Chayno nimaptin asicur galaycurgä. “¿Imatataj gamga Bibliapita yachanqui?” nir. Rätula upälacushpan, payga wilamargan mamänin Jehovapa testigun cashganta y payshi Bibliapitaga ichiclata parlapargan. Chaypitana noga nergä yachacushganpita maslata wilamänanpaj.

Chacaylata parlapacurgä. Amigö tantiachimargan cay mundo Diablupa maquincho caycashganta (Juan 14:30). Nogaläga chayta musyargächu. Umächoga caycargan cay munduta quiquin Dios gobernaycashganta. Y yarpachacoj cä, Dios gobernaycämuptenga ‘imanirtaj pasaypa mana alicunalata ricä’ nir. Chay wichanga 26 watayoj caycargä, y cay munducho ricashgäcunaga pasaypami laquichimaj.

Papänega Estados Uniduscho guerraman aywaj, aviuncunatami manejargan. Y wamrala caycarpis musyargäna ilajpita ima guerrapis galacuycunanpaj. Ejercitucunaga listo caycargan ima guerrapäpis. Universidächo estudiargä California marcacho, pero Vietnamwan guerra cashganraycurga imaycapa pasargä. Imaman yarpar-raj waquin estudianticunawanpis callicunaman yargupäcoj cä, protestacunata rurapäcushgäraycurga policiacunapis gaticachapäcamaj y magapäcamaj. Politicucunapis wanuchinacärej, pasaypa mana ali tiempo cargan.

1970 watacho Alaska sitiupa norte caj ladunpa aroj aywacurgä, chaycho achca guellayta ganargä. Chaypitana Londres (Inglaterra) sitiupa aywacurgä, chaycho motuta ranticuycur may chaypa aywacurgä. Nircurga África naciunchona taricurgä. Viajicho caycarga achca runacunawan reguinacurgä, paycunapis marcancunata jaguirir aywacärergan ali cawayta ashir.

Chay wichancho cuentata gocuycargä Biblia nishganga rasunpa cashganta, cay mana ali munduga Diablupa maquinchomi caycargan. Pero musyaytaraj munargä, chaymi ‘chauraga maychotaj caycan Dios’ nir tapucurgä.

 Respuestantaga tarergä quillacuna pasarishganlachomi. Tiempuwanna yachacurgä pïcunataj imaycacunapa pasarpis rasunpa caj Dioslata adurapäcun.

Tiempuwan Londres naciunman cutimurgä, amigöpa mamäninwan tarinacurgä, y payga juc Bibliata gomargan. Nircurga, Ámsterdam (Países Bajos) nishgan sitiupa aywacurgä. Juc cuti Bibliäta leiycargä callilacho. Chaycho juc hermano ricaycamar ‘manachuraj Bibliapita masla yachacuyta munanqui’ nimargan. Dublín (Irlanda) sitiuman chayarna, chaycho caycaj Jehovapa testiguncunapa sucursalninman aywargä. Puncuta tacaycuptëga Arthur Matthews waugui yargamurgan, payga unaypitana Diosta sirviycargan. Y jucla nergä Bibliapita yachachimänanpaj y payga cushishgala nergan ‘aumi’.

Cushishgalami Bibliapita yachacur galaycurgä, librucunatapis revistacunatapis leir. Quiquin Bibliatapis gustamarganmi leiyta. Congregaciunman aywaptëga almiraypaj cargan, wamracunapis shumaj parlapacamoj ima yachacushgancunapita. Cay mundo runacunaga yachajchu imanirtaj may chaycho nacaycunala caycan, pitaj Dios caycan o imataj pasamanchi wanuptinchi, ichanga chay wamracunaga shumajmi chaypita parlacaramoj. Testigucunalawan juntacar galaycurgä, juc runacunawanga mana. Paycuna yachachimargan Jehovalata cuyanäpaj y voluntäninlata imaypis ruranäpaj.

1972 watacho bautizacurgä. Juc wata pasariptin precursorman ticrargä y nircur Newry (Irlanda del Norte) marcacho caycaj juc congregaciunta yanapacoj aywacurgä. Chaycho alquilargä juc wasita, chayga juc montañacho caycargan. Achca wäcacuna chaycho caj, chaymi discursöcunata practicaptëga wäcacunapa naupancho churacaj cä. Runacuna ricaycamashgan japuyta chay wäcacunata ricaj cä. Chayno rurashgäcunaga yanapämaj ali preparacunäpaj. 1974 wata precursor especial carguta chasquergä; compañerö cargan Nigel Pitt, payga canancamami amigulä caycan.

Chay wichanga, Irlanda del Norte sitio guerracho caycargan. Chayraycur runacuna nipäcoj “caychoga bombacunalata balacunalata wiyanchi” nir. Callincunachopis peliacunala ricacämoj, wanuchinacuyla may chaycho. Religiuncunaraycur pelianacärej, politicucunapis chiquinacärejla. Pero protestanticuna y católico nishgancunaga musyapäcojmi Jehovapa testiguncuna  politicaman mana meticushganchita. Chaymi öra öraga tranquilula Diospita yachachicushcanchi y yachachicuycashganchi öraga waquin wasiyojcuna nipäcoj ‘caypaga mana aywaychu, caypa ayway’ nir. Paycunaga musyapäcojmi ima marcachopis ima problema pasananpaj cajta.

