5 CAJ YACHACHICUY
108 CAJ CANCIÓN ¡Cuyacoj, cuyacoj Jehová!
¿Ima bendiciuncunata chasquinchi Jehová cuyamashganchipita?
“Jutsasapa runakunata salvananpaqmi kay patsaman Jesucristo shamushqa” (1 TIM. 1:15).
¿IMATATAJ YACHACUSHUN?
Jesús wanushganpita ima bendiciuncunata chasquinchi y imanotaj Jehovata agradecicushwan.
1. ¿Imata rurashwan Jehovata cushichinapaj?
PILATAPIS shumaj ropata garaptiqui y mana jaticuptenga, ¿imanotaj sienticunquiman? Capaz mana ali sienticunqui y laquincunquimanpis. Pero chay garashgayqui ropata jaticuptenga alapachi cushicunquichi, ¿au? Chaynolami Jehovapis ali regalutanomi gomashcanchi cuyashga Wamranta cachamur noganchiraycu wanunanpaj. ¡Chay regalupita agradecicuptinchi Jehovapis cushicunga! (Juan 3:16; Rom. 5:7, 8).
2. ¿Imata yachacushun?
2 Tiempuwanna gongashwanmi Jesús noganchiraycu wanushganpita. Chay mana pasamänanchipaj cutin cutinmi yarpänanchi Jehová y Jesús noganchiraycu imacunata rurashganpita, canan chaypita yachacushun. Jina yachacushun Jesús wanushganga imano yanapämanchi canan tiempo y shamoj tiempuchopis. Yachacushunpis Jesús wanushganta Yarpänapaj semanacho imata rurananchi Jehová cuyamashganchipita agradecicunanchipaj.
CANAN WICHAN IMA BENDICIUNCUNATA CHASQUINCHI JESÚS WANUSHGANPITA
3. ¿Canan wichan ima bendiciunta chasquinchi Jesús wanushganpita?
3 ¿Canan wichan ima bendiciunta chasquinchi Jesús wanushganpita? Jehová juchanchicunata perdunamanchi. Payga manami obligaduchu caycan perdunamänanchipaj, ichanga cuyamashpanchimi perdunamanchi. David agradecido caycar cayno nergan: “Qamqa alilata ruraqmi y perdonakuqmi kanki” (Sal. 86:5; 103:3, 10-13).
4. ¿Pïcunapätaj Jehová Wamranta wanunanpaj cachamurgan? (Lucas 5:32; 1 Timoteo 1:15).
4 Waquincuna nipäcun “mana merecëchu Jehová juchäpita perdunamänanpaj”. Pero rasunpa cajchoga manami pï runapis merecinchu. Apóstol Pablupis cayno nergan: “Apóstol kanäpaqpis manami merecïtsu”. Nircur nergan: “Tsayno kaykarpis Tayta Dios kuyapämaptinmi apóstol kaykä” (1 Cor. 15:9, 10). Jehová perdunamänanchipaj mana merecirpis cuyapämashganchiraycu perdunamanchi, juchanchipita arrepenticuptinchi. Chauraga ‘nogaga manami merecëchu Jehová perdunamänanpaj’ nirpis cayman yarpäshun: Jehovaga Wamranta cachamurgan juchasapa runacunapaj, manami juchaynaj runacunapächu (leiriy Lucas 5:32; 1 Timoteo 1:15).
5. ¿Imanirtaj mana nishwanchu “merecëmi Jehová juchäpita perdunamänanpaj”?
5 Manami yarpashwanchu achca watapana Jehovata sirvishganchiraycu pay juchanchita perdunamänanchipaj cashganta. Chayno captinpis payga valuranmi lapan shongunchiwan payta sirvishganchita (Heb. 6:10). Jehová cuyamashpanchi Wamranta gomashcanchi, manami payta achca watapana sirvishganchipitachu. “Jehovata achca watapana sirvishgäpita, merecëmi juchäpita perdunamänanpaj” nir yarparga, Jesús wanushganta yangala cashgantano churaycashwan (Gálatas 2:21 textuwan tincuchiy).
6. ¿Imanirtaj Pablo shongupita Jehovata sirvirgan?
6 Pablo Jehovata manami sirvirganchu perdunashga cananlapächu, sinoga Jehovata cuyashganraycu agradecido caycar (Efes. 3:7). Chaynolami noganchipis Jehovata manami sirvinchichu juchanchipita perdunashga cananchilapächu, sinoga payta cuyar y Jesús noganchiraycu wanushganpita agradecido caycar.
