1. Ima desgraciapis manaraj chayamuptin, ¿imanirtaj shumaj camaricushgala caycashwan?

 IMA desgracialapis chayamuptin, pilapis mayna preparashga o camaricushgala caycaptenga cawaynintami salvanga y waquincunatapis yanapanga. Chaychi Europacho runacunata yanapänanpaj caycaj organizaciunpis “ali camaricushgala caycar waquincunapa cawaynintapis salvashun” ninmi.

2. ¿Imanirtaj camaricushgala caycashwan jatun nacaypaj? (Mateo 24:44).

² Bibliaga wilacun jatun nacay ilajpita galaycunanpaj (Mat. 24:21). Chayno captinpis manami manchacushunchu waquin desgraciacuna waquincunata manchachishganno. Mateo 24:44 (leiriy) textucho, Jesús gatejnincunata nergan mayna camaricushgala carcaycänanpaj chay junajpaj. Jesús nishganta cäsucurga chay junajcho manami wanushunchu y waquincunatapis yanaparcushun salvacärinanpaj (Luc. 21:36).

3. ¿Imanotaj imatapis aguantaj runa, cuyapäcoj y cuyacoj car yanapämäshun jatun nacay wichancho?

³ Quimsa caycan jatun nacay wichan imacuna yanapämänanchipaj (Apoc. 16:21). Juc, valurwan imatapis aguantaj runa cashwan. Ichanga chay wichan runacunapa wanuynin chayaycamushgantana wilacuycäshun, valurwan imatapis aguantarmi Jehovata cäsucushun y payman yäracushun (Hab. 3:17, 18). Ishcay, cuyapäcoj runa cashwan. Maygan cristiano masinchicunapa imalancunapis mana captin cuyapäcoj car jinan hora imalawanpis yanaparcushun (Ezeq.  38:10-12). Y quimsa, cuyacoj runa cananchi. Chiquimajninchicuna ushacächimänanchita munaptin, capaz öraga juc tacsha cuartulacho cristiano masinchicunawan caycashwan shacyächinacur calpata gonacunapaj.

4. ¿Imanirtaj calpachacunanchiraj imatapis aguantanapaj, cuyapäcoj y cuyacoj canapaj?

⁴ Diospa Palabran shacyächimanchi mana yamacaypa valurwan aguantanapaj, cuyapäcoj y cuyacoj canapaj. Lucas 21:19 nin: “Imano nakarpis [valurwan aguantarcuptiquirämi] salvakärinkipaq”. Colosenses 3:12 nin: “Kuyapänakur kawapäkuy”. 1 Tesalonicenses 4:9, 10 nin: ‘Kuyanakur ali kawanaykipaqmi Tayta Dios tantiyatsipäkushushqanki. Tsaymi qamkunata shakyätsipäkamü masraq kuyanakunaykipaqmi’. Cay textucuna nishganno unay cristianucuna mayna chayno cawacuycarpis jinala calpachacärinan cargan aguantananpaj, cuyapäcoj y cuyacoj capäcunanpaj, y noganchipis chayta rurashwan. Chaymi cay yachacuycho ricärishun punta caj cristianucuna rurashgan imano yanapämanchi jatun nacay wichanpaj.

5. ¿Imataj punta caj cristianucuna rurapäcurgan aguantananpaj?

⁵ Punta caj cristianucunaga yäracuyninraycur chiquishga cargan (Heb. 10:36). Pushacoj religiosucuna y autoridäcunaga Jesuspa gatejnincunata gaticachajmi. Quiquinpa familianchopis mana ali ricashgami cargan, chaymi paycunaga mana yamacaypa aguantananrämi cargan (Mat. 10:21). Jina luta yachachicojcuna manacajcunata yachachicuycashgancunapita cuidacunmanmi cargan (Hech. 20:29, 30). Chay jinanpa pasaycarpis, paycunaga Jehovaman mana yamacaypa yäracur carcaycargan (Apoc. 2:3). Chaypäga Bibliacho wilacushgan Diospa sirvejnincuna rurashgancunaman yarpachacurganchi (Sant. 5:10, 11). Jina Jehovata mañacärergan calpanta goycunanpaj (Hech. 4:29-31). Y manami gongapäcurganchu yäracoj captin Jehová bendicinanpaj cashganta (Hech. 5:41).

