1. 1) ¿Imanirtaj pilapis consejamashwan? 2) ¿Imanirtaj consejucunata wiyacushwan?

 LAPANCHITAMI consejucunaga yanapämanchi. Öraga quiquinchimi pilatapis ashinchi consejamänanchipaj. O waquincunaga jucha rurayman ishquinapaj caycashganchita ricar, shumaj yarpachacurcur consejamanchi alita ruranapaj (Gál. 6:1). Y öraga juchalicushgana carga pilapis consejamäshunmi. Imano captinpis consejucunataga wiyacushwanmi. ¿Imanir? Consejucunaga bienninchipämi y salvamäshunmi (Prov. 6:23).

2. Proverbios 12:15 nishganno, ¿imanirtaj consejucunata wiyacushwan?

² Proverbios 22:17 consejamanchi yachajcuna wilapämashganchita wiyacunapaj. Cay caway vidachoga lapantaga manami pipis musyanchu, chaymi öraga pilatapis nishwanrämi consejamänanchipaj (leiriy Proverbios 12:15). Chauraga consejucunata wiyacuptinchega ricacämun ñanpu shongu cashganchita y lapanta mana musyashganchita. Jina cuentata gocunchi imatapis shumaj ruranapäga waquincunapa yanapacuyninwanraj cashganta. Chaychi Jehovaga Salomonta cayno escribinanpaj nergan: “Achcaj tantiyachejcuna captinmi ichanga yarpashancunapis alli llojshin” (Prov. 15:22).

3. ¿Imanotaj consejucunata chasquishwan?

³ Consejucunataga tucuynopami chasquinchi, öraga chay consejucunata tarinchi Bibliata o publicaciuncunata leiptinchi. Y chaycunami yarpachacächimanchi Jehovapa ricaynincho  imano caycashganchita y ima cambiucunalatapis rurananchipaj (Heb. 4:12). Jina juc anciano o maygan pogushga hermanulanchi consejamashwanmi imalachopis pantaycashganchipita mejoranapaj. Pipis Bibliawan consejamaptinchega cuyamanchimi. Chauraga consejuncunata wiyacushwan y cäsucushwanmi.

4. Eclesiastés 7:9 texto nishganno, ¿imatataj mana rurashwanchu?

⁴ Öraga pilapis consejamaptinchega piñacunchi y shumaj chasquicunchichu. ¿Imanir? Juchasapa captinchimi. Chaymi imacho pantaycashganchita pilapis nimaptinchega, chasquicunapaj sasami canman (leiriy Eclesiastés 7:9). Jina caynopis yarpashwanmi ‘mozularajmi caycan consejamänanpäga’ o ‘piñapayparaj parlapämaptenga mana wiyaypämi caycan chay consejuga’ nir. Y öraga caytapis nishwanchi ‘rurashgäcunaga imataj paytaga gocun’ nir. Manami chaylachu, consejamashganchita mana cajman churar ‘wiyayta munashgäta juc consejamänanpaj ashicushaj’ nirchi yarpashwan.

5. ¿Imataj cananga yachacushun?

⁵ Canan yachacurishun unaycho pïcunataj consejucunata mana chasquicärerganchu y pïcunataj chasquicärergan. Jina ricärishun imashi yanapämäshun consejucunata chasquicunapaj y imano yanapämashganchitapis.

6. ¿Imatataj yachacunchi Rehoboam rurashganpita?

⁶ Rehoboampita parlarcushun. Rey cashgan wichan marcan masincunashi mañacurgan taytayqui Salomón nacachimashganchino “ama ñacachimaynachu ari” nir. Chaymannashi Rehoboamga tapucurgan ancianucunata y paycunana nergan marca masincuna mañacushganta rurananpaj (1 Rey. 12:3-7). Ancianucuna consejashganta mana cajman churar Rehoboamga winay masincunata ashirgan tapucunanpaj. Paycunaga 40 watayojna captinchi ali consejananpaj Rehoboamga yarpargan (2 Crón. 12:13). Winay masincuna ichanga consejargan taytan nacachishganpitapis peor-raj runacunata nacachinanpaj (1 Rey. 12:8-11). Maygan consejutapis acrananpäga, Rehoboamga Jehovata mañacurganchu. Más gustashgan consejutami acrargan, chayga cargan winay masincuna consejashganmi. Chayno rurashganga marca masincunapaj y reypäpis mana alipami cargan. Chauraga pipis consejamashgaga, gustunchipäno mana captinpis Bibliawan consejamaptinchega wiyacushwanmi y cäsucushwanmi.

7. ¿Imataj yachacunchi Uziasta pasashganta?

