1. ¿Ima profeciataj canan cumplicuycan, y chayga imataj tantiachimanchi?

 ¿IMANOTAJ ricacunqui familiacho caycajcuna unayno manana cuyanacäriptin? Runacuna pasaypa magacoj, quiquilanpaj imatapis munaj, y pitapis achäquita ashej ricarga laquicunquichi. Waquincunapäga sasami autoridäcunamanpis yäracunanpaj. Pero chaycunata ricarga laquicushwanchu, ali caway chayamunanpäna caycan. 2 Timoteo 3:1-5 textuchoga nin “ultimu tiempucho” chayno runacuna cananpaj. Y manami pipis ali juiciuyoj carga manami nieganmanchu cay profecía cumplicuycashganta. Jina cayga tantiachimanchi Señorninchi Jesús mayna mandacur galaycushganta Diospa Gobiernuncho. Cay yachachicuycho waquin profeciacunapis cay ushanan junajcunacho imano cumplicushganta ricashun, chaywanga yäracuyninchipis masraj miraycunga.

2. ¿Imacunapitataj canan yachacushun, y chayga imanotaj yanapämäshun? (Garancho caycaj dibujupita wilacuy).

² Cay yachachicuychoga juc profeciatami shumaj tantiarcushun, chayga yanapämäshun musyanapaj Diospa Gobiernun imaytaj mandacur galaycushganta. Chaypitapis waquin profeciacunata ricarcushun chaycunaga tantiachimäshun imaytaj Jesús Diospa Gobiernuncho mandacur galaycushganta, y ushanapäna tantiarcushun imaytaj Diospa chiquejnincuna ushacächishga canga. Imanomi puclacuna rompecabezas nishgan piezasnincuna shumaj camacan, chaynolami Bibliapa profeciancunapis shumaj tantiachimäshun ima tiempucho caycanchi Jehová voluntäninta rurananpaj.

3. ¿Imataj Daniel 7:13, 14 textucuna wilacun Diospa Gobiernuncho pï Rey cananpaj?

³ Daniel 7:13, 14 textucunacho caycaj profeciaga tantiachimanchi Diospa Gobiernuncho Jesús Rey cananpaj. Lapan runacunash payta sirvipäcunga y mandashganga manami pipis trucachingapächu. Daniel librucho chaypita parlarmi juc profecía nin ‘ganchis tiempucuna’ usharcuptinraj cananpaj. Ricärishun imaytaj Jesús Diospa Gobiernuncho mandacur galaycushganta.

4. ¿Imanotaj Daniel 4:10-17 textucuna yanapämanchi musyanapaj imay watacho Jesús mandacur galaycunanpaj? (Notatapis ricäriy).

⁴ (Leiriy Daniel 4:10-17). Bibliacho ganchis tiempucunapita parlaptenga 2.520 watacunapämi parlaycan. Cay watacunaga yupayta galaycurgan 607 watapita Jesús manaraj shamuptin, chayga cargan Jerusalencho último caj reyta babiloniucuna preso apacuptin. Cayga ushargan 1914 watacho, Jehová Jesusta Rey cananpaj churaptin, paypa maquinchonami lapan cananpaj (Ezeq. 21:25-27). *

5. ¿Imanotaj yanapämanchi ganchis tiempucunapita profeciata shumaj tantiarcuptinchi?

⁵ ¿Imanotaj yanapämanchi cay profeciaga? Shumaj tantiarcuptinchi ganchis tiempucuna imano cumplicushganga yanapämanchi musyanapaj Jehová imatapis tiempulancho rurananpaj cajta. Pay camacächishganno tiempun chayamuptinmi Jesusta Rey cananpaj churashga. Chaynolami waquin profeciacunapis hora chayamuptinmi Jehová cumplenga. Aumi, chaycunaga pasanga “imaypis päsananpaj caj junajchömi” (Hab. 2:3).