6. Merita aguantananpaj rurashganpita, ¿imataj yachacunchi?

⁶ Noganchipis mana yamacaypa aguantanapaj Bibliacho y publicaciuncunacho Diospa sirvejnincuna imacunapa pasashganman yarpachacushwan. Chayshi Albaniapita Merita jutiyoj cristianata yanapargan aguantananpaj Testigo cashganraycur familiancho pasaypa chiquishga captin. Pay cayno wilacun: “Bibliacho Jobpita yachacur alapa shacyächimargan. Payga pasaypami nacargan, y manami musyarganchu imanir chaycunapa pasaycashganta. Chayno captinpis Job 27:5 nishganno payga nergan wanunanyaj Jehovata mana cachaycunanpaj. Cayga yarpächimargan Jobta pasashganga más sasaraj cashganta nogata pasaycämashganpita. Ichanga noga musyä pï chaycunapa guepancho cashganta”.

7. Canan pruebacunapa manaraj pasarpis, ¿imataraj mayna yachacunquiman rurayta?

⁷ ¿Ima masraj yanapämäshun mana yamacaypa aguantanapaj? Shongunchita mashtapar Jehovata mañacuptinchi (Filip. 4:6; 1 Tes. 5:17). Canan pruebacunapa mana pasarpis, ¿imataj ruranqui laquishga, rabiashga o alapa yarpachacushga captiqui? ¿Jehovapa yanapacuynintachu ashinqui? Cananlapitana imapäpis Jehovata mañacur yanapacuyninta ashiptiquega, shamoj tiempucho chayno masraj ruranqui cawayninchi más sasa captin. Aumi, lapan shonguyquiwan yäracunquimi Jehová yanapäshunayquipaj cajta (Sal. 27:1, 3).

8. Mira cristiana pasashganga, ¿imanotaj yanapämanchi canan pruebacunata aguantarga shamoj tiempuchopis aguantanapaj? (Santiago 1:2-4, fotutapis ricay).

 ⁸ Cananlapita imayca pruebacunata aguantaptinchi jatun nacaychopis aguantashunmi (Rom. 5:3). Achca hermanucuna nipäcun, cananlapita tucuy pruebacunapa pasarga chayga yanapämanchi más sasa pruebacunatapis aguantanapaj. Paycunaga yäracärin Jehová imaypis yanapänanpaj cajta. Chaymi Jehovaman yäracushpan ima captinpis mana yamacaypa aguantapäcun (leiriy Santiago 1:2-4). Albaniapita Mira jutiyoj cristiana yarpan öraga paylami imayca problemacunapa pasaycashganta. Ichanga chayno yarpar galaycuptinshi yarpachacun cawaynincho imano Jehová tucuynopa yanapashgantami. Y nircur quiquinta cayno nin: “¿Imanotaj Jehovata cachaycunquiman? ¿Manachu payga yanapäshushcanqui imayca pruebacunata vencinayquipaj payta sirvir caycänayquipaj?”. Gampis yarpachacunquiman imano Jehová yanapäshushcanqui tucuy pruebacunata aguantanayquipaj. Cayta ama gongaychu, Jehovaga ricaycanmi imacunapa pasashgayquita y aguantaptiquega bendicishunquipämi (Mat. 5:10-12). Chaura, jatun nacay galaycuptenga, musyanquinami imacunata rurartaj jinala aguantanayquipaj.

9. ¿Imanotaj Antioquiapita cristianucuna cuyapäcoj cashganta musyachicurgan?

⁹ Judeacho caycaj cristianucunaga alapa nacapäcuycargan muchuy cashganraycur. Chauraga Antioquiapita cristianucuna chayta musyar, “wilanakurqan imatapis kashqanpita shuntarkur Judeacho kaq wawqi panikunaman apatsinanpaq”. Chaynopa paycuna musyachicurgan cuyapäcoj cashganta (Hech. 11:27-30). Muchuyraycur nacaycaj cristianucuna alapa carucho caycaptinpis, Antioquiapita cristianucunaga listo carcaycargan yanapänanpaj (1 Juan 3:17, 18).