⁷ Rey Uziaspis consejucunataga cäsucurganchu. Sacerdoticunala templuman yaycushganmanshi juc cuticho Uziasga yaycurgan inciensuta rupachinanpaj. Chaymi sacerdoticunaga nergan: “Tayta Uzías, TAYTA DIOSPAQ inciensuwan qoshtatsinaykipaqqa manami qamtatsu churashushqanki”. Chayta wiyaycurnashi Uziasga “pasaypa rabyakurkurqan” y cäsucurganchu. ¿Imanirtaj chayta rurargan? Rey captin imachi munashganta rurananpaj yarpargan. Jehová ichanga manami chaynochu ricargan. Uzías ñanpu shongu captenga juclachi templupita aywacunman cargan y Jehovapis perdunaycunmanmi cargan. Ichanga manami cäsucurganchu, chaymi gueshya leprawan wanushgancama Jehová castigaycurgan (2 Crón. 26:16-21). ¿Imataj yachacunchi?  Congregaciuncho ima carguyoj captinchipis consejucunataga chasquicushwanmi, Jehová ali nawilanwan ricamänanchipaj.

8. ¿Imatataj Job rurargan consejashga captin?

⁸ Bibliaga wilacunmi waquin runacuna consejucunata chasquicärishganpita y Jehová paycunata bendecishgantapis. Jobpita parlarcushun. Jehovata cushichiyta munarpis öraga pantarcurganmi. Imayca mana alicunapa pasar lutanpami parlaycurgan. Chaymi Elihuwan Jehovapis consejaycurganmi. Jobga ñanpu shongu carmi consejuta chasquicurgan; payga nergan: “Mana tantiyakuypami lutanta nishqä”. Caytapis nergan: “Nishqäpita fiyupa penqakurmi alpaman y uchpaman jamaykur perdonta manakü”. Job humilde cashganraycurmi Jehová bendeciycurgan (Job 42:3-6, 12-17).

9. Moisés corregishga captin, ¿imatataj rurargan, y noganchipis chaypita imataj yachacunchi?

⁹ Moisespis pasaypa pantaycushganpita Jehová corregiptin chasquicurganmi. Juc cuticho pasaypa rabiacurmi israelita masincunata gayapargan, Jehovatapis alabarganchu. Chaymi Jehová nergan Aunishgan Pachaman mana yaycunanpaj (Núm. 20:1-13). Chauraga Moisés pasaypa laquicur Jehovata ruwacurgan yaycuchinanpaj, Jehová ichanga nergan: “Tsaytaqa ama manakamaynatsu” (Deut. 3:23-27). Moisés piñacunanpaj trucan Jehová nishgantami chasquicurgan, chaymi israelitacunata pushananpaj Jehová yanapargan (Deut. 4:1). Jobwan Moisés ñanpu shongu cashganpita noganchipis yachacushwanmi. Jobga alita yarpachacunanpämi calpachacurgan, manami ali tucurganchu. Moisesna Jehová corregishganpita manami jagayarganchu, chaymi Jehová Aunishgan Pachaman mana yaycunanpaj captinpis jinalami Jehovata sirviycargan.

10. 1) Proverbios 4:10-13 textucuna nishganno, ¿imanotaj yanapämanchi consejucunata cäsucuptinchega? 2) ¿Imatataj wilacun waquin hermanucuna consejucunata chasquishganpita?

¹⁰ Moiseswan Job rurashganno noganchipis ruraptinchega alimi caycäshun (leiriy Proverbios 4:10-13). Achca hermanucunami chayta rurargan. Emmanuel * hermanunchega República Democrática del Congo naciuncho tiyan, payshi waquin hermanucunapa consejuncunata chasquicurgan. Cayno wilacun: “Jehovapita raquicaycashgäta ricamarmi, congregaciunnëpita waquin hermanucuna consejapäcamargan. Paycunataga cäsucurgämi chaymi mana alicunaman mana chayargächu”. Canadá naciunpita Megan jutiyoj panipis cayno nin: “Öraga waquincuna consejamashgancuna wiyacuyta mana munaptëpis chaycunami cawaynëcho yanapämargan”. Croacia naciunpita Marko jutiyoj wauguipis cayno nin: “Congregaciuncho juc cargucho manana yanapacunäpaj nipäcamargan, pero consejamashgancunaga yanapämargan calpachacunäpaj yapay Jehovawan más amigo canäpaj”.

11. ¿Imapitataj Karl Klein cuentata gocurgan?

¹¹ Karl Klein wauguilanchitapis consejucunaga yanaparganmi, payga Cuerpo Gobernantichomi yanapacurgan. Vidanpita wilacushgancho juc cutichoshi cuyashgan amigun Joseph Rutherford consejaycurgan, pay ichanga piñacurshi consejutaga shumaj chasquicurganchu. Chauraga amigun Rutherford  wauguiwan yapay tincuycuptinshi, Rutherfordga ‘¡imanolataj, Karl!’ nir cushishgala saludaycurgan. Paynashi jagayashga caycar saludunta shumajla cutichirganchu. Chaynash Rutherford nergan: “¡Pajta Diablo ishquichishunquiman Karl!”. Payga pengacuycurshi ‘alimi caycä waugui Rutherford’ nergan. Chayno mana cashganta musyarmi waugui Rutherfordga cayno nergan: “Alimi Karl. Cuidacuy, Diabluga ishquichishunayquita munan”. ¡Nishganga rasunpashi cargan! Chaymi waugui Karl cayno nin: “Juc hermano consejamaptinchi piñacurga o nanapararga Diablupa trampanmanmi jegacurcushwan” * (Efes. 4:25-27). Wauguilanchi Karl consejuta chasquicurganmi, chaymi Rutherford wauguiwan ali apanacärergan.

