1. ¿Imacunatataj yachacushcanqui Bibliapita yachacur?

 BIBLIAPITA yachacur galaycushgayquipita cushicurgayquichi Diospa jutinpita yachacur. Jina infiernucho Dios runacunata mana nacachishganta musyarpis jaucalachi ricacurgayqui. Y mayrajchi cushicurgayqui wanushga castayquicuna cawarimunanpaj cajta yachacur, masraj paycunawan Paraisucho tincunayquipaj yarpar.

2. Pogushga cristiano canayquipäga, ¿imatataj rurashcanqui? (Efesios 5:1, 2).

² Bibliapita yachacur Jehovata masraj cuyar galaycushcanqui, y payta cushichiyta munar lapan yachacushgayquimanno cawacunayquipaj calpachacushcanqui. Jina Bibliapa tantiachicuycunata yachacur ali decisiuncunatapis acrashcanqui. Nircur Dios munashganno yarpayta y ruraytapis galaycushcanqui. Juc wamra taytanpita yachacushganno, gampis Tayta Dios cuyashgan ruraycunata ruranayquipaj calpachacushcanqui (leiriy Efesios 5:1, 2).

3. ¿Imacunatataj tapucushwan?

³ Cayno tapucushwan: “¿Bautizacushgäpita masrächu canan Jehovata cuyä? ¿Jehová cashganno nogapis yarpä y rurä? ¿Congregaciuncho caycaj hermanucunata Jehová cuyashgannochu cuyä?”. Chaycunata ‘mana’ niptinchega ama laquicushunchu. Chaytami punta caj cristianucunatapis pasargan. Ichanga Jesús paycunata jinala cuyar yarpächergan imano cuyacuyninta mirachinanpaj (Apoc. 2:4, 7). Chayga noganchitapis yanapämäshun Jehovata masraj cuyanapaj y cristiano masinchicunatapis.

4. ¿Imataj canan yachacushun?

⁴ Canan yachacushun imano Jehovatawan runa masinchicunata  masraj cuyanapaj. Nircur ricärishun cuyacoj cashganchi imano quiquinchita y waquincunatapis yanapashganta.

5, 6. 1) ¿Ima sasacunapataj Apóstol Pablo pasargan? 2) ¿Imataj yanapargan Jehovata sirvir caycänanpaj?

⁵ Apóstol Pablo may chaypa runacunata cushishga yachachicurgan, chayno captinpis imayca sasacunapami pasargan. Lapan pasashganpita cayno nergan: “Atska kutimi mayupis cäsi cäsi apamashqa. Suwakunapa makinpitapis qeshpirqä. Israel runakunapis y mana Israel runakunapis wanutsimaytami munamashqa” (2 Cor. 11:23-27). Jina waquin cristiano masincuna consejuncunata chasquinanpaj trucan Pabluta jamurpaj (2 Cor. 10:10; Filip. 4:15).

⁶ Pabluga Bibliapita ali yachacoj cargan y cawaynincho imayca pasashgancunacho ricargan Jehová amatar cuyashganta. Chayga yanapargan Jehovalata sirvir caycänanpaj (Rom. 8:38, 39; Efes. 2:4, 5). Jehovata lapan shongunwanmi cuyar, Pabluga calpachacurgan yäracoj masincunata imaypis yanapänanpaj (Heb. 6:10).

7. ¿Imacunata rurartaj Jehovata masraj cuyashun?

⁷ Bibliata leir calpachacunanchi shumajraj yarpachacunapaj Jehovapita imata yachacushganchiman. Chaypäga caycunatami tapucunanchi: “¿Imanotaj cay textucuna ricächiman Jehová cuyamashganta? ¿Imanotaj cay versículo yanapaman Jehovata masraj cuyanäpaj?”. Cay lapancunata rurar yanapämäshun Jehovata masraj cuyanapaj.

8. ¿Imaraj pasanga cada cadala Jehovata masraj mañacuptinchega?

⁸ Jehovaga atentula caycan mañacuyninchicunata wiyamänanchipaj (1 Juan 3:21, 22). Chaymi shongunchita mashtapar Diosta mañacuptinchega yanapämäshun payta masraj cuyanapaj (Sal. 25:4, 5). Asiacho tiyaj Khanh b jutiyoj cristiana nin: “Unayga Bibliata leishgaläpita Jehovata cuyaj cä. Canan ichanga mañacushgäta contestamashganta ricar payta masraj cuyaycö, y chayga yanapaman imaypis alicunalata rurayta munanäpaj”.

9. ¿Imanirtaj ninchi Timoteo yäracoj masincunata alapa cuyashganta?

