Taytäcunaga manaraj casaracurmi Bibliapita yachacurgan 1920 watacho. Nogaga yurishcä Inglaterra naciunchomi 1939 watacho. Wamrapitami taytäcunawan reuniuncunaman aywaj cä, chaypitami yaycorgä Escuela del Ministerio Teocrático nishganman. Cananyajmi yarpaycä punta caj rurashgä discursüta, 6 watayojlaraj carmi microfunuta manami aypargächo, chaymi juc cajaman wicharcur-raj aypargä discursüta gonäpaj. Mayor hermanucunata ricarmi alapa manchacargä.

Papänëmi juc papelman escribipämargan predicaj yargunäpaj. Puntataga 8 watayojlaraj caycarmi japalä juc wasiman tacacoj aywargä predicanäpaj. Papänë escribipämashga papelta wasiyojta goriptëmi payga leirirgan y rasla chasquiramargan “Sea Dios veraz” nishgan librutapis. Predicaciunman yarguy y reuniuncunaman aywayga alapami cushichiman, chaymi yanapämashga lapan tiempüwan Jehovata sirviyta munanäpaj.

Bibliataga más cuyar galaycurgä Wilacamoj revistacunata chasquir galaycushgäpitami. Chayaycamuptinlami lapanta leir usharej cä. Jehovaman más yaracurmi bautizacurergä.

1950 watachomi taytäcunawan Nueva York marcaman aywapäcorgä “Aumento de la Teocracia” nishgan asambleaman. Jueves junajpa programanpa jutinga “Día del misionero” nejmi, bautizacojcunapäga discursamorgan wawgui Carey Barber. Tiempuwanga pay Jehovapa testiguncunata Pushajninmanmi ticrashga. Discursunta usharirga bautizacojcunata tapupäcamaptinmi  noga ichircur fuertipa “awmi” nirgä. 11 watayojlaraj carpis bautizacuyga alapa importante cashganta tantiargänami. Nädayta mana yacharmi yacuman yaycuytaga manchargä pero tiyömi pushamargan mana manchacunäpaj, chaypitami hermanucunaga macyanacur janchaycur yacuman yaycachimargan, jucnin cajmi bautizamargan jucajnin cajmi jorgumargan. Chaypitami Jehovaga caminunpana pushamashga.

Escuela usharirga precursor caytami munargä, pero profesornëcunaga universidäman aywanapämi nimargan. Paycunata casucurmi universidäman yaycurgä, pero cuentatami gocurergä Jehovata shumaj manana sirvinäpaj cajta. Chaymi universidäpita yargucurergä. Jehovata mañacurirmi alapa respetuwan profesornëcunata nirgä manana aywanapaj cajta, chaypitaga Jehovaman alapa yaracurmi precursor cayta galaycurgä.

Precursor cayta galaycorgä 1957 watachomi, julio quillacho. Chaypitami Londres marcacho Betelcho aroj hermanucunata mañacorgä juc yachaj mayor hermanuwan predicaj mandamänanpaj. Chaypitami Bert Vaisey wawgui alapa yanapämashga y más predicanapaj tiempöta shumaj camacächinapäpis yachachimashga. Congregaciunchoga carcaycargä sojta chacha panicuna, wawgui Vaisey y nogalami. Reuniuncunapaj preparacushgaga y chaycho parlapacushgaga alapa yanapämashga Jehovaman más yaracunäpaj y payta alabanäpaj.

Soldado cayta mana munashgäpita carcelcho wichgaramashganpitanami, 1959 watacho pani Barbarawan casaracurergä. Payga precursora especialmi cargan, y maychopis Jehovata sirvipäcunäpämi listo carcaycargä. Puntataga Inglaterra naciunpa Lancashire nishgan marcanmanmi mandapäcamargan. Chaypitami 1961 watacho Escuela del Ministerio del Reino nishganno juc quillapa aywapäcurgä. Manami shuyarargächu escuela ushariptin congregaciuncuna watucacojno canapaj churamänanpaj cajta. Chaypitami juc más yachaj watucacoj wawguita yanapänapaj aywapacorgä warmïwan ishcäcuna. Nircurnami Lancashire y Cheshire mandapäcamashgan marcacunaman aywapäcurgä.

1962 watachomi Betelpita juc cartata chasquipäcorgä escuela de Galaad nishganman aywapäcunäpaj. Barbarawan ishcäcuna Jehovata mañacurirmi chay cartata escribirirga jinan hora Betelman cutichipäcorgä. Chaypita pichga quilla pasariptinmi Nueva York marcaman viajapäcorgä, clase 38 de Galaad nishgancho canapaj chunca quillacunapa.

