1, 2. ¿Imanirtaj ninchi noganchi cristianucuna jatuncaray edificiuno cashganchita? (1 Corintios 15:58).

 JAPÓN naciuncho 1978 watacho, jatuncaray edificiuta runacuna sharcachergan. Chayta ricaycur waquincuna cayno tapucärej: “Pacha cuyuptin, ¿chay edificio juchucäcungachuraj?” nir. Ichanga cada cadala terremoturaycur chay edificio cuyuptinpis, manami juchucäcurganchu. ¿Imanir? Chay edificiuga sharcachishga cargan mana juchucäcunanpämi. Noganchipis chay jatuncaray edificiuno cananchi, ¿imanirtaj chayta ninchi?

² Ali cimientuyoj edificiutaga imapis tunichinchu, chaynolami lapan shongunchiwan Jehovata cuyaptinchega imapis tunichimäshunchu; chaypa trucanga mana guelanaypa y mana ajayaypa mandatuncunata cäsucushun (leiriy 1 Corintios 15:58). Chayno captinpis tantiacoj runacuna cananchi. Chayno carga manami shuyarashwanchu waquincuna noganchi yarpashganchino y rurashganchino imatapis rurananpaj (Sant. 3:17). Jina manami nishunchu ‘cayta wacta ama ruraychu’, ni ‘gampitachä canga ruranayquipaj o manapis’ nir. Canan yachacushun imacunachotaj Jehovata mana guelanaypa jucla cäsucunanchi. Jina yachacushun imata Satanás ruraycan Jehovata mana cäsucunapaj y sinchi runa mana canapaj.

3. ¿Imacunachotaj mana guelanaypa Jehovata cäsucushwan Hechos 15:28, 29 nishganno?

³ Jehová Diosnilanchimi leycunata gomanchi, payga pipitapis más autoridäyoj caycan y leynincuna cawayninchicho alapami yanapämanchi (Is. 33:22). Hechos 15:28, 29 (leiriy)  textucunacho wilacun imacunachotaj mana guelanaypa Jehovata jucla cäsucushwan. Chaychoga nin: juc, Jehovalata aduranapaj y mana idulucunataga; ishcay, yawarta mana micunapaj ni churacunapäpis y quimsa, majanchilawan cacunapaj y manaraj casaracushga carga piwanpis mana punucunapaj. Chaycunata cäsucurga, ricacämun Jehovata shongupita cuyashganchita. Pero, ¿imanotaj canan wichan chaycunata cäsucushwan?

4. Jehovalata adurarga, ¿imacunataj mana rurashwanchu? (Apocalipsis 4:11).

⁴ Jehovalata adurashwan, idulucunataga mana. Quiquin Jehová israelitacunata nergan paylata adurananpaj (Deut. 5:6-10). Jesuspis Diabluta nergan Jehovalata adurananchipaj (Mat. 4:8-10). Chaymi noganchipis idulucunata y santucunatapis aduranchichu, ni naupanmanpis gongurpacunchichu. Jina pushacoj religiosucunata, politicucunata, puclaj, cantaj y actuaj runacunatapis dioscunatano ricanchichu. Chaypa trucanga, shongupita decidido caycanchi, Camacojninchi Jehová Dioslata aduranapaj (leiriy Apocalipsis 4:11).

5. ¿Imanirtaj yawarta y cawayta alapa valejtano ricashwan?

⁵ Yawarta y cawayta alapa valejtano ricashwan. Levítico 17:14 textucho Jehová nin: “Lapan kawaqkunapaqa yawarninchömi vïdan kaykan”. Aumi, cawayga cuyaylapaj regalo Jehovapita caycan. Unaycho Noeta y familianta uywacunata micunanpaj Jehová niptin, ‘yawartashga aychata ichanga ama micunquichu’ nergan (Gén. 9:4). Tiempuwan yapaymi israelitacunatapis yarpächergan yawarta mana micunanpaj (Lev. 17:10). Apostulcuna cawashgan wichanpis cristianucunata pushaj cajcuna mandargan yawarta mana micunanpaj (Hech. 15:28, 29). Canan wichan noganchipis yawarpita Jehová ima nishganta cäsucunchimi. b

6. ¿Jehovata mana laquichinapaj imataj rurashwan?