7. Jesús noganchiraycu wanushganpita, ¿ima bendiciunta chasquinchi? (Romanos 5:1; Santiago 2:23).
7 Jesús noganchiraycu wanushganpita Dioswan ali amigo cayta puedinchina. a Pasajcho yachacushganchino, yurishganchipita manami Dioswan amigo canchirächu. Pero Jesús wanushganraycu “Tayta Dioswan alina kawaykantsi” (leiriy Romanos 5:1; Santiago 2:23).
8. ¿Imanirtaj Jehovata agradecicunchi mañacuyninchita wiyashganpita?
8 Dioswan amigo cashganchipita payta mañacuyta puedinchi, chayga shumaj bendiciunmi caycan. Waquincunawan caycar o quiquilanchi caycarpis payga mañacushganchita wiyanmi. Diosta mañacurga umanchita y shongunchitapis shacyächinmi, y paywan más amigo cananchipaj yanapämanchi (Sal. 65:2; Sant. 4:8; 1 Juan 5:14). Jesús cay Pachacho caycar Taytanta cutin cutinmi mañacoj, ¿imanir? Payga musyarganmi mañacuyninta Papänin wiyaycashganta y payman más guelicushganta (Luc. 5:16). Jesús wanushganraycu Jehovawan amigo cayta puedishganchipita y mañacuyninchita wiyashganpitapis alapa agradecido caycanchi.
SHAMOJ TIEMPUCHO IMA BENDICIUNCUNATA CHASQUISHUN
9. Jesús noganchiraycu wanushganpita, ¿ima bendiciunta chasquishun?
9 ¿Imanotaj Jesús wanushganwan Jehová sirvejnincunata shamoj tiempucho yanapanga? Paycunata imaycamapis cawayta gonga. Waquin runacunaga yarpapäcun “imanopataj imaycamapis cawashun runacuna wanurcaycaptenga” nir. Ichanga Jehová camamashganchi imaycamapis cawananchipaj, chayga canman cargan Adán mana juchacuptin. “Quevä imaycamapis cawashun” nir yarpaptinchipis, Jehová cuyay Wamranta cachamurgan noganchiraycu wanunanpaj, chayno imaycamapis cawanapaj (Rom. 8:32).
10. ¿Imata shuyaraycan cielupaj acrashga cajcuna y cay Pachacho cawajcunapis?
10 Cananlapitana Jehová munan imaycamapis cawananchipaj cajman yarparänanchipaj. Chaymi cielupaj acrashga cajcuna shuyaraycan Cristuwan cielucho gobernamunanpaj (Apoc. 20:6). Y maychicaj runacuna shuyaraycanchi cay Pacha paraisuman ticraptin imaycamapis mana nacaypa cawananchipaj (Apoc. 21:3, 4). ¿Gam cay Pachacho imaycamapis cawanayquipaj shuyaraycanquicu? Cielucho o cay Pachacho cawananchipaj captinpis ali cawacuymi canga. Jehová runacunata camashga cay Pachacho cushishgala cawacunanchipaj.
11, 12. Paraisuchona caycar, ¿ima bendiciuncunata chasquishun? (Dibujucunatapis ricay).
11 ¿Munanquimanchuraj cay Pachacho mana wanuypa mana gueshyaypa cawacuyta? (Is. 25:8; 33:24). Jehovami chayno cawayta gomäshun, ali cawanapäga imayca alicunata camaripämäshun. ¿Paraisucho imalatapis yachacuyta munanquimanchuraj? Capaz yachacuyta munanqui uywacunapita, pishgucunapita, musicata tucayta o dibujaytapis. Imaycacunata ruranapäpis canga: wasicunata sharcachinapaj, chacracho arunapaj, micuyta yanucunapaj, herramientacunata ruranapaj y mascunapis (Is. 35:1; 65:21). ¡Achca tiempumi canga imaycacunatapis ruranayquipaj y yachacunayquipäpis!
12 ¡Alapa cushicuypämi canga wanushgacuna cawarimuptin chasquicuptinchi! (Hech. 24:15). Paraisuchona Jehovapita y camashgancunapitapis masta yachacushun (Sal. 104:24; Is. 11:9). Y más alimi canga juchaynaj car Jehovata cushishga sirviptinchi. Pero laquicuypämi canman juchalicurga cay shumaj bendiciuncunata manami chasquiptinchi (Heb. 11:25). Cay munducho imata tarishganchipis manami igualanchu paraisucho bendiciuncunata chasquinanchipaj cajwan. Ama gongaychu, paraisuga manami yarpayninchilacho caycan, sinoga tiempo chayamunga cay Pacha rasunpa paraisuman ticrananpaj. Cay lapan bendiciuncunata chasquishun Jehová Wamranta cachamushganraycu.
