1, 2. ¿Imacunapataj öraga Jehovapa sirvejnincuna pasanman?

 CAWAY vidachoga ilajpita imapis pasamashwan. Ricashun waquincunata pasashganta. Luis a jutiyoj hermanuta juc doctor nergan fiyu cancerwan caycashganta, y walca quillacunala cawananpaj. Monika cristianaga cushishga Jehovata sirvircaycargan ancianuno yanapacoj runanwan, pero juc junajshi mayargan runan achca watacunapa juc warmiwan engañaycashganta. Japalan caycaj Olivia cristianana huracán shamunanpaj cajta musyar wasinta jaguirir jucla gueshpicurgan. Cutimurnashi wasin pasaypa talmacashgata o juchucashgata tarirgan. Chay lapancunaga ilajpitami pasargan. ¿Gamtapis chayno imalapis pasashushcanquichu?

² Jehovapa siervuncunaga waquin runacunanomi imayca problemacunapa pasanchi y gueshyanchipis. Jina Diosta sirvishganchiraycur chiquishga o mana ali ricashgapis canchi. Chay lapancunapita Jehová mana libramaptinchipis, pay aunimashcanchi yanapämänanchipaj (Is. 41:10). Chaymi ima captinpis, paypa yanapacuyninwan cushishga sirvinchi, ali cajcunata decidinchi y pasaypa mana alicunapa pasarpis paypitaga raquicanchichu. Canan yachacushun imanotaj Jehová yanapämanchi imayca mana alicunapa pasaptinchi. Jina ricashun imatataj rurashwan Jehovapa yanapacuyninta chasquinapaj.

JEHOVÁ IMAPITAPIS CHAPÄMÄSHUNMI

3. Problemacunapa pasarga, ¿ima ruranapätaj sasa canman?

³ Ima laquicuycunapa pasaptinchega, öraga sasami canman shumaj yarpachacunapaj y ali cajcunata decidinapaj.  Laquicushganchi horaga shongunchipis alapa nananraj y imayca yarpachacuycunalawan caycar musyanchichu imata ruranapaj cajtapis. Chaynomi punta caj parrafucho parlashganchi cristianacuna sienticurgan. Olivia cayno wilacun: “Huracanraycur wasë juchucashgata ricar pasaypa laquicur ogracashgano ricacurgä”. Runan engañashganpita parlar, Monika cayno nergan: “Shongü ishcayman rachicashgano ricacurgä. Pipis shongüta imawanpis tucsiycamashgantano nanämargan. Wasëcho caycaj ruraynëcunatapis ruranäpaj camäpacurgächu. Runä traiciunamänantaga manami imaypis yarpargächu”. ¿Imataj Jehová aunimashcanchi noganchiraycur rurananpaj laquicuycunapa pasaptinchi?

4. Filipenses 4:6, 7 textucho, ¿imataj aunimanchi?

⁴ ¿Imataj Jehová ruran? Payga Bibliacho aunimanchi yanapämänanchipaj jaucala o tranquilo caycänapaj (leiriy Filipenses 4:6, 7). Y chaynoga ricacushun Jehovawan ali amigo captinchiraj. Aumi, payman yäracurga mana yarpachacuycarla y mana laquicuycarla cawacushun. Jehová jauca cawayta gomaptinchega, cushishga y alina cawacunchi. ¿Imaylapis lapan shonguyquiwan Jehovata mañacurcur cuentata gocushcanquichu jaucala o tranquilo ricacushgayquita? Chayno captenga, Jehovami yanapäshushcanqui chayno ricacunayquipaj.

5. ¿Imanotaj Jehová cuidan yarpayninchita y shongunchita?

