1. ¿Canan wichan runacuna imamantaj más yarparcaycan?

 CANAN wichan maychicaj runacuna quiquincunalaman yarpar alilata rurashganpita internetcho churapäcun ali ricashga cananpaj. Diostami ichanga mana alabapäcunchu. Caycho yachacushun imanirtaj y imanotaj Jehovata alabashun. Jina yachacushun Jehovalami alabashga cananpaj merecin, chaymi ichiclachona quiquinmi jutinta respetachenga.

¿IMANOTAJ JEHOVATA ALABASHWAN?

 2. ¿Imanotaj Jehová ricächicurgan Sinaí jircacho almiraypaj poderyoj cashganta? (Garancho caycaj dibujutapis ricay).

² Bibliaga wilamanchi Jehová almiraypaj poderyoj cashganta. Chaynomi cargan Jehová israelitacunata Egiptupita jorgaramuptin. Paycunashi Sinaí jircapa chaquincho juntarashga carcaycaptin yanauyayparaj pucutaypis chapacurcurgan, chay horashi ilajpita Pachapis manchariypaj cuyurgan, jircapita goshtay sharcurgan, rayupis pashtamurgan y elguypis ricacurgan. Wagrapis fuertipa tucamushganta mayacämurgan (Éx. 19:16-18; 24:17; Sal. 68:8). Israelitacuna caycunata ricar almirashga sienticurgan Jehová alapa poderyoj cashganpita.

 3. ¿Imanotaj Jehovata alabanchi?

³ Taytalanchi Jehová alapa poderyoj y cuyapacoj caycan. Pay imano cashganpita waquincunata wilapaptinchi alabaycanchi. Jina imaycanopa yanapämashganchipita agradecicuptinchi Jehovata alabanchi (Is. 26:12). Chaynomi rey David rurargan israelitacunapa  naupancho cayno mañacur: “TAYTA DIOS, qamlami lapanpaq munayniyuq kaykanki. Qam japalaykita pïmaypis alabaykuläshunki. […] Jana patsapis, kay patsapis y lapan imaykapis qampami kaykan”. Mañacur usharcuptinmi lapan chaycho caycajcuna Jehovata alabapäcurgan (1 Crón. 29:11, 20).

 4. ¿Imanotaj Jesús Taytan Jehovata alabargan?

⁴ Jesús cay Pachacho caycar Taytanta alabar imaycacunata rurargan. Ima milagruta rurarpis paymi nej Taytanpa poderninwan rurashganta (Mar. 5:18-20). Taytanpita parlar y waquincunata imano tratashganwan Papäninta alabargan. Juc cuticho sinagogacho Jesús yachaycächiptin wiyaycajcunacho juc warmi supayraycu curcuyächishgan caycargan. Payshi mana derechayta puedirganchu, 18 wata nacaycargan. ¡Chayga alapa laquicuypächi cargan! Jesús nacaycashganman yarpar cuyapaylapa cayno nergan: “Kananqa aliyashqanami kaykanki”. Jesús payman maquinta churarcuptin jinan hora derecharcurgan y Jehovata alabar galaycurgan (Luc. 13:10-13). Chay warmi Jehovata alabargan saludninta aliyächishganpita, noganchipis payta alabashun.

¿IMANIRTAJ JEHOVATA ALABANCHI?

 5. ¿Imanirtaj Jehovata respetanchi?

⁵ Jehovata alabanchi shongupita respetarmi. Jehovaga manami imaypis uticanchu, pay poderyoj captinmi respetananchi (Sal. 96:4-7). Lapan camashgancunacho ricacämun yachaj cashganmi. Paypita caway shamun, y cawananchipaj imaycatami gomanchi (Apoc. 4:11). Jehovaga imaypis jaguimanchichu (Apoc. 15:4). Lapan nishganta cumplinmi, y lapan rurashganga alimi yargun (Jos. 23:14). Chaymi profeta Jeremías Jehovata cayno nergan: “TAYTA DIOS, qamnöqa manami pipis kantsu. […] May nacioncho yachaq runapitapis mas yachaqmi kaykanki. Pïmay reypitapis mas munayniyuqmi kaykanki” (Jer. 10:6, 7). Lapan rurashganpita y imano cashganpita Jehovata alapa respetanchi. Pero manami respetanchilachu, sinoga shongupita cuyanchi.

 6. ¿Imanirtaj Jehovata cuyanchi?

⁶ Jehovata cuyashpanchimi alabanchi. Pay imano cashganman yarpar masraj cuyanchi. Payga cuyapäcojmi, pacienciacojmi y perdunacojmi (Sal. 103:13; Is. 49:15). Laquicuptinchi paypis laquicun (Zac. 2:8). Achca publicaciuncunatami camaripämanchi Payta shumaj reguir amigun canapaj (Sal. 25:14; Hech. 17:27). Y humilde cashpan cielupita unchurcamun ali shongu y humilde runacunata yanaparcunanpaj (Sal. 113:6, 7). ¡Chayno Dios captinmi alabayta munaycunchimi! (Sal. 86:12).

