1. ¿Imaparaj Jehová casaracuy cawayta camacächishga?

 JEHOVAGA cushishga Diosmi, noganchipis cushish cananchitami munan (1 Tim. 1:11). Cushishga cananchipäga imayca regalucunata gomashcanchi (Sant. 1:17). Casaracuy cawayga juc regalumi caycan. Chaymi casaracuy junajcho olgu y warmi ishcancuna aunicärin cuyanacärinanpaj, respetacärinanpaj y cuidanacärinanpäpis. Ishcanpis ali cuyanacäriptenga cushishga cawapäcun (Prov. 5:18).

 2. Canan wichan, ¿imanotaj waquin runacuna warminta tratapäcun?

² Canan wichan waquincuna casaracushgan junajcho aunicärishganta manami cumplipäcunchu, chayraycu laquishgami cawapäcun. Organización Mundial de la Salud nishgan wilacun achca olgucuna warminta ashlipäcun, magapäcun y pasaypa nacachin. Waquincunaga runacunapa naupancho ali tucur warminta cuyapaylapa tratapäcun, pero wasinchona caycar mana alipa tratapäcun. Jina internetcho ganra ruraycunata ricar warminta manami respetapäcunchu.

 3. ¿Imanirtaj waquin runacuna warminta nacachin?

³ Canan tiempo waquin runacunaga warminta manami respetanchu, capazchi wasincho papänin mamanta olgüpar o magashganta ricar warmintapis mana ali tratapäcun. Jina marcancho ‘chay runaga warmi mandanan’ mana ninanpaj warminta mana ali tratapäcun. Waquincunaga geniuntapis manami controlayta yachanchu y ganra rurajcunatapis ricar warminta manami respetanchu. Cay problemaga COVID-19  gueshya wichanpita masmi miraycushga. Imano captinpis runacunaga warminta olgüpar manami tratanmanchu.

 4. ¿Imanirtaj cristiano runacunaga cay mundo runacunano manami yarpanmanchu?

⁴ Cristiano runacunaga Diosta mana sirvej runacunano manami yarpanmanchu. a Chayno yarparga paycunano rurar galaycunmanchi. Unay Roma cristianucuna pasashganpita yachacushun, paycunaga cielupaj acrashga cristianucunami cargan. Cay mushoj congregación cajcunata Pablo nergan: “Waquin runacuna shongun munashanta rurar cawashannöga amana cawaynachu” (Rom. 12:1, 2, TDI). Cay cristianucunata Pablo consejargan Diosta mana reguej runacunano mana yarpänanpaj ni rurananpaj. ¿Imanir? Waquin cristianucuna manarämi cambiucunata rurarganrächu cristianuno comportacunanpaj. Canan wichanpis cay consejucunaga casarashga cajcuna cäsucunanpämi caycan. Pero waquin cristianucunaga cay mundo runacunano warminta ashlipar mana ali tratapäcun. b Chauraga, ¿imanotaj Jehová munan runacuna warminta tratananpaj? 1 Pedro 3:7 textucho respuestata tarinchi.

 5. 1 Pedro 3:7 nishganno, ¿imanotaj runaga warminta tratanman?

⁵ (Leiriy 1 Pedro 3:7). Jehová runacunata mandan warmincunata cuyapar respetananpaj. Juc runa warminta respetan ali shimilapa parlapar y cuyapaylapa tratar. Canan yachacushun imano runacuna warminta cuyapar tratanman. Pero puntataga yachacushun imatataj runacuna manami ruranmanchu.

IMATAPIS AMA RURAYCHU WARMIQUITA NACACHINAYQUIPAJ

 6. ¿Pipis warminta magaptin Jehová chasquingachuraj? (Colosenses 3:19).

⁶ Warmiquita ama magaychu. Jehová magacoj runacunata chiquinmi (Sal. 11:5). Paypäga pasaypa mana ali caycan pipis warminta magaptin (Mal. 2:16; leiriy Colosenses 3:19). 1 Pedro 3:7 textucho nin pipis warminta nacachiptin o magaptin Jehovaga manami chasquingachu. Y mañacuynintapis manami wiyangachu.

 7. Efesios 4:31, 32 texto nishganno, ¿imanopataj runacunaga warminta mana parlanmanchu? (Wilacuytapis ricay).

⁷ Warmiquita ama olgüpaychu. Waquin runacunaga rabiacurir warminta olgüypa parlapan. Pero Jehovaga nin “pitapis ama nanaparaytsu, c rabyapaytsu ni qayapaytsu” (leiriy Efesios 4:31, 32). Taytalanchi Jehová lapanta musyan. Payga ricaycan pipis imano warminta trataycashganta, ishcancunala caycaptinpis. Juc runa warminta mana alita trataptin laquichin y nacachin, chauraga Jehovata sirvishgantapis yangalapämi canga (Sant. 1:26).