6. 1) ¿Imacunataj cay Pachacho musyachimanchi Jesús cielucho mayna gobernaycashganta? 2) ¿Ima nintaj Apocalipsis 6:2-8 textucuna Jesús mandacur galaycushganpita?

⁶ Ichiclana pishiycaptin Jesús cielupaj cuticunanpaj discipuluncunata wilargan cay Pachacho imacuna pasananpaj, chaynopa paycuna cuentata gocärinanpaj pay cielucho mandacur galaycushganta. Wilacurgan guerracuna, muchuy, terremotucuna cananpaj. Jina may chaychopis epidemia cananpaj nergan, y chayta canan ricaycanchi COVID-19 pandemia nishganta. Chaypita parlarmi Bibliaga nin chaycunaga juc señal cananpaj Jesús cielucho mandacur galaycushganpita (Mat. 24:3, 7; Luc. 21:7, 10, 11). Y wanushganpita Jesús 60 watacuna pasashganchomi, pay cieluchona caycaptin ápostol Juanta musyachicurgan chaycuna pasananpaj (leiriy Apocalipsis 6:2-8). Chauraga canan lapan ricaycashganchicunaga pasaycan 1914 watapita pacha Jesús Reyman ticrashganpita.

7. ¿Imanirtaj Jesús mandacur galaycuptin cay Pachacho pasaypa mana alicuna miraycushga?

⁷ ¿Imanirtaj Jesús mandacur galaycuptin cay Pachacho cawayga más sasaraj caycan? Apocalipsis 6:2 nimanchi Jesús mandacur galaycuptinshi cielucho juc guerra cargan. Chaycho Jesusga Diabluwan y demoniuncunawan peliargan. Y Apocalipsis 12 caj capituluchomi nin Jesús paycunata venciycur, Satanastawan demoniucunata cay Pachaman gargamurgan. Chauraga Satanás pasaypa rabiashga caycar runacunata nacaycächin. Chaymi Bibliaga nin: “Wawallau, cay pachacho, lamarcho cajcuna” (Apoc. 12:7-12).

8. ¿Imanotaj yanapämanchi Diospa Gobiernunpa profeciancuna cumplicuycashganta ricar?

 ⁸ ¿Imanotaj cay profeciacuna yanapämanchi? Entero munducho pasaycajcunata ricar y canan runacunapis imano cashganga tantiachimanchi Jesús mayna Rey cashganta. Chaymi runacuna quiquilanman yarpapäcuptin y chiquinacäriptenga manami laquicunchichu. Paycuna imano cashganga Biblia wilacushgannomi pasaycan. ¡Cayga tantiachimanchi Diospa Gobiernun mayna mandacur galaycushganta! (Sal. 37:1). Chauraga ichiclacho cay munducho caway más sasaraj captenga ama manchacushunchu, chayga tantiachicun Armagedón galaycunanpäna cashganta (Mar. 13:8; 2 Tim. 3:13). Taytalanchi Jehová amatar cuyamashpanchimi shumaj tantiachimanchi imanir caycunapa pasanapaj. Chauraga, imaycacunami caycan payta ‘gracias’ ninapaj.

9. ¿Imataj wilacun Daniel 2:28, 31-35 último caj potenciapita, y imaytaj yurircamurgan?

⁹ (Leiriy Daniel 2:28, 31-35). Canan chay profeciapis imano cumplicuycashganta ricaycanchi. Nabucodonosor sueñuynincho ricargan ‘shamoj watacunacho ima cananpaj cashganta’, chayga canman cargan Jesús mandacur galaycushganpita. Bibliami wilacurgan cay Pachacho Jesuspa jucnin caj chiquejnin último caj potencia mundial nishgan cashganta. Chay potenciaga tincunmi Nabucodonosor ricashganwan monumentupa fierrupita y mitupita rurashgan chaquincunawan. Cayga yurircamurgan Punta caj Jatun Guerra wichan Reino Unido Estados Uniduswan juc acuerduta ruraptin. Nabucodonosor ricashganga tantiachimanchi cay último caj potenciaga waquincunawan mana igual cananpaj.

