1. ¿Imanirtaj Jehová pushamashganchita cäsucushwan?

 GAMSHI yuncacho ogracashga caycanquiman y ricanqui manchanaypaj uywacunata, venenuyoj plantacunata, imayca chuspicunata y chucluscunatapis. Jina manchacunqui rumicunawan tacacur ishquinayquipäpis. Chay hora pilapis chayamuptin pushashunayquipaj y ima peligrupita cuidashunayquipaj, alapachi cushicunquiman ¿au? Chaynolami cay munduchopis yunca japuyno imayca peligrucuna caycan. Pero Jehovaga pushamanchi ali nänipa aywanapaj, chaynopa imaycamapis cawacunapaj. Payno ali pushacojga manami pipis canchu.

2. ¿Imanotaj Jehová pushamanchi?

² Jehovaga pushamanchi Palabran Bibliawanmi. Jina waquin hermanucunata churashga pushamänanchipaj. Tantiaj y yäracuypaj esclavuga tiempulanchomi imayca yachachicuycunata jorgaramun yanapämänanchipaj ali decisiuncunata acranapaj (Mat. 24:45). Chaypitapis caycan congregaciunta watucamojcuna, congregaciuncho caycaj ancianucunapis. Paycunaga shacyächimanchi y consejamanchi mana alicunapa pasarpis jinala Jehovata sirviycänapaj, amiguncunaman ticranapaj y cawayman apacoj nänipa purinapaj. Chaymi Jehovata alapa agradecicuyculanchi chayno hermanucunata pushamänanchipaj churashganta.

3. ¿Imapitataj canan yachacushun?

³ Pero pushacoj hermanucuna noganchino juchasapa captin, öraga sasami canman nimashganchicunata cäsucunapaj. ¿Imanir? Capaz nimashganchicunaga wiyayta munashganchinochu canman. O consejuncunaga noganchipäno mana cashganta yarpanchi y Jehovapita mana shamushgantapis. Chaycuna pasamaptinchega, masraj yäracunanchi  Jehová marcanta pushaycashganta y calpachacunanchi nimashganchicunata ruranapaj. Chaymi cäsucoj canapaj cay yachachicuycho caycunapita yachacushun: 1) imanotaj Jehová unaycho marcanta pushargan, 2) imanotaj canan pushaycämanchi y 3) imanotaj yanapämanchi imaypis cäsucoj captinchi.

IMANOTAJ JEHOVÁ UNAYCHO ISRAEL MARCANTA PUSHARGAN

4, 5. ¿Imanotaj Jehová musyachicurgan Moisesta acrashganta marcanta pushananpaj? (Garancho caycaj dibujuta ricäriy).

⁴ Jehová Moisestami acrargan israelitacunata Egiptupita jorgunanpaj, y tucuynopa musyachicurgan payta yanapaycashgantami. Israelitacunaga junajpa ricargan naupancho ichiraycaj pucutay aywaycajta y chacaypana ichiraycaj ninata (Éx. 13:21). Moisesga ichiraycaj pucutayta y ninatapis gatipar Puca lamarman israelitacunawan chayargan. Pero Egipto runacuna taripaycur wanuchinanpaj yarpar israelitacunaga pasaypa manchacärirgan. Moisesta culpargan lutan nänipa apashganpita. Pero chayga manami Moisespa culpanchu cargan. Quiquin Jehovami Moisesta pushargan chay sitiuman chayananpaj (Éx. 14:2). Nircur juc milagruwan salvargan (Éx. 14:26-28).

⁵ Moisés 40 watacunapami ichiraycaj pucutayta y ninatapis gatipargan israelitacunata chunyaj jircapa pushananpaj. a Öraga israelitacuna ricapäcurgan Moisespa toldun janancho ichiraycaj pucutay y ninapis caycajta (Éx. 33:7, 9, 10). Jehovaga chay ichiraycaj pucutaypita Moisesta parlapargan y Moisesnami Jehovapa mandätuncunata israelitacunata wilapaj (Sal. 99:7). Chaynomi israelitacuna cuentata gocurgan Jehová Moisesta acrashganta marcanta pushananpaj.

