1. ¿Imanirtaj ali caycan cada wata Jesús wanushganta yarpänapaj?

 JEHOVÁ Wamranta cachamushganga shumaj ali regalumi caycan (2 Cor. 9:15). Jesús wanushganraycu Jehovawan amigo cayta puedinchi y imaycamayajpis cawayta tarinchi. Pay alapa cuyamashpanchi Wamranta cachamushga. Chaymi agradecicunanchipäga imaycacunarämi caycan (Rom. 5:8). Jehová Wamranta cachamushganta mana gonganapäga Jesús mandargan cada wata wanuyninta yarpänapaj (Luc. 22:19, 20).

 2. ¿Imata canan yachacushun?

² Cay 2025 wata, 12 de abril, sábado junajcho yarpäshun Jesús wanushganta. Lapanchimi chaycho cayta munanchi. Chay quillacho shumaj yarpachacushun a noganchiraycu Jehová y Jesús imata rurashganta. Canan Jesús wanushganpita parlar yachacushun Jehová y Jesús imano cashganpita. Y juc caj yachacuycho tantiarcushun Jesús wanushganga imano yanapämanchi y noganchi agradecicur imacunata ruranapaj.

JESÚS WANUSHGANMAN YARPAR IMATA JEHOVAPITA YACHACUNCHI

 3. ¿Imanotaj juc runala aypala runacunata salvanman wanuypita y juchapita? (Dibujutapis ricay).

³ Jehová imaypis alita ruraj cashganraycu wamranta cachamurgan (Deut. 32:4). Adán juchacushganpita lapanchi juchayoj car wanunchi (Rom. 5:12). Chaymi wanuypita y juchapita salvamänanchipaj Jehová japalan  cuyashgan churinta cachamurgan noganchiraycu. Chauraga, ¿imanotaj juc runala aypala runacunata juchanpita salvanman? Apóstol Pablo cayno nergan: “Tsaymi juk runala [Adán] Tayta Diosta mana cäsukushqanpita lapan runakuna jutsata rurapäkun. Tsaynölami juk runala [Jesús] Tayta Diosta cäsukushqanpita atska runakunata jutsaynaqtana Tayta Dios chaskinqa” (Rom. 5:19; 1 Tim. 2:6). Chauraga juc runala Diosta mana cäsucushganraycu juchayoj canchi y wanunchi, chaynolami juc runala Diosta cäsucushganraycu wanuypita y juchapitapis libramashcanchi.

 4. ¿Imanirtaj Jehová manami permitirganchu Adanpa cäsucoj wamrancuna jinala imaycamapis cawacunanpaj?

⁴ ¿Wanunmanräcu cargan Jesús noganchiraycu? Waquincunapäga alichi canman cargan Jesús mana wanuptenga Jehová permitinanpaj Adanpa cäsucoj wamrancuna jinala imaycamapis cawacärinanpaj. Pero Adán juchata rurashganta ricarpis Jehová manami chaynola jaguirinmanchu cargan. ¿Imanir? Jehová nishgana cargan runacuna juchacuptin wanunanpaj cajta, chauraga chayta mana cumpliptenga manami nishwanchu alita ruraj Dios cashganta.

 5. ¿Imanirtaj seguro caycanchi Jehová imaypis alita ruraj cashganta?

⁵ Wamran Jesucristo noganchiraycu mana wanuptinpis, ¿imaraj pasanman cargan juchayoj runacuna imaycamapis cawananpaj Jehová jaguiriptin? Jehová chayta ruraptenga mana alichu canman cargan, ¿imanir? Pay nishganta mana cumplinmanchu cargan, y capaz nishwanpis ‘¿Jehová lapan aunishganta cumplicungachuraj?’ nir. Ichanga cuyashga Wamran wanunan captinpis, Jehová aunishganta cumplirgan. Chaymi seguro caycanchi Jehová imaypis alita ruraj cashganta.

 6. ¿Imanotaj Jehová cuyamashganchita musyachimanchi Jesús wanushganwan? (1 Juan 4:9, 10).

⁶ Jesús wanushganpita yachacunchi Jehová alita ruraj cashganta y amatar cuyamashganchita (Juan 3:16; leiriy 1 Juan 4:9, 10). Jehová Wamranta cachamurgan noganchiraycu wanunanpaj, chaynopa imaycamapis cawacunapaj y legítimo wamran cananchipaj. Adán juchata rurashganpita miraynincunaga Diospa wamran manana canchinachu. Pero Jesús wanushganpita Jehová juchanchicunata perdunamanchi, chaynopa paywan amistächimashcanchi y hermanunchicunawan juc familianomi  caycanchi. Y shamoj watacunacho yäracoj y cäsucoj cajcuna Diospa legítimo wamran cayta puedishun. ¡Taytalanchi Jehová amatar cuyamanchi ¿au?! (Rom. 5:10, 11).