 8. ¿Ima nintaj Jehová ganra ruraycunapita?

⁸ Pornografiata o ganra ruraycunata ama ricaychu. Ganra ruraycunata Jehová pasaypa chiquin. Warmiyoj runaga ganra ruraycunata ricaptin Jehovata sirvishgantapis yangalapämi canman, warmintapis pengayman churan. d Jehová munan warmiyoj runaga yarpayninwan y ruraynincunawanpis warminta respetananpaj, y juc  warmitapis manami munapänanpaj. Jesuspis nergan: “Juk warmita munaparqa maynami majaykita jarukuqno karkaykanki” (Mat. 5:28, 29). e

 9. ¿Imanirtaj Jehová manami munanchu juc cristiano punushgan horacho warminta ganra rurananpaj obligaptin?

⁹ Punushgayqui horacho warmiquita ganra ruraycunata rurananpaj ama obligaychu. Waquin runacuna punushgan horacho warminta obligan melanaypaj cajcunata rurananpaj, chaycunata rurarga warminta pengachin y pasaypa laquichin. Jehovaga manami munanchu pipis quiquilanman yarpar warminta ganra rurananpaj obligaptin. Payga munan majayoj cajcuna warminta cuyananpaj, imano sienticushganta y concienciantapis respetananpaj (Efes. 5:28, 29). Chauraga, ¿imatataj ruranman juc cristiano mayna pornografiata ricar y warminta obligashgana carga ganra rurayta rurananpaj? ¿Imatataj ruranman mana ali yarpashganta y rurashgantapis jaguirinanpaj?

IMATATAJ RURANQUIMAN MANA ALICUNATA MANANA RURANAYQUIPAJ

10. Maja cajcuna, ¿imata yachacunman Jesuspita?

¹⁰ ¿Imatataj rurapäcunman cristianucuna warminta manana pengacächir nacachinanpaj? Calpachacunman Jesús cashganno cananpaj. Payga manami casacurganchu, chayno captinpis discipuluncunata cuyacuywan tratargan. Jesuspita maja cajcunapis yachacärinman (Efes. 5:25). Canan yachacushun imata majacuna yachacunman Jesús parlashganwan y rurashganwan discipuluncunata imano tratashganpita.

11. ¿Imanopataj Jesús apostulnincunata tratargan?

¹¹ Jesús apostulnincunata cuyacuywan y respetuwan tratargan, manami fiyu runa carganchu. Payga autoridäyoj y poderyoj carpis, chaycunapita välicurganchu apostulnincunata mana ali tratananpaj, sinoga humilde car paycunata yanapaj (Juan 13:12-17). Y discipuluncunata cayno nergan: “Kuyapäkuq y ali shonqu kashqäta rikakamar noqapita yachakäriy. Noqapita yachakurmi jamayta taripäkunki” (Mat. 11:28-30). Humilde shonguyoj runaga rabiashga captinpis parlayninta y ruraynintapis controlacunmi.

12. ¿Imanopataj Jesús waquincunata parlapaj?

¹² Jesús laquishga cajcunata shogapaylapa parlapaj. Y discipuluncunata manami olgüparganchu ni gayaparganchu (Luc. 8:47, 48). Chiquejnincuna ashlipaptinpis payga manami ashliparganchu (1 Ped. 2:21-23). Öraga upälacurganmi (Mat. 27:12-14). ¡Alichi canman maja caj cristianucuna Jesús cashganno cananpaj!

13. Mateo 19:4-6 texto nishganno, ¿imanopataj majacuna warminwan mana raquicaypa cawacärinman? (Fotutapis ricay).

¹³ Jesús majacunata mandargan juc warmilawan mana raquicaypa cawacärinanpaj y caynopis nergan: “Runaqa [...] warminwan mana rakikaypa tänanpaqmi” (leiriy Mateo 19:4-6). “Mana rakikaypa” niptenga, griego rimaycho parlaycan lagacashganola imaypis caycänanpaj. Chauraga casarashgacuna juntula caycanman, fuertipa lagacashganomi. Pilapis warminta engañaptin ishcancunami nacapäcun. Chaymi maja cajcuna warminta cuyarga ni pornografiatapis ricanmanchu. Y ganra ruraycunata ricaylapis ricanmanchu ni yarpaylapis yarpanmanchu (Sal. 119:37). Jobno decidido caycanman pï warmitapis mana ricapänanpaj  ni mana munapänanpajpis (Job 31:1).

