1. ¿Jehová imano cashgantataj yarpanqui?

 ¿IMAYLAPIS yarpachacushcanquichu Jehová imano cashganta? Payta mana ricarpis, Bibliaga shumaj tantiachimanchi imano cashganta. Payga “escüduno imaykapitapis tsapämantsi” y ‘imatapis nina rupar ushajnomi’ caycan (Sal. 84:11; Heb. 12:29). Profeta Ezequielpis juc visiuncho ricargan Jehová zafiro rumino cashganta, broncino chipchipyaycajta y turmanyano achicyaycajta (Ezeq. 1:26-28). Chayno Jehová cashganman yarparga, öraga almiracur manchacushwanpis.

2. ¿Imanirtaj waquincunaga creipäcunchu Dios paycunata cuyashganta?

² Jehovata mana ricarga capaz öraga sasami canman creinapaj pay cuyamashganchita. Y caway vidanchicho taytaynaj winashga carga, yarpashwanchi Jehovapis mana cuyamashganchita. Pero Jehová musyanmi imano cawayninchi cashganta y imano ricacushganchitapis. Chaymi cuyamashpanchi Palabrancho musyachimanchi imano cashganta.

3. ¿Imanirtaj Jehová cuyacoj cashganpita yachacushun?

³ Bibliaga nimanchi Jehová cuyacoj cashganta (1 Juan 4:8). Paypa cuyacuyninga alapa jatunmi, chaymi cuyamashpanchi ali runacunapaj y mana ali runacunapäpis imaycata ruran (Mat. 5:44, 45). Canan yachacunapaj cajcho ricashun Jehová cuyacoj cashganta. Paypita masraj yachacurga masrämi cuyaycushun.

JEHOVÁ AMATAR CUYAMANCHI

4. ¿Imanotaj ricacunqui Jehová cuyacoj cashganta musyar? (Fotutapis ricay).

⁴ Jehovaga alapami cuyamanchi (Sant. 5:11). Bibliachoga nimanchi Jehovaga juc cuyacoj mamano cashganta  (Is. 66:12, 13). ¿Ricashcanquichu juc cuyacoj mama imata rurashganta? Wamranta cuyashpan margacurcun o melgaynincho churarcur cuyapaylapa parlapan. Itin wagaptin o imalanpis nanaptenga rasla imatapis ruran yanapänanpaj. Chaynolami Diosninchi Jehovapis laquicushganchi hora manami imaypis jaguimanchichu. Chaymi salmucunata guelgaj o escribej juc runa cayno nergan: “Pasaypa lakishqa kaykaptïmi imaypis shakyätsimashqanki” (Sal. 94:19).

5. ¿Ima nishwantaj Jehovapa cuyacuyninpita?

⁵ Jehovaga manami cacharimanchichu (Sal. 103:8). Pantarcuptinchipis jinala cuyamanchi. Israelitacuna cutin cutin juchata ruraycur arrepenticuptin Jehovaga jinalami cuyargan. Chaymi juc cuticho paycunata cayno nergan: “Qamkunata pasaypami kuyä. Imaykapitapis masmi välipäkunki” (Is. 43:4, 5). Chaynolami noganchitapis Jehová amatar cuyamanchi. Jatun juchata rurarpis shongupita arrepenticuptinchi y yanapacuyninta ashiptinchega jinala cuyamäshun. Payga aunimanchi imaypis perdunamänanchipaj (Is. 55:7). Bibliaga nin Jehová perdunamaptinchega cushishgana cawacushun (Hech. 3:19).

6. ¿Imataj yachacunchi Jehovapita Zacarías 2:8 textucho?

⁶ (Leiriy Zacarías 2:8). Jehovaga nin sirvejnincunaga ñawinpa ñiñunno o ruyrunno cashganta. Ñawinchega alapa delicado y valuryojmi. Chaymi ima mana alicuna pasamaptinchega, Diosninchi cayno nimashganchino caycan: “Pilapis mana alicunata rurashuptiquega ñawïpa ñiñunta togriycashgannomi caycan” nir. Payga pasaypa cuyacoj car imapitapis chapämänanchita munan, imapis laquichimaptinchega paypis laquicun. Chaymi Jehovata cayta nishwan: “Nawi ñiñuykitano imapitapis tsapaykalämay” (Sal. 17:8).

