1. Runacuna imata rurapäcunanpaj tapucäriptin, ¿imatataj Jesuspa gatejnincuna nipäcurgan?

MAY chay marcacunapitami Jerusalenman shapäcamurgan achca runacuna. Chaychomi judiucunaga ilajpita shamojcunapa idiomancuna parlar galaycärirgan. Chayno captinpis chay junajga mana gongaypaj cargan judiucuna imata parlapäcushgan y Pedrupis imata wilacamushganmi. Ima wilacamushganga cargan pipis Jesusman yaracur-raj salvacunanpaj cajta. Chayta wiyarga shonguncunaga cuyurcurganrämi, chaymi cayno tapupäcurgan: “Cananga ¿imataraj ruräman?”. Chaynami Pedro cayno nergan: ‘Arrepinticur bautisacuy’ (Hech. 2:37, 38).

2. ¿Imapitataj canan yachacurishun? (Garancho caycaj fotuta ricay).

² Chay junajga 3.000 runacuna bautizacärirgan y Jesusta gatir galaycärirgan, piraj gongaycunman chay junajta. Chaychoga, Jesús mandacamushganmi pasaycargan y galaycunalanmi cargan, cananyajpis chaytaga ricaycanchimi. Canan wichanga manami pipis juc junajlacho bautizacunchu, öraga achca quillacunaraj o wataraj pasanan bautizacunanpäga. Pilatapis ilajpita yachaycächerga calpachacunanchirämi bautismuman chayananpäga. Canan yachacurishun imacunatataj rurashwan Bibliata estudiaycajcuna bautizacärinanpaj.

3. Mateo 28:19, 20 textucuna wilacushganno, ¿imatataj Bibliapita yachacuycajcuna rurapäcunman bautizacärinanpaj?

³ Manaraj bautizacurga estudianticunaga Biblia yachacuycashganno cawaycanmanna (leiriy Mateo 28:19, 20).  Casucoj cashpanga Jesús wilacushganno ali tantiaj runa canga, ali cimientush wasinta sharcachej runano (Mat. 7:24, 25; Luc. 6:47, 48). Estudianticunataga yanapaycushwanrämi pogunanpaj. Imano cananpaj mä quimsata ricaycushun.

4. ¿Imanotaj estudianticunata yanapashwan calpachacur bautismuman chayananpaj? (“ Estudianticuna imata rurananpaj tantiarcachinapaj” recuadruta ricay).

⁴ Bibliapita yachacuycajcunaga shumajmi musyapäcunman imacunata rurananpaj. ¿Imanirtaj cayga ali canga? Mä tantiarcushun, pipis japaylapa juc marcaman aywarga öraga ricachacunapaj patacunachomi jamapärin shumaj ricachacunanpaj, chayno aywaycar cuentata gocunanpäga mayna mayman aywashganmanpis chayarcunna. Chaynolami estudianticunapis ichiclapa ichiclapa calpachacuptenga cuentata gocunanpäga mayna bautismumanpis chayaycanmanna. Cushishgala imaypis cawanapaj librucho caycan juc recuadro “Ruranayquipaj” nishgan, caywanpis yanapashwanmi estudianticunata. Nircurga quiquinna cuentata gocunga yachacushgancuna imano yanapanga, ima rurayta munashgantapis. Ichic masraj rurananpaj captenga “Jucta ruranayquipaj” nishgancho escribimunanpaj wilapashwan. Jinamanpis aliga canman estudianticunata niptinchi ‘caytaga rurashcanquina, caylana pishiycäshunqui’ nir.

5. Marcos 10:17-22 textucuna wilacushganno, ¿imatataj rico runata Jesús nergan y imanir?

⁵ Estudianticunataga yanapänanchirämi jucnopa cawar galaycunanpaj (leiriy Marcos 10:17-22). Jesusga juc rico runata nergan imaycancunata ranticunanpaj, cayga sasachi cargan chay runapaj (Mar. 10:23). Chay runata cuyapashpanmi  Jesús chayno nergan. Öraga manchacushwanmi estudianticunata cayno wilapayta ‘cawayniquicho pishiycanraj caycho aliyarcunayquipaj’ nir. Chayno captinpis paycunapäga sasarämi canga cambiucunata rurananpaj (Col. 3:9, 10). Imalachopis aliyarcunanpaj jucla wilapaptinchega alimi canga, chayno rurashganchiwanga cuyapaycanchimi paycunata (Sal. 141:5; Prov. 27:17).

6. ¿Imanirtaj tapupaycur tapupaycur-raj yachachicunanchi?

⁶ Estudianticunataga tapupaycur tapupaycurmi yachachishwan. Chaynopa musyashun ima tantiashganta y ima yarpashgantapis. Nircurpis paycunaga ima yarpachacächishgantapis wilapämäshunmi. Cushishgala imaypis cawanapaj libruchoga chayno achca tapucuycuna caycan. Chusco caj yachachicuycho nin: “¿Jehová cushicunchuraj jutinpa gayacuptiqui?”. Isgun cajchopis nin: “¿Imapitaraj Diosta mañacunquiman?”. Cayno tapucuyta ruraparga öraga waquin estudianticuna manami jucla tantiaringarächu, chayno captenga shuyarcunanchiraj. Yanapänapäpis chaycho caycan yurimoj textucuna y dibujucunapis.