 7. Jesús noganchiraycu pasaypa nacar wanushganga, ¿imata yachachimanchi Jehová cuyamashganchipita?

⁷ Jehová runacunata cuyamashpanchi jaguirgan cuyashgan Wamran nacananpaj y wanunanpaj. Satanás nin pipis ima problemacunapa pasar Jehovata manana sirvinanpaj cajta. Lulacoj cashganta musyachinanpaj Jehová permitirgan cuyashga Wamran wanunanpaj (Job 2:1-5; 1 Ped. 2:21). Jehová ricargan wamran Jesusta chiquejnincuna asipar burlacushganta, astashganta, magashganta, guerucho warcushganta y nacachir wanuchishgantapis (Mat. 27:28-31, 39). Chiquejnincunapis nergan: “Chauraga payta cuyarga canan höra Dios salvachun” nir, ichanga Jehová alapa poderyoj carpis chay hora imatapis rurarganchu Wamranta yanapänanpaj (Mat. 27:42, 43, MT). Jehová Jesusta salvaptin pay manami wanunmanchu cargan y noganchi imaycamapis cawayta manami tarishwanchu cargan. Chauraga imaycamayajpis cawacunanchipaj Jehová permitirgan Wamran nacar wanunanpaj.

 8. Wamran Jesusta nacachir wanuchiptin, ¿imanotaj Jehová sienticurgan? (Dibujutapis ricay).

⁸ Wamran wanushgan hora Jehová ricarpis shongun alapachi nanargan. Jehová runacunata camashga payno sentimientuyoj cananchipaj, chaymi noganchino paypis laquicun. Bibliapis wilacun unay tiempucho israelitacuna paypa shongunta nanachishganta (Sal. 78:40, 41). Yarpäshun Abrahán pasashganman, paytami Jehová nergan wamran Isaacta wanuchinanpaj (Gén. 22:9-12; Heb. 11:17-19). Wamran Isaacta wanuchinanpäna caycaptin Abrahanpa shongunpis alapachi nanargan. Chaynochi Jehová sienticurgan Wamranta nacachir wanushganta ricar (Ejemplos de fe: Abrahán [parte 2] nej videuta ricay, jw.org paginacho).

 9. ¿Imata yachacunchi Romanos 8:32, 38, 39 nishgan texto Jehová amatar cuyamashganchipita?

⁹ Jesús wanushganwan Jehová tantiachimanchi cuyamashganchino manami pipis cuyamanchichu (leiriy Romanos 8:32, 38, 39). Quiquinchipitapis pay masmi cuyamanchi. Noganchi imaycamayajpis cawayta munanchi, pero Jehová masrämi chayta munan; juchanchipita Jehová perdunamänanchipaj munanchi,  pero payga masraj perdunamänanchita munaycan. Y munaycanpis Wamran wanushganman yäracunanchipaj y cäsucoj cananchipaj. Tayta Dios Wamranta cay Pachaman cachamur musyachimashcanchi alapa cuyamashganchita. Y paraisuchona caycar Jehovapa cuyacuyninpita achcatarämi yachacushun (Ecl. 3:11).

JESÚS WANUSHGANMAN YARPAR IMATA PAYPITA YACHACUNCHI

10. 1) Jesús wanunanpäna caycar, ¿imamantaj alapa yarpachacurgan? 2) ¿Imata rurartaj Papäninpa jutinta respetachergan? (“ Wanunancama Jesús cäsucuptin Jehovapa jutinta respetachergan” nej recuadrutapis ricay).

¹⁰ Jesús munargan runacuna Papäninpita alicunalata parlananpaj (Juan 14:31). Juc wanuchicoj runano y Diospa contrancho caycajno wanunanpäna caycar, Jesús alapa yarpachacurganchi runacuna Papäninpita imata parlashganta. Chaymi chay hora Papäninta mañacurgan cayno nir: “Papä, gampaj alli captenga fiyupa ñacanäpaj caycashäta ama camacaycachiychu ari” (Mat. 26:39, TDI). Jesús wanunancama Papäninta cäsucurgan, chaynopa Jehovapa jutinta respetachergan y musyachicurgan Satanás lula cashganta.

11. ¿Jesús runacunaman yarpachacur imacunata rurargan? (Juan 13:1).

¹¹ Jesús runacunaman y discipuluncunamanpis alapa yarpachacur cawayninta entregargan (Prov. 8:31; leiriy Juan 13:1). Cay Pachaman manaraj shamur, Jesús musyargannami alapa nacananpaj y wanunanpaj cajta. Chayno captinpis runacunata alapa cuyashpanmi Diospita marcan marcan aywar yachachej y yanapaj, hasta nacar wanunanpäpis listo caycargan. Wanunanpäna  caycaptinpis discipuluncunapa chaquincunata maylargan y shacyächerganpis (Juan 13:12-15). Pasaypa nanaywan guerucho warcurashga caycarpis laduncho caycaj runata nergan paypis paraisucho cayta puedishganta. Y mamanpa yarpachacur apóstol Juanta encargargan mamanta ricananpaj (Luc. 23:42, 43; Juan 19:26, 27). Jesús runacunata cuyashpan yachachergan y wanurganpis.