⁹ Pablo cristianuman ticrashganpita watacuna pasaptin ali mozo Timoteuta reguirgan. Jehovatawan runa masincunata cuyashganta ricar caytami nergan Filipos congregaciuncho caycaj hermanucunata: “Timoteunöqa manami pipis kantsu. Paylami noqano qamkunapaq yarpachakun” (Filip. 2:20). Pabluga manami nirganchu Timoteo ali yachachicoj cashganta o imaycatapis rurayta yachashganta. Chaypa trucan payga más yarpachacurgan imano Timoteo yäracoj masincunata cuyashganta. Congregaciuncho hermanucunaga mayna shuyaraycarganchi Timoteo watucoj aywananpaj (1 Cor. 4:17).

10. Yäracoj masincunata alapa cuyashpan, ¿imataj Annawan runan rurapäcurgan?

¹⁰ Noganchipis puedishganchimanno calpachacushwan hermanunchicunata yanaparcunapaj (Heb. 13:16). ¿Yarpanquichu guepa yachacuycho Annapita parlashganchita? Locu tamya pasashganpitana payga runanwan Testigo caj juc familiata watucärergan. Y chaycho ricargan chay familiapa wasin techuyniynaj cashganta, y limpio ropapis  manami carganchu jaticärinanpaj. Anna wilacun ima rurapäcushganta: “Röpancunata apaycur tacshapäcurgä y nircur shumaj plancharcur cutichipäcurgä. Chayta rurapäcushgäpita canan paycunawan ali amigucuna capäcö”. Yäracoj masincunata alapa cuyashpan Annaga runanwan chayta rurapäcurgan (1 Juan 3:17, 18).

11. 1) ¿Imanotaj hermanunchicuna sienticärin paycunata cuyar yanapaptinchi? 2) Runa masinchita cuyacuywan yanaparcuptinchega, ¿imanotaj Jehová rican Proverbios 19:17 nishganno?

¹¹ Hermanunchicunata cuyacuywan y ali shongulanchiwan yanaparcuptinchega, Jehová rurashganno ruraycanchi. Yäracoj masinchicunaga manami gongapäcunchu lapan rurashganchicunata yanaparcunapaj. Pusaj caj parrafucho Khanh cristianapita parlashganchi, payga cayno wilacun hermanucuna yanapashganpita: “Alapa agradecicuycömi lapan hermanacunata predicaciunman cuyacuywan pushamashganpita, wasëman shapäcamushganpita, imalatapis micupacunapaj invitamashganpita y wasëmanpis ali cutinäpaj yanagämashganpita. Musyämi chay lapanta rurananpäga calpachacunanrämi cargan”. Capaz öraga yanapashganchipita waquincuna ‘gracias’ manami nimäshunchu. ¿Imanir? Payta yanapashganman yarpar Khanh cayno nin: “Lapan yanapämashgancunata agradecicuyta munämi, ichanga manami musyächu maycho tiyaycashgantapis. Jehová ichanga musyanmi, chaymi payta mañacuyculä lapan yanapämashgancunata bendicinanpaj”. Jehovaga manami gonganchu waquincunaraycur lapan rurashganchita, ichicla captinpis. Pilatapis yanapaptinchega, payta yanapaycashganchino caycan (leiriy Proverbios 19:17).

12. Bautizashgana olgucunaga, ¿imanotaj cuyacoj cashganta congregaciuncho musyachicunman? (Fotucunatapis ricay).

 ¹² Gampis bautizashgana olgu captiquega, congregaciuncho hermanucunata yanapänayquipaj imayca ruraycuna caycan. Jordan jutiyoj mozuga juc ancianuta tapupargan imacunachotaj hermanucunata yanaparcunanpaj. Anciano cajga felicitaycurganmi lapan ruraycashganpita, y caycunacho mejorananpaj nergan: reuniuncunaman temprano chayaycur waquincunata saludananpaj, reuniuncunacho comentananpaj, grupuncho caycajcunawan predicananpaj y altanto caycänanpaj imalachopis waquincunata yanaparcunanpaj. Jordan chay consejucunata cäsucur cuentata gocurgan yäracoj masincunata masraj cuyar galaycushganta. Jina yachacurgan pipis siervo ministerial cayta munaptenga, manami chayraj yäracoj masincunata yanapayta galaycunman, sinoga unay rurashgancunata jinala ruran (1 Tim. 3:8-10, 13).

13. ¿Imataj yanapargan Christian hermanuta ancianuno yapay yanapacunanpaj?