7. Pilapis imacunapa pasashganta, ¿imanirtaj wilapashwan estudianticunata?

⁷ Yachachishganchita estudianticuna tantiariptinnaga, ali canga waquincuna pasashgantapis wilapaptinchi. Jehovaga cuyaycalämanmi nishgan videupis caycan ricächinapaj, cayga caycan 14 caj yachachicuycho, “Maslata yachacunayquipaj nishgancho”; alimi yanapacunga reuniunman aywananpaj. Cushishgala imaypis cawanapaj librunchicho caycaj “Shumaj yachacurcunapaj” y “Maslata yachacunayquipaj” nishganchomi yurimun. * Ichanga cayta ama nishunchu estudianticunata: “Payga mayna rurashga, gampis ruranquimi”. Quiquilancunami cuentata gocunga imacunata yachacushganta. Videucho yargamojcunata ima yanapashganta o Bibliapa maygan consejupis yanapashganta wilapäshun. Cutin cutinpis nishwanmi Jehová imano yanapacushganta.

8. ¿Imanotaj estudianticunata yanapashwan Jehovata cuyar galaycunanpaj?

⁸ Bibliapita yachacuycajcunata yanapäshun Jehovata cuyananpaj. Taytanchi Jehová imano cashganpitaga cutin cutinmi parlapaycashwan. Jehovaga cuyapäcoj y cushishgala cawacoj Diosmi, chaytapis ricanmanmi estudianticuna (1 Tim. 1:11; Heb. 11:6). Tantiarcächishun casucoj cashpan cawayninpis imano aliyarcunanpaj y Jehová cuyacoj cashpan imano pushananpaj cajtapis (Is. 48:17, 18). Paycuna Jehovata cuyarga ‘payraycur ali cajtana rurar galaycushaj’ nipäcungami (1 Juan 5:3).

9. Marcos 10:29, 30 textucuna wilacushganno, ¿ima bendiciunman yarpartaj pipis bautismuman chayanga?

⁹ Maygan estudiantipis bautizacunanpäga calpachacunanrämi. Chay rico runata Jesús nishgannopis waquin estudianticunaga imaycatarämi rurapäcunman Diosta cushichinanpaj. Maycho arunanpaj, piwan juntacananpaj shumajraj yarpachacunan. Familianpis chiquipar galaycuptenga  calpachacunanrämi Diosta mana jaguinanpaj, waquincunapäga sasa caycuna canman. Pero Jesusga mayna wilacurgan Taytalanchi Jehová espiritual caj familiata goycalämänanchipaj (leiriy Marcos 10:29, 30). Chauras, ¿imanotaj estudianticunaga cawaynincho cushicurcunman chayman yarpar?

10. ¿Imatataj yachacunchi Manuel wilacushganpita?

¹⁰ Estudianticunawanga amigucunano ricanacushwan. Paycunapaj yarpachacushganchega rurayninchichomi ricacämunman. ¿Imanir? México naciunpita Manuel jutiyoj wawgui, Bibliata yachacushgan wichanman yarpar cayno wilacun: “Yachachimaj wawguiga, manaräpis estudiar, tapupämajrämi imano caycashgäta. Chay horaga cushi cushilami imatapis wilapaj cä. Cuyamashganga ricacämojmi”.

11. ¿Imanirtaj ali canman estudianticunawan juntu juntula caycänapaj calpachacuptinchi?

¹¹ Gatejnincunawan Jesús rurashgannola noganchipis estudiantinchicunawan juntu juntula caycäshun (Juan 3:22). Calpachacuycashganta ricarga wasinchiman shacamunanpäpis nishwanmi, imalatapis micupacurishwanmi; JW Broadcasting^® programapis caycan paycunawan ricapacunapaj. Waquincunaga fiestacuna ruracashgan wichan japalancunala ricacunman, chauras alichi canman ‘wasëman shacamuy’ paycunata niptinchi. Uganda naciunpita Kazibwe jutiyoj wawgui cayno wilacun: “Tayta Jehovapita y Bibliapitapis imaycatami yachacurgä, yachachimaj wawguiwan juntula imatapis rurapäcushgäraycur. Jehovaga cuyanmi sirvejnincunata, chaytapis ricargämi. Chauras nergä ‘nogatapis cuyamangami’”.

12. Estudianticunata watucanapäga, ¿imanirtaj ali canman jucwan jucwan yanagänacur aywaptinchi?

¹² Estudianticunata watucänapaj jucta jucta nishun yanagämänanchipaj. Öraga  ‘japalä estudiantïta watucacushaj’ nishwan, chayno captinpis alapa ali canga jucta jucta pushacurcur watucaptinchi. Moldaviapita wawguinchi Dimitri cayno nin: “Yachachimajnë wawguiga jucwan jucwan yanagänacurmi shamoj, chayno captinmi mastaraj noga yachacoj cä, imatapis shumaj tantiarej cä. Reuniunman aywashgä junajpis mayna reguinacurgä waquincunawan”.

