Papänëga Canadá naciuncho juc iglesiapa ancianun cargan, payga domingucuna tutapami hermanätawan mandapäcamaj waquin wamracunawan Bibliapita yachacärinäpaj. Once hora chayamuptenga, iglesiaman pushapäcamaj ‘masraj Diospita yachacunayquipaj’ nir. Tardipaypana mamänëga Salón del Reinuman pushapäcamaj. Chay ishcay religiuncunaga manami igualchu cargan.

Mamänëga Bibliapita yachacushgantaga wilaparganmi Bob Hutcheson y Marion warminta, paycunapis tiempuwanga Testiguman ticrapäcurgan. Cay amiguncunaga 1958 watacho pushamargan Nueva York sitiucho ruracashgan juc asambleaman. Chay asambleapa jutin cargan: Asamblea Internacional “Voluntad Divina” nishgan, pusaj junajcuna durargan. Chayman yarparga mana gonganapaj junaj caycan. Imaycata rurapäcurgan apapäcamänanpaj quiquincunapa quimsa wamrancuna caycaptinpis.

Mozularaj caycaptëga cawashgä sitiucho achca animalcunami cargan y cushi cushilami ricaj cä. Chaymi veterinario caytapis munargä. Chay wichanmi juc anciano nogawan parlargan, mamänëmi wilapargan cawaynëwan imata rurayta munashgäta. Cay anciano yarpächimargan ‘ultimu tiempuchona’ cawaycashganchita, y universidäman yaycuptëga Jehovapa amistänintapis ichanga ograrinäpaj (2 Tim. 3:1). Nimashganga yanapämarganmi, universidäman aywargänachu.

Colegiuta usharcur imata ruranäpaj cajtaga musyargächu. Ganasnë mana captinpis semana ushaycunacho predicaciunman yargoj cä. ‘Pitaj precursor canga’ nirpis yarpaj cämi. Papänëpis tiüpis manami Testiguchu cargan, paycunaga munapäcurgan juc negociucho arunäpaj. Chay trabajuchoga jatun carguyojmi tiü caycargan, y chaycho arunäpaj nimaptenga chasquicurgämi.

 Waran waranmi trabajulacho jatiräcuycargä y mana Testigo caj runacunawanpis goturäcuycargämi. Diosta sirvinäpaj tiempö cargannachu. Chay wichanga awilüwanmi cawaycargä, payga mana Testiguchu cargan, tiempuwan wanucuptenga maycho tiyanäpaj ashirmi galaycurgä.

Guepacho parlashganchi Bob y Marion hermanucunaga, taytäcunanomi nogapaj cargan. Invitapäcamargan paycunawan wasincho junto cawanäpaj, chayga yanapämargan Diosta yapay cushi cushila sirvinäpaj. 1960 watacho John jutiyoj wamranwan bautizacurgä. Y pay bautizacurir precursorman ticraptenga, nogapis mastaraj predicayta munargä. Calpachacushgäraycurga, ancianucuna nimargan Escuela del Ministerio Teocrático nishgancho yanapacunäpaj. a

1966 watacho, Randi Berge cristianawan casacurgä, payga precursorano cushi cushila yanapacuycargan y juc marcapapis aywacuyta munaycargan Diospita yachachicunanpaj. Congregaciuncunata watucaj wauguimi shacyächimashpan nipäcamargan juc congregaciunpa aywacärinäpaj, Orillia (Ontario) nishgancho caycaj. ¡Guepipacärergä y aywacärergä!

Warmilä Randiga cushi cushila imatapis ruraj. Chaymi mushoj congregaciunninchiman chayaycurga precursor regularman ticrarergä y ali yachachicoj canäpaj calpachacurgä. Cushicuypämi cargan waquincuna Diosta reguinanpaj yanapacäriptë. Yarpämi juc matrimoniuta yanapashganchita, paycunaga cawaynincho cambiucunata rurar Diosta sirvir galaycärergan.

Juc cuticho Toronto marcaman aywapäcushgächo, Arnold MacNamara jutiyoj hermanuwan reguinacurgä, payga Betelchomi aroj. Y ishcäcunata tapupäcamargan, ‘¿precursor especialno yanapacuyta puedipäcunquimanchuraj?’ nir. Nogacunaga chay horala ‘aumi’ nipäcurgä. Ichanga caytapis  nipäcurgä: “Maypapis mandapäcamay ari, pero Quebec marcamanga mana” nir. Mejoranämi cargan, nogaga waquin runacunanomi yarpaycargä, Canadacho inglés rimajcunaga chiquinacärejmi francés rimajcunawan. Jina chay watacunachoga politicucuna imaycacunata rurapäcuycargan Quebec marca juc naciunman ticrananpaj.

Nishgäpita Arnold hermanunchi cayno nimargan: “Sucursalninchega Quebec marcalamanmi precursor especialcunata mandaycan”. Chayta nimaptenga ‘aumi, aywapäcushämi’ nergä. Warmiläga mayna munaycargan chay marcapa aywayta. Tiempo pasariptenga cuentata gocurgä, chay marcaman aywapäcushgäga alapa cushicuypaj cashganta.

