1. ¿Imanirtaj waquincunaga ‘japalämi ricacö’ nipäcunman?

ÖRAGA lapanchipis laquicuycar ‘japalämi ricacö’ nishwanmi, waquincunaga punuytapis tarinmanchu chayraycur. Jina achca runacuna rurincho caycarpis pipis laquishgala caycanman. O mushoj congregaciunman chayashga carga manami jucla yachacanchu. Waquincunapis juc marcapa aywacushga carga familianta laquipar japalanna ricacun. Wanupacushga carpis laquesa manami ilacanchu shonguncunapita. Chaylaraj bautizacushga cajcunapis familiancuna y unay amiguncuna contrancho churacashganraycur pasaypa laquicärin.

2. ¿Imacunapitataj canan yachacushun?

² Jehovaga musyanmi lapancho imano caycashganchita, imaraycur shongunchi nanashgantapis ricaycanmi y yanapämananchita munan. Cay tapucuycunami canan yachacunapaj caycan: ¿Imanotaj Jehová yanapämäshun ‘japalämi ricacö’ nerga?, ¿imatataj rurashwan laquesalawan caycarga? y chaycunapa hermanunchicuna pasaptenga, ¿imanotaj yanaparcushwan?

3. ¿Imatataj Jehová rurargan Eliasta yanapänanpaj?

³ Noganchipaj yarpachacurmi Jehovaga aliyänanchita munan. Juc taytano ladunchicho caycarmi shongunchi imaraycur nanaycashganta musyan (Sal. 145:18, 19). Profeta Eliasta imano yanapashganpita ricaycushun. Eliasga ricarganmi Israel marca pasaypa mana alicunapa pasashganta.  Chiquicoj runacunaga imanopapis wanuchiytami munapäcurgan Diosta sirvejcunata, Eliastapis mayna ashiycarganna (1 Rey. 19:1, 2). ‘Nogalanami Diospa protefan caycä’ nirmi payga yarpachacur laquicurgan (1 Rey. 19:10). Jinan hora Taytalanchi Jehovaga angelninwan wilachicurgan japalanla mana caycashganta; awmi, Diospa sirvejnincunaga caycashgarämi chay marcacho (1 Rey. 19:5, 18).

4. Familianchicuna noganchipita witicushga carga, ¿imatataj Jehová tantiachimanchi Marcos 10:29, 30 textucunacho?

⁴ Jehovaga musyanmi payraycur imaycata rurashganchita. Öraga Diosta sirvishganchiraycur ichanga familianchipis noganchipita witicärishga. Juc cutichomi Pedrupis cayno Jesusta tapurgan: “Tayta, nogacunaga llapan ima-aycätapis cachaycurmi gamta gatirpaycä. ¿Imataraj nogacunaga chasquishaj?” (Mat. 19:27). Paycunata cuyapashpanmi Jesusga nergan waquin cristianucuna familian japuy cananpaj (leiriy Marcos 10:29, 30). Quiquin Tayta Jehovapis yanapacungami sirvejnincunata (Sal. 9:10). Ricarishun canan japalanchino ricacurga imanotaj Jehová yanapämashwan.

5. ¿Imanirtaj ali canga Jehová yanapämashganchiman yarpachacuptinchi?

⁵ Jehová imano yanapaycämashganchiman yarpäshun (Sal. 55:22). Chayta rurarga alapa manana laquicushunchu. Carol * jutiyoj cristiana (payga japalanmi familiancho Testigo can) cayno nin: “Nogataga alapa yanapämashga nacaycashgä hora Jehová maquinta goycalämashganman yarpachacushgämi. Cayga yarpächiman Jehová imaypis mana jaguirimänanpaj”.

6. ¿Imanotaj 1 Pedro 5:9, 10 textucunaga yanapanman laquishga caycajcunata?

⁶ Laquishga caycaj hermanucunata Jehová yanapaycashganta yarpäshun (leiriy 1 Pedro 5:9, 10). Hiroshi jutiyoj wawguiga  japalanshi familiancho Testigo caycan, paymi cayno nin: “Congregaciunchoga cada cadalami ricaycanchi pïcuna nacaycashganta. Jucninchi jucninchipis Jehovata sirvinapaj calpachacushganchita ricarga mananami japalä ricacönachu”.

7. Gampis mañacuptiquega, ¿yanapäshunquichu?

⁷ Jehovaman guelicur pay munashganta ruraycäshun. Alapa alimi canga shongunchita mashtapaycur Jehovata lapanta wilapaptinchi (1 Ped. 5:7). Massiel jutiyoj panipita parlarcushun, paytaga familianshi wasguiycurgan Diosta sirvir galaycuptin; paymi nin: “Japalä ricacushgä öraga lapan calpäwanmi Jehovata ruwacurgä. Diostaga taytätanomi ricargä. Lapanta wilaparmi cutin cutin paywan parlargä”.

