1. Juc pani casaracuyta munarga, ¿imacunamantaj yarpachacunman?

CRISTIANUCUNAGA Jesusta casucunanchi, alapa ali cashpanmi payta casucuyga manami sasachu. Ichanga juc warmi casaracuptin öra öraga runanta casucunanta sasa canman. Chaymi juc pani casaracuyta munarmi cayno yarpanman: “¿Cay turiga ali maja cangachuraj? ¿Maynachu Jehovata sirviycan lapan shonguwan? Chayno mana captinga, ¿casacurir-rajchuraj chayta ruranga?”. Quiquinpis cayno yarpanman: “Casaracunäpaj, ¿pacienciacoj y yanapacoj warmi cä? ¿Nogapis Jehovata sirviycä lapan shongüwan?” (Ecl. 4:9, 12). Casado vidacho juc warmi cushishga cawacunanpaj canga manaraj casacurir caycunaman yarpachacushganpita.

2. ¿Imatataj canan yachacushun?

² Runanpa maquincho caycar majayoj panicunaga runanta casucärin, ali rurashganpita alapa cushicunchi. Cay yachacuychomi cay tapucuycunapita yachacushun: ¿ima problemacuna canman majayoj panicunapaj?, ¿imanirtaj majayoj warmiga runanta casucunman?; y ¿imatataj majayoj cajcuna yachacunman Jesús, Abigaíl y Mariapitapis?

3. ¿Majayoj cajcuna imacunapa pasanman?

³ Casado vidaga Diospa bendiciunninmi, chayno captinpis juchasapa canchi (1 Juan 1:8). Chaymi Diospa Palabran nin: “Majachacajcuna ñacangami” (1 Cor. 7:28, TDI). Öra öraga majayoj warmicunaga cay problemacunapa pasanman.

4. ¿Imanirtaj majayoj warmicunaga mana valej cashganta yarpanman?

 ⁴ Runanta casucushpanmi warmiga mana valej cashganta yarpanman, Estados Unidos marcapita pani Marisol cayno nin: “Tashgä marcacho warmicunaga nipäcun lapanchopis olgupis warmipis igual capäcunganta. Warmi runanta casucunanta Jehová camacächishganga alipami cashga, chayno captinpis Jehová yarpashganno ruranapaj sasa canman”.

5. ¿Imatataj waquin olgucuna yarpapäcun warmicunapita?

⁵ ‘Warmiga wasilapämi’ ninmi runacuna waquin marcacunacho, waquin olgucunaga chaynomi yarpapäcun warmicunapita. Sudamericapita, Ivón jutiyoj paniga cayno wilacun: “Marcächoga olgu cajcuna puntata micun. Warmi wamracunalata pichananpaj y yanucunanpaj mandapäcun, olgu wamracunata ichanga mamanin y panincunapis pasaypa atiendipäcun, jina nipäcun wasicho ‘rey cashganta’”. Asia marcapita, Yingling jutiyoj panipis cayno nin: “Marcächoga nipäcun warmiga imatapis mana yachacunanpaj y wasicho caj ruraycunalata rurananpaj. Y ima yarpashgantapis ninmanchu olgucuna caycaptin”. Chayno yarpaj runaga warminta mana cajman churaycan y Jehovata Jesustapis casucuycanchu (Efes. 5:28, 29; 1 Ped. 3:7).

6. ¿Imatataj majayoj warmicuna ruranman achca ruraynincuna captinpis?

⁶ Pasaj caj yachacuycho yachacushganchino, familian necesitashganta goycunanpaj olguga calpachacunman y masraj Jehovata familianwan junto sirvipäcunanpaj (1 Tim. 5:8). Chayno captinpis, majayoj warmicunaga cada cadala tiempunta raquinman Bibliata leinanpaj, leishganman yarpachacunanpaj y Jehovata mañacunanpäpis. Öra öraga achca ruraynincuna captinmi sasa canman lapanta rurananpaj. Chayno captinpis chaycunata rurananpaj calpachacunman. Jehovaga munan paywan ali amigo canapaj lapanchi calpachacunanchipaj (Hech. 17:27).

7. Runanta casucunanpaj y respetananpaj, ¿imatataj majayoj warmicunata yanapanga?

⁷ Majayoj warmicunapäga runanta respetananpaj y casucunanpaj facilchu canman. Chayno captinpis Bibliacho Jehová mandashganpita yachacushganga yanapanga runanta casucunanpaj y respetananpäpis.

8. Efesios 5:22-24 textucuna nishganno, ¿imanirtaj majayoj panicuna runanta casucunman?

⁸ Majayoj panicunaga runanta casucunmi Jehovapa mandacuynin captin (leiriy Efesios 5:22-24). Paycunata cuyashpanmi y majanwan ali cawapäcunanpaj munarmi Jehová chayta camacächishga (Deut. 6:24; 1 Juan 5:3).