10. Cristiano masinchicuna nacapäcuptin, ¿imacunataj rurashwan paycunata cuyapar? (Fotutapis ricay).

¹⁰ Noganchipis cuyapäcoj cashganchita musyachicunchi nacaycaj hermanunchicunata yanaparcuptinchi. Chaypäga ancianucunata wilashwan imalachopis yanaparcunapaj munashganchita, aycalatapis guellayninchita apachicushwan, y nacaycajcunapäpis mañacushwanmi (Prov. 17:17). b Tantiarinapaj, 2020 wata, entero munducho 950 Comités de Socorro nishgan cashga COVID-19 gueshyaraycur nacaycajcunata yanaparcunanpaj. Chaymi alapa agradecicuyculanchi chay lapancho yanapacushgancunata. Achcajmi cristiano masincunata cuyapar imalawanpis yanapacurgan, Bibliawan shacyächergan y öraga wasintapis o maycho shuntacänanpäpis sharcachipäcurgan (2 Corintios 8:1-4 textuwan tincuchiy).

11. Cuyapäcoj captinchega, ¿imanotaj Taytalanchi Jehovata cushichinchi?

¹¹ Desgraciacuna captin nacaycajcunata yanaparcunapaj lapan rurashganchicunaga waquincuna ricarcaycan. 2019 wata, Bahamas naciuncho Diosta aduranapaj juc Wasi juchucargan huracán Dorian captin. Chaura Diosta aduranapaj Wasita yapay sharcachinanpaj hermanucunaga, juc runawan contratuta rurayta munargan imano chay lapanta rurananpaj. Ichanga payga nergan: “Gamcunaraycur imalatapis rurayta munä. Chaymi quiquëpita maquinacunata y materialcunatapis camaripäshayqui. Alapami almiracö gamcuna  jucniqui jucniqui yanapanacushgayquita ricar”. Achcajmi Jehovata mana reguirpis, ichanga ricaycanmi Testiguncuna rurashgancunata. Hermanunchicunawan cuyapäcoj cashganchita ricar, öraga waquincuna cuyapäcoj Diosninchipitapis yachacur galaycunmanmi (Efes. 2:4).

12. Cananlapitana cuyapäcoj captinchi, ¿imanotaj yanapämäshun jatun nacaychopis? (Apocalipsis 13:16, 17).

¹² Bibliaga nimanchi gobiernucunata mana yanapajcunaga imayca nacaycunapa pasananpaj, y chayga canga canan tiempo y jatun nacay wichanchopis (leiriy Apocalipsis 13:16, 17). Öraga achca hermanucunapaj sasami canga ima necesitashgancunata taripäcunanpaj. Chaymi ali caycan cananlapitana yachacunapaj waquincunawan cuyapäcoj cayta. Chayno captenga Reyninchi Jesús runacunata juzgananpaj chayamuptin, payga nimäshun ‘qamkunapaq Taytä kamarishqanta’ chasquicuy (Mat. 25:34-40).

13. ¿Imataj punta cristianucuna rurapäcurgan masraj cuyanacärinanpaj? (Romanos 15:7).

¹³ Unay tiempucho cristianucuna cuyanacärinanpäga, ¿facilchuraj cargan? Romacho caycaj congregaciunchoga, may chaypita tucuy clase runacuna congregaciuncho caycargan. Waquincuna Judío car Moisesta goshgan Ley nishgannomi ashmashga cargan. Waquincunana juc naciuncunapita car costumbrincunapis jucnomi cargan. Capaz juccunaga esclavo capäcurgan, y juccuna mana. ¿Imataraj paycunata yanapaycushga jucnin jucnin masraj cuyanacärinanpaj? Apóstol Pablo paycunata nergan: “Yärakuq mayintsikunawan kuyanakushun” (leiriy Romanos 15:7). Chauraga, chay cristianucunaga cristiano masincunata cuyacuywanmi chasquicärinman cargan. Juc cuticho, Filemonpa ashmaynin Onésimo gueshpicur aywacushga cargan. Chaymi Pabluga Filemonta nergan: ‘Noqata chaskimashqaykino paytapis chaskiykulay’ (Filem. 17). Priscilawan Áquila más unayna cristianucuna caycaptinpis, Apolusta ali chasquicur yanaparganmi (Hech. 18:26). Cay lapan cristianucuna tucuy costumbricunayoj o juc marcapita caycaptinpis, ali chasquinacärergan y juc shongunola capäcurgan.

14. ¿Imanotaj cuyacoj cashganta musyachicurgan Annawan runan?