⁶ ‘Majayquilawan cacunquiman’ Jehová nishganta imaypis cäsucushwan (Heb. 13:4). Apóstol Pabluga cristianucunata consejashgancho nergan ‘shonguyqui mana alicunata munashganta ama ruraychu’. Chaywanga niycämanchi fornicación o jucha rurayman chayachicoj ganra ruraycunata mana ricänapaj ni wiyanapäpis, fácil mana captinpis calpachacunanchimi (Col. 3:5; Job 31:1). Jina Jehovata mana laquichiyta munarga cuidacunanchi imaman yarpashganchicuna y rurashganchicunatapis; ilajpita mana ali yarpaycuna chayamuptenga jucla ilgächishwan.

7. ¿Imataj ruranapaj calpachacushwan, y imanir?

⁷ Lapan shongunchiwan payta cäsucunapaj Jehová munan (Rom. 6:17). Leynincunaga bienninchipämi caycan, chaymi juc ishcaylataga cäsucushwanchu, sinoga lapantami cäsucunanchi (Is. 48:17, 18; 1 Cor. 6:9, 10). Chayta rurarga, unaycho juc salmista nishganno, nishun: “Lapan shonqüwanmi estatütuykikunata [o mandatuyquicunata] cumpliyta munaykä. Wanunäyaqmi imaypis cäsukushaq”. Payno Jehovata cushichiyta munanchi (Sal. 119:112). Cay salmistano ruranapaj calpachacurpis, Satanás imaycacunata ruranga mana alicunaman o juchaman ishquichimänanchipaj. ¿Imanotaj chayta ruran?

8. Satanás chiquimashpanchi, ¿imatataj ruran?

⁸ Chiquimashpanchi nacachimanchimi. Satanasga munan Jehovawan manana amigo  cananchipaj, chaymi tucuynopa nacachimanchi; payga yargashga liunno puricachaycan (1 Ped. 5:8). Unaychopis cristianucunata chiquicoj runacuna jurapayparaj magargan y wanucherganpis (Hech. 5:27, 28, 40; 7:54-60). Canan wichanpis Rusiacho y may chay naciuncunacho caycaj hermanunchicunata chiquicoj runacuna pasaypa nacarcaycächin, y chay lapanpita guepanchoga Satanás caycan. 

9. ¿Imanirtaj Robert hermanuga manami ishquirganchu Satanás churashgan trampaman?

⁹ Mana ricacaj trampacunata Satanás churapämanchi. Efesios 6:11 textucho tantiachimanchi mana ricacaj trampacunawan Satanás engañamänanchita munashganta. Robert jutiyoj hermanunchipita parlarcushun, payga hospitalcho caycaj doctorcunata nergan yawarniynajla operacunanpaj. Doctorna nergan ‘aumi chayno rurashaj’. Ichanga familiancuna hospitalpita aywacäriptin, juc caj doctorga nergan ‘yawarta mana churashuptiquipis, alichi canman amänula chararänayquipaj necesitaptiqui’. Payga yarparganchi familian manana caycaptin yawarta churananpaj. Ichanga Robert hermanuga nergan ‘¡ima pasaptinpis, yawartaga manami churacushächu!’.

10. ¿Imanirtaj mana ali canman Diosta mana cäsucoj runano yarpaptinchi? (1 Corintios 3:19, 20).

¹⁰ Diosta mana cäsucoj runacunano yarpänapaj shacyächimanchi. Paycunano yarpar galaycuptinchega Jehovapa contranman churacuycashwanchi (leiriy 1 Corintios 3:19, 20). Diosta mana chasquicoj runacuna yachaj cashganga shongun munashgalanta rurar cawapäcun. Chaynomi pasargan Pérgamo y Tiatira congregaciuncho caycajcunawan. Runacunaga jucwan jucwan punucärej y idulucunatapis adurapäcoj. Chayta ricaycur waquin cristianucunapis chayno rurayta galaycärergan. Chaymi Jesusga paycunata anyapargan chay ruraycunata jaguirinanpaj (Apoc. 2:14, 20). Canan wichan runacunapis paycunano yarpar lutancunata ruranapaj munan. Maygan castanchicuna o amigunchipis öraga ‘shonguyqui munashganta ruranquiman’ nir shimita jatipämanchi Diospa leynincunata mana cäsucunapaj. Paycunaga yarpapäcun shongunchi munashganta rurar cawacunapaj y Biblia yachachicushganga canan wichanpäno mana cashganta.

