MIÉRCOLES 18 enerupita, 2023 watacho, juc shumaj wilacuy yargamurgan jw.org paginacho: Gage Fleegle y Jeffrey Winder hermanucuna nombrashga cargan Jehovapa testiguncunata Pushajcuna cananpaj. Ishcancuna achca watacunapami Jehovata sirvircaycargan.

Hermanunchi Fleegle winashga Pensilvania oeste cajcho (Estados Unidos). Taytanwan maman Jehovapita yachachergan. Mozuyarcuycaptinna juc marcapa aywacärergan yanapacoj. Nircur walca tiempucho bautizacurgan, 20 noviembripita 1988 wata.

Taytanwan mamanga imaypis parlapargan lapan tiempunwan Jehovata sirvinanpaj. Imaypis wasinman invitargan congregaciunta watucamojcunata y betelitacunatapis, chaycho payga ricargan paycuna cushishga capäcushganta. Chayshi 1 setiembripita, 1989 watacho, precursor regularno yanapacur galaycurgan. Y ishcay watacuna pasariptin Betelcho yanapacur galaycurgan, chaytashi 12 watayojla caycaptin munargan. Brooklyn Betelcho yanapacur galaycurgan, octubre 1991 watacho.

Chaycho 8 watacunapami arurgan taller de encuadernación nishgancho, nircur yanapacurgan Departamento de Servicio cajcho. Chay wichancho ruso rimaycho congregaciuncho sirvirgan. 2006 watacho casacurgan Nadia hermanawan, y chaypita ishcancuna Betelcho yanapacurcaycan. Portugués rimaycho congregaciunchopis yanapacurgan, cananga chunca watana español congregaciuncho carcaycan. Achca watapana Departamento de Servicio nishgancho yanapacushganpita, Oficina del Comité de Enseñanza y nircur Oficina del Comité de Servicio cajchona arurgan. Y marzo 2022 watacho yanapacur galaycurgan  Comité de Servicio del Cuerpo Gobernante nishgancho.

Winder hermanunchega winargan Murrieta, California (Estados Unidos) naciuncho. Taytanwan maman Jehovapita yachachergan, y bautizacurgan 29 marzupita, 1986 watacho. Juc quilla pasariptilanmi precursor auxiliarno yanapacur galaycurgan, y manami imaypis cachayta munarganchu. Nircur 1 octubripita, 1986 watachona, precursor regularmanna ticrargan.

Mozuyaycarna ishcay wauguincunata watucoj aywargan, paycunaga Betelcho arurcaycargan. Chaycho ricashganshi yanapargan paypis Betelcho yanapacuyta munananpaj. Y mayo 1990 watacho invitashga cargan Wallkill Betelcho yanapacunanpaj.

Yanapacurgan Departamento de Limpieza, Departamento de la Hacienda y la Oficina de Betel nishgancho. Casaracurgan Angela hermanawan 1997 watacho, y chaypita ishcancuna Betelcho yanapacurcaycan. 2014 watacho Warwick cajchona carcaycargan, chaycho hermanunchi Winder localcunata sharcarcachir yanapacurgan. Y 2016 wataga Centro Educativo de la Watchtower, Patterson marcacho yanapacur galaycurgan Servicios de Audio y Video nishgancho. Chuscu watacuna pasariptinna Warwick cajman cutirgan, y Oficina del Comité de Personal cajchona yanapacurgan. Chaypita marzo 2022 watacho, Comité de Personal del Cuerpo Gobernante nishgancho yanapacur galaycurgan.

Cay ishcay hermanucunaga regalo japuyno caycan Jehovapita (Efes. 4:8). Chaymi Jehovata mañacuyculanchimi yanapänanpaj Gobiernunraycur lapan rurashgancunacho.