6. ¿Israelitacunaga cäsucurganchu Jehová Moiseswan pushaycashganta? (Números 14:2, 10, 11).

⁶ Jehová tucuynopa musyachicuycaptinpis Moisesta acrashganta marcanta pushananpaj, achca israelitacuna cäsucuyta manami munarganchu (leiriy Números 14:2, 10, 11). Cutin cutin manami reconocirganchu Jehová Moisesta acrashganta paycunata pushananpaj. Chaymi Jehovaga permitirganchu mana cäsucoj israelitacuna Aunishgan Pachaman yaycunanpaj (Núm. 14:30).

7. ¿Pïcunataj Jehová pushaycashganta cäsucurgan? (Números 14:24; dibujutapis ricay).

⁷ Pero waquin israelitacunaga Jehová pushaycashgantami reconocirgan, chaymi Jehová nergan: “Sirvimaqnï Calebmi itsanqa nishqäkunata cäsukaman” (leiriy Números 14:24). Caleb cäsucoj captinmi Jehová bendecirgan y Canaán marcamanpis yaycurgan tiyananpaj (Jos. 14:12-14). Caleb rurashganno, tiempuwan yurej israelitacunapis Josueta cäsucurgan, “payta imaypis respitapäkurqan”. Moisés wanucuycuptin Jehová Josueta acrargan marcanta pushananpaj (Jos. 4:14). Israelitacuna cäsucushganraycur Jehová bendecirgan y pay Aunishgan Pachamanpis yaycuchergan (Jos. 21:43, 44).

8. ¿Imanotaj Jehová marcanta pushargan reycuna cawashgan wichan? (Dibujutapis ricay).

⁸ Tiempo pasariptinna Jehová juescunata acrargan marcanta pushananpaj. Y reycuna cawashgan wichancho profetacunata acrargan. Diosta cuyaj reycunaga profetacuna nishgantami cäsucurgan. Juc cuticho rey David humilde cashpan profeta Natán anyapashganta chasquicurgan (2 Sam. 12:7, 13;  1 Crón. 17:3, 4). Rey Jehosafatpis cäsucurgan profeta Jahaziel nishganta y marca masincunata shacyächergan Diospa profetancuna nishganta cäsucunanpaj (2 Crón. 20:14, 15, 20). Rey Ezequías manchacushgan hora profeta Isaiasta ashirgan yanapänanpaj (Is. 37:1-6). Jehová nishganta reycuna cäsucuptin, pay imaypis bendicej y marcantapis chapaj (2 Crón. 20:29, 30; 32:22). Chaura lapan israelitacuna ricanman cargan Jehová profetancunawan marcanta pushaycashganta. Pero chayta rurananpaj trucan waquin reycuna y israelitacunapis cäsucurganchu (Jer. 35:12-15).

IMANOTAJ JEHOVÁ PUNTA CAJ CRISTIANUCUNATA PUSHARGAN

9. ¿Imanotaj Jehová punta caj cristianucunata pushargan? (Dibujutapis ricay).

⁹ Punta caj cristianucuna cawashgan wichan Jehová juc congregaciunta camacächergan. ¿Imanotaj chay wichan Jehová marcanta pushargan? Jesustami acrargan congregaciunta pushananpaj (Efes. 5:23). Pero Jesusga manami cada cristianuwan parlajchu imata rurananpäpis ninanpaj, chaypa trucanga apostulcunawan y Jerusalencho caycaj ancianucunawanmi pushaj (Hech. 15:1, 2). Jinamanpis cada congregaciuncho ancianucunatami churargan cristiano masincunata pushananpaj (1 Tes. 5:12; Tito 1:5).

10. 1) Punta caj cristianucunaga, ¿imanotaj wilacuycunata chasquipäcurgan? (Hechos 15:30, 31). 2) ¿Imanirtaj waquincunaga cäsucärerganchu Dios acrashgan pushananpaj runacunata? (“ Imanirtaj waquincuna cäsucärinchu Dios acrashgan runacunata” recuadrutapis ricay).