14. ¿Imacunata ruranman maja cajcuna warminwan y Jehovawan amistänanpaj?

¹⁴ Magacoj o nanaparaypa parlaj runaga, warminwan y Jehovawan amistänanpaj caycunatarämi ruranman. Punta caj, quiquinmi cuentata gocunman ruraynincuna mana ali caycashganta. Jehová ricanmi lapan rurashganchita, imatapis pacayta camäpacunchichu (Sal. 44:21; Ecl. 12:14; Heb. 4:13). Ishcay caj, warminta mananami maganmanchu ni parlashganwanpis mananami nanaparanmanchu (Prov. 28:13). Quimsa caj, runaga mana ali rurashganpita warminta cayno ninman: “agraviuta rurar nacachishcä gamta y Jehovatapis”. Nircur shongupita arrepenticur warminta y Jehovatapis perdunta mañacunman (Hech. 3:19). Jehovata mañacunman yanapänanpaj parlashganta, yarpashganta y rurashgantapis controlananpaj y warminta cuyapaylapa tratananpäpis (Sal. 51:10-12; 2 Cor. 10:5; Filip. 2:13). Chuscu caj, Jehovata mañacushganno ruranman, jina magacoj y ashlipacoj cayta jaguirinman (Sal. 97:10). Pichga caj, jucla ancianucunapa yanapacuyninta ashinman, paycunaga cuyapaylapa yanapanga (Sant. 5:14-16). Sojta caj, shumaj yarpachacunman imatapis mana rurananpaj warminta yapay manana magananpaj o nanaparaylapa manana parlananpaj. Chaynolami ruranman pornografiata yapay manana ricananpaj. Mana ali rurashganta jaguirinanpaj calpachacuptenga Jehovami bendecinga (Sal. 37:5). Caycama yachacushcanchi maja cajcuna warminta mana nacachinanpaj. Chauraga ¿imata sí ruranman warminta respetar cushichinanpaj? Canan chaypita yachacushun.

IMANOPATAJ WARMIQUITA CUYAPAR RESPETANQUIMAN

15. ¿Imata rurartaj maja cajcuna warminta cuyapaylapa tratanman?

¹⁵ Cuyapaylapa tratay. Waquin majacuna warminta cuyapaylapa trataptin ishcancuna cushishgala cawacärin (1 Juan 3:18). Maja cajcuna warminwan jancharashga  purinman, cuyapaylapa macalacunman, jina waytatapis apanman, y cayno parlapanman: “Hija, ¿micushcanquinacu?” o “warmilä, ¿imanolataj caycanqui?” nir. Maja cajcuna cayta rurapäcuptin warmin musyanga respetashganta y cuyashgantapis, chaynopa casado vidancho cushishgami cawapäcunga.

16. ¿Imanirtaj runaga warminta alabar agradecicunman?

¹⁶ Ali rurashganpita shongupita agradecicuy. Maja cajga warminta alabaptin alapa valuryoj cashganta musyachicun. Runaga “ali aroj warmi canqui” o “alitami rurashcanqui, graciaslä” nirmi warminta cuyacuywan agradecicun (Col. 3:15). Maja cajga shongupita cuyacuywan agradecicuptenga warminga respetashga y cuyashga sienticunga (Prov. 31:28).

17. ¿Imata rurartaj runaga warminta cuyar respetanman?

¹⁷ Warminta cuyashpan respetanmanmi. Runaga warminta cuyarga valuranmi, Jehovapa bendiciunnintano ricanman (Prov. 18:22; 31:10). Runaga warminta cuyanman, respetanman y cuidanman punushgan horachopis. Chaymi warminta manami obliganmanchu mana munashganta rurananpaj ojlanacuy horacho y concienciantapis respetanmanmi. f Paypis calpachacunman ali concienciayoj cananpaj Jehovapa ricaynincho (Hech. 24:16).

18. ¿Imatataj ruranman maja cajcuna warminta respetananpaj? (“ Maja cajcuna imacunata ruranman warminta respetananpaj” nej recuadrutapis ricay).

¹⁸ Maja cajcuna, Jehovami ricaycan y valuranmi warmiquita cuyapaylapa respetuwan tratashgayquita. Y yarpaylapis yarpanquimanchu warmiquita mana ali tratanayquipaj, sinoga cuyacuywan y respetuwan tratanquiman. Majayoj cajcuna, warmiquita cuyapar respetaptiqui Jehová sirvishgayquitapis chasquingami (Sal. 25:14).