⁵ Jehová imano yanapämashganchipita parlar, Filipenses 4:7 nin: “Paymi shonquykitapis yarpaynikitapis cuidanqa”. Cay textucho “cuidanqa” nishgan palabraga yarpächimanchi unaycho soldaducuna juc marcata imano täpashganta chiquejnincuna mana atacananpaj. Soldaducuna chay marcata täpaycashganta musyar runacunaga tranquilula o jaucala punucärin. Chaynolami Diosninchipis shongunchita y yarpayninchita cuidaptenga jaucala ricacunchi (Sal. 4:8). Ima laquichimashganchicuna jucla o rasla mana alchacaptinpis, alapa yarpachacuycarla manami caycanchichu, sinoga Ana ricacushganno jaucala ricacunchi (1 Sam. 1:16-18). Chayga yanapämanchi shumaj yarpachacurcur-raj imatapis ali decidinapaj.

6. ¿Imataj rurashwan jaucala caycänapaj? (Fotucunatapis ricay).

⁶ ¿Imataj rurananchi? Imanomi juc marcapita runacuna soldaducunata mañacunman marcanta täpananpaj, chaynolami noganchipis Jehovata mañacunanchi chapämänanchipaj. Cutin cutin mañacushpanchega Jehová yanapämäshun jaucala ricacunapaj  (Luc. 11:9; 1 Tes. 5:17). Chaytami Luis y warmin Anawan rurargan doctorcuna wilapaptin walca tiempula cawananpaj. Luis nin: “Cáncer gueshyawan caycashgayquita nishuptiquega, manami musyanchichu ima ruraytapis ni ima tratamientuta chasquiytapis. Pero mana yamacaypa Diosta mañacuptinchega jaucala ricacunchi, y mana yarpachacuycarla caycanchichu”. Luiswan Anaga cutin cutinshi shongunta mashtapar Jehovata ruwacurgan yanapänanpaj, shongunta, yarpaynintapis cuidananpaj y yachaytapis gonanpaj ali decisiuncunata acrananpaj. Lapan mañacushgancunatash Jehová contestargan. Gampis chaypa pasaycaptiquega, cutin cutin Jehovata mañacurcuy. Chayta ruraptiqui, quiquiqui ricanqui imano Jehová yanapäshushgayquita jaucala caycänayquipaj, shonguyquitapis y yarpayniquitapis cuidashganta (Rom. 12:12).

JEHOVAPA YANAPACUYNINWANGA YARPACHACUYCARLA CAYCÄSHUNCHU

7. ¿Imanoraj ricacushwan sasacunapa pasaptinchi?

⁷ Imayca sasacunapa pasarga alapa yarpachacuylawan caycar, öraga lutanta yarpar imatapis rurayta galaycushwanchi. Imanomi pulchachaycaj lamarcho juc barco wacpa caypa tunicuyta o ishquiyta munan, chaynomi öraga ricacushwan. Luis wanucuptin, chaynoshi warmin ricacurgan. Pay wilacun: “Öraga quiquëpitami laquicoj cä. Ladücho Luis mana caycaptinna rabiashgapis sienticurgä”. Luispa warminga japalanna caycarshi ni ima ruraytapis y decidiytapis puedirganchu. Payga, pulchachaycaj lamarpa chaupincho juc barco caycashgannoshi ricacurgan. ¿Imanotaj Jehová yanapämanchi laquicuylawan y yarpachacuylawan caycaptinchi?

8. ¿Isaías 33:6 textucho imataj aunimanchi sasa problemacunapa pasaptinchi?

⁸ ¿Imataj Jehová ruran? Pay aunimashcanchi ima pasamaptinchipis yanapämänanchipaj (leiriy Isaías 33:6). Lamarcho yacu pasaypa pulchajyaptenga, juc barco ali aywaycaptin caypa wacpa cuyur galaycunman. Chaymi mana talpucänanpäga yacu rurincho barcupa ishcay laduncho guerucunano caycan ali chararänanpaj. Chaywanga barco alapa cuyunnachu y pasajerucunapis cushishga viajapäcun. Chaynolami, sasa problemacunapa pasaycaptinchipis, Jehová yanapämänanchita munarga, jinala payta sirviycäshun.

9. ¿Imanotaj yanapämanchi publicaciuncunacho yargamoj yanapacuycuna? (Fotucunatapis ricay).