 7. ¿Imata rurartaj Jehovata alabanchi?

⁷ Jehovata alabanchi runacunata yachachicuptinchimi. Chiquicoj Diabluga runacunata engañan Jehovapita lutanta yarpänanpaj (2 Cor. 4:4). Diabluga runacunata creichin Jehová mana ali Dios car runacunata nacaycächishganta. Noganchicuna ichanga rasunpa cajta musyanchi, chaymi  Taytalanchi Jehovapita rasunpa cajta runacunata yachachiyta munayculanchi, payta alabanapaj (Is. 43:10). Salmo 96 texto parlamun Jehovata alabanapaj, y canan waquin versiculucunata tantiarcushun Jehovata más aliraj alabanapaj.

¿IMANOTAJ MÁS ALIRAJ JEHOVATA ALABASHWAN?

 8. ¿Imanotaj Jehovata alabanchi? (Salmo 96:1-3).

⁸ (Leiriy Salmo 96:1-3). Parlashganchiwanpis Jehovata alabanchimi. Salmo textucho nimanchi Jehovata cantar alabanapaj, jutinta jogarir alabanapaj, salvacoj Dios cashganta ali wilacuynincunata wilacunapaj y munayniyoj Dios cashganta wilacunapäpis. Chaycunata rurarmi Jehovata alabanchi. Unay Jehovata sirvejcuna y apostulcuna cawashgan wichan cristianucunapis Jehovapa jutinta jogarir defendipäcurgan y alita rurashganpita waquincunatapis wilacurgan (Dan. 3:16-18; Hech. 4:29). Paycunano canapaj, ¿imatataj rurashwan?

9, 10. ¿Imataj yachacunqui Angelina pasashganpita? (Fotutapis ricay).

⁹ Estados Unidos naciunpita Angelina jutiyoj cristianapita parlarcushun. a Mushoj aruynincho caycaptin aroj masincunawan reguinacärinanpaj juc reuniunmi cargan. Paymi hermanucunawan cushishga caycashganta shumaj fotucunata acrargan, aroj masincunata ricachir chaypita parlapänanpaj. Shuntacashgan hora manaraj parlaptin, juc aroj masin wilacurgan wamra cashganpita Testigucunata reguishganta, y Jehovapita mana alita parlar burlacurgan. Chay horacho Angelina pasaypa manchacar yarpargan: “¿Cananga Jehovapa jutinta defendishäcu o manacu?” nir.

¹⁰ Angelina shongulancho Jehovata mañacurgan, nircur mana rabiacuylapa payta cayno nergan: “Gamno nogapis wamra cashgäpita Testigucunata reguirgä y chaypita canancama Jehovapa testigunmi caycä”. Chayno parlaptin aroj masinga rabiacurgan. Angelina  ichanga mana rabiacuylapa parlapargan Jehovapa testigunno alicunata rurashganpita, fotucunata ricachergan cushishga caycashganta (1 Ped. 3:15). Parlar ushariptin aroj masin manana rabiacurgannachu y reconocergan Jehovapa testigun car alicunapa pasashganpita. Chauraga Angelina cushicurgan y payga nin: “¡Jehovapita rasunpa cajta parlarga y jutinta defendirga alapa ali caycan!”. Alichi canman noganchipis pipis Jehovapita mana ali parlaptin paypa jutinta jogarir defendinanchipaj.

11. Salmo 96:8 texto nishganno unaypita canancama, ¿imanotaj Jehovapa sirvejnincuna charashganchicunawan yanapacunchi?

¹¹ (Leiriy Salmo 96:8). Ali charashganchicunawan Jehovata alabanchimi. Jehovapa sirvejnincunaga imaypis alinnin cajcunawan yanapacärejmi (Prov. 3:9). Unaychoga israelitacuna templuta sharcachinanpaj voluntäninpita apapäcurgan gorita y imayca alinnin cajcunatapis (2 Rey. 12:4, 5; 1 Crón. 29:3-9). Waquin Jesuspa discipuluncuna guellayninwan payta y apostulnincunatapis yanapacurgan (Luc. 8:1-3). Punta caj cristianucuna wichancho, muchuy captin imalatapis cashganlapita shuntarcur cristiano masincunaman apachicurgan (Hech. 11:27-29). Canan wichanpis chaynolami guellayninchiwan aycalawanpis yanapacunchi.

12. ¿Imanotaj guellayninchita apachicur Jehovata alabanchi? (Fotutapis ricay).

