1, 2. ¿Mateo 5:11 textuga wilacuycan, imaycacunapa pasar laquishgala caycänapaj? Tantiachicamuy.

CUSHI cushila cawapäcunanpämi gatejnincunata Jesús nirgan. Pero öraga Jesusta cuyashganchiraycur imaycacunapa pasanchi, caypitapis Jesús wilacurganmi (Mat. 10:22, 23; Luc. 6:20-23). Waquincunaga masraj chiquimanchi Diosta sirvishpanchi, achca marcacunachomi gobiernucunaraycur hermanunchicuna nacarcaycan, wamracunatapis escuelancho nacachipäcun. Pero ima cacuptinpis cushi cushilami Jesús rurashgannola rurayta munanchi.

² Laquesapami canman pipis alapa chiquimaptinchi, pero chaypa pasashganchi hora ¿cushicurcushwanchuraj? Diospa Palabranga nimanchi: awmi. Santiago libruga nin cushicarcäriy imayca laquesapa pasashgayqui hora (Sant. 1:2, 12). Jesuspis nirgan cushicuyninchita mana ogranapaj pï chiquicojpis contranchicho shapäcamuptin (leiriy Mateo 5:11). Imacunapis pasamäshunmi cay caway vidachoga, ¿imanotaj shongunchicho cushicurcushwan chaypa pasarga? Santiago ima wilacushganta ricärishun caypita yachacunapaj. Nawpataga chay wichan imacunapa pasapäcushganta musyaycushun.

3. ¿Imataj pasargan Santiago cristianuman ticrarishgan wichan?

³ Santiago cristianuman ticrarishgan wichanlami, Jerusalencho caycaj cristianucunata chiquir y atacar galaycärergan (Hech. 1:14; 5:17, 18). Estebantapis wanuchipäcorgan  y “Jesusman yäracojcuna mashtaypa-mashtar” aywacärergan. Waquincunash chayapäcorgan Chipre y Antioquía marcacunaparaj (Hech. 7:58–8:1; 11:19). ¡Imanoraj cay cristiano masinchicuna nacapäcorgan! Chayno captinpis, alapa aliga caycan may chaycho Diospita yachachicur cashgancunami. Awmi, congregaciuncunash quichacämorgan chayashgan marcacunacho (1 Ped. 1:1). Pero más problemacunaga yurimushgarämi.

4. ¿Ima laquesacunapataj pasargan unay cristianucuna?

⁴ Unay cristianucunaga calpachacärirganmi imaycata aguantapäcunanpaj. ¿Manachu 50 wata wichan Romacho autoridäyoj Claudio gargurgan lapan judiucunata? Awmi, chay judiucunaga wasincunata jaguiycurmi aywacärergan juc laducunapa (Hech. 18:1-3). 61 wata wichanpis, apóstol Pablo wilacorgan chiquicojcuna imaycata rurashganta hermanunchicunata: ashlipäcurganshi, wichgapäcurganshi y suwapärganshi charashgancunatapis (Heb. 10:32-34). Imalawanraj cawapäcorgan, gueshya imapis carganchi (Rom. 15:26; Filip. 2:25-27).

5. ¿Ima tapucuycunapitataj yachacushun?

⁵ Manaraj 62 wata chayamuptinmi Santiaguga cartanta escribergan y musyarganmi imacunapa cristiano masincuna pasaycashganta. Chauras Jehovapa yanapacuyninwanmi shumaj cartata ruraycorgan, chaycho parlaj imano cushicurcunapaj problemacunapa pasarpis. Mä ricärishun imacunata escribishganta y cay  tapucuycunatapis ricaycushun: ¿imano cushishga canapätaj parlaycargan Santiago?, ¿imanotaj juc cristiano cushicuynin aywacunanta jaguiycanman? y ¿imanotaj yachaj runa, yaracoj y mana manchacoj cashganchi yanapämashwan imaycacunapa pasashganchi hora?

6. Lucas 6:22, 23 nishganno, ¿imanirtaj juc cristiano cushishga caycanman ima pruebacunapa pasarpis?

⁶ Waquincunaga ninman ‘nogaga cushishga cacö guellaynï captin, umäpis shongüpis ali captin y familiäwan ali cawacurmi’. Pero Santiaguga parlaycämurgan Diospita shamoj cushicuypitami (Gál. 5:22). Rasunpaga cushicunchi Jehovapa nawilancho ali caycarmi y Jesús cawacushgannola cawacurmi (leiriy Lucas 6:22, 23; Col. 1:10, 11). Imanomi wayrapis tamyapis mana upichinanpaj ninata chaparcunchi, chaynolami shongunchipita cushicuyninchi mana upicänanta jaguinchichu. Achquinopis achquiraycanla ima gueshya captinpis, guellay mana captinpis o familianchi o pï chiquicojpis contranchicho sharcurcuptin. Diospita cushicuyninchi shamuptinga, masraj cushicurcunchi imayca desgraciacunapa pasarpis. Y chaychomi ricacan rasunpa cristiano cashganchipis (Mat. 10:22; 24:9; Juan 15:20). Cayno Santiago nishganga rasunpami caycan: “Ima ñacayman chayarpis ama llaquicuychu; chaypa ruquenga cushisha goyay” (Sant. 1:2, TDI).

