1. ¿Imataj Jesús nergan cay Pacha ushacänanpaj cajpita, y imataj consejacurgan?

 JESÚS wanunanpaj walcala pishiycaptinmi chuscu discipuluncuna tapucurgan “cay pacha ushacänanpäna” caycaptin imacuna cananpaj cajta (Mat. 24:3). Chay discipuluncunaga musyayta munarganchi Jerusalén y templunpis ushacänanpaj caycaptinna imacuna pasananpaj cajta. Jesús parlashganwanga manami tantiachicurganchu Jerusalén ushacächishga cananlapächu, sinoga canan wichan “cay pacha ushacänanpäna” caycaptin imacuna pasananpaj cajtapis. Último tiempo ushacänanpaj cajpita parlarmi nergan: “Imay junaj, imay öra cananpaj cashantapis Tayta Diosllami musyan manami pipis musyanchu ni anjilcunapis ni Wamranpis”. Nircur caycunata consejacurgan: “Mayaq mayaqla karkaykay” y ‘kamarikushqalana karkaykay’ nir (Mar. 13:32-37).

2. ¿Imanirtaj punta caj cristianucunaga alcäbula caycänan cargan?

² Punta caj cristianucuna alcäbulami caycänan cargan. Jesusga discipuluncunata tantiachergan imacunata ricartaj Jerusalén ushacächishga cananpaj walcala pishiycashganta musyananpaj. Pay nergan: “Soldädukuna Jerusalénta tumaparaykaqta rikarmi ushakänanpaqna kaykashqanta musyapäkunkipaq”. Chauraga paycuna chayta ricaycur jucla jircacunapa aywacärinan cargan (Luc. 21:20, 21). Jesusta cäsucärejcunaga jircacunapami gueshpicärergan romanucuna Jerusalenta manaraj ushacächiptin, chaynopa salvacärerganmi.

3. ¿Imataj cay yachachicuycho ricärishun?

³ Noganchega cay mana ali mundo ushacänanpaj wichanchomi cawaycanchi. Chaymi punta caj cristianucunanopis ali juiciunchiwan cawacur alcäbula caycäshun. Cay yachachicuychomi ricärishun imatataj rurashwan cay munducho  pasashgancunata ricar alapa mana yarpachacunapaj. Jinamanpis ricärishunmi imataj rurashwan imano caycashganchita cuentata gocunapaj y imanotaj walcala tiempo quedashganta shumaj provechanapaj. 

4. ¿Imanirtaj cay munducho pasacuycashganta tantiacuyta munashwan?

⁴ Imaycacunami caycan Bibliapita profeciacuna imano cumplicuycashganta cuentata gocunapaj. Jesusmi wilacamurgan imacuna pasananpaj Satanás camacächishgancunata ushacächishga cananpaj walcala pishiycaptin (Mat. 24:3-14). Apóstol Pedrupis consejamashcanchimi profeciacuna imano cumplicuycashganta tantiarcunapaj, chaynopa yäracuyninchi sinchi caycänanpaj (2 Ped. 1:19-21). Y Bibliapita último libruga caynomi galaycun: “Cayga caycan manapis aycällatana päsananpaj caycajcunata sirbejnincunata musyachinanpaj Jesucristuta Tayta Diosninchi ribilashanmi” (Apoc. 1:1). Cay munducho imaycacuna pasacuycashganta tantiacuyta munaptinchega alimi caycan, chaynopa profeciacuna imano cumplicuycashganta cuentata gocunapaj. Jina chaypita hermanunchicunawan parlaytapis galaycushwanchi.

5. ¿Imanirtaj profeciacunapita parlarga quiquinchipa yarpayninchipita parlashwanchu, y imatataj rurashwan? (Fotucunatapis ricay).

⁵ Bibliapa profeciancuna imano cumplicuycashganta parlaptinchega cuidacushwan lutancunata mana parlanapaj. ¿Imanir? Quiquinchipa yarpayninchipita parlayta munanchichu hermanucunata mana raquicächinapaj. Capaz wiyashwanchi munducho mandacojcuna imacunata rurayta munashganta runacuna jaucala cawapäcunanpaj o wanuchinacuycuna manana cananpaj. Chaura ‘cayga 1 Tesalonicenses 5:3 nishgannomi cumplicuycan’ ninapaj trucanga, chaylaraj publicaciuncunacho chaypita ima tantiachicushgantami ashishwan. Lapan ima nishganchicuna Jehovapa marcan tantiachicushganno captenga, congregaciuncho “juc yarpayla” cawapäcunapämi yanapacushun (1 Cor. 1:10; 4:6).

6. ¿Imataj yachacunchi 2 Pedro 3:11-13 textucunapita?