¹² Guellayninchiwan hermanunchicunata yanapacuptinchi Jehovata alabanchi. Ricärishun ima pasashganta 2020 wata Zimbabue naciuncho, mana tamyaptin micuycuna ushacaycarganna. Chay marcacho cawargan Prisca paninchi. Payga miércoles y viernes junaj mana faltaypa predicaj yargoj. Chaymi vecinuncuna payta nej: “¡Muchuy captin micanaypita wanunquipajmi!” nirmi burlacärej. Chayno niptin Prisca paycunata nej: “Sirvishgä Jehová Diosnëga manami cachaycämangachu” nir. Y chaynomi cargan, guellayninchita apachicushganchipita Pushacoj hermanucuna camacächergan chay hermana vivirista chasquinanpaj. Y vecinuncuna chayta ricaycur nergan:  “Rasunpami gamtaga Diosniqui manami cachaycushushgayquichu, paypita yachacuyta munapäcö”. Y ganchis vecinuncuna reuniunman aywar galaycurgan.

13. Salmo 96:9 texto nishganno, ¿imanotaj portacuyninchiwan Jehovata alabanchi?

¹³ (Leiriy Salmo 96:9). Ali portacuptinchi Jehovata alabanchi. Unaychoga sacerdoticuna maylacärej sagrado tolduman y templuman yaycunanpaj (Éx. 40:30-32). Chaynolami noganchipis cuerpunchi limpio canman, y masga ali portacunanchi Jehovapa ricaynincho (Sal. 24:3, 4; 1 Ped. 1:15, 16). ‘Macwa ropata jitarejno unay cawashganchita cacharinanchi’ y Tayta Dios munashganno cawacunanchi. Chauraga mana ali munayninchita y mana ali rurayninchicunata jaguirir mushoj runano ali portacushwan, Tayta Dios Jehová santo y limpio cashganno (Col. 3:9, 10). Aumi, hasta mana ali ruraj runacuna y jucwan jucwan cacojcunapis Jehová yanapaptenga cambiayta puedinmi.

14. ¿Imata yachacunqui Jack pasashganpita? (Fotutapis ricay).

¹⁴ Canan yachacushun Jack jutiyoj runa pasashganpita, payshi pasaypa peliandero y wanuchicoj captin ‘Demonio’ nirpis reguipäcoj. Carcelmanpis apargan y wanunanpaj sentenciashga caycargan. Carcelman juc cristiano yachachicoj aywaptin Jack Bibliapita yachacurgan, tiempuwanna cambiucunata rurargan y Jehovapa testigunno bautizacurgan. Wanuchinanpäna caycaptin ali cambiucunata rurashganpita guardiacunapis wagar-raj paypita despidicurgan. Juc sargentupis paypita nergan: “Unaychoga, Jack pasaypa mana ali runami cargan, canan ichanga más ali runami caycan”. Y Jack wanushganpita juc semana pasarcuptinna chay carcelcho reuniuncunata pushaj hermanucuna juc mushoj runata ricargan, y cay preso runaga nergan: “Noga shamushcä Jack imano cambiashganta musyayta munarmi”. Aumi, ali portacushganchiwan Jehovatami alabaycanchi (1 Ped. 2:12).

 JEHOVÁ IMATA RURANGA ICHICLACHONA JUTIN ALABASHGA CANANPAJ

15. ¿Imatataj Jehová ichiclachona ruranga jutinta respetachir alabashga cananpaj? (Salmo 96:10-13).

¹⁵ (Leiriy Salmo 96:10-13). Salmo 96 cajcho nin Jehovaga mana jananpaypa ali juzgaj Reymi caycan. Paypa jutin alabashga cananpaj Jatuncaray Babiloniata ushacächenga (Apoc. 17:5, 16; 19:1, 2). Lula caj religiuncuna lutanta yachachir Jehovapa jutinta ganratachishganpita ichiclacho ushacächishga canga, chayta pasashganta ricar waquincuna capazchi noganchicunawan Jehovata adurapäcunanpaj decidipäcunga. Armagedón guerracho Jehovapa contrancho cajcuna y chiquejnincuna ushacächishga cangapaj, pero cäsucojcuna y Paypa jutinta respetajcuna salvashgami canga (Mar. 8:38; 2 Tes. 1:6-10). Chaypitana Cristo cay Pachata Waranga Watacuna mandashganta usharirna y último caj pruebana pasarcuptinna entero Pachacho quiquin Jehovami jutinta respetachinga (Apoc. 20:7-10). Chay wichan “lamarcho yacu juntarashannömi mundu intëruchöpis TAYTA DIOSTA rispitaj runacunallana aypalla canga” (Hab. 2:14, TDI).

16. ¿Imata ruranayquipaj jinala calpachacuycanquiman? (Dibujutapis ricay).

¹⁶ ¡Mayraj cushicuypaj canga entero munducho Jehovapa jutinta jogarir pay munashganno alabaptinchi! Chay junaj chayamunanpaj cajman shuyaraptinchi Jehovapa jutinta alabanapaj calpachacushwan. Chayman yarparänapaj Jehovapa testiguncunata Pushaj hermanucuna 2025 watapaj Salmo 96:8 textuta acrargan, chaycho nin: “Jehovapa jutinta jogarir adurapäcuy”.