10. 1) ¿Daniel wilacushgan profeciaga imanotaj tincun Reino Unido y Estados Unidos potenciawan? 2) ¿Imacunapitataj cuidacunanchi? (“ ¡Mitupita cuidacäriy!” recuadrutapis ricäriy).

 ¹⁰ ¿Imanirtaj ninchi Reino Unido y Estados Unidos potenciaga waquincunawan mana tincushganta? Nabucodonosor sueñuyninchoga ricargan chay monumentupa waquin partincunaga juc material-lapita rurashga cashganta: orupita o platapita, ichanga chaquincunaga fierrupita mituwan talushga caycargan. Mituga tincunmi cay munducho caycaj runacunawan (Dan. 2:43). Chauraga runacuna eleccioncunata ruraptin, campañacunata camacächiptin y huelgacunapis captinmi cay último caj potenciaga munashgancunata rurananpaj shumaj camäpacunchu y chaycuna rasunpa cashgantaga manami pipis nieganchu.

11. ¿Imataj más yanapämanchi convencido caycänapaj ushanan junajcunachona cawaycashganchita?

¹¹ Jina cay último caj potenciaga tincunmi chay monumentupa chaquincunawan. Bibliaga mayna wilacurgan Reino Unido y Estados Unidos último caj potencia cananpaj. Cayga tantiachimanchi más potenciacuna mana cangapänachu. Chauraga Diospa Gobiernunga cay potenciata y waquin gobiernucunatapis ushacächenga Armagedón guerracho (Apoc. 16:13, 14, 16; 19:19, 20). *

12. ¿Ima mastataj tantiachimanchi ushanan junajcunachona cawaycashganchita Daniel wilacushganno, y cayga imanotaj shacyächimanchi?

¹² ¿Imanotaj cay profeciaga yanapämanchi? Daniel wilacushgan profeciaga shumaj tantiachimanchi ushanan junajcunachona cawaycashganchita. Daniel wilacurgan Babilonia marca ushacächishga captin chuscu jatun potenciacuna yurircamur Diospa marcanta chiquinanpaj, y pay wilacushganpitaga 2.500 watapitapis masna pasashga. Jina tantiachicamurgan Reino Unido y Estados Unidos naciuncuna último caj potencia cananpaj. Chauraga, ichiclacho Diospa Gobiernun cay Pachacho lapan gobiernucunata ushacächinanpaj cajta musyarga shacyächimanchi, calpatapis gomanchi (Dan. 2:44).

13. ¿Pitaj caycan “pusaq kaq reymi” y ‘chunca reycuna’ Apocalipsis 17:9-12 wilacushgan, y imanotaj chay profecía cumplicurgan?

¹³ (Leiriy Apocalipsis 17:9-12). Punta caj Jatun Guerraga pasaypa fiyumi cargan y chaywanga juc profecía más cumplicuycargan ushanan caj junajcunapita. Chaypita entero mundupita mandacojcuna jaucala caycänanpaj munar 1920 watacho enero quilla Sociedad de Naciones nishganta camacächergan, pero 1945 wata octubre quillachoga Naciones Unidas nishganwan trucachishga cargan. Bibliaga nin chay organizaciunga “pusaq kaq reymi” caycan, pero manami juc potenciachu. Gobiernucunapa yanapacuyninwan chay organizaciunga munayniyoj y poderyoj caycan. Y chay gobiernucunata Biblia nin ‘chunca reycuna’ cashganta.

14, 15. 1) ¿Imataj Apocalipsis 17:3-5 textucuna wilacun “Jatuncaray Babiloniapita”? 2) ¿Imataj pasaycan luta religiuncunata yanapajcunata?