12. Humilde cashpanchega, ¿imanotaj yanapämäshun consejucunata chasquicunapaj? (Salmo 141:5).

¹² Consejucunata chasquicunapäga humildimi cashwan. Juchasapa cashganchita cuentata gocushun, chaymi öraga imalachopis pantaycunchi. Jobpita parlashganchinopis payga lutanpami yarpaycargan, ichanga nircur consejuta chasquicurganmi. Humildimi cargan, chaymi Elihú mozularaj caycaptinpis consejacushganta wiyacurganmi (Job 32:6, 7). Jina Jehovapis bendicirganmi humilde cashganraycur. Chauraga noganchipis humilde captinchega consejucunata chasquicushunmi noganchipaj mana captinpis o consejamajninchi jovinlaraj captinpis. Canadá naciunpita juc anciano cayno nin: “Quiquinchega manami ricacunchichu waquincuna ricamashganchino. Chaymi pipis mana consejamaptinchega, ¿imanoparaj mejoraycushwan?”. ¿Piraj mana munanmanchu ali runaman ticrananpaj y ali yachachicoj caytapis? (Leiriy Salmo 141:5).

13. ¿Imanirtaj Jehová consejamanchi?

¹³ Jehová cuyamashpanchimi consejucunata gomanchi. Ali cawananchipämi Jehovaga munan (Prov. 4:20-22). Juc pogushga hermanulanchi consejamaptinchi, Bibliacho o waquin publicaciuncunacho consejucunata tariptinchega Jehová cuyamashganchitami ricanchi. Chaymi Hebreos 12:9, 10 textucuna wilacushgannopis Jehová ali “cawananchïpämi piñacamanchi”.

14. Pipis consejamaptinchega, ¿imamantaj yarpachacushwan?

¹⁴ Consejuman yarpachacushun y imano consejamashganchimanga mana. Pipis consejacunanpäga ali shimilapami consejacunman,  chayno facil-la chasquicunanpaj. Öraga ichanga pilapis piñapayparaj o mana cuyapaylapa consejamashwanchi (Gál. 6:1). * Chauraga chayno pilapis consejamaptinchega, consejumanmi yarpachacushwan y imano consejamashganchimanga mana. Caynopis tapucushwan: “Pay imano consejamashgan mana alino captinpis, ¿nishganga rasunpachuraj? Imano consejamashganman yarpachacunäpaj trucan, ¿consejun imano yanapämänanpaj cajmanchuraj yarpachacöman?”. Alichi canman consejucunata chasquishganchi imano yanapämänanchipaj cajman yarpachacuptinchi (Prov. 15:31).

15. ¿Imanirtaj consejucunata mañacushwan?

¹⁵ Bibliami nimanchi consejucunata ashinapaj. Proverbios 13:10 nin: Pipis yachachishga cananpaj mañacoj “runaqa tantiyakuqmi kaykan”. ¡Chayga rasunmi! Pipis consejucunata mañacuptenga ichic ichiclapa ali y pogushga cristianuman ticran. Chauraga consejucunata mañacunapaj calpachacushun y pipis consejamänanchitaraj shuyarashwanchu.

16. ¿Imacunapitataj consejucunata mañacushwan?

¹⁶ ¿Imacunapitataj consejucunata mañacushwan? Mä quimsalata ricärishun. 1) Juc pani yachachicunanpaj panin masinta yanagänanpaj mañacun, nircurpis mañacun imalachopis mejoracunanpaj consejaycunanpaj. 2) Juc japalan panina pantaloncunata rantir ali acrananpaj juc pogushga hermanata tapupan. 3) Juc wauguipis congregaciuncho chayraj discursamunanpaj caycar juc ali yachachicoj ancianuta mañacun discursunta wiyaycur consejaycunanpaj imacunacho mejorananpaj. Jina achca watapana discursucunawan yachachicojcunapis alichi canman waquincunata consejucunata mañacuptin imalachopis mejorananpaj.

17. ¿Imatataj rurashwan consejucuna yanapämänanchipaj?

¹⁷ Chauraga, cay semana y gatejnin quillacunacho pilapis consejaycamäshunchi, Bibliacho y publicaciuncunachopis consejucunataga tarishunmi. Chaymi humilde cashwan, consejuman yarpachacushwan y imano consejaycamashganchimanga mana, jina cäsucunapaj calpachacushun. Ni pï runapis lapantaga musyanchu. Chaymi consejucunata wiyacur cäsucuptinchega yachaj runaman ticranapämi Bibliaga nimanchi (Prov. 19:20).