaynolami Jehovaman masraj yäracushun unaycho sirvejnincunata imano yanapashganta yarpar, canan wichan imano yanapaycämashganchita ricar y shamoj tiempucho imano yanapämänanchipaj cajta musyar. Chayno yäracushganpitami David Salmo 56 capitulucho wilacun. Chay capitulupa waquin versiculuncunata leir yachacushun imanotaj Jehovaman masraj yaracuptinchega yanapämäshun alapa manana manchacunapaj.

¿IMATAJ UNAYCHO JEHOVÁ RURARGAN SIRVEJNINCUNARAYCUR?

5. ¿Imacunamantaj Davidga yarpachacurgan manana manchacunanpaj? (Salmo 56:12, 13).

⁵ Davidpa cawaynin peligrucho caycaptinpis, payga yarpachacurgan Jehová unaycho imano yanapashganman (leiriy Salmo 56:12, 13). Davidga chaytami ruraj lapan cawaynincho, jina Jehová camashgancunamanpis yarpachacojmi, chayta rurarga yarpaj Jehová poderoso cashganman y alapa runacunata cuyashgantapis (Sal. 65:6-9). Waquincunata imano yanapashganmanpis yarpachacojmi (Sal. 31:19; 37:25, 26). Jina, quiquintapis wamralapita imano cuidashganman y yanapashganmanpis  yarpachacoj (Sal. 22:9, 10). Chayno rurashgancuna Davidta yanapargan lapan shongunwan Jehovaman masraj yäracunanpaj.

6. Manchacushpanchi hora, ¿imataj yanapämäshun Jehovaman yäracunapaj?

⁶ Gampis manchacushpayqui öraga yarpachacuy unaycho Jehová lapan rurashgancunaman. Pay camashgancunata ricaptiqui, yarpachacunquiman pishgucunata o avicunata y waytacunata imano cuidashganta, chayta rurarga Jehovaman masraj yäracunqui imaypis yanapäshunayquipaj (Mat. 6:25-32). Jina yarpachacuy sirvejnincunata Jehová imano yanapashganta. Chaypäga Bibliacho yachacuy unaycho Jehova sirvejnincunaraycur imata rurashganta y canan wichanpis imacunata ruran. a Nircur quiquiquitapis Jehová imano yanapäshushgayquiman yarpachacuy. ¿Imanotaj yanapäshushcanqui paypita yachacunayquipaj? (Juan 6:44). ¿Imanotaj mañacuyniquicunata contestargan? (1 Juan 5:14). Jesús gamraycur wanushganpita, ¿ima alicunatataj tarishcanqui? (Efes. 1:7; Heb. 4:14-16).

7. Profeta Daniel imapa pasashganga, ¿imanotaj Vanessa cristianata yanapargan?

⁷ Ricärishun Haití naciunpita Vanessa b jutiyoj cristiana imapa pasashganta. Marcanpita juc runashi paywan cacuyta munar cada junaj celularpa gayaj y mensajitapis mandarganshi. Y Vanessa mana munaptinshi chay runaga pasaypa ashlipar galaycurgan y wanuchinanpäpis jurapargan. ¿Imataj Vanessa rurargan alapa mana manchacunanpaj? Payga imaycata rurargan cuidacunanpaj, y juc ancianupis yanapargan policiacunata wilananpaj. Jina yarpachacurgan unaycho sirvejnincunata Jehová imano yanapashganmanpis. Pay nin: “Yarpargä imano Jehová Danielta yanapashganta juchaynaj caycaptinpis leuncuna caycashgan uchcuman gaycushga captin. Jehovata nergä lapantana ruranäpaj calpachacushgäta y yanapämänanpaj ruwacurgä. Chaura manana manchacurgänachu” (Dan. 6:12-22).

¿IMATAJ RURAYCAN JEHOVÁ CANAN SIRVEJNINCUNARAYCUR?

8. ¿Imatataj Davidga musyargan? (Salmo 56:8).

⁸ Gat marcacho caycar Davidpa cawaynin peligrucho caycaptinpis, manami manchacuycarlachu caycargan. Chaypa trucan payga yarpargan chaycunapa pasaycaptin imata Jehová payraycur ruraycashganta yanapänanpaj. Y cuentata gocurgan Jehová imapitapis chapaycashganta y imano sienticushgantapis musyaycashganta (leiriy Salmo 56:8). Amiguncuna sumo sacerdote Ahimélec y Jonatanpis shacyächergan (1 Sam. 20:41, 42; 21:6, 8, 9). Rey Saúl wanuchiyta munaptinpis Davidga salvacurganmi. Payga musyarganmi Jehová ricaycashganta imano sienticushganta y imacunapa pasaycashgantapis.