7. ¿Imanirtaj quiquinchi convencicushwan Jehová cuyamashganchipita?

⁷ Diosnilanchi Jehovaga munan quiquinchi convencido caycänapaj amatar cuyamashganchita. ¿Imanir? Öraga cawayninchicho imacunapa pasashganchicuna y canan wichan problemacunapa pasarpis capaz dudashwanmi Pay cuyamashganchipita.  Chaura, ¿imataj yanapämäshun mana gonganapaj Jehová cuyamashganchipita? Chaypäga ricärishun imanotaj Jehová ricächicun cuyacoj cashganta Jesuswan, cielupaj acrashgacunawan y noganchiwanpis.

JEHOVÁ RICÄCHICUN CUYACOJ CASHGANTA

8. ¿Imanirtaj Jesús convencido caycargan Taytan cuyashganpita?

⁸ Jehovawan Jesusga chaychica watacuna junto caycargan. Chaymi alapa cuyanacärin, paycunanoga manami pipis canchu. Mateo 17:5, textucho Jehová Jesusta nergan cuyashganta. Payga manami nirganlachu “Paypitami kushishqa kaykä”, sinoga waquincunata musyachicuyta munargan wamranta alapa cuyashganta, chaymi nergan: “Payqa kuyay tsurïmi” (Efes. 1:7). Jesusga yarpaylapis yarparganchu Taytan Jehová mana cuyashganta, chaypa trucan payga imaypis convencido caycargan Jehová alapa cuyashganpita (Juan 3:35; 10:17; 17:24).

9. ¿Imanotaj Jehová musyachicun cielupaj acrashgacunata cuyashganta? (Romanos 5:5).

⁹ Jehovaga cielupaj acrashgacunatapis cuyayculanmi (leiriy Romanos 5:5). Bibliachoga nin Jehová paycunata alapa cuyashpan espiritunta cachamurgan. Chaymi alapa cushicunchi cielupaj acrashgacunata Jehová cuyashganta musyar. Quiquincunapis musyapäcun Jehová paycunata amatar cuyashganta (Jud. 1). Jucnin jucnincunapis apóstol Juan nishganno nipäcun: ‘¡Tayta Dios pasaypami kuyamantsi! “Wamräkunami karkaykanki” nimantsi’ (1 Juan 3:1). Chaura, ¿cielupaj acrashgacunalatachuraj Jehová cuyan? Manami, payga lapan sirvejnincunatami cuyamanchi.

10. ¿Imataj Jehová rurash alapa cuyamashpanchi?

¹⁰ Jehová amatar cuyamashpanchi cuyashga wamranta cachamurgan noganchiraycur wanunanpaj. Paynoga manami pipis cuyamanchichu (Juan 3:16; Rom. 5:8). Jehovaga cuyaynin Churinta cachamurgan wanunanpaj, chaynopa juchanchicunapita perdunamananchipaj y amigunman ticranapaj (1 Juan 4:10). Jehovawan Jesús noganchiraycur rurashgantaga manami pipis ruranmanchu cargan, chaymi paycuna rurashganman shumaj yarpachacurga tantiashun alapa cuyamashganchita y masraj cuyaycushun (Gál. 2:20). Jehovaga Jesusta manami cachamurganchu ley ima nishganta cumpliyta munarlachu, sinoga cuyamashpanchimi. Payga jaguirgan cuyashga Wamranta nacananpaj y noganchiraycur wanunanpaj.

11. ¿Imataj yachacunchi Jeremías 31:3 textupita?

¹¹ ¿Imataj yachacushcanchi caycama? Mana alicunapa pasar laquicuptinchega, Jehovapis laquicunmi. Payga tucuynopa musyachimanchi cuyamashganchita (leiriy Jeremías 31:3). Cuyamashpanchimi marcanmanpis pushamashcanchi (Deuteronomio 7:7, 8 textucunawan tincuchiy). Pipis ni imapis Jehovapita raquichimäshunchu (Rom. 8:38, 39). Cay lapanta musyarga, ¿imanotaj ricacunqui? Cananga yachacushun Salmo 23 cajpita. Caycho ricashun Jehová alapa cuyashganta musyar David imano ricacushganta y gamtapis imano yanapäshunquiman.