⁶ (Leiriy 2 Pedro 3:11-13). Apóstol Pedruga consejamashcanchi profeciacunapita yachacur ali juiciuwan cawanapaj. Shacyächimanchi alcäbula caycänapaj “Tayta Dios juzganan junaq ras” chayamunanpaj cajpita. Chaywanga manami niycämanchichu Armagedón “imay junaq imay höra” chayamunanpaj musyanapaj, sinoga chay junaj manaraj chayamuptin “jutsata mana ruraypa Tayta Dios munashqanno santu” runacunano cawacunapaj (Mat. 24:36; Luc. 12:40). Chauraga alicunalata rurayta y Jehovata cuyar sirviycarla caycänapaj munanchi. Chaypäga cuentata gocushwan imano caycashganchita.

7. ¿Imatataj rurashwan quiquinchi imano caycashganchita cuentata gocunapaj? (Lucas 21:34).

⁷ Jesusga discipuluncunata nergan alcäbula caycänanpaj imacuna pasacuycashganpita y quiquincuna imano caycashganpitapis. Chaytaga clarumi tantiachicun Lucas 21:34 (leiriy, TNM) textucho. Caynomi Jesús nergan: “Quiquiquicuna imano caycashgayquita cuentata gocäriy”. ¿Ima ninantaj quiquinchi imano caycashganchita cuentata gocunapaj? Chayga ninan alcäbula caycänanchi ima rurashganchicuna Jehovawan amistäninchita mana ushacächinapaj y mana alicunata imaycanopapis mana ruranapaj. Chaynopa Jehovaga imaypis cuyaycämäshunmi (Prov. 22:3; Jud. 20, 21).

8. ¿Imataj apóstol Pabluga cristianucunata consejacurgan?

 ⁸ Apóstol Pabluga cristianucunata nergan imano cawacärishganta cuentata gocärinanpaj. Tantiarinapaj, Éfeso marcacho caycaj cristianucunata cayta escribergan: “Imano cawarcaycashayquipäpis sumaj yarpachacuy” (Efes. 5:15, 16). Satanasga imaycanopapis yäracuyninchita ushacächiyta munan. Chaymi Bibliaga consejamanchi ‘Diosninchi munashganno cawanapaj shumaj tantiacunapaj’, chaynopa Satanaspa ima trampancunamanpis mana ishquinapaj (Efes. 5:17).

9. ¿Imanotaj cuentata gocunchi noganchipaj Jehová imata munaycashganta?

⁹ Jehovaman yäracuycashganchita lapan ushacächej mana ali ruraycuna Bibliachoga manami wilacunchu. Cutin cutinmi quiquinchi shumaj tantiarcur imata ruranapaj acrashwan, chaycunapita Bibliacho escribishga mana caycaptinpis. Alita acranapäga ‘Diosninchi munashanno cawanapaj shumaj tantiacushwan’. ¿Chaytaga imanotaj ruranchi? Cada cadala Bibliata leiptinchi y leishganchiman yarpachacuptinchi. Lapanpaj juc mandamiento mana captinpis Jehová imata munashganta tantianapaj y ‘Jesucristo yarpashanno yarpanapaj’ calpachacuptinchega, más facilnami canga Tayta Diosninchi munashgannona cawanapaj (1 Cor. 2:14-16). Waquin peligrucunapitaga raslami cuentata gocunchi, ichanga waquincunapitaga shumajraj tantiarcushwan.

10. ¿Maygancunataj caycan waquin peligrucunapita witicunapaj?

¹⁰ Waquin peligrucunaga caycunami caycan: olgu o warmi carpis imaypis asichinacäriptin, micurla o upiarla cacuptinchi, palabranchicunawan waquincunata laquichiptinchi, mana alita rurajcunawan goturaptinchi, maganacuypita o ganra ruraycunata peliculacunacho ricaptinchi (Sal. 101:3). Chiquimajninchi Diabluga imaycanopapis Jehovapa amistäninta ograycunapaj munan (1 Ped. 5:8). Mana cuidacuptinchega yarpayninchicho y shongunchichopis yurichinmanmi envidioso, lulacoj, quiquinchilapaj imatapis munaj, chiquicoj, ali tucoj y rabiacoj canapaj (Gál. 5:19-21). Galanancho ‘chaycuna manami imananpischu’ niptinchipis, tiempuwan ichanga imanomi mana ali jachacuna ali plantata chaquichin, chaynomi Jehovawan amistäninchitapis ushacächinmanmi (Sant. 1:14, 15).

11. ¿Imatataj caycan juc trampano jucla cuentata mana gocuptinchipis, y imataj rurashwan witicunapaj?