9. ¿Imapitataj Jehová altanto caycan?

⁹ Gampis sasacunapa pasaycaptiqui manchacuycarga, ama gongaychu Jehová altanto caycan imacunapa pasaycashgayquipita y imano sienticushgayquipitapis. Egiptucho israelitacuna esclavuno carcaycaptin Jehová ricargan fiyupa laquicur nacarcaycashganta (Éx. 3:7). Juc cuticho Davidpis Jehovata cantapar nergan “imano lakikuykashqätapis rikamashqanki” nir (Sal. 31:7). Y tiempuwan  israelitacuna mana alicunata decidishganraycur nacaptinmi “Tayta Diospa shonqunpis fiyupa nanarqan” (Is. 63:9). Chauraga Jehová musyanmi manchacushpanchi hora imano sienticushganchita, y yanapämänanchitapis munan manana manchacunapaj.

10. ¿Imanirtaj yäracushwan Jehová imaypis yanapämänanchipaj?

¹⁰ Laquicuycunapa pasarga capaz öraga cuentata gocunchichu imano Jehová yanapaycämashganchita. Chaymi mañacuyninchicho Jehovata nishwan yanapämänanchipaj noganchiraycur ruraycashganta ricanapaj (2 Rey. 6:15-17). ¿Yarpanquichu maygan discursulapis o pilapis reuniuncho comentashgan shacyächishushgayquita? ¿Ima publicaciunlapis, videupis o canciunpis yanapäshushcanquichu? ¿Maygan hermanulapis Bibliawan calpata goshushcanquichu? Cay tapucuycunaman yarpachacurga alapa alimi canga. Jehová amatar cuyamashpanchimi cuyacoj hermanunchicunawan y palabran Bibliawanpis yanapämanchi, chaymi sasacunapa pasarga chaycunata ama gongashwanchu (Is. 65:13; Mar. 10:29, 30). Jehová chay lapanta ruran noganchiraycur alapa yarpachacur, chaymi paylaman yäracunanchi (Is. 49:14-16).

11. ¿Imataj Aida cristianata yanapargan manana manchacunanpaj?

¹¹ Senegal naciunpita Aida jutiyoj cristiana sasacunapa pasaycaptinshi ricargan Jehová imano yanapaycashganta. Taytanwan mamanga shuyararganshi Aida achca guellayta gänaycur paycunata manteninanpaj. Pero payga precursorano yanapacuyta munar walca guellaylatash gänaj, y chayraycur familianga pasaypashi rabiacurgan. Aida cayno wilacun: “Manchacurgämi waquincuna jamurpämänanta, y ‘cananga imanotaj familiäta yanaparcushaj’ nirpis yarpargä. Jehovatapis culpargä lapan pasaycämashganpita”. Pero juc discursucho wiyashganshi alapa shacyächergan. Pay nin: “Discursamoj hermanuga nergan Jehová ricaycashganta shongunchicho alapa laquicuycashganchita. Nircur ancianucunapis waquin hermanucunapis yarpächimargan  Jehová cuyamashganta, chayta wiyar alina ricacurgä. Jina cutin cutin mañacushgäcunata Jehová contestamashganta ricar más jaucalana ricacurgä”. Tiempuwanga juc ali trabajuta tarishganshi yanapargan precursora cananpaj, taytanwan mamanta y waquincunatapis yanapänanpaj. Aida nin: “Yachacurgä Jehovaman lapan shongüwan yäracunapaj. Y mañacuptëga manchacuynëpis ilacan”.

¿IMATAJ RURANGA JEHOVÁ SHAMOJ TIEMPUCHO SIRVEJNINCUNARAYCUR?

12. Salmo 56:9 texto nishganno, ¿imanirtaj Davidga Jehovaman yäracurgan?

¹² ¿Ima mastataj David rurargan mana manchacunanpaj? Yarpachacurgan shamoj tiempucho payraycur imataj Jehová rurananpaj (leiriy Salmo 56:9). Payga musyargan Jehová imapitapis salvananpaj, Jehová aunishga cargan David Israelcho rey cananpaj, chaymi yäracurgan imapitapis chapänanpaj (1 Sam. 16:1, 13). Jina Davidga musyarganmi Jehová imatapis auniptin cumplishganta.

13. ¿Imataj Jehová ruranga shamoj tiempucho?

¹³ Jehovaga manami aunimashganchichu canan wichan problemanchicunata ilacächinanpaj. c Pero canan imayca mana alicunapa pasaycarpis ama gongashwanchu Jehová aunimanchi mushoj Pachacho chay lapancunata ushacächinanpaj (Is. 25:7-9). Pay alapa poderyoj captin wanushgacunata cawarachimunga, gueshyaycajcunata aliyächenga y chiquimajninchicunatapis ushacächenga (1 Juan 4:4).