⁹ ¿Imataj rurananchi? Laquicuylawan y yarpachacuylawan caycarga, calpachacushun Jehovapa ali amigunman ticranapaj.  Payga musyanmi unayno imatapis rurayta imanir mana puedishganchita (Lucas 21:1-4 textuwan tincuchiy). Chaymi Bibliayquita leinayquipaj y leishgayquiman yarpachacunayquipaj tiempuyquita jorgunayqui. Pushacoj hermanunchicunapis jorguycämun achca yachachicuycuna y videucunapis laquicushganchi hora yanapämänanchipaj. Chay yanapacuycunata tarinayquipäga yaycuriy JW Library^®, Índice de las publicaciones Watch Tower y Guía de estudio para los testigos de Jehová nishgancunaman. Caycunashi Monika cristianata yanapargan yarpachacuylawan mana caycänanpaj. Payshi publicaciuncunacho ira, traición o lealtad, nishgan temacunapita ashej shumaj yachacunanpaj ali sienticushgancama. Pay nin: “Shongü pasaypa laquicuycaptinpis chaycunapita yachacur galaycoj cä, nircur ichanga Jehová juc macalayta goycämashgantano cushishgana ricacoj cä”. Gamtapis laquicushgayqui hora Jehovami yanapäshunqui jaucala y cushish ricacunayquipaj (Sal. 119:143, 144).

JEHOVAMI CHARARÄMÄSHUN

10. ¿Imanoraj sienticushwan desgraciapa pasaptinchi?

¹⁰ Ima desgraciapa pasarga, laquishga y calpaynajpis sienticushwanmi. Imanomi maraton correj runa ilajpita shumaj japaytapis puedinnachu. Chaynolami noganchipis öraga ricacushwan unayno imatapis rurayta mana puedirga, y Elías profetanopis punuylatachi munashwan (1 Rey. 19:5-7). ¿Imataj Jehová aunimanchi calpaynaj sienticuptinchi?

11. ¿Imataj Jehová ruran chararämänanchipaj? (Salmo 94:18).

¹¹ ¿Imataj Jehová ruran? Payga aunimanchi chararamänanchipaj (leiriy Salmo 94:18). Imanomi maratonta correj runa mana japaytana puedir jucpa yanapacuynintaraj ashin, chaynolami noganchipis jucpa yanapacuynintaraj necesitanchi Jehovata mana uticaypa sirviycänapaj. Y Jehová cayno nimanchi: “TAYTA DIOSNIKI karmi qamkunata makipita jancharaykä. Tsaymi kayno niykä: ‘Ama mantsakäriytsu. Qamkunata yanapashaykimi’” (Is. 41:13). Rey David chiquejnincuna gaticachaptin imayca sasacunapa pasaycashgancho, ricargan Jehovapa yanapacuyninta, chaymi payga cayno nergan: “Alawqa kaq makikiwanmi tsararämashqanki” (Sal. 18:35). Y noganchita, ¿imanotaj Jehová chararämanchi?

12. Laquishga y calpaynaj ricacurga, ¿pïcunawantaj Jehová yanapaycalämanchi?

 ¹² Öraga Jehová pilawanpis yanapaycalämashwanmi. Juc cuticho Davidpis laquishga calpaynaj ricacurgan, ichanga amigun Jonatán aywargan shacyächinanpaj (1 Sam. 23:16, 17). Eliastana, profeta Eliseuwan Jehová yanapargan (1 Rey. 19:16, 21; 2 Rey. 2:2). Noganchitapis, Taytalanchi Jehová yanapämashwan familianchicunawan, amigunchicunawan y ancianucunawanpis. Ichanga laquishga caycar, öraga japalanchipis cacuyta munashwanchi. Chayno captenga ama laquicuychu. Chauraga, ¿imataj rurashwan Jehovapa yanapacuyninta chasquinapaj?