¹⁴ (Leiriy Apocalipsis 17:3-5). Juc visiuncho Jehová apóstol Juanta ricächergan juc wayrapacoj warmita, jutinga “Jatuncaray Babiloniami”. Chay warmiga tincunmi munducho caycaj luta religiuncunawan. Chay visiunga tantiachimanchi Pachacho caycaj lapan luta religiuncuna gobiernucunawan imano yanapanacärishganta, y bendiciunnintapis goycushganta. Ichanga ichiclacho gobernanticunaga “Tayta Dios yarpayta qoshqannölami” ruranga. Chauraga ‘chunca  reycuna’ o gobiernucunaga lapan luta religiuncunata chipyaj ushacächenga (Apoc. 17:1, 2, 16, 17).

¹⁵ ¿Imanotaj musyanchi ichiclacho Jatuncaray Babilonia ushacänanpaj? Chaypäga yarparcushun unay Babilonia marcata pasashganta, Éufrates mayu tumaraycaptin chay marcata chapaj atacashga mana cananpaj. Canan wichanpis ‘Jatuncaray Babiloniata’ yanapajcunata Apocalipsis tincuchin yacu chaparashgantano (Apoc. 17:15). Jina nin chay yacu chaquicäcunanpaj, cayga ninanmi lapan luta religiuncunapita runacuna yargucunanpaj, manana yanapänanpaj (Apoc. 16:12). Y cay profeciapis mayna cumplicuycan, achca runacuna luta religiunnincunapita yargucushga y juclächo yanapacuycunata ashircaycan.

16. ¿Imanotaj yanapämanchi tantiarcuptinchi Naciones Unidas camacächishga cashganta y Jatuncaray Babiloniapis ushacächishga cananpaj cashganta?

¹⁶ ¿Imanotaj cay profeciacuna yanapämanchi? Naciones Unidas camacächishgan y luta religiuncunapita runacuna yargucushganta ricarga cuentata gocunchi ushanan junajcunachona caycashganchita. Jatuncaray  Babiloniapita runacuna yargucuptinpis cayga manami ninanchu chay pasacuptinla ushacänanpaj. Ricashganchinopis quiquin Jehová chunca reycunaman o Naciones Unidas nishgan yanapaj gobiernucunaman yarpayta churanga voluntäninta rurananpaj. Aumi, runacunaga almirashga carcaycanga gobiernucuna ilajpita luta religiuncunata ushacächiptin (Apoc. 18:8-10). * Chayta ricar runacunaga manchacashga carcaycanga y chayraycur problemacunapis masrächi miraycunga. Pero Jehovapa sirvejnincunapäga cushicuy tiempo canga. ¿Imanir? Juc, Jatuncaray Babiloniaga mana imaypis canganachu. Ishcay, ichiclanami pishiycan cay mana ali mundo ushacänanpaj y librina canapaj (Luc. 21:28).

17, 18. 1) ¿Imatataj rurashwan yäracuyninchi masraj miraycunanpaj? 2) ¿Imapitataj gatejnin yachachicuycho yachacushun?

¹⁷ Daniel wilacurgan tiempo chayamuptinmi imapis ‘imano cananpaj cashganta musyacänanpaj’. Y chaynomi cashga; cananga shumaj tantiarcunchi ushanan junajcunapa profeciacunata (Dan. 12:4, 9, 10). Chay profeciacuna imano cumplicuycashganta ricar Jehovata y Palabrantapis masraj respetayculanchi (Is. 46:10; 55:11). Chauraga jinala calpachacuycäshun Bibliapita shumaj yachacunapaj y waquincunatapis yanaparcushun Jehovapa amigun cananpaj, chaynopa yäracuyninchipis masraj miraycunga. Taytalanchi Jehovaga payman guelicamojcunata ali cawapäcunanpämi imaypis yanapanga (Is. 26:3).

¹⁸ Gatejnin yachachicuycho ricashun canan wichan congregaciuncuna imano cananpaj waquin profeciacuna wilacushganta. Jina ricashun imano chay profeciacuna tincushganta ushanan junajcunacho pasaycashgancunawan. Chaypitapis maslata yachacushun imanirtaj ninchi Reyninchi Jesús cielucho mandacur galaycushganta y gatirajnincunata pushaycashganta.