¿IMANOTAJ RICACUNQUI JEHOVÁ AMATAR CUYASHUPTIQUI?

12. ¿Imapitaj parlaycämun Salmo 23 caj capitulucho?

¹² (Leiriy Salmo 23:1-6). Salmo 23 caj capitulucho David wilacun Jehová alapa cuyashpan imano cuidashganta. David nergan Jehová michicojnin cashganta y payman yäracushganta. Chayta musyar David jaucala cawacurgan, imaypis payman guelicoj. Davidga  musyarganmi wanunanyaj sirviptenga Jehová imaypis yanapänanpaj. Ricärishun imanir David chayno ricacushganta.

13. ¿Imanirtaj David musyargan Jehová cuidananpaj cajta?

¹³ “Manami imapis pishïmantsu”. David cawaynincho ricargan lapan imaycancunata o necesitashgancunata Jehová camaripashganta. Jina musyarganpis Jehová ali amiguntano ricashganta y paywan cushishga caycashgantapis. Chaymi payga seguro caycargan imacunapa pasaptinpis imaycancunata Jehová camaripänanpaj cajta. Laquicuynincuna captinpis Jehová amatar cuyashganmanmi más yarpachacurgan, y chayraycur alila y cushishgapis cawacurgan (Sal. 16:11).

14. ¿Imanotaj Jehová musyachimanchi cuyamashganchita?

¹⁴ Imayca sasacunapa pasaptinchi Jehová cuyamashpanchi masraj cuidamanchi. Clara a cristianata ima pasashganta ricashun, payga 20 watapita masna Betelcho yanapacuycan. Payshi alapa laquicurgan familiancho imayca sasacunapa pasashganpita, taytantash infarto cerebral charirgan, juc nanantash congregaciunpita gargurgan, familianpa negociun ushacargan y wasintapis guechurganshi. ¿Imanotaj Jehová paycunata cuidargan? Clara nin: “Taytalanchi Jehovaga familiä junaj junaj lapan necesitashgancunata camaripashga. Noga yarpashgäpitapis masrämi cashga. Imaypis manami gongashächu Jehová amatar cuyamashpan lapan rurashganta. Chaycunaman cada cadala yarpachacuptëga yanapaman ima mana alicuna captinpis”.

15. ¿Imataj David rurargan calpan yapay yurinanpaj? (Dibujutapis ricay).

 ¹⁵ ‘Calpatapis paymi goman’. Imayca sasacunapa pasarmi Davidga laquicurganmi (Sal. 18:4-6). Pero Jehová juc taytano alapa cuyashganta ricar, Davidpa calpanpis yapay yurirgan. Y Jehová amigun cashganta musyar, nergan “ali qewakunachömi mitsiman. Chuya yakumanmi pushaman” nir. Chaynopa calpatapis yapay tarirgan Jehovata cushishga sirviycänanpaj (Sal. 18:28-32).

16. ¿Imanotaj Jehová calpayquita yapay yurichergan?

¹⁶ Noganchipis sasacunapa pasarga cayno nishwan: “TAYTA DIOSQA imaypis kuyamantsimi. Kuyapäkuq kashqanqa manami ushakantsu” (Lam. 3:22; Col. 1:11). Rachel jutiyoj cristianaga alapashi laquicurgan pandemia wichancho runan Jehovata y paytapis jaguiriptin. ¿Imataj rurargan Jehová yanapänanpaj? Rachel nin: “Jehová yanapämashga cuyashga ricacunäpaj. Achca hermanucuna wasëman shamoj yanagamänanpaj japalä mana caycänapaj. Micuynëtapis apapäcamaj, mensajicunatapis guelgapäcamaj o escribipäcamaj cushircachimänanpaj, imaypis yarpachipäcamaj Jehová cuidaycämashganta. Jehovata cutin cutin ‘gracias’ nëmi marcancho familiä japuytano cuyacoj hermanucunata tarishgäpita”.