13. ¿Imanirtaj estudianticunata cada cadala nishwan reuniunman shacamunanpaj?

¹³ Reuniuncunaman shacäramunanpaj yanapäshun. ¿Imanirtaj chayga ali canga? Jehová mandacushga captin y payta reuniuncho adurashpanchimi (Heb. 10:24, 25). Chaychomi tarenga espiritual caj familiantapis. Lapanchicuna reuniuncho carga, familiacho cushi cushila micupacurishganchi japuymi caycan. Reuniunman shacamunanpaj yanaparga bautismuman chayananpämi yanapacuycanchi. Chayno calpachacuptinpis bautizacuyta mana puedirga Cushishgala imaypis cawanapaj nishgan librumi yanaparcunga, ¿imano?

14. ¿Imatataj rurashwan estudianticuna reuniunman shacamunanpaj?

¹⁴ Cushishgala imaypis cawanapaj librucho 10 caj yachachicuyninchomi caycan estudianticunata yanapänapaj reuniunman shamunanpaj. Cay libro manaraj jorgacämuptinmi mayna waquin publicadurcuna yachachicärish cay libruwan, y alapa ali cashgantami nipäcun. Galaycunanlachonami estudianticunata nishwan reuniunman aywar shumaj yachacunanpaj, cutin cutinpis nishwanmi chaytaga. Estudianticunapa cawaynincunaga öraga jucno jucnomi canman, chaymi jucnin jucninpaj shumaj yarpachacurcur yanapashwan. Reuniunman jucla mana shamuptinpis laquicuycäshunchu, shamungapämi, shuyaraycäshunla.

15. ¿Imacunapitataj estudianticuna manchacärinman?

¹⁵ Mayraj noganchipis manchacushcanchi Jehovapa testigunmanna ticranapaj caycaptinchi. Ichanga yarpachacushcanchi ‘imanotaj wasin wasin yachachicushaj’ nir; masraj familianchipis contranchicho ticracuriptin. Imapa pasashganchiman yarpachacurga musyashunmi estudianticunata imano yanapayta. Jesusga mayna wilacurgan öraga chaycuna manchachimänanchipaj, pero payga gatejnincunata nergan manchacuycarla mana cacärinanpaj, chaypa trucan Diosta sirvir caycänapaj (Mat. 10:16, 17, 27, 28). ¿Imanotaj paycunata Jesús yanapacurgan? Y ¿paynola noganchipis imatataj rurashwan?

16. ¿Imanotaj estudianticunata yanapashwan paycunapis waquincunata Diospita parlapänanpaj?

¹⁶ Yachacuycashganta waquincunata parlapänanpaj yachachishun. Discipulucunaga ichic manchacärirganchi predicaj aywapäcunanpaj Jesús mandaptin. Ichanga cushicärirganna maycho y imapita parlananpaj Jesús yachachiptin (Mat. 10:5-7). ¿Jesusnola rurashwanchuraj? Awmi, noganchipis wilapashwanmi maycho yachachicunanpaj. Tapupashwanmi pilawanpis reguinacushganta, imano paycunapis Diospita yachacurcunanpaj. Nircurpis nishwan ‘caynomi Bibliapita parlapänayqui, caynomi facil-la tantiachinayqui’. Mastaraj yanapänapaj caycan, naga parlashganchi librunchicho, “Waquincuna nipäcun” y “Waquincuna tapucärin” nishgancuna. Jinamanpis alapa  ali canga Bibliawan shumaj imaypis yachachicunanpaj musyachiptinchega.

17. ¿Imanotaj Mateo 10:19, 20, 29-31 textuwan estudianticunata yanapashwan Jehovaman yaracärinanpaj?

¹⁷ Jehovaman yaracunanpaj yanapäshun. Gatejnincunatami Jesusga nergan paycunata cuyashpan Jehová yanapänanpaj (leiriy Mateo 10:19, 20, 29-31). Yarpächishun paycunawan Jehová cushish caycashganta. Mañacuptinchipis imano calpachacuycashganta Jehovata wilapashwan. Poloniapita Franciszek wawgui cayno nin: “Yachachimaj wawgui mañacuptenga, nogapitami mañacurej calpachacushgäta Dios bendicinanpaj. Jehovaga wiyajmi mañacushganta, chaymi nogapis mañacur galaycoj cä. Asambleäta y reuniunnëcunatapis mana ogranäpaj yarpämi Jehová imano yanapämashganta”.

18. ¿Imanoraj Jehová caycan estudianticunaraycur imaycata ruraptinchi?

¹⁸ ¿Y canan hora pilatapis Bibliapita mana yachaycächerga? Caycanraj waquincunapa estudiantincunata yanapänapaj. ¿Imanotaj rurashwan? Waquin hermanucunata yanagaycurmi. Alimi ricaycanchi, estudianticunataga Jehová alapami cuyan. Yanapacoj cashganchipitapis Jehovaga cuyaycalämanchimi noganchicunatapis (Is. 52:7).