¹⁰ Punta caj cristianucuna cawashgan wichan, waquincuna ali shongulanwanmi chasquicurgan apostulcuna y ancianucunapis nishganta. Chayta rurashpan, shacyächishga ricacur “lapan kushikärirqan” (leiriy Hechos 15:30, 31). Canan wichan, ¿imanotaj Jehová marcanta pushaycan?

IMANOTAJ JEHOVÁ PUSHAMANCHI CANAN WICHAN

11. ¿Imanirtaj ninchi Jehová canan wichanpis runacunata acrashganta pushamänanchipaj?

¹¹ Canan wichanpis Jehovaga Palabran Bibliawan y wamranwanpis marcanta pushaycan, Jesusga congregaciunpa umanmi caycan.  ¿Ima pruebalapis caycanchuraj Jehová marcanta pushananpaj runacunata acrashganta? Aumi, ricärishun 1870 wata wichan ima pasashganta. Charles Russell y yanapajnincunaga shumaj tantiapäcurgan 1914 watacho Jesús mandacamur galaycamunanpaj Diospa Gobiernuncho (Dan. 4:25, 26). Chayta shumaj tantiapäcurgan Bibliacho caycaj profeciacunata ali yachacushganpita. Pero chay lapanpita guepancho Jehová caycargan. 1914 watacho Punta caj Jatun Guerra galaycurgan, muchuypis, terremotupis y peste gueshyacunapis cargan. Chayga ricächicurgan Diospa Gobiernun mandacur galaycushgantana (Luc. 21:10, 11). Chauraga claro ricacämurgan Jehová ali shonguyoj runacunata acrashganta marcanta pushananpaj.

12, 13. Ishcay caj Jatun Guerra wichan, ¿imataj ruracargan Diospita may chaycho yachachicur galaycunapaj?

¹² Yarpashwanpis Ishcay caj Jatun Guerra wichan ima pasashganta. Diospa marcanta pushaj hermanucunaga Apocalipsis 17:8 nishganta shumaj yachacur tantiapäcurgan Armagedón manaraj chayamunanpaj Ishcay caj Jatun Guerra ushariptin, sinoga runacunata Diospita yachachicunapaj tiempo cashgantaraj. Chaymi Colegio Superior Bíblico de la Watchtower de Galaad b nishganta camacächergan, chaytaga rurargan waquincunata shumaj yachachinanpaj juc naciuncunacho misionerucunano predicar yanapacunanpaj. Guerra cashgan wichanchopis waquin hermanucunata juc naciuncunaman mandapäcurgan. Nircur ali tantiaj y yäracuypaj esclavuga Ministerio Teocrático c nishgan escuelatapis camacächergan lapan publicadorcuna ali yachachicojcuna capäcunanpaj. Chay lapancunami Diospa sirvejnincunata yanapargan Jehovapa cajcho masraj rurananpaj.

¹³ Caycunacho claro ricanchi Jehová marcanta pushaycashganta. Ishcay caj Jatun Guerra ushariptin, Diospa sirvejnincunaga may chaycho libre yachachicur carcaycargan. Achca runacuna Jehovata reguir  Testiguncunaman ticrargan, cananga lapan Pachachomi yachachicurcaycan.

14. ¿Imanirtaj yäracushwan Jehovapa testiguncunata Pushaj hermanunchicuna y ancianucunapis wilacuycunata gomaptinchi? (Apocalipsis 2:1; fotutapis ricay).

¹⁴ Canan wichanpis Jehovapa testiguncunata Pushajcunaga Jesús pushananta ashipäcun. Chaymi jorgamushgan wilacuycunaga Jehovawan Jesús munashganno caycan. Jina ancianucunawan y congregaciunta watucamojcunawan chay wilacuycunata congregaciuncunaman chayachimun. d Cielupaj acrashga waquin ancianucunapis Jesuspa alauga caj maquinchomi carcaycan (leiriy Apocalipsis 2:1). Y juchasapa cashganraycur öraga paycunaga pantarcunmi Moisés, Josué y apostulcunapis pantashganno (Núm. 20:12; Jos. 9:14, 15; Rom. 3:23). Chayno captinpis, musyanchimi tantiaj y yäracuypaj esclavuta y ancianucunatapis Jesús pushaycashganta, y chaytaga ruraycanga cay mana ali mundo ushanancama (Mat. 28:20). Cayta musyarga yanapämanchi pushamajninchi hermanunchicuna wilacuycuna gomashganchiman masraj yäracunapaj.