17. ¿Imanirtaj David nergan: ‘Manami manchacüchu’?

¹⁷ ‘Gam imaypis yanagaycämanquimi, manami manchacüchu’. Davidpäga achca chiquejnincuna caycargan y wanuchiytapis munargan. Pero Jehová alapa cuyashganta musyar seguro caycargan imapitapis chapänanpaj. Jehová ladulancho imaypis caycashgantano ricacurgan. Chaymi cayno nergan: “Mantsariptïpis paymi valorta qomashqa” (Sal. 34:4). Davidpa cawaynin cutin cutin peligrucho caycaptin, payga Jehová alapa cuyashganman más yarpachacurgan, chaymi manchacuyninpis aywacurgan.

18. Imayca sasacunapa pasar manchacurga, ¿imanotaj Jehová musyachimanchi cuyamashganchita?

¹⁸ Noganchipis imayca sasacunapa pasar manchacurga, ¿imanotaj yanapämanchi Jehová cuyamashganchita musyar? Susi jutiyoj cristiana wilacun runanwan imano sienticushganta wamran cawayninwan ushaptin, Susi nin: “Quiquin wamrayqui cawayninwan ushaptenga pasaypa laquicuypämi, ima ruraytapis musyanquichu. Pero Jehová amatar cuyamashganchiraycur imaycanopapis cuidamashcanchi y calpatapis gomashcanchi  aguantanapaj”. 16 caj parrafucho parlashganchi Rachel cristianapis cayno nin: “Juc chacaycho pasaypa laquishga y manchacashga ricacurmi Jehovata wagapalanpa ruwacurgä yanapämänanpaj. Jinan hora imano juc mama wamran wagaptin margarcun shogananpaj, chayno Jehová nogawan ruraycashgantano ricacurgä. Nircurna jaucala punucurgä, chay hora Jehová imano yanapämashgantaga manami imaypis gongashächu”. Juc anciano Tasos jutiyoj carcelcho chuscu wata wichgarashga caycargan ejercituman aywananpaj niegacushganpita. Payga wilacun imano Jehová cuyacuywan cuidashganta, nin: “Lapan necesitashgäcunata camaripämashga, y yanapämashga payman masraj yäracunäpaj. Poderninwan yanapämashga jaucala ricacunäpaj carcelcho wichgarashga caycaptëpis, chaynopa ricargä alapa cuyamashganta. Chaymi preso caycarpis precursor regularno yanapacur galaycurgä”.

CUYACOJ DIOSNINCHIMAN GUELICUSHUN

19. 1) Jehová cuyamashganchita musyar, ¿imanotaj mañacunanchi? 2) ¿Maygan textucunataj Jehová cuyacoj cashganpita shonguyquiman chayan? (“ Textucuna Jehová amatar cuyamashganchipita” recuadruta ricay).

¹⁹ Näga hermanucuna wilacushgancuna ricächimanchi Jehová cuyacoj cashganta (2 Cor. 13:11). Payga jucninchi jucninchipaj yarpachacun. Payman “yärakuq runakunataqa Tayta Diosmi kuyapar” yanapan (Sal. 32:10). Cada cadala yarpachacuptinchi Jehová cuyamashganchita, rasunpa Taytanchitano ricar payman masraj guelicushun. Chaymi shongunchita mashtapar mañacuyninchicho nishwan cuyaycalämananchipaj. Paytaga wilapashwan lapan laquicuyninchicunata y seguro caycashwan tantiamänanchipaj y yanapämänanchipäpis (Sal. 145:18, 19).

20. ¿Imanirtaj Jehová cuyacoj captin payman masraj guelicunchi?

²⁰ Imanomi gasaycho tulpapa ladunman witircunchi goñurcachimananchipaj, chaynolami Jehovamanpis ashuycushwan o guelicushwan imaypis cuyamänanchipaj. Jehovapa cuyacuyninga alapa jatunmi, y alapa cushicurculanchi Jehová amatar cuyamaptinchi. Chaymi noganchipis nishwan: ‘Jehovata pasaypa kuyä’ (Sal. 116:1).