Chay escuelachoga yachacärishcä Jehová Diospa Palabranpita, marcan  imano churanacushga caycashganpitami y entero munducho hermanucuna imano Diosta sirvir caycashganpitami. Nogaga 24 watayojlarämi cargä y Barbaranämi 23 wata, chaymi alapa yachacärishcä waquin hermanucunapita. Nogaga alapami cushicö wawgui Fred Ruskwan arushgäpita. Payga pitapis consejarga imaypis Bibliawanmi consejaj, chaytami nogapis yachacushcä. Chay escuelacho yachachicamoj wawguicunaga cargan Nathan Knorr, Frederick Franz y Karl Klein wawguicunami. Y imano shumajmi y humilde cayta yachacushcä Alexander Macmillan wawguipita. Payga juc shumaj discursuwan yanapämashga tantianäpaj 1914-1919 watacho marcanta Jehová imano pushashganpita.

Clasecuna ushaycaptinnami Nathan Knorr wawgui nimargan nogawan warmïtapis África naciunpa Burundi nishgan marcaman aywapäcunäpaj. Chaymi jinan hora sharcurcur corrilapa aywargä Anuario librucho ashej chay marcacho ayca hermanucuna cashganta musyanäpaj, pero manami tarirgächu. Chaymi cuentata gocurirgä chay sitiuchoga ni pipis imaypis mana predicashga cashganta. Chaymi manchacärergä, pero Jehovata mañacuriptëmi yanapämashga alapa mana manchacänapaj.

Chay tashgä sitiuchoga lapanpis jucnomi cargan, tiempupis, costumbrincunapis, idiumancunapis jucnomi cargan. Cananga francés idiumatanami yachacunä cargan; y tänapaj juc wasitapis tarinami cargan. Chayashgäpita ishcay junaj pasiriptinmi Zambia naciunman sirvej aywaycaj wawgui Harry Arnott yanapämargan juc wasita tariyta. Chaycho tiyarmi galaycurgä. Chaypita Jehovata cushichir galarcaycaptë, Jehovapa testiguncunata mana reguej chay jinan autoridäcuna, arunapaj permisuta mana tarirga chaypita aywacunapaj nipäcamargan. Chaymi Uganda naciunmanna aywacärergä.

Chay Uganda naciunman yaycunapaj permisucuna mana captinmi alapa manchacorgä, pero Jehovamanmi yaracärergä. Chaymi chay jinancho taj hermano juc policiawan nogacunapita parlapäriptin, permitimargan achca quillacunapa quedacunapaj, chay naciuncho tänapaj permisuta  tarishgäcama. Chaychomi ricashcä Jehová alapa yanapäcamashganta.

Cay Uganda naciunchoga predicaciunga galaycushganami cargan, y entero naciuncho 28 testigucunalami cargan. Chay sitiuchoga achca runacunami inglés rimayta parlapäcoj, pero nogacunaga rasunpaypa runacunata Jehovapa amigun cananpaj yanapayta munarga, quiquincuna parlapäcushgan idiumatami yachacunä cargan. Chaymi nogacunaga decidirgä Kampala sitiucho parlashgan luganda nishgan rimayta yachacuyta. Achca watacunaran pasashga chay rimayta shumaj parlapäcunäpäga. Pero shumaj parlayta yachacuriptëga runacunaga nogacunamanmi más yaracamoj y Bibliata estudiaj imano sienticushgantami wilapämaj. Chaynopami nogapis cuentata gocoj cä Jehovapa amigun cananpaj imata necesitashganta y chaynopa imano yanapänäpaj cajtapis.

Alapami cushicurgä humilde runacunata Bibliapita yachachir, pero masmi cushicurgä entero naciunpa predicaciunta necesitaj sitiucunata ashej aywapäcunäpaj Keniapita sucursal mandapäcamaptin, chay sitiucunaman precursor especialcunata mandananpaj. Waquin sitiucunacho Jehovapa testiguncunata mana reguiycarpis, chay runacunaga alapa cuyacuywanmi imayca familiantano chasquipäcamargan micuynincunapis garamargan.

Chaypitanami trenwan ishcay junajpa viajar siguirgä, Kampalapita hasta Mombasapa puertuncama, Keniacho. Chaypitanami jina océano Índico nishganpa barcuwan aywargä islas Seychellescama. Chay ichic tiemputanami 1965-1972 watacama Barbarawan ishcäcuna chay sitiucunata watucargä, chay sitiuchoga ishcay publicadurcunalami cargan; tiempuwanga juc grupumanmi ticrashga, chaypitanami juc congregaciunman. Chaypitaga viajarmi siguishcä Eritrea, Etiopía y Sudán naciuncunapa waquin hermanucunata watucanäpaj.