14. ¿Imamantaj yarpachacushwan?

¹⁴ Manchacushpayqui hora yarpachacuy shamoj tiempucho cawacuy imano cananpaj cajman. Satanasga ilgächishga canga, fiyu runacunapis canganachu, may chaychopis ali runacunala canga y juchaynajmanpis ticrashun. 2014 wata jatun asambleacho juc actuaciuncho ricashganchi imano yarpachacunapaj shamoj tiempuman. Chaycho juc hermano familianwan 2 Timoteo 3:1-5 textupita parlar yarpachacurgan Paraisucho runacuna imano cananpaj cajman: “Shamoj tiempucho runacuna nacanganachu. Runacunaga runa masinta y Jehovapa cajcunata cuyanga, mana ali tucoj, humilde, Diosta respetaj, taytanta y mamanta cäsucoj, agradecicoj y mana jaguicoj, familianta cuyaj, mana tumpacoj, waquincunapita alita parlaj, geniunta controlacoj, alilata ruraj, confiacuypaj, tantiacoj, mana runa tucoj, imapitapis masga Diosta cuyaj y mandashgancunata ruraj. Chayno runacunawanmi juntacashwan”. ¿Noganchipis parlacunchichu familianchiwan o hermanucunawanpis Paraisucho caway imano cananpaj cajpita?

15. ¿Imataj Tanja cristianata yanapargan manana manchacunanpaj?

¹⁵ Macedonia del Norte cajpita Tanja cristianaga, Jehová aunishgancunaman yarpachacur mana manchacunnachu. Bibliapita yachacuyta galaycuptinshi taytan mamanwan pasaypa rabiacärergan. “Reuniuncunapita cutimuptë mamänëga magamajmi. Y ishcancuna jurapämargan wanuchimänanpaj Jehovapa testigunman ticraptë”, chayno nin Tanja. ¿Imataj rurargan wasinpita garguriptin? Cayno nin: “Yarpachacurgä ima captinpis Jehovata sirviptëga imaycamapis cushishga cawacunäpaj. Y canan wichan imaycäcunata ograshgäcunapitapis Jehovaga masrämi gomanga, y lapan päsamashgancunatapis  manana yarpashänachu”. Tanja cristianaga Jehovata cachaycurganchu y maycho tiyananpäpis tarergan. Cananga Diosta cuyaj cristianuwan casaracushga, y ishcancuna lapan tiempunwan sirvircaycan.

CANANLAPITA JEHOVAMAN MASRAJ YÄRACUSHUN

16. Lucas 21:26-28 profecía cumplicuptin, ¿imaraj yanapämäshun alapa mana manchacunapaj?

¹⁶ Jatun nacay galaycuptin, runacunaga alapa manchacuypita chiyacäconga. Noganchi ichanga cushishga y ali caycäshun (leiriy Lucas 21:26-28). Jehovaman yäracushganchiraycurmi imapitapis mana manchacushunnachu. Tanja cristiana ima pasashgancuna yanapargan ima nacaycunatapis aguantananpaj. Payga nin: “Cuentata gocushcä ima nacaycunapa pasaptinchi Jehová yanapämanchi y bendicimanchi. Öraga waquincunaga yarpapäcunman maquincho caycashgancuna lapanta rurananpaj, pero paycunaga imaycatapis ruran Jehová permitiptilanmi. Ama gongashunchu ima sasa problemacuna captinpis ushacajlami caycan”.

17. ¿Cay watapaj textuga imanotaj yanapämäshun? (Garancho caycaj fotutapis ricay).

¹⁷ Cay munducho pasaypa mana alicunata ricarga, Davidno manchacuycarlaga caycäshunchu. 2024 watapaj texto caycan David cayno nishganmi: ‘Tayta Dios, manchacushpäga qammanmi yärakamü’ (Sal. 56:3). Cay textupita parlarmi juc libro cayno nergan: “Davidga manchacunanpaj trucan Dioslamanmi yäracurgan salvananpaj cajta”. Chaymi sasacunapa pasaycaptiquega ama gongaychu cay watapaj acracämushga textuta. Tiempuyquitapis jorgurir yarpachacuy Jehová sirvejnincunaraycur unaycho imata rurashganta, canan wichan y shamoj tiempuchopis imata rurananpaj cajman. Chayta rurarga Davidno Jehovata cayno nishun: “Qamman yärakurmi pitapis mana mantsakütsu” (Sal. 56:4).