Manaraj aywacäriptë, pichga semanapa francés rimayta yachachipäcamargan, nircur mandapäcamargan juc matrimoniuwan junto Rimouski marcapa, chayga caycan Montreal sitiupita norte caj ladunpa. Francés rimaytaga shumajraj parlargächu. Juc cutichomi reuniuncho asambleapaj anunciucunata ruraycargä. Chaychomi “delegados austriacos” ninäpaj trucanga “delegados avestruces” nergä.

Rimouski marcachoga, aywapäcushgä matrimoniuwan cawapäcurgä. Jina chay wasilacho chuscu soltera hermanacuna cawapäcurgan y juc matrimoniupis ishcay warmi wamrancunawan. Cay matrimoniumi chay wasita alquilargan y chay alquilertaga lapäcunami pagapäcurgä. Chay wasi yuraj color captinmi “Yuraj Wasi” nir reguipäcoj cä. Chaycho 14 runacunano cawapäcurgä. Warmiläwanga precursor especial carmi, pacha warashganpita pacha chacashgancama predicapäcoj cä. Pasaypa gasaycaptinpis pilapis ‘yanagäshayqui’ nipäcamaptenga cushicuypämi cargan.

Waquin precursorcunawanga cuyanacärergämi, juc familianomi capäcurgä. Maylachopis ninata ratarcachirmi jamacurcur cushi cushila parlapacärej cä y imatapis mishqui mishquila micupäcunäpaj yanucärej cä. Öraga sábado chacaycunachomi juc hermano musicata tucaycuptin cantapäcoj y danzapäcoj cä.

Rimouski marcacho predicashganchega alapa alimi cargan. Pichga watacuna pasarcuptin achca estudianticuna bautizacärergan, tiempuwanga 35 publicadorcunana cargan. Chay lapanta ricarga cushicuypämi cargan.

Quebec marcacho carga alapa yanapäcamashga Diospita más ali yachachicoj cananchipaj. Clarumi caycan, Jehovaga yanapämashcanchi waquincunata yachachinapaj y cawanapäga imatapis faltachimashcanchichu. Jinamanpis, francés rimaj runacunawanga yachacärergämi, idiumanpis y costumbrincunapis cuyaylapämi cargan. Chayraycurga listuna carcaycargä juc marcapapis aywacärinäpaj (2 Cor. 6:13).

Tiempuwanga, sucursalpita hermanucuna nipäcamargan Tracadie sitiupana aywacärinäpaj, chayga caycargan Nueva Brunswick sitiupita más cay ladunpa. Juc marcapa aywacunapäga manami yarpaycashcanchichu. Chaylarämi juc wasitapis alquilarganchi y profesorno arunäpäpis aunicushgäna cargan juc escuelacho. Estudiantëcunapis chaylarämi publicadorman ticrargan, jina chaylarämi Salón del Reynutapis sharcaycächishcanchi. Cambiucunata ruranapäga sasanomi cargan.

Jehovata mañacarcärirmi Tracadie marcapa aywacärergä, cay marcaga Rimouski marcawan manami igualchu cargan. Maypapis aywanapäga ‘Jehová munashganno cayculächun’ nishcanchimi. Y rasunpami cargan, mayman chayanapäpis Jehovami  pushaycalämashcanchi (Mal. 3:10). Randi warmiläga chay mushoj marcapa aywar imaycanchicunata apanapäga, cushi cushilami Diosta cuyashpan yanapacamushga.

Tracadie marcachoga, Robert Ross wauguilami ancianuno yanapacuycargan. Linda jutiyoj warminwanmi precursor regularno yanapacaycärergan, ichanga wamran yurircuptin chaycho quedacärergan. Calpachacärejmi wamranta ashmapäcunanpaj, shacyächicoj hermanucuna capäcurgan, pitapis wasincho pachächejmi y Diospitapis ganas ganasla yachachicärej.

Tracadie marcacho ishcay watacuna carcaycaptëmi juc ali wilacuy chayamurgan: Congregaciuncunata watucunapaj nipäcamargan. Ganchis watacunapami watucärergä inglés rimayniyoj congregaciuncunata y nircurga Quebec marcacho caycaj francés idiumata rimajcunatapis. Chay marcachoga Léonce Crépeault waugui superintendente de distrito cargan, payga discursücunata wiyar ‘alimi caycan’ nimaj. b Ichanga ali shongulanwanmi imalachopis mejoranäpaj nimargan. Nimashganwanga discursücunaga más facil-lana tantiacänanpaj cargan.