9. Majayoj warmicuna Jehová mandashganta ruraptin, ¿imanotaj familianwan goyanga?

⁹ Jehová camacächishga mandamientucuna majayoj warmicuna runanta casucunanpaj. Warmicunata mana cajman churashganta runacuna nipäcun. Chayno yarpaj runacunaga cuyacoj Taytanchi Jehovata manami reguinchu. Jehová warmicunata cuyashpanmi lutanta rurananpaj mandacunmanchu. Majayoj warmicuna runanta casucuptinmi  Jehová mandashganta rurarcaycan, chayta rurananpaj calpachacuptinmi wasincho jauca jaucala familianwan goyangapaj (Sal. 119:165). Runan, wamrancuna y quiquinpis cushishga cawapäcunga.

10. ¿Imatataj yachacunchi pani Carol nishganpita?

¹⁰ Majayoj warmicunaga Jehovata cuyashpanmi y respetashpanmi runan pantarcuptinpis casucunman. Sudamericapita Carol jutiyoj paniga cayno nin: “Runäga imalachopis pantacuringami, noga Jehovata cuyashpä imaypis payta casucuycarla cacushaj, chaymi fácil mana captinpis calpachacö runäta respetanäpaj, chaynopa Jehovata cushichinäpaj”.

11. 1) Aneese panita, ¿imatataj yanapan perdunacunanpaj? 2) ¿Imatataj yachacunchi pay rurashganpita?

¹¹ Warmin yarpashganta y imano sienticushganta mana cajpa runan churaptinga, warminpa sasa canga payta respetananpaj y casucunanpaj. Majayoj pani Aneese cayno wilacun: “Jucla mana rabiacunapaj cayno yarpaymi yanapäman ‘öra öraga lapanchipis pantarcunchimi’. Chaymi imaypis Jehovano perdunacunapaj calpachacö. Chayno ruraptëga cushishgala sienticö” (Sal. 86:5). Majayoj warmicuna perdunacoj cashpanmi runanta casucunga.

12. ¿Pïcunapitataj Biblia wilamanchi?

¹² ‘Lapancho casucoj captiqui upami canqui’ runacuna nipäcun. Manami chaynochu. Bibliaga wilamanchi casucoj runacunapita; casucoj captinpis valiente runacuna capäcoj. Jesús, Abigaíl y María rurashganpita canan yachacushun.

13. ¿Imanirtaj Jesús Jehovata casucoj? Wilacamuy.

¹³ Jesús Jehovapa maquincho caycarmi pay mandashganta imaypis casucun, Taytanta alapa respetarmi chayta ruran, manami upa cashganpitachu.  Payga yachaj runami cargan, chaymi paynoga manami pipis shumaj yachachicurganchu (Juan 7:45, 46). Jehová, Jesús rurashganman yaracurmi cielutapis y Pachatapis camashgancho Jesús yanapänanpaj permitergan (Prov. 8:30; Heb. 1:2-4). Jesusta cawarachimurmi, paypa maquinman “llapantami churasha cay pachacho cajtapis syëlucho cajtapis” (Mat. 28:18, TDI). Alapa yachaj captinpis Taytanta cuyashpan lapan nishgancunata casucurgan (Juan 14:31).

14. 1) ¿Imatataj warmiyoj runacuna yachacärinman Jehovapita? 2) ¿Imatataj paycuna yachacunman Proverbios 31 textupita?

¹⁴ ¿Imatataj warmiyoj runacuna yachacärinman? Jehová camacächishga majayoj warmicuna runanta casucunanpaj, chaytaga mana camacächishgachu runa caj más yachaj captin; chayno captinga Jehová acranmanchu cargan olgutapis warmitapis Jesuswan gobernamunanpaj (Gál. 3:26-29). Jehová Jesuspa maquinman cachapashga Paypa cajcunata ricananpaj, chaynola yachaj runapis warmin wasincho cajcunata ricananpaj cachapanman. Bibliaga wilacun yachaj warmicuna wasincho cajcunata ricapäcunanpaj: chacrata rantishganta, ranticushgantapis, shumaj arushganta y negociuta rurashgantapis (leiriy Proverbios 31:15, 16, 18). Chauras warmi ima yarpashgantapis wilacunman, chaymi runaga warminman yaracurmi warmin nishgantaga cuentaman churanman (leiriy Proverbios 31:11, 26, 27). Runa warminta cuyashpanmi warminga shongupita casucunga.

15. ¿Imatataj majayoj warmicuna Jesuspita yachacärinman?

¹⁵ ¿Imatataj majayoj warmicuna yachacärinman? Lapan rurashganpita y Jehovata lapancho casucushganpita Jesusga mana valejno manami sienticunchu (1 Cor. 15:28; Filip. 2:5, 6). Chaynola Jesusno yachaj warmipis runanta casucushganpita mana valejno sienticunmanchu. Jehovata cuyashpanmi y respetashpanmi runantapis imaycachopis yanapanga.

16. 1 Samuel 25:3, 23-28 textucuna wilacushganno, ¿ima problemacunapataj Abigaíl pasargan? (Garancho caycaj dibujuta ricay).