12. ¿Imacunata rurartaj Jesús yanapaycämanchi?

¹² Jesús juc cutilami wanurgan juchanchipita libramänanchipaj, chayno captinpis jinala aruycan noganchipaj (Rom. 6:10). Canancama imaycacunata rurananpaj caycan. Reyninchino payga mana uticaypa aruycan, Jehová perdunamänanchipaj favorninchiman sharcun y Jehovapa marcantapis pushaycan (1 Cor. 15:25; Efes. 5:23; Heb. 2:17). Caytapis ruraycan: cielupaj aywajcunata y cay Pachacho cawacunanpaj cajcunatapis shuntaycan, cay aruyta ushanga Armagedón guerra manaraj chayamuptin (Mat. 25:32; Mar. 13:27). b Paymi yäracuypaj esclavuta pushaycan ali yachachishga cananchipaj y Jehovata sirvir caycänanchipaj (Mat. 24:45). Paraisucho gobernamaptinchi imaycacunata noganchipaj ruranga. Jehová Wamranta gomashcanchi noganchiraycu wanunanpaj y imaycacunata rurar yanapämänanchipaj.

MANA GUELANAYPA YACHACUYCÄSHUN

13. ¿Imata rurashwan Jehová y Jesús cuyamashganchipita yachacunapaj?

¹³ Jehová y Jesús cuyamashpanchi rurashgancunaman shumaj yarpachacuy. Jesús wanushganta Yarpänapaj junaj manaraj chayar Mateo, Marcos, Lucas o Juan librucunata leiriy. Leishgayqui horacho achca capitulucunataraj manami leinquimanchu, sinoga walcalata leirpis yarpachacuy Jehová y Jesús imata noganchiraycu rurashga, y yachacushgayquita waquincunata wilapay.

14. Salmo 119:97 nishganno, ¿imata más rurashwan yachacunapaj Jesús wanushganpita y waquin yachachicuypitapis? (Fotutapis ricay).

¹⁴ Achca watapana Jehovata sirviycaptiqui, ama gongaychu Jehová justo y cuyacoj cashganpita y Jesús wanushganpita masraj yachacunayquipaj cashganta. Chaypäga, ¿imataraj ruranquiman? Juc texto Bibliapita shumaj mana tantiaptiqui  publicaciuncunacho ashinquiman, nircur yachacushgayquipita yarpachacuy imano Jehová y Jesús alapa cuyashushgayquita (leiriy Salmo 119:97). Imaycapis caycan masraj yachacunayquipaj.

15. ¿Imanirtaj mana yamacaypa Bibliapa yachachicuyninta ashishwan?

¹⁵ Ama guelanaychu avecis Bibliata leir mushoj yachachicuyta mana tariptiqui. Cayman yarpay, oruta ashejcunaga manami juc ishcay horalachu ashin sinoga achca junajcunarämi, y acapala oruta tarirpis alapami cushicun. Orupita Biblia nishganga masmi välin, chaymi Bibliata leir mana yamacaypa mushoj yachachicuyta ashiy (Sal. 119:127; Prov. 8:10).Chauraga pacienciacur mana yamacaypa cada junaj Bibliata leiy (Sal. 1:2).

16. ¿Imacunata rurartaj Jehovano y Jesusno ruraycäshun?

¹⁶ Bibliata yachacur shumaj yarpachacunquiman cawayniquicho imano yachacushgayquita cäsucunayquipaj. Jehová ali ruraj cashganpita yachacur yarpachacunquiman gampis imano waquincunapaj ali cajta ruranayquipaj. Jesús Taytan munashgalanta rurargan y nacaycunapa pasarpis waquincunata yanapargan. Payno ruranayquipaj mana ali tiempuchopis yäracoj masiquicunata yanapay, jina runacunata wilacuy paycunapis Diosta cäsucur Jesús wanushganpita bendiciuncunata chasquinanpaj.

17. ¿Imatataj juc caj yachacuychoga ricärishun?

¹⁷ Jesús wanushganpita shumaj tantiar y agradecido caycar, Jehovata y Jesusta más cuyashun y paycunapis noganchita masraj cuyamäshun (Juan 14:21; Sant. 4:8). Chaymi calpachacunanchi Jesús wanushganpita más yachacunanchipaj. Juc caj yachacuychoga ricärishun ima bendiciuncunata chasquishun Jesús wanushganpita, y imanotaj musyachicushwan Jehová cuyamashganchipita agradecido caycashganchita.