11. ¿Imanirtaj ninchi quiquinchicuna yarpashganchita rurayga mana ali cashganta?

¹¹ Jesuspa tiempuncho pushacoj religiosucunaga Ley nishganta quiquincuna yarpashgancunawan talurcachir yachachicärej, chayga runacunapäga sasami cargan cäsucärinanpaj (Mat. 23:4). Öraga noganchipis Jehovapa marcanpita maygan wilacuycunata chasquicur shumaj mana tantiarcurga, capaz Bibliacho nishganta yapapaycur quiquinchi munashganchita rurayta munashwan (1 Cor. 4:6). Ichanga Bibliacho niycashganpita yapapaycur-raj mana yachachicunapaj, ni quiquinchi yarpashganchicunata mana ruranapaj, Jehovaga Palabranwan y pushacoj hermanucunawanpis shumaj tantiachimanchi imacunata ruranapaj (Prov. 3:5-7).

12. ¿Imacunawantaj Satanasga runacunata pantacaycächin?

¹² Apostulcuna cawashgan wichan waquin runacunaga quiquincuna yarpashgancunapita yachachicärej, manami Biblia nishganpitachu. Jina cristianucunatapis creichiyta munapäcurgan unay Ley nishganta lapanta cäsucärinanpaj, chay lapancunapita guepancho Satanás caycargan. Payga mana munarganchu runacuna Jehovapita rasunpa cajta yachacärinanpaj. Cananpis Satanasga luta yachachicuycunawan  runacunata pantacaycächin jaucala mana cawacunanpaj (Col. 2:8). Chaytaga ruran internetcho, televisiuncho o radiucho yargamoj luta wilacuycunawan. Chaytaga ricashcanchi COVID-19 gueshya wichancho. c Ichanga Jehovapa testiguncunaga yäracuypaj pushacoj hermanucuna nishganta cäsucur jaucala carcaycargan (Mat. 24:45).

13. ¿Imacunaraj tiempunchita ograchimashwan y imanirtaj chaycunaga mana ali canman?

¹³ Micunapaj, upunapaj, puclanapaj y arunapaj ruraycuna alino captinpis, chaycunalaman jatiräcurga mana alimanpis chayashwanchi (Luc. 21:34, 35). Chaycunaga tiempunchita ograchimashwan ali ruraycunata ruranapaj, chaymi Bibliacho nimanchi más alinnin caj ruraycunata puntaman churanapaj (Filip. 1:9, 10). Televisiuncho o radiupa politicucuna rimanacushgancunataga ricashwanchu ni wiyashwanchu. ¿Imanir? Chaycunalata ricaycurga shongulanchicho mayganlatapis yanapacuyta munashwanchi. Canancama ricashcanchi imanomi Satanás pantachimänanchita munan ali cajcunata mana ruranapaj. Canan ricärishun imacunata rurashwan chaycunaman mana ishquinapaj.

14. ¿Imacunaraj yanapämäshun Jehovalata sirvir caycänapaj?

¹⁴ Yarpänanchi Jehovalata sirvinapaj aunishganchiman. Yarpanquichi ichic ichiclapa Jehovapita yachacur, payta Taytayquitano ricar, jina respetar cuyaytapis galaycushcanqui. Chaypitapis payman yäracur juchayquicunapita arrepenticushcanqui y Jehová chiquishgan ruraycunataga rurayta jaguishcanquinami. Jehová perdunashushgayquita ricaycurga cushicushcanquichi (Sal. 32:1, 2). Nircur lapan reuniuncunaman aywanayquipaj y yachacushgayquipita waquincunata parlapänayquipaj calpachacushcanquimi. Cananga bautizashgana cristiano caycar cawayman apacoj nänicho caycanqui y chaypita yargucuyta manami munanquichu (Mat. 7:13, 14).

15. ¿Imanotaj yanapämanchi Diospa palabranta estudiaptinchi y yachacushganchiman yarpachacuptinchi?