Uganda naciunchoga militarcunami gobernaj yaycurirgan chaymi achca watacunapa mancha manchala cawapäcoj cä. Chaychomi cuentata gocurergä “Cesarpa cajtaga Cesarta goycuy” Biblia nishganta casucuy alapa importante cashganta (Mar. 12:17). Juc cutichomi, lapan chay naciunpita mana cajcunataga nipäcamargan juc comisariaman anotacoj aywapäcunäpaj, nogacuna jinan hora anotacoj aywapäcurgä. Chaypita waraynincuna juc misioneruwan carruwan Kampala marcapa aywarcaycaptëmi policiacuna päraramargan, shongücunapis “trass” nirganmi. Nogacuna gobiernupa contran carcaycashgäta y marcanta ricapacoj aywashgäta nipäcamargan, nogacuna misiunero capäcushgata nipäcuptëpis manami casupäcamarganchu y juc comisariamanmi apapäcamargan. Chay comisariacho anotamaj policía reguiramarmi libre cacharimargan, chaychoga cushinärirgämi.

Chay wichanga carreteracunacho achcami caj controlacoj policiacuna, chaymi alapa manchacuypa caj y masga soldaducuna shincashga carcaycaptin. Chaymi imaypis Jehovata mañacärej cä y pasarirga alapami  cushicärej cä. Chayno captinpis 1973 watachoga juc-lä naciunpita cajcunataga lapäcunata gargupäcamargan Uganda naciunpita.

Chaypitaga Costa de Marfil nishgan marcamanmi mandapäcamargan, chaychoga costumbrincunapis jucnomi cargan y francés rimaytanami yapay yachacänä cargan y juc-lä naciunpita misiunerucunawan cawaytapis yachacänä cargan. Ali shongu runacuna Jehovapa wilacuyninta wiyacuptinmi cuentata gocurgä Jehová yanapaycämashganta.

Barbaraga ilajpitami cancerwan gueshyarirgan, chaymi yapay yapay aywapäcorgä Europapa jampita ashir, pero 1983 watachomi payga masna gueshyacuycorgan. Chaymi Costa de Marfil marcachoga quedacuyta puedipäcorgänachu, chaypita aywacuptëga imanomi ishcäcunapapis shongücuna nanaycamarganraj.

Londrespa Betelnincho carcaycaptënami Barbaraga wanucurgan. Chaychoga Betelcho aroj lapan hermanucuna alapa yanapämashga, juc matrimoniumi imaycacho yanapämashga Jehovaman yaracur siguinäpaj. Chaypita tiemputaga Betelcho yanapacoj Ann panitami reguirergä, payga precursora especialnomi yanapacushga cargan y Jehovata alapami cuyaj. Chaymi 1989 watacho paywan casacurergä. Chaypitaga Londrespa Betelninchomi ishcäcunapis yanapacur carcaycä.

1995 watapita 2018 watacamaga Jehovapa testiguncunata Pushajcuna trucannomi aywapäcurgä 60 naciuncunapa Betelcunata watucaj. Chaychomi ricashcä Jehovapa siervuncuna imaycapa pasaptinpis payga bendecishganta.

Chayno watucacur purishgächomi 2017 watacho Africaman yapay cutishcä, imano cushicuypämi cashga cananga chaycho maychicaj hermanucuna mirashgantana musyay, y Ann warmïtapis chay naciunta reguichiy. 1964 watacho noga wasin wasin predicar purishgächomi cananga juc shumaj Betel wasi can, chaypitami 15.500 hermanucunata chay naciuncho yanapan.

2018 watacho Costa de Marfil naciuntapis watucanäpaj cajta musyarirga alapami cushicorgä. Abiyán marcaman chayarirga imayca marcächonomi sienticorgä. Chaypita Betelcho lapan aroj hermanucunapa numerunta ricapaycashgächomi posadacushgä cuartupa nawpancho hermanupa jutinga, unay caycho sirvishcä wichan watucacoj wawguipa jutinno cargan, chaymi paychari nirgä, pero manami paychu cargan sinoga wamranmi cargan.

Jehovaga awnicushganta cumplishgami. Chayno ilajpita desgraciacuna pasamashganchomi yachacushcä payman yaracuptiquega payga caminunpämi pushashunqui. Lapan shongüwanmi munaycö mushoj Pachaman chayachicoj nänipa aywayta siguinäpaj, chaycho cawayga alapa shumajmi (Prov. 4:18).