13. Jehovapa yanapacuyninta chasquinapaj, ¿imatataj rurananchi? (Fotucunatapis ricay).

¹³ ¿Imataj rurananchi? Waquincunapita raquicäshunchu. Waquincunapita raquicäcurga, quiquinchipa problemanchilaman yarpachacuycanchi. Chayta rurarga mana alitapis decidishwanchi (Prov. 18:1). Ima desgraciapapis pasarga, öraga japalanchi cacuyta munashwanchi. Ichanga, pilapis yanapämänanchita mana munarga, Jehovapa yanapacuynintachi chasquiycashwanchu. Chauraga, chay hora sasa captinpis familianchicunapa, amigunchicunapa y ancianucunapa yanapacuyninta chasquicushun. Chay yanapacuycunata chasquirga Jehovapa yanapacuynintami chasquiycanchi (Prov. 17:17; Is. 32:1, 2).

JEHOVAMI SHOGAMÄSHUN

14. ¿Imacunataj manchachimashwan?

¹⁴ Imapis pasamaptinchega öraga manchacushwanmi. Biblia wilacun, unaycho Diospa siervuncuna chiquejnincunaraycur y sasa problemancunaraycur manchariywan sicsicyar ricacushganta (Sal. 18:4; 55:1, 5). Capazchi noganchipis nacaycanchi estudiaj masinchi, familianchi, aroj masinchi y autoridäcunapis Jehovata sirvishganchiraycur chiquimaptinchi. ¿Fiyu gueshya charimaptinchi wanunanchipänacu caycanchi? Chaycunapa pasarga, calpaynaj ichic wamranomi ricacushwan. ¿Imataj Jehová ruran yanapämänanchipaj?

15. Salmo 94:19 nishganno, ¿imataj Jehová aunimanchi?

¹⁵ ¿Imataj Jehová ruran? Payga shogamanchi y shacyächimanchi (leiriy Salmo 94:19). Yarparcushun juc warmi wamra manchacuypita punuyta mana puedishganta räyu pashtar bunrurumuptin. Pero ¿imaraj  pasanman taytan ladunman aywaycur ricralancho punuchiptenga? Räyu pashtar jinala bunruruycaptinpis, wamraga taytanpa ricrancho caycar seguro y cushishga punucun. Chaynolami noganchipis manchacuypita sicsicyaycarga, Jehovapa ricrancho caycashganchinomi ricacuyta munanchi. ¿Imatataj rurananchi chayno ricacunapaj?

16. Jehová shogamänanchipäga, ¿imatataj rurananchi? (Fotucunatapis ricay).

¹⁶ ¿Imataj rurananchi? Alichi canman tiempunchita jorguptinchi Bibliata leinapaj y Jehovata mañacunapäpis (Sal. 77:1, 12-14). Chaycunata rurarga, sasacunapa pasarpis Jehovapa yanapacuynintami imapitapis más puntata ashishun. Jehovata wilapashwan ima manchachimashganchicunapita, ima yarpachimashganchicunapita y payga Palabranwan shogamäshun y shacyächimäshun (Sal. 119:28). Manchacushganchi hora Bibliacho caycaj Job, Salmos y Proverbios librucunata leiptinchega yanapämäshunmi y Mateo 6 caj capitulucho Jesús nishganpis. Aumi, Jehovata mañacuptiqui y Palabranta leiptiqui, Jehová imano shogashushgayquitami ricanqui.

17. ¿Imacunataj yarparaycäshun?

¹⁷ Alapa sasacunapa pasarga ama gongashunchu Jehová yanapämashganchita. Payga japalanchitaga imaypis jaguimäshunchu (Sal. 23:4; 94:14). Yarpäshun, Jehová imapitapis chapämäshun, yarpachacuycarla mana caycänapaj yanapämäshun, chararämäshun y shogamäshunpis. Chaymi Isaías Jehovata cayta nergan: “Qamlaman yärakuqkunataqa ali kawapäkunanpaqmi imaypis yanapanki. Qamlapaq yarparaqkunataqa mana lakikärinanpaqmi imaypis tantiyatsinki” (Is. 26:3). Chauraga Jehovalaman yäracuy y lapan yanapacuynincunata chasquipäcuy. Chaynopa calpatapis tarinquimi cawayniquicho ima desgraciapa pasaptiqui aguantanayquipaj.