Canancamaga yarpaycärämi 1978 watacho Montreal naciuncho juc shumaj asamblea ruracashganta, jutin cargan Asamblea Internacional “Fe Victoriosa”. 80.000 runacunano chay asambleaman shamunanpaj caycargan. Y micuycuna imano preparacänanpaj noga yanapacunäpaj nipäcamargan. Micuytapis alistapacunapaj manami unay cashgannochu caycargan. Micuycuna mana malugracänanpäpis imaycata rurashcanchi. Jina estadiuman tiempulancho yaycunanchipäpis manami puedicarganchu. Asambleanchi galaycunanpaj juc junaj pishiycaptinmi, pelotata puclapäcurgan chay estadiucho. Chaymi pulan pagaschöraj yaycushcanchi. Y jucla arur galaycushcanchi pacha wararcuptin desayuno listo cananpaj. Utishgami carcaycargä, pero chaycho cushi cushila aroj pogushga cristianucunapitaga yachacurgämi, chay lapancho yanapacärishgächoga más amigucunatami tarergä. Waquincunawan canancamaga tincuycärämi. Quebec marcacho ruracashgan asambleaga alapa shumajmi cashga. Más guepa watacunacho chay marcacho waquin runacunaga pasaypami Jehovapa testiguncunata chiquipäcush.

Montreal sitiucho ruracashgan jatun asambleacunacho, yachacurgämi waquin carguyoj  hermanucunapita. Jucmi caycan David Splane, cananga Jehovapa testiguncunata Pushaj hermano caycan. Chay wichanga asambleata ricaj encargado hermanumi caycargan. Juc asamblea ruracaptenga, nogatana nipäcamargan chayno yanapacunäpaj, y David hermanulanchega chaycho yanapaycalämashgami.

36 watacuna congregaciuncunata watucar capäcurgä, 2011 watachoga Escuela para Ancianos de Congregación nishgancho yachachicoj canäpaj nipäcamargan. Yupaptëga, ishcay watacunalachomi Randi warmiläwan 75 camacunacho punupäcushcä. Calpachacärishgäga alipämi cargan, ancianucunaga agradecicärirganmi Jehovapa testiguncunata Pushajcuna imano paycunapaj yarpachacärishganta ricar.

Tiempuwanga Diospita Yachachicojcunapaj escuelancho yachachicoj canäpaj nipäcamargan. Chay escuelaman shamoj estudianticunaga öraga laquicärejmi, ‘¿imanoparaj lapan clasëcunapaj preparacushaj?, ¿imanoparaj demostraciuncunata discursucunatapis rurashaj?’ nir. Chaura paycunataga cutin cutinmi nipäcoj cä, ‘quiquin Jehovami yanapäshunqui’ nir. Chaynomi cargan, Jehovami jucnin jucnintapis yanapargan yarpapäcushganpitapis mastaraj.

Yanapacoj warmi cashganraycurmi, mamänëga achca estudianticunata yanapargan Bibliapita yachachicunanpaj y quiquin papänëpis rasunpa cajpita yachacuyta munargan. Mamänë wanushganpita quimsa junajcuna pasarcuptin, Salón del Reinuman papänëga shamurgan juc shumaj discursuta wiyananpaj. Y chay wichanpitaga 26 watacunano mana fallaypa aywargan. Manami bautizacurganchu, pero ancianucunaga nipäcamargan payshi pipitapis más puntacho chayaj reuniunman. 

Mamänëga alapami yanapäcamashga nogatawan hermanäcunata. Paycunaga runancunawanmi Jehovata sirvircaycan. Ishcancuna caycan Betelcho: Portugal Betelcho y Haití Betelcho.

Randi warmiläwan cananga precursor especialno yanapacäriycä Hamilton (Ontario) sitiucho. Congregaciuncunata watucärishgä wichanga, gustamajmi waquin hermanucunata yanagayta revisitancunaman y estudiuncunamanpis. Canan ichanga quiquëcunapami estudiantëcuna caycan, y Diosta sirvinanpaj cambiucunata rurapäcushganta ricarga cushicuypämi. Congregaciuncho hermanucunawanpis más tiemputa pasanchi y shacya shacyala ricacunchi imaycacunapa pasarpis paycunata Jehová yanapashganta ricar.

Randi warmiläwanga agradecidumi carcaycä, nogacunaraycur waquincuna imaycata rurapäcushganta. Nogacunapis calpachacärishgämi waquincuna Diosta sirvishgancho masraj calpachacärinanpaj (2 Cor. 7:6, 7). Juc familiachomi mama caj, wamran y warmi wamran precursorno yanapacuycargan. Chaymi papäninta tapurgä paypis precursorno yanapacuyta yarpaycashganta o mana. Payna nimargan ‘mayna quimsa precursorcunata yanapaycä’ nir. Chauraga tapurgä: “¿Manachuraj paycunata Jehová gampitaga masraj yanapacunman?”. Jina tantiachergä familiancuna Jehovata sirvishganraycur cushi cushila carcaycajta, sojta quillacuna pasariptenga precursor regularmanna ticraycurgan.

Randi warmiläwanga parlarcaycäshämi runacunata y paycunapita mirajcunatapis, Camacojninchi Jehová juc ali Dios cashganpita y masraj cushicunapaj canga paycunapis ganas ganasla y cushi cushila Jehovata sirvir galaycäriptin (Sal. 71:17, 18).