JEHOVÁ PUSHAMASHGANCHITA CHASQUICURGA QUIQUINCHIPÄMI CANGA

15, 16. ¿Imataj yachacunqui Andy, Rosa y Marcia rurashganpita?

¹⁵ Jehová pushamashganchita cäsucuptinchega canan wichan yanapämanchimi. Andy y warmin Rosaga, e más walcalawan cawacunanpaj caj consejuta cäsucunanpaj calpachacärergan. Chayta rurashganraycur localcunata sharcachiycho yanapacärergan. Rosa cayno wilacun: “Achca cuticunacho tacsha sitiulacho tiyapäcurgä, y maycho yanucunalapäpis manami carganchu. Fotucunata tomayta gustamaptinpis, camaräcunata y imaycancunatapis ranticurgä. Chaycunata laquishga ranticuptëpis Abrahanpa warmin Sarano cayta munargä, payga jaguishgancunaman manami yarparajchu” (Heb. 11:15). ¿Imaylapis pësacurganchuraj chayta rurashganpita? Rosa cayno nin: “Cushishgami carcaycä Jehovapaj mastaraj rurashganchita musyar. Cada cadala Jehovapaj imalachopis yanapacurga, mushoj Pachacho imano cawacunäpaj cajman yarpachacärë”. ¿Ima nintaj Andy? Pay nin: “Diospa Gobiernunta lapan calpäwan yanapacushgäga imawanpis tincunchu”.

¹⁶ ¿Imano mastataj yanapämanchi Jehová pushamashganchita cäsucuptinchi? Marcia  jutiyoj cristianata pasashganta ricärishun. Escuelanta usharcur precursoraman ticrananpaj decidirgan (Mat. 6:33; Rom. 12:11). Payga nin: “Juc becata chasquirgä chuscu watacunapa juc universidächo estudianäpaj. Pero Jehovapa cajcho mastaraj rurayta munar, juc oficiulata yachacuyta munargä, quiquë mantenicunäpaj y precursora canäpaj. Chayta decidishgäga alipämi cargan, manami imaypis pesacurgächu. Cananga precursora cä y aruynëga yanapaman Betelchopis yanapacunäpaj, achca bendiciuncunatami chasquirgä”.

17. ¿Imano mastataj yanapämanchi Jehová pushamashganchita cäsucuptinchi? (Isaías 48:17, 18).

¹⁷ Diospa marcanchoga imayca consejucunatami chasquinchi guellaylata mana ashinapaj y Jehová chiquishgan ruraycunatapis mana ruranapaj. Jehová nimashganchita cäsucuptinchega quiquinchipämi caycan. Aumi, conciencianchi limpio caycan y imayca mana alicunapita o laquicuypitapis chapämanchi (1 Tim. 6:9, 10). Chayga yanapämanchi Jehovata sirvishganchicho imaycacunata ruraycänapaj. Paylata sirvirmi rasunpa cushishga y jaucalapis cawacunchi (leiriy Isaías 48:17, 18).

18. ¿Imanirtaj pushacojniqui Jehovata cäsucunquiman?

¹⁸ Jatun nacay wichancho y Waranga Watacunacho Jesús gobernashganchopis jinala Jehovaga runacunawan sirvejnincunata pushaycanga (Sal. 45:16). Chay wichan nimashganchi cajcuna munashganchino mana captinpis, ¿cäsucushwanchuraj? Canan wichan cäsucoj carga, shamoj tiempucho sasanachu canga cäsucoj canapaj. Chaymi Jehová pushamashganchita cäsucushun y pay acrashgan runacunatapis pushamänanchipaj (Is. 32:1, 2; Heb. 13:17). Imaycacunami caycan pushamajninchi Jehovaman yäracunapaj, payga imayca yanapacuycunatami gomanchi mana ali ruraycunaman mana ishquinapaj. Jina yanapämänanchita munan mushoj Pachaman yaycunapaj imaycamapis cawacunapaj.