¹¹ Yarparcushun imanirshi cuidacushwan Jehovata mana reguej aroj masinchicunapita. Capaz öraga Jehovapa testiguncunapita alita yarpänanpaj munarmi cuyapäcoj canchi y imalachopis yanapaycunchi. Nircur juc ishcay cuti paywan micur galaycunchi, ichanga tiempuwanga cada cadalana paywan micunchi. Galananlacho ganra ruraycunapita o lisuracunata parlaptin mana gustamaptinchipis cäsupanchichu. Y tiempuwanga cada cadala parlashganta wiyar ‘manami imananpischu’ nir yarpanchi. Chauraga, juc cuticho aruyta ushaycur imalatapis upunapaj invitamanchi y auninchi aywanapaj. Cuentata gocuptinchega paynona yarpar y parlar galaycushcanchi. ¿Ayca tiempuraj pasanman chay runanona comportacärinapaj? Biblia nishganno pï maywanpis cuyapäcoj y respetuoso captinchipis, cuidacunanchi pïcunawan goturänapaj, chaynopa mana alicunaman mana chayanapaj (1 Cor. 15:33). Chauraga imano cawacuycashganchita cuentata gocunapaj Jesús nimashganchita cäsucuptinchega, Jehovapa mandamientuncunata mana respetajcunawanga alapaga manami goturäshunchu (2 Cor. 6:15). Juc trampa caycashgantami cuentata gocushun y witicushunmi.

12. ¿Imatataj Jesuspa discipuluncunaga ruranman cargan Jerusalén y templunpis ushacächishga cashganyaj?

¹² Jesuspa discipuluncunaga Jerusalén y templunpis ushacächishga cashganyaj, ¿imatapis mana rurarchuraj shuyaranman cargan? Manami, Jesusga paycunata mandargan ali wilacuycunata apananpaj “Jerusaléncho, intëru Judeacho, Samariacho y maytsay markakunachöpis” (Hech. 1:6-8). Chayta cumplinanpäga imaycataraj rurananpämi caycargan. Ichanga lapan tiempunwan yanapacäriptenga tiempunta shumajmi provechaycanman cargan.

13. ¿Imanirtaj tiempunchita shumaj provechashwan? (Colosenses 4:5).

¹³ (Leiriy Colosenses 4:5). Imano cawacuycashganchita cuentata gocunapäga tiempunchiwan imata ruraycashganchitami ricashwan. Eclesiastés 9:11 nishganno “lapantsipaqmi alipis mana alipis” ilajpita caycan. Öraga ilajpitami wanuycushwanpis.

14, 15. ¿Imacunata rurartaj tiempunchita shumaj provechashun? (Hebreos 6:11, 12; fotutapis ricay).

¹⁴ Tiempunchitaga shumajmi provechashun Jehovawan más ali amigo canapaj y mandamashganchita ruranapaj calpachacuptinchimi (Juan 14:21). Biblia cayta consejacushganta cäsucushwan: “Mana uticaypa [...]  Jesucristuman yäracuy y mana yamacaypa paypa alli willacuyninta willacuy” (1 Cor. 15:58). Chauraga ilajpita wanucuptinchi o cay mundupa ushacaynin junaj chayamuptin, manami nishunchu ‘imanir-raj Jehovata masraj sirvinäpaj calpachacushcächu’ nir (Mat. 24:13; Rom. 14:8).

¹⁵ Jesús aunicushganno cay Pachacho caycaj discipuluncunata pushaycanmi Diospa ali Gobiernunpita entero munducho predicapäcunapaj. Jehovapa marcanwanmi Jesusga yachachimanchi imano ali wilacuycunata yachachicunapaj, y chayta ruranapaj necesitashganchicunata camaripämanchi (Mat. 28:18-20). Chaymi noganchicunaga ganas ganasla predicashwan y yachachicushwan, imano cawacuycashganchitapis cuentata gocushwan cay mana ali munduta Jehová ushacächinanpaj shuyaraycashganchicama. Imata shuyaraycashganchitaga chasquishun o ushanancama aguantashun Hebreos 6:11, 12 (leiriy) consejacushganta ruraptinchi.

16. ¿Imata ruranapätaj imaycanopapis calpachacushwan?

¹⁶ Jehovaga musyanmi Satanaspa mundunta imay junaj ushacächinanpaj. Chay junaj chayamuptin Palabrancho caycaj profeciacunatami cumplenga. Jehovapa junajnin chayamunanpaj achcaraj pishiycashganta yarpaptinchipis, “päsanga imaypis päsananpaj caj junajchömi”; chaymi shuyaraycäshunla (Hab. 2:3). Chauraga imaycanopapis calpachacushun Miqueas 7:7 nishganno ruranapaj: “Nogami ichanga TAYTA DIOSLLATA shuyäcuycäshaj. Salbamaj Tayta Diosnilläman yäracushaj. Payga wiyamangami”.