7, 8. ¿Imanotaj yaracuyninchi caycanga pruebacunata aguantarga?

⁷ Mastarämi Santiago parlaramun imanir jatun pruebacunata aguantanapaj. Nin: “Ñacaycunata päsar-rämi yachacunchi llapan shongunchïwan [...] yäracuyta” (Sant. 1:3, TDI). Ninawanrämi herramientacunata ruranapaj pucatay pucataymanraj acarcachinchi, gasarcuptinga chay herramientaga pasaypa chucrucäcurinna. Chayno nina japuymi pruebacunapis canman, aguantarga, yaracuyninchiga sinchiyarcungami. Chaychi Santiagupis cayno wilacamurgan: “Mana yamacaypa ima desgraciacunatapis aguantaycäshun, chaynoparaj ali yaracoj runaman ticrashun” (Sant. 1:4, TNM). Chayno captinga cushi cushila aguantaycäshun imayca pasashganchicunata.

⁸ Santiaguga jina parlarganmi imanir shongunchipita cushicuyninchi aywacunman. ¿Imanirtaj chayga pasanman, y imatataj rurashwan?

9. ¿Imaraj yanapämäshun ‘imataraj rurashaj’ nishgaga?

⁹ Imapis pasaptin ‘imataraj rurashaj’ ninchimi. Ali cajcunalata ruraytami imaypis munanchi, chaymi imacunapapis pasarga Jehovata ruwacunchi (Jer. 10:23). Imata ruranapaj, maypa aywanapaj, lapanta wilapanchi payta, ¿Diosga yachayninta goycamashwanchuraj? Yachaj runa carga musyashunmi imano waquincunawan parlaytapis. Imapis cushicuyninchitaga apacunmanchu, öraga imacunapis laquichimäshunmi, chayno carga, yargushun chaypita, chaylacho cacushunchu.

10. Santiago 1:5 nishganno, ¿imatataj rurashwan yachaj runaman ticranapaj?

¹⁰ Cayta rurananchi: Jehovapa yachayninpaj ruwacushwan. Mana alapa laquicuypa pruebacunata aguantanapäga Taytalanchi Jehovata ruwacushwan yachaj runaman ticrachimänanchipaj (leiriy Santiago 1:5). Öraga manami juclachu yachaj runaman ticrashun. Pero cutin cutin mañacuycäshun, chaytami Biblia nin, y Diosga manami piñacungachu chaynola cada cadala ruwacuycarga. Imay hora tantiashgan junajmi Diosga goycalämäshun mañacushganchicunata (Sal. 25:12, 13). Payga ricaycämunmi imacunataj nacaycächimanchi y yanapämäshunmi. Cushicuypämi chayno captinga. Pero ¿imanotaj Jehová yachayninta goycalämanchi?

11. ¿Imatataj rurananchi yachaj runaman ticranapaj?

¹¹ Bibliata leirmi rasunpa yachayta tarinchi (Prov. 2:6). Chauras shumajmi leipänanchi y estudiapänanchi, y más folletucunapis librucunapis caycan. Y yachacushganchicunaga manami  umanchilachochu caycanman, cawayninchomi ricacämunman. Santiago librucho cayta tarinchi: “Wiyashallanchïwan cuntintacorga quiquillanchïmi engañacuycanchi” (Sant. 1:22, TDI). Diospa Palabran nishgannola cawacurga ñanpu shongu y ali geniuyoj runa cashun (Sant. 3:17). Chayno runaman ticrarga ima pruebatapis ganas ganasla aguantashun.

12. ¿Imanirtaj Bibliapitaga shumajraj yachacunanchi?

¹² Bibliaga espejo japuymi shumaj ricacächimanchi imano runa canapaj o imano runaman ticranapaj (Sant. 1:23-25). Imano cashganchita Bibliacho ricacorga ichanga cuentata gocushwan jucla piñacoj runa cashganchita. Imanomi chay hora munaycunchi Jehová yanapämänanchipaj, paypa poderninwanga ali shongu runamanna ticrarinchi. Chayno carga, cawayninchicho ima prueba captinpis jauca jaucala caycäshun, shumaj yarpachacur imatapis ruraycäshun (Sant. 3:13). ¡Bibliapita yachacushganchiga imaypis yanapacunmi!

13. ¿Imanirtaj waquin Diospa sirvejninpita yachacunanchi?