¹⁶ Abigailpa runanga cargan Nabal. Payga micha, ali tucoj y mana agradëcicoj runami cargan. David soldaduncunawan runanta wanuchinanpäna caycaptinga payga upalala cacunman cargan. Ichanga runanta y wasincho caycajcunata salvananpämi aywargan. ¡Imanoparaj valiente warmi cashga 400 soldaducunapa nawpancho cananpaj y Davidta respetuwan parlapänanpäpis! Runan mana alita rurashganpita quiquin culpayoj cashgantapis nirganmi (leiriy 1 Samuel 25:3, 23-28). Davidga jucla cuentata gocurgan Jehová chay warmita cachamushganta, payta consejananpaj mana alita mana rurananpaj.   

17. ¿Imatataj warmiyoj runacuna yachacärinman Davidpita y Abigailpitapis?

¹⁷ ¿Imatataj warmiyoj runacuna yachacärinman? Abigaíl yachaj warmi cargan. Davidta consejashganga alipami cargan. Chaymi David culpaynaj runacunata wanuchirgannachu. Chaynola warmiyoj runaga warmin yarpashganta  ali ricanman; imatapis manaraj rurar tapupaptinpis alapa alimi canga.

18. ¿Imatataj majayoj warmicuna yachacärinman Abigailpita?

¹⁸ ¿Imatataj majayoj warmicuna yachacärinman? Jehovata cuyaj y respetaj warmiga familianta yanapanman, runan, Jehová mandashganta mana casucuptinpis. Jehová mandashgantaga casucurmi, runanta ima achaquilapitapis mana jaguinmanchu. Ichanga cäsucoj y respetosa warmi canman chaynopa runanpis Jehovapita yachacuyta munananpaj (1 Ped. 3:1, 2). Runan ali ruraycashganta mana valuraptinpis, Jehovaga ali nawilanwanmi ricaycanga.

19. ¿Imachotaj majayoj warmicuna runanta casucunmanchu?

¹⁹ Chayno captinpis runan Diospa leynincuna contran rurananpaj niptinga casungachu. Y ¿imaraj canman runanga lulacunanpaj, suwacunanpaj o ima mana ali rurananpaj niptinga? Runanta casucunan captinpis, caychoga Jehovalatami casucunga. Chaymi runanta cuyaylapa y ali claro wilacunga imanir chaycunata mana rurananpaj (Hech. 5:29).

20. ¿Imanirtaj ninchi María Jehovata ali reguishganta?

²⁰ Mariaga Jehovata y Palabrantapis ali reguejmi, chaymi Juan Bautistapa mamanin Elisabet parlashgancho 20 cutipitapis más Diospa Palabranpita parlargan (Luc. 1:46-55). Musyashganchinopis María Josewan casaracunanpaj caycargan, chayno captinpis Jehovapa angelnin, Mariata puntata yuripargan y wilapargan wamrayoj cananpaj cajta y chay wamra Diospa Churin cananpaj cajtapis (Luc. 1:26-33). Jehovaga Mariata ali reguejmi y segurumi caycargan Churinta cuyananpaj y cuidananpäpis. Jesús wanuptinpis, cielupaj cuticuptinpis Mariaga Jehovata sirviycargan (Hech. 1:14).

21. ¿Imatataj warmiyoj wawguicuna Mariapita yachacärinman?

²¹ ¿Imatataj warmiyoj runacuna yachacärinman? Warmiyojcunaga cushicärin  warmin Diospa Palabranpita ali reguiptinmi y manami yarpanchu warmin paypita más yachaj canganta. Jina cuentata gocunmi warmin Bibliapita y Diospa mandamientuncunapita ali musyashgaga familianpa alimi canga. Y warmin paypita más estudiashga captinpis payga musyan familianwan Jehovata adorapäcunanpaj ruraycunata rurananpaj pay carguyoj cashganta (Efes. 6:4).

22. ¿Imatataj majayoj warmicuna Mariapita yachacärinman?

²² ¿Imatataj majayoj warmicuna yachacärinman? Majayoj warmiga runanpa maquincho caycarpis quiquinpitami canga fënin sinchi cananpaj (Gál. 6:5). Achca ruraynincuna captinpis tiempunta raquinman Bibliapita yachacunanpaj y yachacushganman yarpachacunanpaj. Chaynopa Jehovata cuyananpaj y respetananpäpis calpachacuycan. Jinamanpis runanta casucur cushishgala caycanga.

23. Majayoj warmicuna runanta casucushpan, ¿imanotaj yanapanga quiquincunata, congregaciuncho caycajcunata y familiantapis?

²³ Jehová camacächishga majayoj warmicuna runanta casucärinanpaj. Chayta ruraptinga majayoj warmicuna cushishga cawapäcunga. Jina rurayninwan yanapanga mozucunata, jipashcunata, familianwan ali cawapäcunanpaj, jina congregaciuncho caycajcunawan ali goyänanpäpis (Tito 2:3-5). Canan tiempucho aypala warmicuna Jehovata sirvipäcuycan (Sal. 68:11). Lapalanchi olgu carpis o warmi carpis congregación ruraycunacho yanapacushwan. Gatejnin caj yachacuycho chayta ruranapaj yachacushun.