8. ¿Imanotaj yanapäshunqui Bibliata leir y chayman yarpachacurga?

⁸ Bibliataga leicuycashwanmi, chaychoga ricaycäshunmi imano cuyacoj Jehová Diosninchi cashganta. Bianca jutiyoj paninchipitaga imaycatash familiancuna laquichir parlan, paymi cayno nin: “Bibliäta o waquin publicaciuncunata leirga noga pasashgätanomi tarë, chaycunami alapa yanapäman”. Waquin hermanucunapis valurcharcunanpaj umachicurcun cayno textucunata: Salmo 27:10 y Isaías 41:10. Waquinna reuniunnincunapaj alistacunanpaj o yachacuyta munarla Bibliapa grabaciunninta churaycun. Caycunash yanapan laquesapa pasaycashgan hora.

9. ¿Gampis ima ninquitaj reuniuncunacho cashgayquipita?

⁹ Lapan reuniunninchicunacho caycarga alimi canga, chaychomi hermanunchicunawan masraj reguinacur shacyächinacushun (Heb. 10:24, 25). Naga parlashganchi Massiel pani caytapis nin: “Manchacuycarpis lapan reuniunman aywanapämi calpachacurgä, öraga maquëtapis jogarcojmi cä. Chayta rurarga mananami japaläla ricacurgänachu”.

10. ¿Imanirtaj yaracoj hermanunchicunawan juntacashwan?

¹⁰ Yaracoj hermanunchicunawan juntacäshun. Ima edayoj captinpis, maypita captinpis ali canga paycunawan reguinacuptinchi. Bibliaga yarpächicun ‘mayurcunaga sumaj musyaj yachaj’ cashganta (Job 12:12). Ichanga mayor hermanucunapis yachacunmanmi mozucunapita, chaytaga musyanchi Davidwan Jonatán cuyanacärishganta ricarmi (1 Sam. 18:1). Nacaycunachopis, ishcanshi Jehovata sirvinanpaj  yanapanacärirgan (1 Sam. 23:16-18). Irina jutiyoj panipis japalanshi familiancho Testigo caycan, cayno nin: “Cristiano masinchicunaga taytanchino, aylunchino, legítimo hermanuno caycan. Quiquin Jehovami paycunata goycalämanchi”.

11. ¿Imata rurartaj ali amigucunata tarishun?

¹¹ Waquincunaga pipis parlapänantaraj shuyaranman piwanpis reguinacunanpäga. Chaypami pasargan Ratna jutiyoj pani, paytash chiquircärirgan Diosta sirvishganlapita. Paymi nin: “Manchacuycar japaläna ricacurga imanomi munaycurgä hermanucunawan juntacayta; y chayta rurargä”. Sasano captinpis, alimi canga imapa pasaycashganchita pilatapis wilapaptinchi, chayta rurarga amigucunatapis taririshwanmi y paycunaga musyanga imano yanapämänanchipäpis.

12. Diospita yachachicurga, ¿imanotaj waquincunawan masraj reguinacunchi?

¹² Diospita yachachicunapaj waquincunawan yanagänacurga amigunchimanpis ticracurinmanmi. Naga parlashganchi pani Carol nin: “Waquincunawan masraj reguinacushcä Diospita yachachicur purishgächo y payta sirvinapaj imayca rurashgächopis. Paycunawanmi Jehovaga alapa yanapaycalämashga”. Cushicuypämi yaracoj hermanucunawan juntacarga, imanomi yanapaycalämanchi laquicuy horacuna o japalanchi ricacuptinchipis (Prov. 17:17). 

13. ¿Imatataj jucninchi jucninchipis rurashwan?

¹³ Congregaciuncho jauca jaucala caycänapäga lapanchipitami canga (Juan 13:35). Chaymi tantiarcushwan imata parlaycanchi, imata ruraycanchi. Juc pani cayta nergan: “Diospita yachacushgä wichanga, legítimo familiä japuymi congregaciunnë ticracurirgan. Alapami yanapäcamargan Jehovapa testigunman ticranäpaj”. ¿Imatataj rurashwan japalanla Testigo cajcuna familianchi japuy congregaciuncho cananpaj?

14. ¿Imata rurartaj shacaycämojcunapa ali amigun cashwan?