¹⁴ Noganchipis cuyacoj cashganchita musyachicunchi waquincunata ali chasquiptinchi y lapancunawan amigo cayta ashiptinchi. Chayta rurarga waquincunapis cuyacuywan tratamäshun (2 Cor. 6:11-13). Chaytami pasargan Annatawan runanta, África Occidental cajcho misionerucunano yanapacuycaptin. Chay sitiuman chayapäcushganlapitash COVID-19 gueshya galaycurgan, chaura congregaciunpita hermanucunawan shuntacayta camäpacurgannachu. Chaura videocunalapa hermanucunawan conectacurgan, ‘gamcunata más reguiyta munapäcö’ ninanpaj. Chayta wiyarshi hermanucunaga cushicärergan y Anna runanwan telefunupa o mensajipapis parlacur galaycärergan. ¿Imanirtaj cay misionerucunaga calpachacurgan hermanucunata shumaj reguinanpaj? Panilanchi Anna nin: “Manami gongächu imano hermanucuna familiäta y nogatapis cuyamar yanapämashganta. Chayman yarpar yanapaman nogapis waquincunawan cuyacoj canäpaj”.

15. ¿Imataj yachacunchi Vanessa yäracoj masincunawan cuyacoj cashganpita? (Fotutapis ricay).

¹⁵ Achca congregaciuncunacho hermanunchicunaga jucnin jucninpis jucnomi caycan. Chaura lapancunata masraj cuyaycunapäga  ali cashganman yarpachacunanchi. Nueva Zelanda naciunpita Vanessa jutiyoj cristianapäga manami facilchush cargan yäracoj masincunawan ali apanacärinanpaj. Imalapitapis rabianächicärejshi, chayno captinpis calpachacurganshi paycunawan más tiempo caycänanpaj. Chayta rurar, cuentata gocurgan Jehová paycunacho ima alicunata ricashganta. Payga wilacun: “Runä congregaciuncunata watucur galaycuptin cananga masraj tucuy clase hermanucunawan shuntanacärë. Y jucnin jucninpis jucnomi capäcun. Chayno captinpis manami sasanachu caycan lapancunawan ali apanacärinäpaj. Cushicömi tucuy hermanucunata reguir, quiquin Jehová paycunatami marcanman pushamurgan”. Chauraga, Jehovano hermanunchicunata ricaptinchega, paycunata cuyaycanchimi (2 Cor. 8:24).

16. ¿Imanirtaj canan cuyacoj cashganchega jatun nacay wichanchopis yanapämäshun? (Fotutapis ricay).

¹⁶ Jatun nacay wichanchoga alapa ali canga hermanunchicunata cuyanapaj. ¿Imanotaj Jehová chapaycalämäshun jatun nacay galaycuptin? Babilonia marca ushacächishga cananpaj captin, Jehová cayno nergan sirvejnincunata salvacärinanpaj: ‘[Ruri] wayikikunaman yaykur punkuykikunata wichqakamuy [...] rabyaynï pasashqanyaq pakarpäkuy’ (Is. 26:20). Chaynolachi noganchipis ruraycushwan jatun nacay galaycuptin. ‘Ruri wasiquicuna’ niptenga parlaycämun congregaciuncunapitami. Chay wichan hermanunchicunawan juc shongunola captinchega Jehová aunimanchi chapaycalämänanchipaj. Chauraga calpachacunanchimi hermanunchicunata shongupita cuyanapaj, chayta ruraptinchirämi salvaciuntapis tarishun.

17. Cananlapita ali camaricushga caycarga, ¿imatataj jatun nacay wichancho rurashwan?

¹⁷ Jehová Dios ‘juzganan junajga’, achcajpämi alapa manchariypaj canga (Sof. 1:14, 15). Jehovapa sirvejnincunapis sasacunapa pasashwanmi. Ichanga cananlapita ali camaricushga caycarga manami manchacushwanchu, listo caycashwan waquincunata yanaparcunapaj. Aumi, ima captinpis mana yamacaypa valurwan aguantashwan. Jina cuyapäcoj car listo caycashwan hermanunchicunata imalachopis yanaparcunapaj y necesitashgancunatapis tarichinapaj. Nircur paycunata cuyashpanchimi chay wichanchopis juc shongunola caycashwan. Ichiclacho lapan nacachimashganchicuna pipis yarpanganachu, Jehová imaycamapis cawayta goycalämäshun (Is. 65:17).