Paraisucho caycaptiqui, ¿ima bendiciunta chasquiyta munaycanqui? (11 y 12 caj parrafucunata ricay).
IMATATAJ RURANQUIMAN JEHOVAPA CUYACUYNINPITA AGRADECICUNAYQUIPAJ
13. ¿Imanotaj Jehovata agradecicunchi Churinta noganchiraycu cachamushganpita? (2 Corintios 6:1).
13 ¿Imanotaj Jehovata agradecicunchi Churinta noganchiraycu cachamushganpita? Cawayninchicho voluntäninta puntaman churar (Mat. 6:33). Aumi, “manami kikintsi munashqalantsita rurar kawakunantsipaqtsu Jesucristo wanushqa, sinöqa pay munashqannöna kawanantsipaqmi. Payqa wanurpis noqantsi raykumi kawarimushqa” (2 Cor. 5:15). Jehová cuyamashganchiraycu imaycacunata rurashganpita manami imaypis gongashwanchu (leiriy 2 Corintios 6:1).
14. ¿Jehovaman yäracur imatataj rurashwan?
14 Jehovaman yäracurga y yachachimashganchita cäsucurga cuyamashganchita agradecicuycanchi. ¿Chaytaga imanotaj ruranquiman? Juc aruyta ashir o universidäman aywanapaj manaraj decidir, Jehovata cuentaman churay, yarpay imata pay munan ruranayquipaj (1 Cor. 10:31; 2 Cor. 5:7). Ali cajcunata acraptinchi Jehovaman más yäracushun y payman guelicushun. Y shamoj tiempo imaycamapis cawananchipaj segurumi caycäshun (Rom. 5:3-5; Sant. 2:21, 22).
15. Jehovawan agradecido caycar, ¿imata rurashwan Conmemoración wichan?
15 Jehovawan agradecido caycar Conmemoración wichan tiempunchita camacächishwan chaycho caycänanchipaj, y waquincunatapis invitashwan chay reuniunman aywananpaj (1 Tim. 2:4). Jina jw.org paginanchipita ishcay videucunatapis ricachishwan: ¿Imanirtaj Jesús wanurgan? y Jesuspa wanuyninta yarpäshun. Ancianucunapis invitanman espiritual cajcho gasacashga hermanucunata Conmemoraciunman aywananpaj. Y gasacashga hermanucuna yapay Jehovata sirviptenga cielucho y Pachacho cajcunapis alapa cushicärenga (Luc. 15:4-7). Conmemoración junaj cushi cushila lapanta chasquinanchi y masraj gasacashga hermanucunata y chayraj shamojcunatapis, chaynopa paycunapis alapa cushishga sienticunga (Rom. 12:13).
16. ¿Imanirtaj Conmemoración wichan runacunata más yachachishun?
16 Jehovata Jesustapis agradecido cashganchipita Conmemoración wichan runacunata yachachinanchipaj más yargushun y chay reuniunman invitashun. Chayno ruraptinchi Jehová yanapämäshun ali shonguyoj runacunata tarinapaj y Jehovaman masraj yäracushun (1 Cor. 3:9). Conmemoración wichanpaj acracämushga textucunaga Waran waran Diospa Palabranta yachacushun nej folletucho y pulan semana reuniuncho Imano yachacunapaj nishgancho leinayquipaj caycan. Bibliata estudiashgayqui hora leishgayqui textucunapita masmi yachacunqui.
17. ¿Imatataj rurashwan Jehovata cushichinapaj? (“ Imanotaj Jehová cuyamashganchita agradecicushwan” nej recuadruta ricay).
17 Canan yachacushganchino lapanta mana rurayta puedirga ama yarpachacuychu, Jehovaga manami juzgashunquichu waquincunano rurayta mana puediptiqui. Payga cushicun shongupita rurashgayquita y gamraycu Jesús cachamushganpita agradecido caycashgayquitapis (1 Sam. 16:7; Mar. 12:41-44).
18. ¿Imapitataj Jehovata y Jesustapis agradecicunchi?
18 Jesús wanushganraycurla juchanchita Jehová perdunamanchi, paywan amigo cashwan y shamoj tiempucho imaycamapis cawacushun. Jehová noganchita cuyamashpanchi cay bendiciuncunata gomashcanchi, chaypita agradecicunchi (1 Juan 4:19). Jesuspis noganchita alapa cuyamashpanchi wanurgan, chaymi paytapis agradecicunchi (Juan 15:13).
154 CAJ CANCIÓN Imaypis cuyanacuycarla