¹⁴ Piwanpis ali amigo cashun. Congregaciuncho chaylaraj shacaycämojcunata cuyapaylapa chasquircushun (Rom. 15:7). Pero chaylachu manami canman, amigunchimanpis ticrananpaj calpachacushwanmi. Cuyapäcoj y paycunawan ali shongu cashganchipis alimi canga. Ichanga waquincunaga jucla wilapämäshunchu imacunapa pasashganta, chaymi alapa imatapis tapupaycashwanchu. Jina ali canga ali shimilanchiwan parlapaptinchi y parlapämashganchita wiyapaptinchi. ‘Imanotaj Jehovapa testigunman ticrashcanqui’ nirpis tapuparga alimi canga.

15. ¿Imanotaj pogushga hermanucuna congregaciuncho yanapacunman?

¹⁵ Pogushga cristianucuna o ancianucuna yanapacoj captenga, congregaciunpis alimi caycanga Diospa nawpancho. Melissa jutiyoj panitaga mamanshi yanapargan Diosta sirvinanpaj, paymi nin: “Imaypis gongashächu. Congregaciunchoga taytätanomi cuyacoj hermanucunata tarishcä. Imalatapis parlanäpaj captenga chaychomi carcaycan”. Mauricio wawguinchega japalanshi ricacurgan Bibliapita yachachejnin wawgui congregaciunpita  witicuptin, paymi nin: “Ancianucunaga alcabulami caycargan nogapaj. Mayna Bibliapita nogawan parlarcaycarganna, predicaycarganna y puclanapäpis apapäcamaycarganna”. Melissa panipis, Mauricio wawguipis lapan tiempunwanmi Diosta sirvircaycashga.

16, 17. ¿Imacunata rurartaj waquin hermanunchicunata yanapashwan?

¹⁶ Ganas ganasla yanapacushun (Gál. 6:10). Caru marcacho misioneruno yanapacoj wawgui Leo, cayno nin: “Imanomi cushicurcunchi pilapis ali shongulanwan yanapaycushuptiqui. Juc cuticho yarpä carrüwan caycar ichiclapa mana wanushgäta. Chaypitaga manchacashgami caycargä. Chayno caycaptëmi juc matrimonio wasinman aywanäpaj gayacaycamargan. Chay junaj ima garaycamashgantaga manami yarpächu, ichanga cuyapaylapa wiyapämashgantaga manami imaypis gongashächu. Laquishga caycashgäpita cushicurcurgä”.

¹⁷ Asambleanchicunacho lapanchi juntacarga cushi cushila parlapacurirmi pasarinchi. Pero naga parlashganchi Carol pani caytapis wilacun: “Cushicunäpaj trucanga laquishgalami asambleacho ricacö. Pï mayta chaycho ricä familiancunawan caycashganta, ichanga nogaga japalämi ricacö”. Waquincunapis nacaytarä asambleaman aywapäcun warminpis o runanpis wanushganraycur. ¿Pilapis chaypa pasaycajta ricashcanquichu? ¿Manachuraj ali canman asambleaman aywanapäna caycar ‘nogacunawan junto aywashun’ niptinchi?

18. ¿Imanotaj 2 Corintios 6:11-13 textucuna yanapämashwan piwanpis ali shongu canapaj?

¹⁸ Tiemputa camacächishun paycunawan caycänapaj. Japalanla ricacojcunata o waquin hermanucunatapis nircushwan imalatapis junto rurarinapaj. Shongunchega lapanpämi canman, masraj laquishga caycajcunapaj (leiriy 2 Corintios 6:11-13). Naga parlashganchi Melissa pani cayta yarpan: “Cushicuypämi cargan waquincuna ‘wasëman shacamuy, pasiapacoj  aywashun’ nimaptenga”. ¿Congregaciunninchichoga pilatapis puncunchita quichapashwanchuraj?

19. ¿Imacuna captintaj laquishga caycajcunawan juntula caycäshun?

¹⁹ Yarpachacushwanmi watacho ima junaj laquishga caycajcunawan wasinchicho junto caycänapaj. Öraga fiesta wichancuna sasa ticracurinman familiancho japalanla Diospa sirvej hermanucunapaj. Waquincunana laquicärin castanpaj yarpachacur, ima junaj wanushgan chayarcamuptin. Cayno hermanunchicunataga laquiparmi yanaparcushwan (Filip. 2:20).

20. Japalanchila laquishga caycarga, ¿imanotaj Mateo 12:48-50 textucuna yanaparcamäshun?

²⁰ Imaycacunapis caycanmanrämi waquincuna laquishgala o japalanla ricacunanpaj. Pero Taytalanchi Jehová musyanmi imano caycashganchita. Payga yanapämanchimi ali shongu hermanucunata goycalämashpanchi (leiriy Mateo 12:48-50). Chaypitaga ‘gracias’ nishwanmi lapan hermanunchicunata yanapänapaj calpachacur. Imano caycarpis, imawan nacarpis Jehovaga ladulanchichomi imaypis caycanga.