 ¹⁵ Juc árbol winashganman tupu sapincunapis may chaypa mashtacan y más racuman ticraycun, chayno captenga imapis tunichinchu. Chaynolami ali yäracoj runa canapäga canga Diospa palabranta estudiaptinchi y yachacushganchiman yarpachacuptinchi, chayga yanapämäshun más convencido caycänapaj Bibliacho caycaj consejucunaga bienninchipaj cashganta (Col. 2:6, 7). Jina yarpachacunanchi unay Diospa sirvejnincuna Jehovapa consejuncunata y leynincunata cäsucur imano bienninpämi cashganta. Ezequielga juc visiuncho ricaycurgan juc ángel templuta tupuycashganta, pay ricashganga manami yäracuyninlatachu sinchiyächergan, sinoga noganchitapis yachachimanchi Jehovapa leynincunata respetanapaj pay munashganno aduranapaj (Ezeq. 40:1-4; 43:10-12). d Noganchipis tiempunchita raquiptinchi Bibliata estudianapaj y yachacushganchiman yarpachacunapaj cawayninchicho alapa yanapämäshun.

16. ¿Imataj Robert hermanuga rurargan Jehovaman lapan shongunwan yäracushganpita? (Salmo 112:7).

¹⁶ Davidga yarpaylapis yarparganchu Jehovata cachaycunanpaj, chaymi juc canciuncho payta nergan: “Lapan shonqüwanmi qamta alabashayki” (Sal. 57:7). Noganchipapis lapan shongunchega Jehovalapämi canman (leiriy Salmo 112:7). ¿Imataj Robert jutiyoj cristianuga rurargan Jehovaman lapan shongunwan yäracushganpita? Payga doctorcunata nergan yawarta churayta munaptenga jucla aywacunanpaj. Robert cayno nin: “Yarpaylapis yarpargächu yawarta churacunäpaj, ni yarpargäpischu imata pasamänanpaj cajta”.

17. ¿Imataj yachacunchi Robert rurashganpita? (Fotucunatapis ricay).

¹⁷ Robert hermanuga shongupita pacha munargan Jehovata cushichiyta. Chaymi Bibliacho y waquin publicaciuncunachopis shumaj yachacurgan Jehová ima nishganta yawarpita y cawaypita. Payga manami shuyararganchu hospitalchoraj captin chaypita yachacunanpaj. Payga yäracurganmi Jehová  bendicinanpaj cajta leynincunata cäsucuptin. Noganchipis lapan shongunchiwan Jehovaman yäracunanchi ima pruebacuna captinpis.

18. ¿Imataj yachacunchi Baracpita? (Garancho caycaj dibujuta ricäriy).

¹⁸ Diospa sirvejnin Barac Jehovata lapancho cäsucuptin chiquejnincunata vencirgan. Chay wichan israelitacunapaga imaycancunapis manami carganchu peliapäcunanpaj. Chayno captinpis Jehovaga Baracta nergan Sisarapa soldaduncunawan peliapäcunanpaj (Juec. 5:8). Paycunaga ali camaricushga carcaycargan. Jehovaga Baracta nergan Tabor jircapita urämunanpaj Cisón pampaman, chaycho Sísara 900 carretancunawan shuyarpaycargan. Chay pampacho Sísara carretancunawan vencinanpaj cajta musyarpis, Baracga Jehovata cäsucurganmi. Paywan soldaduncuna uraycämuptin, Jehová locu tamyata tamyachimurgan, chaura Sisarapa carretancunaga mitucho tunir y jaticar galaycurgan. Chayno Jehová Baracta yanapargan vencinanpaj (Juec. 4:1-7, 10, 13-16). Noganchitapis Jehová yanapämashwanmi payman lapan shongunchiwan yäracuptinchi y lapan nimashganchicunata cäsucuptinchi (Deut. 31:6).

19. ¿Imanirtaj Jehovalata mana cachaypa sirviyta munanqui?

¹⁹ Mushoj mundo chayamunancama, calpachacuycäshunla imapis Jehovapita mana raquicächimänanchipaj (1 Tim. 6:11, 12; 2 Ped. 3:17). Chaymi chiquishga captinchipis o imayca yarpachacuycunawan caycarpis Jehovalata sirvishwan. Cuidacunanchi luta yachachicuycunapita, runacuna imano yarpashgancunapita y tiempunchita ograchimänanchita ruraycunapitapis (Efes. 4:14). Jehovata shongupita cuyar nimashganchicunata imaypis cäsucushun y ali shongu runacunapis cashun. Gatejnin yachacuycho ricaycushun imanotaj Jehovawan Jesusga pipitapis más ali shongu capäcushganta y imataj paycunapita yachacunchi.