¹³ Jehovaga manami gonganchu unaycho siervo ministerialno o ancianuno yanapacur lapan rurashgayquita (1 Cor. 15:58). Payga ricaycanmi canan wichanpis cuyacoj cashgayquita. Christian jutiyoj cristianuga laquicurganshi ancianuno manana yanapacunanpaj niptin. Ichanga chayraycur manami gelanäcurganchu, payga nin: “‘Ancianuno manana yanapacurpis, jinala calpachacushaj Jehovata cuyar payta sirvinäpaj’ nirmi yarpaj cä”. Tiempuwan yapay ancianuno yanapacunanpaj niptin payga manash seguruchu caycargan chayno yanapacunanpaj. Ichanga caynoshi yarpargan: “Cuyacoj  Taytanchi Jehová ancianuno yapay yanapänäpaj niycämaptenga, imanir-raj ‘mana’ nishaj, payta y hermanunchicunataga alapami cuyaycö”.

14. ¿Imataj yachacunchi Elena cristiana nishganpita?

¹⁴ Jehovapa sirvejnincunaga mana Testigo cajcunatapis cuyanchimi (Mat. 22:37-39). Georgia naciunpita Elena jutiyoj cristiana, cayno nin: “Jehovata cuyashpämi wasin wasin yachachicoj aywaj cä. Pero Taytalä Jehovata masraj cuyar runacunatapis masraj cuyayta galaycurgä. Chaymi runacuna imacunapa pasashgancunacho o ima necesitashgancunacho yanapänäpaj calpachacurgä. Chayga yanapämargan paycunata shongupita pacha masraj yanapayta munanäpaj” (Rom. 10:13-15).

15, 16. Fotucunacho ricashganchino, ¿imanirtaj ali caycan waquincunata cuyacuywan yanapaptinchi?

¹⁵ Cuyashga hermanunchicunata yanapaptinchi, waquin runacunatapis yanapaycanchimi. COVID-19 gueshya wichancho, Paolo warminwan achca edayashga hermanacunatashi shumaj yachachergan imano telefunupa yachachipäcunanpaj y tabletancunatapis manejananpaj. Juc hermanapa chayta yachacunanpaj sasa captinpis, achca ayluncunata o castancunata invitargan Jesús wanushganta Yarpänapaj reuniunman; 60 runacunash videulapa conectacärergan. Paolo warminwan cay hermanata yanapar waquin runacunatapis yanapaycargan. Chaymi cay  hermanaga agradecicur Paolutawan warminta cayno nergan: “Päquila edayashgacunata yachachimashgayquipita. Imaypis gongashächu Jehová cuyamashganta y gamcuna pacienciacoj capäcushgayquipita”.

¹⁶ Cay lapan rurashganpita, Paolo cuentata gocurgan cuyacoj cayga más ali cashga yachaj y habilidoso cashganpitapis. “Unaycho congregaciuncunata watucamojno yanapacur, hermanucunaga manachi yarpannachu lapan yachachicushgätapis, ichanga yarpanrämi imano paycunata yanapashgäta”, chayno nin Paolo.

17. ¿Imaraj pasanman waquincunata cuyacuywan yanapaptinchi?

¹⁷ Waquincunawan cuyacoj captinchega, quiquinchitapis shacyächimanchi. Juc cuticho Nueva Zelanda naciuncho, Jonathan jutiyoj cristiano ricargan juc precursor pasaypa shanaycaj horacho japalan predicaycashganta. Chaura camacächergan sábado junajcunacho tardipaypa yanagänanpaj. ¿Chayta rurashganpita imataj pasargan? Pay cayno wilacun: “Chay wichanchoga runacunata yachachicuyta cushichimajchu. Ichanga chay precursor cushi cushila yachachicuptin runacuna atentula wiyashganta ricar, nogapis chayno yachachicuyta munargä; ichic ichiclapa predicayta masraj gustamaj. Jina cay precursor ali amigüman ticrargan, payga yanapämargan pogushga cristianuman ticranäpaj, cushi cushila runacunata yachachinäpaj y Jehovawan más ali amigo canäpaj”.

18. ¿Imataj Jehová munan ruranapaj?

¹⁸ Diosnilanchi Jehovaga payta y runa masinchicunatapis cuyanapaj munan. Chaypäga canan ricashganchino, Diospa Palabranta leinanchi, leishganchiman yarpachacushwan y junaj junaj mañacunanchi. Y yäracoj masinchicunata cuyar imalachopis yanapacushun. Chayta rurarga, Jehovaman masraj guelicushun y hermanunchicunawanpis juc familiano caycäshun. ¡Aumi, imaycamapis Jehovawan amigo cashun y hermanunchicunawanpis jauca jaucala goyäcushun!