Chayno captinpis, öraga cawaynëcunaga peligruchomi caycargan. Juc cuticho Dennis Carrigan wauguiwan predicaj aywapäcurgä juc marcapa. Chay marcachoga maygan Testigupis cawajchu, y juc cutila predicashga carganpis. Chaycho carcaycaptë ilajpita juc warmi nergan: “Paycunaga contranchicho caycaj soldaducunami” nir. Manchacärergämi. Soldaducunaga imaraycurlapis juc balaso goycushunquimanmi. Dennis wauguiwanga carruta shuyarpaycargä aywacärinäpaj, pero juc carro yurircamur juc tiendapa puncuncho pararergan. Y chaycho caycargan contranchicho näga parlashgan warmi, y parlar galaycurgan chay carrucho caycaj ishcay runacunawan, piñashga ricapäcamargan. Chaypitana chay runacunaga nogacuna caycashgäpa shamurgan, tapupaycämaptinchimi shuyaycashganchi carro yuriycamurgan. Pararachirmi chofernintana tapupar galaycärergan, imapitaraj parlapäcuycargan manami wiyapäcurgächu. Pero imapis pasamashcanchichu. Cutimurna carrupita bajarir, chay choferta tapurgä: “¿Chay runacunaga imatataj munaycargan?” nir. Payna nergan: “Laquicäriychu. Nogami paycunata wilapashcä pïcunataj gamcuna canqui. Tranquilula aywacäriy”.

1976 watacho, Dublín marcacho asamblea de distrito a nishgan ruracämurgan, chaycho reguirgä Pauline Lomax warmita, payga Inglaterracho precursora especialno yanapacuycargan. Humilde y Diosta cuyaj warmi cargan. Shulcan turin Ray jutiyoj cargan, paycunaga wamralapitana Bibliapita yachacur galaycärergan. Juc wata pasarcuptin, Paulinewan casacärergä y Ballymena (Irlanda del Norte) sitiucho precursor especialcunano yanapacur siguipäcurgä.

Juc tiempucho congregaciuncunata watucar yanapacärergä Belfast, Londonderry y waquin marcacunachopis. Chay sitiucunachoga hermanulanchicunaga alapa yäracoj cristianucuna capäcurgan y Jehovata sirvipäcunanpäga unay creenciancunata y imayca mana ali costumbrincunata jaguipäcurgan. Taytalanchi Jehovaga cuidayculashgami chay hermanulanchicunata.

Chunca watacunami Irlanda naciuncho cashcä. 1981 watachomi, Galaad escuelaman invitapäcamargan 72 caj clasiman. Chay escuelata usharirna Sierra Leona (África Occidental) nishganpana mandapäcamargan.

Tiyashganchi wasicho 11 misionerucuna caycargan. Lapäcuna juc cocinata, quimsa bañucunata, ishcay duchacunata, juc telefunuta, juc lavadorata y juc secadoratapis utilizapäcoj cä. Achquiga ilajpita cada cadala aywacoj, wasipa techuncho achca ucushcuna caycargan, y sotanuchona culebracunapis caycargan.

Chayno cawanapaj sasa caycaptinpis, predicaciunmanga cushi cushila yargupäcoj cä. Runacunaga Bibliata respetacärejmi y shumaj mayapäcojpis. Achcajmi estudiar Testiguman ticrargan. Chaypita runacunaga “señor Robert” nipäcamaj y Paulinetaga “señora Robert” nej. Nircur sucursalpaj alapa arur galaycuptë, predicaciunman shumaj yanapacuyta puedirgänachu. Chaura  Paulineta “señora Pauline” runacuna nipäcoj y nogatana “señor Pauline” nir. Payga cushish caycargan chayno gayaptin.

Achca hermanucuna waccha capäcoj, ichanga Jehovaga tiempulancho necesitashgancunata camaripargan (Mat. 6:33). Yarpämi juc cuticho, juc pani paypaj y wamrancunapaj micuyninta rantinanpaj guellayta charaycashganta. Ichanga payga malaria gueshyawan nacaycaj wauguita guellayninta gorgan medicamentuncunata rantinanpaj. Y chay junajla juc warmi paninchipa wasinman aywaycur pagargan najchananpaj. Chayno pasashgantaga cutin cutin ricapäcoj cä.

Isgun watacuna Sierra Leona naciuncho carcaycargä. Chaypita mandapäcamargan Nigeriacho caycaj Betelman, jatunmi cargan. Nogaga unay aruyläwanmi siguirgä, ichanga Paulinepäga manami facilchu cargan. Quillacho 130 horacuna predicashganpita y achca estudianticunata charaycashganpita, cananga goyati ropacunata jirananpaj o alchananpaj caycargan. Yachacänanpaj sasa caycaptinpis, nircur rurashgancunapita hermanucuna agradecicuptin payga cushicurgan, y calpachacurgan waquin betelitacunata imanopapis shacyächinanpaj.