¹³ Öra öraga pantacushganchipita yachacushwan chayno captinpis más aliga canman waquincuna pantacushganpita yachacuyga Santiago librucho Abrahán, Rahab, Job y Eliaspita yachacunanpaj nimanchi (Sant. 2:21-26; 5:10, 11, 17, 18). Cay Diospa sirvejnincunapis laquesapa pasacurgan chayno captinpis cushicuyninga aywacurganchu. Noganchipis yachacushwan paycunapita Jehovapa yanapacuyninwan imatapis aguantanapaj.

14, 15. ¿Imanirtaj yaracuyninchi ushacanman?

¹⁴ Jehovaman yaracushganchi ushacanman. Öra öraga Bibliata leirga tantiashwanchu, jina mañacushganchiga Jehová jucno contestashgantapis yarpashwan. Chayno captinga Jehovaman yaracushganchiga ushacanman, paywan amigun cayninchipis (Sant. 1:7, 8). Jina Jehovapa awnicuynincunaman yaracuytapis jaguishwanmi.

¹⁵ Jehová awnishganta cumplinanpaj shuyaraycanganchipita apóstol Pablo parlargan (Heb. 6:19). Juc barco yacucho aywaycashgancho shucucuy captinmi anclaga charan mana cuyunanpaj, pero chay anclapa cadenanga ismushga carga rachicäcurinman anclapita y barcuga talpucanman. Imapitapis seguro mana caycarga ismushga cadenano yaracuyninchi caycanman mana alicunapa pasarga lapan shongunchiwan Jehová awnicushganman yaracushwannachu. Santiago nishganno “Ishcayta yarpaycar [...] gochacho yacuta cuyuchir wac-läman cay-läman wayra pullchajyächishannömi” caycashwan (Sant. 1:6). ¿Piraj chayga munanman?

16. ¿Imatataj rurashwan seguro caycänapaj?

¹⁶ Cayta rurananchi: yaracuyninchita aliyächishun. Chaynochuraj o manachuraj ama nishunchu. Elías profeta cawashgan wichan, israelitacuna chaynomi capäcoj, paycunata Elías nirgan: “Gamcuna ¿imaycamataj wichaypa uraypa yarparcaycanqui? TAYTA DIOS rasunpa Dios captenga payllata adurar rispitay-llapa. Baal dios captenga chay cajta rispitay” (1 Rey. 18:21, TDI). Chayno mana pasamänanchipaj alimi yachacunanchi Jehovapita, Palabranpita y rasunpa sirvejnincuna cashganchipita (1 Tes. 5:21). Chayta rurashgaga yaracuyninchi aliyächinga;  ancianucunapis yanapämashwan imatapis mana tantiaptinchi, cushi cushila Jehovata sirvinapäga chaytaga rurananchi.

17. ¿Imataj pasamashwan alapa laquicuptinchi?

¹⁷ Alapa laquicuptinchi. Bibliaga nin: “¿Nacaycunapa pasar alapa laquicunquichu? Calpayquipis cangachu” (Prov. 24:10, TNM). Chauras calpanchiga mana captinga cushicuyninchipis ushacäcurinman.

18. “Aguantanapaj” nirga, ¿imapitataj parlaycanchi?

¹⁸ Cayta rurananchi: Jehová calpata gomänanchipaj yaracushun. Calpata necesitanchi imatapis aguantanapaj (Sant. 5:11). “Aguantanapaj” nirga mana yamacaypa caycänapaj niycanchi, imayca juc soldaduno contrancuna atacaycaptinpis guepaman cutinchu.

19. ¿Imataj yachacunchi apóstol Pablupita?

¹⁹ Apóstol Pablo imacunapa pasarpis calpaynaj caycarpis Jehovaman yaracushpanmi calpata charargan imatapis aguantananpaj, valientipis cananpaj (2 Cor. 12:8-10; Filip. 4:13). Noganchipis payno cashwan, Jehovaman yaracushpanchi calpata charashun imatapis aguantanapaj (Sant. 4:10).

20, 21. ¿Imata rurayta gongashwanchu?

²⁰ Ama imaypis yarpashunchu Jehová nacachimashganchita. Santiago wilamanchi: “Nacaycunapa pasarga ‘Dios nacaycächiman’ ninquichu, Tayta Diosga nacachiytapis yarpanchu. Pitapis manami nacachinchu” (Sant. 1:13, TNM). Chayta yarpashgaga Taytalanchi Jehovaman lapan shongunchiwan yaracushun (Sant. 4:8).

²¹ Jehová “imaypis kashqalanmi kaykan” (Sant. 1:17). Unay cristianucunata yanapashgannola noganchitapis yanapämäshun ima nacaycunapis aguantanapaj. Jehovata ruwacushun yachayta, valurta, yaracuytapis gomänanchipaj. Payga wiyamäshunmi, chauras yanapämäshun ima nacaycunapa pasarpis cushishgala caycänapaj.