Nigeria naciunga mushoj costumbricunayoj cargan, chaura nogacunaga yachacärinami cargan. Yarpämi juc cuticho ima pasashganta, juc pani Betelman chaylaraj chayashganpita juc waugui noga cajman pushargan reguichimänanpaj. Chauraga maquëta macyargä saludanäpaj, ichanga payga naupächo gongurpacurgan. Mana musyargächu imata ninäpaj. Jinan horacho yarpargä Hechos 10:25, 26 y Apocalipsis 19:10 nishganta. “¿Imalatapis nëmanchuraj?” nir tapucoj cä. Pero nircur yarpargä: “Betelman invitashga captenga, musyanchaj Biblia ima nishganta” nir.

Chaura jinala parlapacur siguirgä, nircur maslata ashishcä imanir chayno rurashganpita. Tantiargä chayno saludanacärishganta waquincuna chay naciuncho. Olgu cajcunapis chayno gongurpacur pitapis saludaj. Y chayno rurarga manami pitapis aduraycarganchu, sinoga respetaycashgantami ricächicoj. Bibliachopis wilacamun waquincuna chayta rurashganta (1 Sam. 24:8). Chay hora imalatapis jucla niptëga capaz panita laquichëmanmi cargan, ¡ali cashga upälala quedacushgäpita!

 Achca hermanucunata Nigeriapita reguipäcurgä Jehovata sirvishgancho yäracoj runacuna capäcushganta. Jucmi cashga Isaiah Adagbona. b Payga jovinla Testiguman ticrashga cargan, pero nircur lepra gueshyawan nacar galaycurgan. Chauraga leprawan caycaj runacunaman payta mandargan, y japalan Testigo cashga. Waquincuna chiquiptinpis leprawan nacaycaj 30 runacunapitapis mastaraj yanapashga Testiguman ticrananpaj, y chaycho juc congregaciunta camacächergan.

1996 watacho Kenia naciuncho caycaj Betelman mandapäcamargan. Achca watacuna pasashga cargan cay marcaman mana cutimushgäpita, y caypitaga galaycunancho ichiclata wilacurgä. Betelchoga cada cadala mushoj gorpacuna caycargan: cercopiteco verde nishgan monucuna shamuycur, panicunapa frutancunata suwacur apacärej. Juc cuticho juc pani cuartunpa ventanancunata quichashga jaguirergan. Chauraga cutimuptin chaycho tarirgan achca monucuna micuycajta. Payga gaparar galaycurgan y cuartunpita jucla yargucurgan. Y monucunapis gapararcur manchacashga ventanapa yargurgan.

Paulinewan suajili rimayta parlaj congregaciuncho yanapacuyta galaycärergä. Ichic tiempo pasariptinla nimargan Estudio de Libro de Congregación ruranapaj (canan reguinchi Estudio bíblico de la congregación). Pero manami shumaj musyargächu suajili rimaytaga. Tapucuycunata ruranäpäga cada cadala shumaj estudiaj cä. Pero pipis escribiycashganno mana contestamuptenga, manami tantiajcächu respuestancunata. Chayraycur laquicoj cä, hermanucunata yanapayta munaj cä. Ichanga hermanucunaga humilde y paciente nogawan capäcurgan.

Keniacho juc wata caycänapaj pishiycaptin 1997 watacho Brooklyn (Nueva York) caycaj Betelman invitapäcamargan. Rico naciunchona carcaycargä, cayga waquincunapaj öraga sasami canman Jehovata sirvinanpaj (Prov. 30:8, 9). Chayno captinpis yäracoj hermanucuna carcaycargan. Paycunaga guellayninta imaycancunata manami utilizanchu munashgancunata rurananpaj, sinoga Jehovapa marcanta yanapänanpaj.

May chaycho Jehovata sirvishganchicho ricapäcurgä yäracoj hermanucuna caycashganta: Irlandacho sasa caway captinpis; Africacho muchuy, waccha o carucho caycaptin y Estados Uniduscho achca guellay captinpis yäracoj hermanucuna carcaycargan. Tucuy jinanpa hermanunchicuna pasashganta ricar Jehovaga cushicunchi payman yäracäriptin.

Watacunaga rasla pasashga, Job 7:6 nishgannopis cawayninchega “kaykan telarcho awaq runa lanzadërata pasatsiptin rasla pasaqnömi”. Cananga Warwick (Nueva York) Betelcho yanapacurcaycä, caycho caycaj runacunaga jucnin jucnin cuyanacärin. Alapa cushicärëmi Reyninchi Jesucristuta yanaparcunäpaj calpachacäriptë, payga aunimanchi ichiclacho yäracojcunata bendicinanpaj (Mat. 25:34).